Han Kãme 7 - O Novo Testamento na língua Kaingáng

Estêvão tỹ vẽnh kãmén

¹ Kỹ Topẽ tũ to pã'i mág tóg ti mỹ: “Ki hã ke mỹ'?“ he mũ.

² Kỹ Estêvão tóg ag mỹ: “ijóg',” he mũ. “Inh kanhkã',” he tóg. “Ẽg jóg tỹ Topẽ vỹ tóg vẽnh kar kãfór nĩ. Ti hã ne ẽg jógjóg tỹ Abraão mré vĩ ja nĩgtĩ, ti tỹ ver ga tỹ Mesopotâmia tá nĩ ki, ti tỹ ver ẽmã tỹ Harã ra tĩ tũ ki.

³ Kỹ tóg ti mỹ: “ã jamã tá kutẽ,” he ja nĩ. “Ã kanhkã ag kar ré kỹ tĩg. Ga ũ ra tĩg, isỹ tá ã mỹ: tag kã nĩm nĩ, he jé,” he ja tóg nĩ ti mỹ, Topẽ ti.

⁴ Hã kỹ tóg ga tỹ Caldéia tá kãkutẽ mũ, Harã tá ẽmãn jé. Ti panh ter kar kỹ Topẽ tóg ti mỹ: “ga tag ra tĩg sir,” he mũ. Ẽg jamãn hã vẽ, Abraão jamã ja ti,” he tóg.

⁵ “Ge ra Topẽ tóg ti mỹ ga ẽn nĩm ja tũ nĩ ver. Ti mỹ tóg hã ra: ã tũnh ke vẽ, kar kỹ, ã krẽ tũnh ke vẽ gé, he ja nĩ. Hã ra tóg ver kósin ja tũ nĩ, Topẽ tỹ ti mỹ: ã krẽ tũnh ke vẽ, he mũ ẽn kã.

⁶ Kỹ Topẽ tóg ti mỹ: ã krẽ ag tỹ fóg ũ ag mré mũnh ke vẽ, fóg ẽn ag jamã ra, he mũ. Ag tỹ ag mré rãnhrãj ke vẽ, kỹ ag tóg ag vóg kónãn ke mũ, prỹg tỹ 100 tỹ 4 (ke) ki, he tóg.

⁷ Hã ra sóg ũ tỹ ag vóg kónãn mũ ẽn ag vóg kónãn ke mũ gé, kar kỹ, he tóg. Isỹ ag vóg kónãn kar kỹ ã krẽ ag tóg tá kãpanh mũ. Kỹ ag tóg ga tag ki isũ ti han mũ, he tóg, Topẽ ti. Ti tỹ Abraão mỹ ken hã vẽ,” he tóg, Estêvão ti.

⁸ “Kỹ tóg ti mỹ vẽjykre nĩm mũ, ti tỹ ti krẽ ag gré fár junun kym jé. Topẽ tỹ ag rán han hã vẽ. Kar kỹ Abraão tóg Isaque han mũ. Ti tỹ kurã tỹ 8 (ke) han kỹ tóg ti mỹ kym mũ. Isaque tỹ Jacó han kỹ tóg hã han mũ gé, kỹ Jacó tóg hã han mũ gé, ti tỹ ti krẽ tỹ 12 (ke) ẽn ag han kỹ, ẽg tỹ ũ to: “ẽg jógjóg kar“, he mũ ẽn ag.

⁹ Hã ra ẽg jógjóg ẽn ag tóg ag jãvy tỹ José to jũgjũ ja nĩgtĩ, ag tỹ ti tũ to én kỹ. Hã kỹ ag tóg ti vẽne he mũ, ũ tỹ ga tỹ Egito ra mũ mũ ag mỹ. Hã ra Topẽ tóg ti ki rĩr mũ.

¹⁰ Kỹ tóg ti jy nĩgãn mũ, ti tỹ vẽnh jagtar vég mũ ra. Ti jykre há nĩn kỹ tóg Egito tá ke ag pã'i mág mỹ há tĩ, ag tỹ ũ to: Faraó, he mũ ẽn mỹ. Hã kỹ tóg ti tỹ pã'i mág han mũ, José ti tỹ, ti tỹ Egito tá ke kar ẽn ag ki rĩr jé sir.

