João 9 - O Novo Testamento na língua Kaingáng

Jesus tỹ ũn kyvó tỹ há' he

¹ Kejẽn Jesus tóg tĩg kỹ ũn kyvó vég mũ. Ti mur mũn kã tóg kyvó nĩ.

² Kỹ ti mré mũ tĩ ag tóg ti mré ti vég mũ gé. Kỹ ag tóg ti mỹ: “ti han mũ fag hỹn Topẽ vĩ mranh', ha kỹ tóg kyvó nĩ'. Ti tỹ vẽsóg ki Topẽ vĩ mranh kỹn mỹ kyvó nĩ vó?“ he mũ.

³ Kỹ Jesus tóg: “ti tỹ Topẽ vĩ mranh to ke pijé',” he mũ. “Ti han mũ fag tỹ Topẽ vĩ mranh to ke pijé'. Topẽ tỹ vẽnh kar mỹ ti tỹ nén han sór mũ ẽn ven sór vẽ, ti ki.

⁴ Isỹ ũ tỹ inh jẽnẽg mũ ẽn tỹ inh mỹ nén tó mũ ẽn han sór vẽ. Ver tóg inh mỹ kurã nĩ, sỹ rãnhrãj jé. Kãnhmar tóg kuty nỹnh mũ, kỹ ũ tóg rãnhrãj mãn ke tũ nĩ, iser ke kurã ẽn kã,” he tóg.

⁵ “Ver sóg ãjag mré tĩnh mũ, kỹ sóg ãjag mỹ jẽngrẽ ri ke nĩ ver,” he tóg.

⁶ Tag tó kar kỹ tóg ga kri sug mũ, kỹ tóg óré sĩ han mũ. Óré ẽn tỹ tóg ũn kyvó kanẽ to tĩn mũ.

⁷ Kỹ tóg ti mỹ: “ha tĩg, goj tỹ Siloé ki vẽnh kype jé,” he mũ. Goj tỹ Siloé to ke hã vỹ: “ũ tỹ inh jẽnẽ ja,” he mũ, ẽg vĩ ki. Kỹ tóg tĩ mũ, ũn kyvó ti. Kỹ tóg tá kãtĩg kỹ vãhã ẽvãnh há nĩ sir.

⁸ Ti tỹ vãhã ẽvãnh há nĩn kỹ tóg ti rã hã nỹtĩ kar ag mỹ e tĩ. Vẽnh kar vỹ ti ki kanhró nỹtĩ. Kỹ ag tóg: “ũ tỹ ẽg mỹ: inh mỹ nén ũ nĩm, he nĩgtĩ ẽn hã tũ mỹ'?“ he mũ.

⁹ Kỹ ag kã mĩ ũ tóg: “ti hã vẽ,” he mũ. Hã ra ũ ag tóg: “tỹ tóg ti hã ve nĩ, hã ra tóg ẽg mỹ tỹ ti hã tũ nĩ gé,” he mũ. Hã ra tóg vẽso: “inh hã vẽ,” he mũ.

¹⁰ Kỹ ag tóg ti mỹ: “kỹ ã hẽ ri ké, ã tỹ ẽvãnh há' he jé?“ he mũ.

¹¹ Kỹ tóg ag mỹ: “ag tỹ ũ to: Jesus, he mũ ẽn vỹ óré han, kỹ tóg inh kanẽ to tĩn, kỹ tóg inh mỹ: “goj tỹ Siloé ra vẽnh kupenh tĩg,” hé. Kỹ sóg vyr. Kỹ sóg ẽvãnh há' he mũ sir,” he tóg.

¹² Kỹ ag tóg ti mỹ: “hỹn, ti?“ he mũ. Hã ra tóg ag mỹ: “ha'?“ he mũ.

Pã'i ag tỹ ũn kyvó ja ki jẽmẽ

¹³ Kỹ ag tóg pã'i ag mỹ ti pére mũ mũ.

¹⁴ Hã ra tóg tỹ vẽnhkán ke kurã nĩ. Ẽn kã Jesus tóg óré han kỹ ti tỹ há' hé.

¹⁵ Kỹ pã'i ag tóg ti mỹ: “ã hẽ ri ké, ã tỹ ẽvãnh há' he jé?“ he mũ gé. Kỹ tóg: “óré tỹ tóg inh kanẽ to tĩn, kỹ sóg vẽnh kupenh vyr, kỹ sóg ẽvãnh há' he mũ sir,” he mũ.

