Han Kãme 6 - O Novo Testamento na língua Kaingáng

Ag tỹ ũ tỹ 7 (ke) ag vin

¹ Kỹ ũ tỹ hẽn ri ke ag tóg Jesus ki ge mũ. Ũ ag tóg Grego vĩ tó tĩ, kỹ ũ ag tóg Hebreu vĩ tó tĩ. Hã ra ag kar tóg jagnẽ mré jẽg tĩ. Ag e nỹtĩn kỹ ũ tỹ Grego vĩ tó mũ ag tóg kejẽn vĩ kónãn mũ, Hebreu vĩ tó tĩ ag kato. “Ũ tỹ Hebreu vĩ tó mũ ag vỹ ẽg ki króm tũ nĩ mỹr. Ag kã ũn mén ter ja fag vỹ kurã kar ki vẽjẽn há vég tĩ, ag tỹ fag mỹ vin kỹ. Jãvo ag tóg ẽg kã ũn mén ter ja ẽn fag kã jatu nỹtĩ. Hã kỹ fag tóg jagtar nỹtĩ,” he ag tóg.

² Kỹ ũ tỹ 12 (ke) ag tóg mẽg mũ, Jesus tỹ ũn vin mũ ag. Kỹ ag tóg Jesus mré mũ kar ag jé prẽr mũ. Kỹ ag tóg: “Ẽg tũ hã vẽ, hã vỹ ẽg tỹ tỹ Topẽ vĩ tó tĩ nỹtĩ,” he mũ. “Ẽg tỹ vẽjẽn ki rĩr kỹ ẽg tóg kutar nỹtĩ.

³ Kỹ ũ tỹ 7 (ke) ag vin nĩ, ũn kãme kórég tũ ag, ũn jykre há ag, ũ tỹ Topẽ kuprĩg tỹ jagrẽ nĩ ẽn ag,” he ag tóg. “Ẽn ag mỹ ẽg tóg vẽnh rãnhrãj tag nĩm ke mũ, ag tỹ vẽjẽn ki rĩr jé.

⁴ Kỹ ẽg tóg tag tỹ vẽnh kutãn mãn ke tũ nĩ. Jatun mỹ ẽg tóg Topẽ mré vẽmén ke mũ. Ti vĩ tó jé ẽg tóg ke mũ,” he ag tóg, Pedro ag.

⁵ Ag vĩ vỹ vẽnh kar mỹ há nĩ ha, kỹ ag tóg Estêvão fẽg mũ sir, ũ tỹ Jesus ki rã kỹ jẽ ẽn ti, kỹ Topẽ kuprĩg vỹ tỹ ti jagrẽ nĩ. Ti mré ag tóg Filipe fẽg mũ gé, Prócoro ke gé, Nicanor ke gé, Timom ke gé, Pármenas ke gé, Nicolau ke gé, ẽmã tỹ Antioquia tá ke tag ti, fóg tỹ Judeu jykre han mũ tag ti.

⁶ Ẽn ag vin ag tóg mũ, Jesus tỹ ũn vin mũ ag jo. Kỹ ag tóg ag to Topẽ mré vĩ mũ, ag nĩgé tỹ ag mẽ kỹ. Hã kỹ ag tóg ag mỹ vẽnh rãnhrãj ẽn nĩm mũ, ag tỹ vẽjẽn ki rĩr jé.

⁷ Kỹ Topẽ vĩ tóg vẽnh kar kri rũm ke mũ sir. Ũ tỹ Jesus mré mũ ag vỹ tóg hẽn ri ke nỹtĩ, Jerusalém tá. Kỹ Topẽ tũ ki rĩr tĩ ũ ag tóg Jesus vĩ kri fi kỹ ti ki ge mũ gé sir.

Ag tỹ Estêvão se

⁸ Estêvão vỹ hã ra krĩ há nĩ, Topẽ tỹ ti mỹ vẽjykre nĩm kỹ. Kỹ tóg ẽg tỹ nén han vãnh tỹ hẽn ri ke hynhan mũ, vẽnh kar mỹ.

⁹ Hã ra ũ ag tóg Judeu ag vẽnh kanhrãn jafã tá ti vĩ kafãn mũ. Ẽmã tỹ Cirene tá ke ag vẽ, ẽmã tỹ Alexandria tá ke ag ke gé, ga tỹ Cilícia tá ke ag ke gé, ga tỹ Ásia tá ke ag ke gé.

¹⁰ Hã ra ag tóg ti tỹ hẽ ri ke tũ nĩ, ti krĩ há nĩn kỹ, ti tỹ Topẽ kuprĩg tỹ jagrẽ nĩn kỹ.

¹¹ Kỹ ag tóg ũ ag krĩn mũ, ag tỹ ti kato vĩ jé, kỹ ag tóg: “ti vĩ mẽ ẽg mỹr,” he mũ. “Moisés to vĩ kónãn tóg mỹr, Topẽ to ke gé,” he ag tóg ón kỹ, Estêvão to.

¹² Hã kỹ vẽnh kar tóg ti to jũgjũ mũ, kófa ag mré hã, Topẽ vĩ to ẽg kanhrãn tĩ ag mré hã. Kỹ ag tóg ti kãgmĩ kỹ ti ség mũ. Kỹ ag tóg pã'i ag to ti pére kãmũ mũ.

¹³ Ũ tỹ ón kỹ ti kato vĩnh ke mũ ag jé ag tóg prẽr mũ gé, pã'i ag. Kỹ ag tóg: “Topẽ ĩn to tóg vĩ kónãn tĩ, Topẽ tỹ ẽg mỹ nén tó ja ẽn to ke gé. Hã ra tóg ti vĩ kónãn to krónh ke tũ nĩgtĩ,” he ag tóg.

¹⁴ “Ti vĩ mẽ ẽg mỹr. Jesus kãmén tóg tĩgtĩ, Nazaré tá ke ẽn ti. Topẽ ĩn kókén jé tóg ke mũ, Jesus ti, he tóg tĩgtĩ, kỹ tóg Moisés tỹ ẽg mỹ vẽjykre nĩm mũ ẽn tỹ tũ' he sór mũ gé, ẽg mỹ vẽjykre ũ nĩm kỹ,” he ag tóg ón kỹ, Estêvão to.

¹⁵ Kỹ pã'i ag kar tóg ti tugnỹm mũ, hã ra ti ve tóg tỹ Topẽ tỹ jẽnẽ jafã ve ri ke nĩ sir.