Roma 9 - O Novo Testamento na língua Kaingáng

Topẽ tỹ Judeu ag kuprẽg

¹ Nén ũ tó sór inh mũ gé, ha mẽ. Cristo vỹ ki kanhró nĩ, sỹ tónh ke mũ tag. Sỹ ke há vẽ, ón tũ sóg nĩgtĩ, kỹ Topẽ kuprĩg vỹ inh mỹ: “ki hã ã tóg tó,” he tĩ gé.

^2-3 Ha mẽ, inh mré ke ag to sóg fe kaj tãvĩ nĩ, Judeu ag to, ag tỹ Jesus kato tẽn kỹ. Fỹ sóg tĩ, sỹ ag mĩ ẽkrén kỹ. Inh mỹ tóg vẽnh kaga jagy ri ke nĩ, ha mẽ. Kỹ tóg Topẽ tỹ ag jagfy inh kato tẽ ra inh mỹ há tĩ vẽ. Ti tỹ ag jagfy isỹ tỹ Cristo mré ke tũ han ra tóg inh mỹ há tĩ vẽ. Tỹ ag tóg inh kanhkã pẽ nỹtĩ,

⁴ isỹ tỹ ag mré Judeu nĩn kỹ. Tỹ ag tóg Topẽ krẽ ja nỹtĩ vẽ, ti tỹ ag kuprẽg kỹ. Kỹ tóg ag mỹ ti jykre tar ven ja nĩ gé. Ag mré tóg vẽjykre tỹ hẽn ri ke han ja nĩgtĩ. Ag jyvẽn ja tóg nĩgtĩ gé. Ti ĩn pẽ han ja ag tóg nĩgtĩ, Jerusalém tá, krẽm nén ũ kar pũn jafã. Ag mỹ tóg ti tỹ nén han ke ti kãmén ja nĩgtĩ.

⁵ Ẽg jógjóg ve ag, ũ tỹ vãsỹ Topẽ mré vẽmén tĩ ag vỹ jógjóg ve nỹtĩ gé. Kỹ Cristo vỹ tỹ ag kã ũ nĩ gé, ag kanhkã, ti tỹ ga kri tĩg kỹ. Ẽg kri ke kar vẽ, Cristo ti. Topẽ vỹ tỹ ti nĩ. Ti hã mỹ ẽg vĩ há han to krónh kenh ke tũ nĩ, ga kri, kanhkã tá ke gé. Hã vẽ.

⁶ Jesus kato tẽ ag tóg nỹtĩ ha, Judeu ag, Topẽ tỹ ag jyvẽn ja ra. Hã kỹ Topẽ tóg ag mỹ tó há han ja tũ nĩ ve nĩ. Hã tũ vẽ. Ag hã ne to jykrén há han ja tũ nĩ'. Ẽg tỹ to jykrén há han kỹ ẽg Judeu ag jykre ki kanhrãn mũ. Judeu ũ ag tóg ón kỹ tỹ Topẽ krẽ nỹtĩ ve nĩ, ha mẽ.

⁷ Hã ra ag tóg ón kỹ: “Abraão vỹ tỹ ẽg jógjóg ve nĩ,” he tĩ, “hã kỹ ẽg tóg tỹ Topẽ krẽ nỹtĩ,” he ag tóg tĩ. Ag tỹ kygnẽ vẽ, ha mẽ. Topẽ tóg Abraão mỹ: “ã kósin tỹ Isaque krẽ vỹ tỹ ã krẽ pẽ nỹtĩnh mũ,” he ja nĩ.

⁸ Hã ra Abraão vỹ krẽ e han ja nĩgtĩ. Kósin pir tũ ti nĩ. Hã kỹ Abraão krẽ ũ vỹ tỹ Topẽ krẽ tũ nỹtĩ, Abraão tỹ ag han ja ra. Ũ tỹ Topẽ ki ge kỹ nỹtĩ ag hã vỹ tỹ Topẽ krẽ pẽ nỹtĩ, Topẽ tỹ ũn kuprẽg ja ag.

⁹ Topẽ vỹ Abraão mỹ: “prỹg tũg kỹ sóg ã venh kãtĩg mãn ke mũ, kỹ Sara fi kósin vỹ kã nỹnh mũ sir, ha vem nĩ,” he ja nĩ. Ti tỹ ti mỹ Isaque mur ke tó jan hã vẽ, ti tỹ Isaque hã kuprẽg ja nĩn kỹ.

¹⁰ Kỹ tóg ge nĩ gé, ẽg tỹ Rebeca fi krẽ to jykrén kỹ, Isaque prũ fi. Krẽ vẽgni han ja fi nĩ, kỹ ag tóg tỹ ẽg jóg tỹ Isaque krẽ kar nỹtĩ, ũn vẽgni ja ag.