¹¹ Kejẽn tóg prỹg tĩ sir, ga tỹ Egito mĩ hã, ga tỹ Canaã mĩ hã ke gé. Kỹ vẽnh kar tóg kókĩnkĩr mũ, prỹg tĩn kỹ. Kỹ ẽg jógjóg ẽn ag tóg kókĩnkĩr mũ gé.

¹² Kỹ ũ tóg Jacó mỹ: “Egito tá ti vẽjẽn nĩ inhhã,” he mũ. Kỹ tóg ẽg jógjóg ag jẽgnẽg mũ, ag tỹ Egito ra mũ vén jé.

¹³ Ag tỹ ra mũ mãn kỹ José tóg vãhã ag mỹ: “inh hã vẽ,” he mũ, ti kãke ag mỹ. Hã kỹ Faraó tóg José kanhkã ag ki kanhró nĩ gé sir.

¹⁴ Kỹ José tóg ti panh tỹ Jacó jé prẽr mũ, ti tỹ vẽnh kar tatĩn kãtĩg jé. Ũ tỹ 70 kri 5 (ke) ag vẽ, ti kanhkã ag.

¹⁵ Kỹ tóg Egito ra tĩ mũ. Tá tóg ter mũ kejẽn. Kar kỹ ẽg jógjóg ag vỹ tá kãgter kãn ja nĩgtĩ gé.

¹⁶ Hã kỹ ag tóg ẽmã tỹ Siquém tá kénh kỹ nỹtĩ. Abraão vỹ tóg vẽnh kej ẽn to jãnkamy nĩm ja nĩgtĩ, Emor krẽ ag mỹ,” he tóg, Estêvão ti.

¹⁷ “Vãhã tóg kurã pétẽm mũ sir, Topẽ tỹ Abraão mỹ: ã krẽ mỹ sóg ga ẽn nĩm mũ, he ja kurã ẽn ti. Kỹ ag tóg Egito tá vẽnh grun mũ.

¹⁸ Kejẽn ũ tóg tá tỹ pã'i jẽ, Egito tá. Hã ra tóg José mẽ ja tũ nĩ, pã'i tag ti.

¹⁹ Ẽn tóg ẽg kanhkã ag to jũ mũ. Ẽg jóg ag vóg kónãn tóg mũ gé. Kỹ tóg ag mỹ: “ãjag krẽ mur mũ ra ti gré nỹn kỹ ti fón nĩ, ti ter jé,” he mũ.

²⁰ Ẽn kã vãhã Moisés tóg mur mũ, kỹ tóg sĩnvĩ pẽ nĩ. Kỹ ti han mũ fag tóg ti tén tũg mũ. Kysã tãgtũ ki fag tóg ti ki rĩr mũ, vẽnh kar vatánh tá.

²¹ Kysã tãgtũ tũg kỹ fag tóg sir ti fón mũ. Hã ra Faraó ẽn kósin fi tóg ti ve kỹ ti vãg mũ, ti jẽ'ỹn jé. Kỹ tóg tỹ fi kósin ri ke nĩ, Moisés ti.

²² Kỹ tóg nén kar ki kanhrãn mũ, Egito tá vẽjykre kar ẽn ki. Kỹ ti jykre vỹ vẽjykre tỹ hẽn ri ke nĩ, kỹ ti vĩ vỹ vẽnh vĩ tỹ hẽn ri ke nỹ gé,” he tóg.

²³ “Vãhã tóg prỹg tỹ 40 (ke) han mũ. Kỹ tóg ti kanhkã pẽ ag to jykrén mũ, ti povo tỹ Israel to, ag tỹ nén han mũ venh tĩg jé.

²⁴ Kỹ tóg ũ vég mũ, Egito tá ke ũ. Ti tỹ Judeu vóg kónãn vég tóg mũ, nén ũ tũ to. Kỹ tóg ti kajãm mũ. Egito tá ke ẽn tén tóg mũ.

²⁵ Inh kanhkã ag hỹn to jykrén kỹ ki kanhrãn mũ, Topẽ tỹ isugrĩn ag kren han ke ti, he tóg, Moisés ti. Hã ra ag tóg to jykrén tũ nỹtĩ, ti kanhkã ag,” he tóg.

²⁶ “Tỹ vaj kỹ tóg ag to tĩg mãn mũ, ti kanhkã ag to. Kỹ ũn régre ag tóg jagnẽ to jũ nỹtĩ. Kỹ tóg ag tỹ jagnẽ to há han sór mũ. Hã kỹ tóg ag mỹ: tỹ ãjag tóg jagnẽ kanhkã nỹtĩ vẽ, hã ra ãjag tóg jagnẽ vóg kónãn sór mũ, he mũ.

