Han Kãme 13 - O Novo Testamento na língua Kaingáng

¹ Antioquia tá ũ ag tóg nỹtĩ, Topẽ vĩ tó tĩ ũ ag, Jesus jykre tỹ vẽnh kanhrãn nỹtĩ ag ke gé. Kỹ ũ jijin hã vỹ: Barnabé, he mũ, kar ũ jijin hã vỹ: Simão Negro, he mũ. Ũ tóg tỹ Lúcio nĩ, Cirene tá ke tag ti. Kỹ ũ tóg tỹ Manaém nĩ, pã'i tỹ Herodes mré mog mũ tag ti. Kỹ ũ tóg tỹ Saulo nĩ gé.

² Kejẽn ag tóg jagnẽ mỹ Topẽ jykre tó mũ, ag jẽg tũ nĩn kỹ. Kỹ Topẽ kuprĩg tóg ag mỹ: “Barnabé fẽg ra, Saulo mré,” he mũ, “ag tỹ inh rãnhrãj han jé, isỹ nén to jykrén mũ ẽn ti, ag tỹ inh jykre tó jé, vẽnh kar mỹ,” he tóg.

³ Kỹ ag tóg ag jẽg tũ nĩn kỹ Topẽ mré vĩ mãn mũ. Ag nĩgé tỹ ag tóg ag mẽg mũ, kỹ ag tóg: “ha mũ jẽg,” he mũ.

Kujá tỹ Elimas

⁴ Kỹ Topẽ kuprĩg tóg ag jẽgnẽg mũ, kỹ ag tóg ẽmã tỹ Selêucia ra mũ mũ. Tá junjun kỹ ag tóg goj vãso tỹ Chipre ra mũ mũ, canoa mág kã mĩ.

⁵ Kỹ ag tóg ẽmã tỹ Salamina tá junjun mũ. Tá ag tóg Topẽ vĩ kãmén mũ, Judeu ag tỹ vẽnh kanhrãn jafã krẽm. João Marcos vỹ ag mré tĩ mũ gé. Ag mré rãnhrãj mũ vẽ.

⁶ Goj vãso mĩ ag tóg pa mũ. Kỹ ag tóg ẽmã tỹ Pafos tá junjun mũ, Topẽ vĩ kãmén kỹ. Tá ũ tóg nĩ nĩ, kujá ũ. Ón kỹ tóg Topẽ vĩ tó sór mũ. Judeu ũ vẽ, ti jiji hã vỹ: Bar Jesus, he mũ.

⁷ Governador mré tóg nĩ nĩ. Ti jiji hã vỹ: Sérgio Paulo, he mũ. Krĩ há ti nĩ, governador ti, kỹ tóg Barnabé ag jé prẽr mũ. Ti tỹ Topẽ vĩ jẽmẽ sór vẽ.

⁸ Kỹ kujá ẽn tóg ag vĩ kato tẽ mũ, ti tỹ Topẽ vĩ kri fig tũ nĩ jé. Kujá ẽn jiji ũ hã vỹ: Elimas, he mũ.

⁹ Kỹ vãhã Topẽ kuprĩg tóg Saulo krĩn mũ. Saulo jiji ũ hã vỹ: Paulo, he mũ. Topẽ kuprĩg tỹ ti krĩn kỹ tóg kujá ẽn ki kanẽ jũ han kỹ ti ki ẽvãnh mũ.

¹⁰ Kỹ tóg: “tỹ ã tóg ũn ón mé nĩ,” he mũ. “Jykre pãno ã nĩ. Japo kósin vỹ tỹ ã nĩ, vẽjykre kuryj kato tẽ ã nĩ. Hã kỹ ã tóg vẽjykre pãno to krónh ke tũ nĩgtĩ.

¹¹ Ha vé, Topẽ vỹ ã vóg mũ, kỹ ã tóg kyvãn ha. Rã venh ke tũ ã nĩ ha, kurã tỹ hẽn ri ke ki,” he tóg, Paulo ti. Kỹ tóg vẽsỹmér ti mỹ kuty' he mũ. Kyvó tóg nĩ sir. Kỹ tóg jẽmĩg mũ. Ũ jé tóg prẽr mũ, ti tỹ ti pére tĩg jé.

¹² Governador tỹ tag ve kỹ tóg ti mỹ e tĩ. Kỹ tóg Jesus ki rã mũ. Topẽ jykre tóg ti mỹ tar ja nĩ.