^11-12 Kỹ ag mur tũg ki, ag tỹ ver nén ũ han tũg ki Topẽ tóg ag mỹnh fi mỹ: “ũn mur vén ke mũ vỹ tỹ ũ tỹ ti nón mur ke mũ ẽn krẽm ke jẽnh ke mũ, ha vem nĩ,” he ja nĩ. Topẽ tỹ fi mỹ tó mũ kã ag tóg nén ũ há mré nén ũ kórég han ja tũ nĩ ver. Ag mur tũg ki ke ja vẽ. Topẽ tỹ ẽg mỹ ti jykre ven sór ja vẽ. Hã kỹ tóg ag mur tũg ki tag tó ja nĩ. Ti tỹ nén to jykrén mũ ẽn han ti tĩ, Topẽ ti. Kỹ tóg ti tỹ ũn kuprẽg sór mũ ẽn hã kuprẽg tĩ gé, ag tỹ ver nén ũ han tũg ki.

¹³ Hã kỹ tag tóg rán kỹ nĩ gé, Rebeca fi krẽ ẽn ag to, ha mẽ: “Jacó to inh há nĩ, hã ra sóg ti jo mur ja tỹ Esaú to kórég nĩ,” he ja tóg nĩ, Topẽ vĩ rán ki.

¹⁴ Kỹ Judeu ag hỹn inh mỹ: “Topẽ jykre vỹ há tũ nĩ,” he sór mũ. “Kuryj tũ ti nĩ, ti tỹ vẽsóg ki nén ũ to jykrén sór kỹ, ti tỹ ũn kuprẽg mũ ẽn to,” he ag hỹn tĩ. Hã tũ vẽ hã ra.

¹⁵ Hã kỹ tóg Moisés mỹ: “isỹ ũn jagãgtãn sór mũ ẽn hã jagãgtãn jé sóg ke mũ,” he ja nĩ.

¹⁶ Ẽg tỹ to vãsãn tũ vẽ, ẽg tỹ to tar nĩnh ke tũ vẽ. Topẽ tỹ vẽsóg ki ẽg jagãgtãn hã vẽ.

¹⁷ Hã kỹ ga tỹ Egito tá pã'i tỹ Faraó to tag tóg rán kỹ nĩ gé, ha mẽ. “Ũn tar vỹ tỹ inh nĩ,” he ja ti nĩ, Topẽ ti, Faraó mỹ. “Ã tỹ sóg ũn tar han, vẽnh kar tỹ isỹ tỹ ũn tar nĩ tag ki kanhró nỹtĩ jé, isỹ ã vóg kónãn to, ã tar jẽ ra. Vẽnh kar tỹ inh jiji mẽnh ke vẽ, he ja ti nĩ, vãsỹ.

¹⁸ Hã kỹ, Topẽ tỹ ũ jagãgtãn sór nĩn kỹ tóg ti jagãgtãn tĩ sir. Hã ra tóg ũ tỹ mẽ jãvãnh ẽn ti kutu kãfór han mũ sir, Faraó ri ke.

Topẽ tỹ ti tỹ nén han sór mũ ẽn han tĩ

¹⁹ Kỹ Judeu ag hỹn inh mỹ: “kỹ ẽg hỹn Topẽ tỹ ẽg kuprẽg tũ tugrĩn kutu nỹtĩnh mũ,” he sór mũ. “Ti tugnĩn ke vẽ. Kỹ ti tỹ ne jé ẽg vóg kónãn sór nẽ?“ he sór ag hỹn mũ, ón kỹ Topẽ to vĩn kỹ.

²⁰ Ha vé, ẽprã ke vỹ tỹ ẽg nỹtĩ. Ti vĩ kafãn ke tũ pẽ ẽg tóg nĩ. Ti kamẽg jé ẽg tóg ke mũ. Ti tỹ nén han sór mũ ẽn han ti tĩ. Kejẽn ẽg tóg nén ũ han tĩ, go'or tỹ. Kỹ go'or tóg ẽg mỹ: “isỹ kukrũ kórég han tũg nĩ, isỹ kukrũ sĩnvĩ han nĩ,” he tũ nĩgtĩ.

²¹ Go'or ũ tỹ ẽg kukrũ sĩnvĩ han tĩ, ũ tỹ ẽg kukrũ kórég han tĩ. Ẽg tỹ nén han sór mũ ẽn han ẽg tóg tĩ,

²² Topẽ tỹ ti tỹ nén han sór mũ han tĩ ẽn ri ke. Ũ ag to tóg jũ tĩ, ẽg kar tỹ ag ki ti tar nĩ to jykrén jé. Hã ra tóg kãnhmar ag to jũnh ke tũ nĩ. Ver tóg ag to fe mág nĩ, ag kórég tãvĩ nỹtĩ ra. Hã ra tóg ag vóg kónãn ke mũ, ha vem nĩ.