²⁷ Kỹ ũ tỹ ti régre vóg kónãn mũ ẽn tóg ti fón', ti fón', he kỹ ti mỹ: ã pijé tỹ ẽg pã'i nĩ', ã pijé ẽg jyvẽn mũ', he mũ.

²⁸ Ã hỹn isén sór mũ, ã tỹ rãké tá Egito tá ke ẽn tén ri ke han sór ã hỹn mũ, he tóg ti mỹ,” he tóg.

²⁹ “Kỹ Moisés tóg ti vĩ mẽ kỹ vẽnh péju kỹ tĩ mũ. Kỹ tóg ga tỹ Midiã ra tĩ mũ. Povo ũ ag mĩ tóg tĩ mũ gé. Tá tóg prũg kỹ kósin régre han mũ.

³⁰ Prỹg tỹ 40 (ke) tũg kỹ Topẽ tỹ jẽnẽ jafã vỹ ti mỹ vẽnh ven mũ, ti tỹ ẽmã tũ ja mĩ tĩ mũ ra, krĩ tỹ Sinai tá. Vãnh gru ki tóg ti vég mũ.

³¹ Kỹ tóg ti mỹ e tĩ. Kỹ tóg ra tĩ mũ, ti ve há han jé. Kỹ tóg vẽnh vĩ mẽg mũ. Topẽ vĩ vẽ.

³² Kỹ tóg ti mỹ: tỹ sóg ã jógjóg ag Topẽ nĩ, Abraão Topẽ, Isaque Topẽ, Jacó Topẽ, he mũ. Hã ra Moisés tóg jũrũn ke mũ, ti kamẽg kỹ. Kỹ tóg tá ẽvãnh jãvãnh nĩ.

³³ Hã ra Topẽ tóg ti mỹ: ã pẽn né nũ ra. Inh jo ã tóg jẽ nĩ mỹr, hã ra sóg vẽnh kar kãfór nĩ. Hã kỹ nũ, he mũ.

³⁴ Egito tá ke ag tỹ isũ ag vóg kónãn vég isóg nĩ nĩ. Ag vẽnh krẽkrẽr mẽg sóg nĩ nĩ. Kỹ sóg tére, sỹ ag kygvãn jé. Hã kỹ sóg ã jẽnẽg mũ, ga tỹ Egito ra. Ha tĩg, he tóg, Topẽ ti, Moisés mỹ,” he tóg.

³⁵ “Moisés ẽn hã jẽnẽ ja tóg nĩ, ti tỹ ti kanhkã ag krenkren han jé, ti tỹ tỹ pã'i nĩ jé. Hã to Topẽ tỹ jẽnẽ jafã tóg ti mỹ vẽnh ven, vãnh gru ki. Hã ra ti kanhkã ag tóg ti to é he ja nĩgtĩ, ti mỹ: ã pijé tỹ ẽg pã'i nĩ', ã pijé ẽg jyvẽn mũ', hen kỹ.

³⁶ Moisés tóg sir ẽg tỹ nén han vãnh hynhan, ga tỹ Egito tá, goj kafã tũ tá ke gé, goj kusũg he mũ ẽn tá ke gé. Kỹ ag tóg ẽmã tũ mĩ mũ mũ, prỹg tỹ 40 (ke) ki, ti kanhkã ag. Kỹ tóg tá ẽg tỹ nén han vãnh hynhan mũ gé, ti tỹ ag jo tĩn kỹ,” he tóg.

³⁷ “Moisés tóg povo tỹ Israel ag mỹ: Topẽ vỹ ãjag mỹ ti vĩ tó tĩ ũ jẽnẽnh mũ, ãjag mré ke ũ, ti tỹ ãjag mỹ Topẽ vĩ tó jé, inh ri kén, he ja nĩgtĩ.

³⁸ Moisés ẽn hã ne tóg povo tỹ Israel ag mré ẽmã tũ mĩ tĩ ja nĩgtĩ. Ag tỹ kejẽn pãnónh tỹ Sinai tá nỹtĩn kỹ tóg Topẽ tỹ jẽnẽ jafã mré vĩ mũ. Kỹ Topẽ tóg ti mỹ vẽjykre nĩm mũ, ẽg tỹ ki króm kỹ ẽg rĩr krỹg ja tũ ve jé,” he tóg.