¹⁶ Hã ra pã'i ag kã mĩ ũ ag tóg Jesus to: “Topẽ pijé ti jẽnẽ',” he mũ. “Vẽnhkán ke kurã ki tóg vẽnhkán vãnh nĩgtĩ, kỹ tóg kórég nĩ,” he ag tóg mũ. Hã ra ũ ag tóg ti to: “hã ra tóg nén ũ há tãvĩ han,” he mũ gé. “Ti kórég nĩ ran hỹn tag han ki kagtĩg nĩnh mũ vẽ,” he ag tóg, pã'i ũ ag. Hã kỹ ag vẽnh kãpãm kỹ nỹtĩ.

¹⁷ Kỹ ag tóg ũn kyvó ja ẽn ki jẽmẽ mãn mũ. “Ti mỹ tỹ ũn há nĩ', ũn kórég mỹ vó?“ he ag tóg mũ. “Ã tỹ tóg há' hé mỹr,” he ag tóg. Kỹ tóg: “inh mỹ tóg tỹ Topẽ vĩ tó tĩ pẽ nĩ,” he mũ.

¹⁸ Hã ra ag tóg ti vĩ kri fi sór tũ nĩ. “Ti mỹ kyvó ja nĩ vỹ?“ he ag tóg mũ. Kỹ ag tóg ti han mũ fag jé ke mũ.

¹⁹ Kỹ ag tóg fag mỹ: “ãjag kósin hã mỹ'?“ he mũ. “Ti mỹ ti mur mũ kã kyvó ja nĩ? Kỹn hỹn hẽ ri ké, ti tỹ ũri ẽvãnh há nĩ jé?“ he ag tóg mũ.

²⁰ Kỹ fag tóg: “hỹ, ẽg kósin hã vẽ,” he mũ. “Ti mur mũ kã tóg kyvó ja nĩ.

²¹ Hã ra tóg ũri ẽvãnh há nĩ. Hẽ ri ken kỹ'? Ha'? Ũ nỹ ti han'? Ti ki jẽmẽm nĩ. Sanh há ti nĩ ha. Ãjag mỹ ti tónh mũ,” he fag tóg.

²² Hã ra fag tóg pã'i ag kamẽg mũ, hã kỹ fag tóg: “ti ki jẽmẽm nĩ,” he mũ. Pã'i ag tóg Jesus to: “ãjag kã mĩ ũ tỹ ti to: Cristo vỹ tỹ ti nĩ, hen kỹ ẽg ti kutẽm ke mũ, ti tỹ tỹ ẽg mré ke tũ nĩ jé, ti tỹ ẽg mré vẽnhmãn tũ nĩ jé, ẽg vẽnh kanhrãn jafã krẽm,” he ja nĩgtĩ.

²³ Hã kỹ ũn kyvó ja ẽn han mũ fag vỹ Jesus to nén ũ tó sór tũ nĩ.

²⁴ Kỹ ag tóg ũn kyvó ja ẽn jé ke mãn mũ. Kỹ ag tóg ti mỹ: “ker ón hẽ', Topẽ vỹ ã vĩ mẽg mũ,” he mũ. “Ũ tỹ ã tỹ há' he mũ ẽn vỹ kórég nĩ. Topẽ vĩ mranh ti tĩ,” he ag tóg mũ ti mỹ.

²⁵ Kỹ tóg: “mẽ', ti mỹ Topẽ vĩ mranh tĩ'? Sỹ ki kagtĩg tóg tĩ,” he mũ. “Nén ũ pir hã ki kanhró sóg nĩ. Kyvó inh vẽ vẽ, hã ra sóg ẽvãnh há nĩ ha,” he tóg mũ.

²⁶ Kỹ ag tóg ti mỹ: “ti hẽ ri ké, ti tỹ ã tỹ há' he jé?“ he mãn mũ.

²⁷ Hã ra tóg ag mỹ: “ãjag mỹ inh hur tó, hã ra ãjag tóg mẽ sór tũ nĩ,” he mũ. “Ãjag tỹ ne jé jẽmẽ mãn sór nẽ? Ãjag mỹ ti mré mũ sór mũ gé?“ he tóg.

²⁸ Kỹ ag tóg ti nyg mũ. “Ã hã vỹ tỹ ti mré ke nĩ. Jãvo ẽg tóg tỹ Moisés mré ke nỹtĩ,” he ag tóg, pã'i ag.