²³ Kỹ tóg ũ ag jagãgtãn mũ gé, vẽnh kar tỹ ag ki Topẽ tỹ tỹ ũn há tãvĩ nĩ to jykrén jé, ẽg há kar kãfór. Hã jé tóg ag kuprẽg ja nĩgtĩ. Ti tỹ ag tỹ ũn mág han sór vẽ, ti mré.

²⁴ Ẽg hã vẽ sir, ũn kuprẽg kỹ nỹtĩ tag ag, fag ke gé. Hã kỹ tóg ẽg mỹ vẽnh vĩ jẽnẽ. Judeu ag kã mĩ tóg ẽg mỹ vẽnh vĩ jẽnẽ, fóg ag kã mĩ ke gé, kanhgág ag kã mĩ ke gé.

²⁵ Hã kỹ Oseias tóg tag tó ja nĩ, ha mẽ. “Vãsỹ ag tóg tỹ inh mré ke tũ ja nỹtĩ, hã ra sóg ag mỹ: inh mré ke vỹ tỹ ãjag nỹtĩnh mũ ha, isũ ag, he sór mũ, he ti, Topẽ ti,” he ja tóg nĩgtĩ. “Vãsỹ sóg ag to há tũ ja nĩgtĩ, hã ra sóg ag to há nĩnh mũ ha,” he ti.

²⁶ “Vãsỹ sóg ag mỹ: ãjag pijé tỹ isũ nỹtĩ', he ja nĩgtĩ. Hã ra sóg ag mỹ: Topẽ krẽ vỹ tỹ ãjag nỹtĩnh mũ, henh ke mũ. Ũn rĩr nĩ ẽn krẽ vỹ tỹ ãjag nỹtĩnh mũ, he jé sóg ke mũ ag mỹ, he ti, Topẽ ti,” he ja tóg nĩ, Oseias ti. Ti tỹ ũ tỹ ũri Cristo ki ge kỹ nỹtĩ ag kãmén hã vẽ.

²⁷ Kỹ Isaías vỹ Judeu ag to: “e ag nỹtĩ, goj fyr mĩ rỹnhrỹj e nĩ ẽn ri ke. Ge ra ag pipir nỹtĩnh mũ, ũn krenkren ke mũ ag.

²⁸ Topẽ vỹ kãnhmar ti tỹ nén tó ja ẽn han ke mũ, ga tag ki. Kỹ tóg ag vóg kónãn kãn ke mũ, ũn e ẽn ag, ag kórég nỹtĩn kỹ,” he ja ti nĩ, Isaías ti.

²⁹ Kỹ tóg: “ẽmã tỹ Sodoma tá ke ag tũg kãn ja tóg nĩ, Topẽ ti, ẽmã tỹ Gomorra tá ke ag ke gé. Kỹ tóg ẽg tũg kãn kren gé, ag ri kén. Hã ra tóg ẽg kã mĩ ũ krenkren han mũ,” he ja nĩ gé, Isaías ti.

³⁰ Oseias mré Isaías ag tỹ tó mũ vỹ ge nĩ, ha mẽ. Fóg mré kanhgág ag pijé vẽjykre kuryj nón mũ ja nĩgtĩ'. Ge ra Topẽ tóg ag jagãgtãn kỹ ag mỹ vẽnh pãte fón mũ ha, ag tỹ Jesus ki rã kỹ, fag ke gé.

³¹ Ag jãvo Judeu ag vỹ ag jykre hã tỹ Topẽ tỹ ag jyvẽn ki króm sór ja nĩgtĩ. “Ti vĩ han ẽg tĩ, kỹ tóg ẽg to há nĩ,” he ag tóg tĩ, ón kỹ. Hã ra ag tóg ki króm kãn ja tũ nĩ, hã kỹ Topẽ tóg ag to há tũ nĩ, jérĩn mỹ.

³² Hẽ ri ken kỹ hỹn'? Ag tỹ ti ki ge ja tũ tugrĩn ke vẽ. Hã kỹ tóg ag mỹ vẽnh pãte fón ja tũ nĩ gé. Hã kỹ ag tóg Cristo kato tẽ nỹtĩ. Pó ri ke ti nĩ, Cristo ti, ẽg tỹ tỹ krĩm ke jafã. Ag tỹ ti tỹ krĩm ke jan hã vẽ, hã vỹ: ti ki rã tũ, he mũ.

³³ Hã kỹ tag tóg rán kỹ nĩ, Jesus Cristo to, ha mẽ. “Jerusalém tá sóg pó nĩm mũ, ag tỹ tỹ krĩm ke jé. Kỹ ag tóg, pãró tag tỹ krĩm ke kỹ vár ke mũ sir. Hã ra ũ tỹ ti ki rã mũ vỹ ti tỹ nén ve sór mũ ẽn venh ke mũ,” he ja ti nĩ, Topẽ vĩ rán ki, Jesus Cristo tỹ Jerusalém tá ter ke to.