João 19 - O Novo Testamento na língua Kaingáng

¹ Kỹ Pilatos tóg soldado ag mỹ: “ ha ti mrãnmrãn , ge kỹ,” he mũ.

² Kỹ ag tóg ti mrãnmrãn mũ. Kar kỹ ag tóg sónh pĩrĩn kỹ tỹ ti krĩ tógfĩg mũ sir. Kỹ ag tóg kur kusũg tỹ ti kri fón mũ gé sir.

³ Ti ki junjun kỹ ag tóg ti mỹ: “viva, Judeu ag pã'i',” he mũ, ti nyg kỹ. Kar ag tóg ti tãnh mũ gé sir.

⁴ Kỹ Pilatos tóg re ra kutẽ mãn mũ gé sir. Kỹ tóg vẽnh kar mỹ: “ha vé ha, ti jykre kórég mẽ ja tũ sóg nĩ vẽ. Kỹ sóg ãjag mỹ ti ven mũ. Nén ũ vẽnh mỹ han tũ ti nĩ vẽ,” he mũ.

⁵ Kỹ Jesus tóg kãkutẽ mũ, hã ra tóg sónh tỹ ti krĩ tógfĩn kỹ kãkutẽ mũ, kur kusũg ẽn tu kỹ ke gé. Kỹ Pilatos tóg vẽnh kar mỹ: “ti ve ra,” he mũ, ag tỹ hẽn ri ke mũn ti tovãnh jé, ag tỹ ti jagtar ẽn ve kỹ.

⁶ Pã'i ag tỹ ti ve kỹ, porisa ag tỹ ti ve kỹ ag tóg prẽnprẽr mũ gé sir. “!..Ka to ti sã..! !..Ka to ti sã..!“ he ag tóg mũ sir, prẽnprẽr kỹ. Kỹ Pilatos tóg ag mỹ: “kỹ ãjag hỹn inhhã ka to ti sa sór mũ'. Ti pijé nén ũ kórég han mũ',” he mũ.

⁷ Kỹ ag tóg: “hã ra tóg: “tỹ inh Topẽ kósin nĩ,” he tĩ, ẽg mỹ,” he mũ. “Ẽg tỹ ũ tỹ ge tén ke vẽ. Hã tó ja ti nĩ, ẽg mỹ, Topẽ ti, hã kỹ tóg rán kỹ nĩ,” he ag tóg mũ sir.

⁸ Kỹ tóg Pilatos tỹ ti tỹ tỹ Topẽ kósin nĩ mẽ kỹ ti mỹ e tãvĩ tĩ.

⁹ Kỹ tóg ti ĩn kã ra rã mãn kỹ Jesus mỹ: “tỹ ã hẽ tá ke nĩ?“ he mũ. Hã ra Jesus tóg ti mré vẽmén mãn sór tũ nĩ.

¹⁰ Kỹ Pilatos tóg ti mỹ: “ã mỹ inh mré vẽmén ke tũ? Isỹ ã kavãn sór kỹ sóg ã kavãn mũ. Isỹ ka to ã sa sór kỹ sóg to ã sanh mũ gé. Tag to jykrén,” he mũ.

¹¹ Hã ra Jesus tóg: “Topẽ tỹ ã tỹ pã'i han tũ nĩ ra ã tóg tag han ki kagtĩg nĩnh mũ vẽ,” he mũ. “Hã kỹ ũ tỹ ã mỹ inh fẽg mũ ẽn vỹ ã tỹ Topẽ vĩ mranh mũ tag kãfór nĩ ha,” he tóg.

¹² Kỹ tóg Pilatos mỹ e pẽ tãvĩ tĩ, kỹ tóg ti kavãn sór mũ sir. Hã ra Judeu ag tóg ti mỹ: “ã tỹ tag kavãn kỹ ã pijé tỹ ẽg pã'i mág tỹ Imperador ẽn mré ke nĩ'. Ũ tỹ vẽsỹ pã'i mág han mũ ẽn vỹ Imperador kato tẽ mũ,” he mũ.

¹³ Kỹ Pilatos tóg ag vĩ tag mẽ kỹ Jesus jé prẽr mũ, ti tỹ ti mré re ra kutẽ jé. Kỹ tóg ti nĩgja kri nĩ mũ, ti tỹ kri nĩ kỹ hẽ tá vẽnh kar jykre vég tĩ ẽn kri. Tá ag tóg pó nẽ ja nĩgtĩ, hã kỹ ag tóg to: “Pó Nẽ,” he tĩ, hã vỹ: “Gabatá,” he mũ, Hebreu vĩ ki.

¹⁴ Rã tỹ ẽg nĩno kã sa ra ke vẽ. Tỹ vaj kỹ ag tóg fénhta tỹ Páscoa ẽn han sór mũ, hã kỹ ag tóg ũri vẽjẽn tỹ hẽn ri ke kãn mũ. Ẽn kã Pilatos tóg Judeu ag mỹ: “ãjag pã'i mág hã vẽ ha,” he mũ.