²⁹ “Topẽ vỹ Moisés mré vẽmén ja nĩgtĩ, tag ki kanhró ẽg tóg nỹtĩ. Hã ra ẽg pijé ẽn ki kanhró nỹtĩ'. Ti hỹn tỹ hẽ tá ke nĩ'?“ he ag tóg, Jesus to.

³⁰ Kỹ ũn kyvó ja ẽn tóg ag mỹ: “mẽ',” he mãn mũ. “Ãjag mỹ ti ki kagtĩg nỹtĩ, ti tỹ tỹ hẽ tá ke nĩn ki? Isỹ tóg há' hé mỹr, inh kanẽ tỹ.

³¹ Hã ra Topẽ tóg ẽg vĩ mẽg tũ nĩgtĩ, ẽg tỹ tỹ ti vĩ mranh tĩ nỹtĩn kỹ. Ũ tỹ Topẽ kamẽg mũ ẽn vĩ hã mẽg ti tĩ. Ũ tỹ ti vĩ ki króm mũ ẽn vĩ hã mẽg ti tĩ, Topẽ ti.

³² Inh mur mũ kã inh kyvó nĩ ja nĩ. Ũ tỹ ge tỹ há' he mũ tag ve ja tũ inh nĩ ver. Hã ra tóg isỹ há' hé.

³³ Ti tỹ Topẽ tá kãtĩ tũ nĩ ra tóg nén ũ há han ki kagtĩg nĩnh mũ vẽ,” he tóg, pã'i ag mỹ.

³⁴ Kỹ ag tóg ti to jũ mũ. “Topẽ vĩ mranh kỹ ã tóg mur, hã ra ã tóg ẽg kanhrãn sór mũ',” he ag tóg. Kỹ ag tóg ti kutẽm mũ, vẽnh kanhrãn jafã krẽm.

Jesus tỹ ũn kyvó ja ẽn mré vẽmén

³⁵ Hã ra Jesus tóg mẽg mũ, ag tỹ ti kutẽm ja ti. Kỹ tóg ti venh tĩ mũ. Kỹ tóg ti mỹ: “ã mỹ ẽprã ke fi kósin ẽn ki rã sór tũ?“ he mũ.

³⁶ Kỹ tóg: “kỹ ũn nẽ ge? Sỹ ti ki rã sór vẽ,” he mũ.

³⁷ Kỹ tóg ti mỹ: “ti ve ã huri,” he mũ. “Ũ tỹ ã mré vẽmén jẽ mũ hã vỹ tỹ ti nĩ, inh hã vỹ tỹ ti nĩ,” he tóg.

³⁸ Kỹ ũn kyvó ja tóg ti mỹ: “Senhor,” he mũ. “Ã ki rã kỹ inh jẽ nĩ,” he tóg. Kỹ tóg ti krẽm mũg ke kỹ ti mỹ: “Topẽ kósin vỹ tỹ ã nĩ,” he mũ.

³⁹ Kỹ tóg ti mỹ: “ga tag ki sóg jun, sỹ vẽnh kar jykre tugnỹm jé,” he mũ. “Ũn kyvó ag tỹ ẽvãnh há han jé sóg ke mũ. Ag tỹ iso jykrén há han ke to ken hã vẽ. Kỹ sóg ũ tỹ ve há han mũ ag kyvó han ke mũ gé. Ag tỹ iso jykrén há han ki kagtĩg to ken hã vẽ,” he tóg.

⁴⁰ Hã ra pã'i ũ ag tóg ti vĩ mẽg mũ. Kỹ ag tóg ti mỹ: “ã tỹ ẽg to ke mỹ'? Kỹ ẽg mỹ kyvó nỹtĩ gé'?“ he mũ.

⁴¹ Kỹ Jesus tóg: “Hỹ,” he mũ. “Ãjag tỹ: kyvó ẽg nỹtĩ, ki kagtĩg ẽg nỹtĩ, hen kỹ Topẽ tóg ãjag to jũnh ke tũ nĩ vẽ. Hã ra ãjag tóg: ẽvãnh há ẽg nỹtĩ, ki kanhró ẽg nỹtĩ, he tĩ. Hã kỹ Topẽ tóg ãjag to jũnh ke mũ. Vẽnh pãte fón ke tũ ti nĩ, ãjag tỹ ti vĩ mranh ja ti,” he tóg.