³⁹ “Moisés vĩ han vãnh ag nỹtĩ, ẽg jógjóg ag. Kỹ ag tóg ti tovãnh kỹ ga tỹ Egito ra mũ mãn sór mũ, kyrãgrã kỹ.

⁴⁰ Kỹ ag tóg Moisés jãvy tỹ Arão mré vĩ mũ. Ti mỹ ag tóg: “ẽg mỹ vẽnh kãgrá tỹ topẽ han, ẽg tỹ vẽnh jo ag gé mũ jé,” he mũ. Moisés tóg ẽg jo tĩg ja nĩ. Ẽg kãpan ja tóg nĩ, ga tỹ Egito tá, hã ran hẽ ra vyr hỹn'? he ag tóg ti mỹ. Kỹ tóg ag mỹ: he, he mũ.

⁴¹ Kỹ ag tóg monh sĩ kãgrá han mũ. Kỹ ag tóg vẽnh kãgrá ẽn mỹ ag mẽg kugprũg mũ. Ag mỹ tóg sĩnvĩ nĩ. Kỹ tóg ag mỹ sér tĩ sir.

⁴² Hã ra Topẽ tóg vẽnh kaja jé ag tovãnh mũ gé, hã kỹ ag tóg rã to jãnjãn mũ, kysã to, krĩg kar to ke gé. Hã kỹ Topẽ vĩ tó tĩ ũ tóg ag to rán mũ gé, kỹ tóg: Judeu', he mũ. Ãjag tỹ prỹg tỹ 40 (ke) ki ẽmã tũ ja mĩ mũn kỹ ãjag tóg inh mỹ nén ũ pũn ja tũ nĩgtĩ, hã ra ãjag tóg topẽ ũ ag mỹ kugprũn ja nĩgtĩ, he tóg.

⁴³ Ón kỹ topẽ tỹ Moloque kãgrá va ãjag tóg mũ ja nĩgtĩ, krĩg kãgrá ke gé, hã vỹ: Renfã, he mũ. Ẽn to ãjag tóg jãnjãn ja nĩgtĩ. Hã kỹ sóg ãjag vóg kónãn kỹ Babilônia tá ke ag jẽgnẽnh mũ, ag tỹ ãjag tatĩ mũ jé, he tóg, Topẽ ti, ti vĩ tó tĩ tỹ,” he tóg, Estêvão ti.

⁴⁴ “Ẽg jóg ag tỹ ẽmã tũ ja mĩ mũn kỹ ag tóg kur tỹ Topẽ pẽ ĩn han ja nĩgtĩ, ag tỹ tá Topẽ mré vẽmén jé. Topẽ vỹ Moisés mỹ ti tỹ nén han ke tó ja nĩgtĩ, ti tỹ kur tỹ Topẽ ĩn han jé.

⁴⁵ Ag krẽ tóg sir ag ri kén ĩn tỹ kur ẽn ma mũ ja nĩgtĩ gé, ag tỹ Topẽ tỹ ag mỹ ẽmã tó mũ ẽn ra mũn kỹ. Moisés ter kar Josué tóg sir ag jo tĩ mũ. Hã ra Topẽ tóg ga ẽn tá ke ag kãpan mũ, ẽg jógjóg ag jo. Kejẽn Davi tóg tỹ ag pã'i nĩ sir, prỹg tỹ hẽn ri ke tũg kar kỹ. Hã ra ĩn tỹ kur ẽn tóg ver jẽ nĩ.

⁴⁶ Topẽ vỹ Davi to há nĩ. Kỹ Davi tóg ti mỹ: sỹ ã mỹ ĩn há han há tóg tĩ vẽ. Ã hã ne tóg tỹ ijógjóg tỹ Jacó Topẽ nĩ, he mũ. Kỹ tóg ã tỹ ĩn tỹ kur krẽm nĩn kỹ inh mỹ há tũ nĩ, he tóg, ti mỹ.

⁴⁷ Hã ra Davi tóg han tũ nĩ ver. Ti kósin tỹ Salomão hã tóg ĩn ẽn han mũ,” he tóg, Estêvão ti.