¹⁵ Hã ra ag tóg prẽnprẽr kỹ: “!..ti tén ra, ti tén ra, ka to ti sã..!“ he mũ sir. “Kỹ inh mỹ ãjag pã'i mág tỹ krunh to sanh mũ'?“ he tóg, Pilatos ti. Kỹ pã'i ag tóg ti mỹ: “pã'i mág ẽg nỹtĩ, hã vỹ: Imperador, he mũ,” he mũ.

¹⁶ Kỹ Pilatos tóg ag mỹ: “ha krunh to ti sanh mũjẽg ge,” he mũ sir.

Ag tỹ Jesus tỹ krunh to sanh ke

¹⁷ Kỹ ag tóg Jesus mỹ krunh fig mũ, ti tỹ vyn kỹ pãnónh tỹ Calvário ra tĩg jé, ag tỹ Hebreu vĩ ki to: Gólgota, he mũ ẽn ra.

¹⁸ Tá ag tóg krunh to ti sãg mũ sir. Ti mré ag tóg ũn régre ag tỹ krunh to ag sãg mũ gé, kỹ ũ vỹ ti pẽgja tá krunh to sa, jãvo ũ vỹ ti jakãnh tá krunh to sa gé.

¹⁹ Hã ra Pilatos tóg Jesus to vẽnh rá han ja nĩ, kỹ ag tóg ti krĩg mỹ vẽnh rá ẽn sa ja nĩ, hã vỹ: “Nazaré tá Jesus vẽ, Judeu ag pã'i tỹ rei vẽ,” he mũ, vẽnh rán ki. Hebreu vĩ ki tóg rán kỹ nĩ, Latim vĩ ki ke gé, Grego vĩ ki ke gé.

²⁰ Kỹ Judeu tỹ hẽn ri ke ag tóg vég mũ sir, vẽnh rá ti. Jerusalém vỹ tá kakó nĩ, Jesus tỹ hẽ tá krunh to sa kỹ jẽ ẽn ti tá.

²¹ Kỹ pã'i ag tóg Pilatos mỹ: “Judeu ag pã'i tỹ rei vẽ, he ja ã nĩ, vẽnh rán ki,” he mũ. “Hã ra tóg ki krov tũ nĩ. Vẽso tóg: “tỹ sóg Judeu ag pã'i tỹ rei nĩ,” he ja nĩ. Kỹ tag hã rán nĩ,” he ag tóg.

²² Hã ra Pilatos tóg: “vó, rán inh huri, kỹ tóg rán kỹ nĩ ha,” he mũ.

²³ Kỹ soldado ag tóg Jesus tỹ ka to sãg mũ. Kỹ ag tóg ti kur mãn kỹ vẽnh kãpãm mũ. Ũ tỹ 4 (ke) ag vẽ, soldado ag, hã kỹ ag tóg ti kur tỹ vẽnh kãpãm tỹ 4 (ke) han mũ. Hã ra ti vẽnh kri fẽg ja vỹ kur pir tỹ há nĩ. Kurỹr tũ ti nĩ.

²⁴ Kỹ ag tóg ti kapa há ve kỹ jagnẽ mỹ: “ẽg hỹn tag kym ke tũ nĩ, to joga he jé ẽg tóg ke mũ. Ũ tỹ mãg mũ ẽn hã vỹ tunh mũ,” he mũ. Hã ra ag tỹ ti kur to joga he mũ ẽn tóg rán kỹ nĩ gé, Topẽ vĩ rá ki, ha mẽ. “Inh kur tỹ vẽnh kãpãm ag tóg, hã ra ag tóg inh kur tỹ vẽnh kri fẽg ja to joga he mũ,” he ja tóg nĩ, Topẽ vĩ rá ki, hã kỹ ag tóg ke mũ.

²⁵ Hã ra Jesus mỹnh fi vỹ tá jẽ nĩ, krunh rã hã, fi jãvy fi mré. Kar kỹ Maria Madalena fi vỹ tá jẽ nĩ gé, kar kỹ Maria ũ fi ke gé, Clopas prũ fi.

²⁶ Kỹ Jesus tóg ti mỹnh fag vég mũ sir. Ti mré tĩ mũ ũ vỹ fi to grẽn ke kỹ jẽ nĩ, Jesus tỹ ũ to há ẽn ti. Kỹ Jesus tóg ti mỹnh fi mỹ: “tag vỹ tỹ ã kósin nĩnh mũ ha,” he mũ, ti mré tĩ mũ ẽn to.

²⁷ Jãvo tóg ti mỹ: “fi hã vỹ tỹ ã mỹnh nĩnh mũ ha,” he mũ gé. Hã kỹ ti mré tĩ mũ ẽn tóg fi mỹ: “inh mré nĩnh kãtĩg,” he mũ, kỹ fi tóg ti ĩn krẽm nĩ nĩ, ti tỹ Jesus jẽgja ki fi jẽ'ỹn jé.

Jesus ter

²⁸ Kỹ Jesus tóg sir ti tỹ nén hynhan ke mũ ẽn hynhan kãn ja nĩ. Hã to jykrén kỹ tóg ti to nén rán kỹ nĩ ẽn hynhan kãn sór mũ, hã kỹ tóg: “inh og há tóg tĩ,” he mũ sir.

²⁹ Tá runja ũ vỹ nĩ nĩ, hã ra vinho kaja pir vỹ ki nĩ, runja ẽn ki. Kỹ ag tóg esponja tỹ vinho ki tỹ pun ke mũ. Kỹ ag tóg ka tỹ hissopo jurỹn kỹ nén kugpe jafã ẽn kusón kỹ tỹ vinho kã ra rãg kỹ ti mỹ jun mũ sir.

³⁰ Kỹ tóg ki ũnh ũnh he mũ sir. Kỹ tóg: “ke kãn inh huri,” he mũ. Kỹ ti krĩ tóg héré' he mũ. Ter tóg mũ sir.

Soldado ũ tỹ Jesus kusón

³¹ Kỹ Judeu ag tóg Pilatos mỹ to vĩ mũ, soldado ag tỹ ũ tỹ ka to sa kỹ nỹtĩ ag fa mrynhmranh jé, ag tỹ kãnhmar kãgter jé. Tỹ vaj kỹ ag mỹ fénhta mág vẽ, hã kỹ tóg ag mỹ kórég nĩ, ũ tỹ ag fénhta kurã ki krunh to sa kỹ ter mũ ti. Hã kỹ ag tóg Pilatos mỹ ag kãgtén ke to vĩ mũ, ag tỹ ka to ag kãrem jé.

³² Kỹ soldado ag tóg ũ tỹ Jesus mré krunh to vin kỹ nỹtĩ ag fa mrynhmranh mũ mũ.

³³ Kỹ ag tóg Jesus fa mrynhmranh sór mũ gé, hã ra tóg hur ter, hã kỹ ag tóg mrynhmranh tũ nĩ sir.

³⁴ Kỹ soldado ũ tóg ti rógro tỹ ti jẽn'yr ki kusón mũ, kỹ ti kyvénh tóg ki kãkutẽ mũ, kyvénh jãpri mré.

³⁵ Tag ve inh, mỹr, ha mẽ, hã kỹ sóg ãjag mỹ tó mũ. Sỹ ki hã tó vẽ. Sỹ ãjag mỹ tag kãmén vẽ, ãjag tỹ inh vĩ tag kri fi jé, ãjag tỹ ti ki ge sór jé.

³⁶ Hã ra tóg rán kỹ nĩ gé, ag tỹ ti kusón ke tag ti. “Ag pijé ti kuka mrynhmranh ke mũ',” he tóg, Topẽ vĩ tỹ rán kỹ nĩ ki.

³⁷ Kỹ tag tóg rán kỹ nĩ gé, hã mẽ. “Ag tỹ ũn kusón mũ ẽn ve jé ag tóg ke mũ,” he tóg mũ gé, Topẽ vĩ ki, Jesus to.

Ag tỹ vẽnh kej ra ti va mũ

³⁸ Kỹ Jesus to há ũ tóg nĩgtĩ, Arimatéia tá José. Ẽn vỹ ti mré tĩg ja tũ nĩgtĩ, ti tỹ pã'i ag kamẽg kỹ, hã ra tóg Jesus to há nĩ. Hã kỹ tóg sir Pilatos venh tĩ mũ, kỹ tóg ti mỹ: “sỹ Jesus tỹ ka to ti kãtérem há tóg tĩ,” he mũ. Kỹ Pilatos tóg ti mỹ: “he,” he mũ. Kỹ tóg Jesus tỹ krunh to ti kãtérem tĩ mũ sir.

³⁹ Kỹ Nicodemos vỹ kãtĩ mũ gé, ũ tỹ kuty tá Jesus mré vẽmén mũ ẽn ti. Ẽn vỹ nén ger há ma kãtĩ mũ, 45 (ke) quilos vẽ mỹr. Ka tỹ mirra jẽnjo ger há vẽ, kar kó'ẽr jẽnjo mré. Ẽn ma tóg kãtĩ mũ, Nicodemos ti.

⁴⁰ Kỹ ag tóg Jesus ti kãtérem mũ sir, krunh to, José mré Nicodemos ti. Ti pãg ag tóg mũ sir, kur tỹ, kỹ ag tóg nén ger há ẽn tỹ ti pãg ke ẽn kã kã nĩm mũ gé. Judeu ag jykre ũ vẽ, ag tỹ vẽnh kej tá ũ fi kỹ.

⁴¹ Ka kré ũ vỹ Gólgota tá kakó nĩ, tá tóg vẽnh kej tãg nĩ, pãró nor ti, ũ tỹ ag tóg ver kã kã fi ja tũ nĩ.

⁴² Ẽn kã kã ag tóg ti fig mũ, ti kakó nĩn kỹ. Hã ra tóg rãké nỹ ha, kỹ ag fénhta tóg kakó' he mũ ha, hã kỹ ag tóg vẽnh kej tãg ẽn kã kã Jesus fig mũ sir.