⁴⁸ Kỹ tóg ag mỹ: “hã ra vẽnh kar kãfór ẽn tóg ẽg tỹ ti jo ĩn han mũ ẽn krẽm nĩ tũ nĩgtĩ mỹr,” he mũ. “Hã kỹ Topẽ vĩ tó tĩ ũ tóg ti to tag tó ja nĩ, ha mẽ.

⁴⁹ Kanhkã tãn vỹ tỹ inh nĩ, he tóg. Inh nĩg jan hã vẽ. Kỹ ga vỹ tỹ isũ nĩ gé. Sỹ tá vẽnhkán sór nĩn kỹ sóg kenh ke mũ. Isũ kar vẽ. Kỹ ãjag tỹ inh mỹ ĩn han sór kỹ ãjag hỹn hẽ ri kenh mũ'? Pétẽm ke tũ ãjag nĩ, ãjag tỹ inh mỹ vẽnhkán jafã han mũ ra.

⁵⁰ Inh hã ne tóg nén kar hynhan ja nĩ inhhã, he tóg, Topẽ ti, ti vĩ tó tĩ tỹ,” he tóg.

⁵¹ Kỹ tóg: “krĩ tũ ãjag nỹtĩ', ki kanhrãn jãvãnh ãjag tóg nỹtĩ', ãjag nĩgrẽg tóg kutu nĩ',” he mũ. “Topẽ kuprĩg kato ãjag tóg vãsãnsãn tĩ'. Ãjag jógjóg ag mré ãjag tóg ti kato vãsãnsãn tĩ'.

⁵² Ãjag jógjóg ag ne tóg Topẽ vĩ tó tĩ ag kar vóg kónãn ja nĩgtĩ'. Ag kãgtén ja ag tóg nĩgtĩ'. Hã ra ẽn ag tóg ũ tỹ vẽjykre kuryj han mũ ẽn kãmén ja nĩgtĩ, hã vỹ: Jesus, he mũ. Jãvo ãjag tóg ẽn kato vĩ ja nĩgtĩ, fóg mỹ. Kỹ ãjag tóg ti tén ja nĩgtĩ, Cristo ti,” he tóg.

⁵³ “Topẽ hã ne ãjag mỹ ti vĩ nĩm ja nĩ', ti tỹ jẽgnẽ jafã ag tỹ. Hã ra ãjag tóg ti vĩ mranh ja nĩgtĩ',” he tóg. Estêvão tỹ pã'i ag mỹ tón hã vẽ.

Ag tỹ Estêvão tén

⁵⁴ Ũ tỹ tá nỹtĩ ag tỹ ti vĩ mẽ kỹ ag fe tóg gỹm ke mũ. Kỹ ag tóg ag jã tỹ gángán ke mũ.

⁵⁵ Hã ra Topẽ kuprĩg tóg Estêvão krĩn mũ, kỹ tóg kanhkã ki ẽvãnh kỹ Topẽ vég mũ, ti kókov ti. Jesus vég tóg mũ gé. Topẽ pẽgja tá tóg jẽ nĩ.

⁵⁶ Kỹ tóg: “ha vé,” he mũ. “Kanhkã tá sóg vég mũ, kỹ ẽprã ke fi kósin tóg Topẽ pẽgja tá jẽ nĩ,” he tóg.

⁵⁷ Kỹ ag tóg prẽnprẽr mũ sir, ag nĩgrẽg nĩgfénh kỹ. Ag kar tóg ti to vẽnh génh han mũ.

⁵⁸ Kỹ ag tóg ti ség mũ. Jerusalém tá ag tóg ti kutẽm mũ gé. Kỹ ag tóg ti pin mũ, pó tỹ. Ag kur vãvãm ag tóg mũ, kỹ kyrũ tóg ki rĩr mũ, ag kur ki. Kyrũ ẽn jiji hã vỹ: Saulo, he mũ.

⁵⁹ Kỹ ag tóg Estêvão pin mũ sir, pó tỹ. Hã ra Estêvão tóg jamã há ra : “!..inh Senhor'..!“ he mũ. “!..Jesus'..!“ he tóg. “!..Inh kuprĩg jãvãnh ra..!“ he tóg mũ.

⁶⁰ Kỹ tóg ti jakrĩ tỹ jẽ kỹ prẽr mũ: “!..inh Senhor'..! !..Ag tỹ inh pin tỹ ag mỹ vẽnh pãte fón ne..!“ he tóg mũ. Kar kỹ tóg hun ke kỹ ter mũ sir.