Paulo tỹ ẽmã tỹ Antioquia tá Topẽ vĩ tó

¹³ Kỹ vãhã Paulo ag tóg Pafos tá pa mũ. Canoa mág kã mĩ ag tóg mũ mũ. Kỹ ag tóg ga tỹ Panfília tá junjun mũ, ẽmã tỹ Perge tá. Hã ra João Marcos tóg kyrã mũ. Ag ré kỹ tóg Jerusalém ra vỹn ke mũ.

¹⁴ Jó ag tóg Perge tá pa mũ, ga tỹ Pisídia ra mũ jé, ẽmã tỹ Antioquia ra. Tá junjun kỹ ag tóg vẽnhkán ke kurã ki Judeu ag tỹ vẽnh kanhrãn jafã kã ra ge mũ.

¹⁵ Ũ tóg tá Topẽ tỹ ẽg mỹ vẽjykre nĩm ja ẽn to ke mũ, rán kỹ nĩ ẽn to. Ti tỹ ẽg jyvẽn tó tóg mũ gé, vãsỹ Topẽ vĩ tó tĩ ag tỹ rán ja ẽn ti. Kar kỹ pã'i ag tóg Paulo ag jé prẽr mũ. Kỹ ag tóg: “kanhkã', ãjag tỹ ẽg jyvẽn sór kỹ tóg há nĩ,” he mũ.

¹⁶ Kỹ Paulo tóg jẽgnẽ mũ. Ti nĩgé tỹ tóg ag mỹ ge mũ, ag tỹ katy' he jé. Kỹ tóg ag mỹ: “ha mẽ, Judeu kar'. Jẽmẽ ra, ũ tỹ Topẽ kamẽg mũ kar, ãjag tỹ tỹ fóg nỹtĩ ra,” he mũ.

¹⁷ “Topẽ hã vỹ ẽg jógjóg ag kuprẽg ja nĩgtĩ. Ag tỹ tóg povo mág han, ag tỹ ver Egito tá nỹtĩn kỹ. Kar kỹ tóg tá ag kãpan mũ, ti jykre tar ẽn tỹ.

¹⁸ Ag to tóg fen mág mũ, ag tỹ ẽmã tũ ja mĩ mũn kỹ, prỹg tỹ 40 (ke) ẽn ki.

¹⁹ Povo tỹ 7 (ke) tỹ tóg tũ' he mũ, ga tỹ Canaã tá. Kỹ tóg ẽg jógjóg ag mỹ ag ga ẽn fig mũ, tỹ ag tũ nĩ jé.

²⁰ Kỹ tóg ag mỹ pã'i ag vin mũ gé, ag jyvẽn ke mũ ag, 100 tỹ 4 kri 50 anos ki. Kar kỹ Samuel vỹ Topẽ vĩ tó tĩ nĩ gé.

²¹ Kỹ ag tóg pã'i mág ve sór mũ. Kỹ ag tóg Topẽ mỹ to vĩ mũ. Hã kỹ Topẽ tóg Saul fẽg mũ, Quis kósin ẽn. Benjamim krẽ'krẽ ũ vẽ, Saul ti. 40 anos ki tóg tỹ pã'i mág nĩ.

²² Ti tỹ ẽn kutẽm kar kỹ tóg Davi fẽg mũ, Topẽ ti. Davi to tóg vĩ há han mũ, kỹ tóg: “Davi ve sóg, Jessé kósin,” he mũ. “Nén há han tóg tĩgtĩ. Kỹ sóg ti to há nĩ. Ẽn hã vỹ inh jykre kar han ke mũ,” he tóg, Topẽ ti, Davi to,” he tóg, Paulo ti.

²³ “Davi krẽ'krẽ ũ vẽ, hã vỹ: Jesus, he mũ. Topẽ vỹ vãsỹ ti kãtĩg ke tó ja nĩgtĩ. Kỹ tóg vãhã Jesus jẽnẽ ja nĩ, ẽg povo tỹ Judeu to, ti tỹ ẽg kren han jé.

²⁴ João vỹ ti kãtĩg ke jo vẽnh kar mỹ: “ãjag jykre tovãnh ra, isỹ ãjag kygpe jé,” he ja nĩgtĩ, ẽg povo tỹ Judeu kar mỹ.

²⁵ João rãnhrãj tỹ tũ' henh ken kỹ tóg ag mỹ: iso ãjag tóg Cristo he sór mũ, he ja nĩgtĩ. Hã tũ vẽ. Inh pijé tỹ Cristo nĩ'. Ha vé, inh nón tóg kãtĩg ke mũ, inh Senhor ti, hã vỹ: Jesus, he mũ. Sỹ tỹ ti mỹ rãnhrãj tĩ nĩnh ke vẽ vẽ, sỹ ti pẽn né kunũ jé, hã ra sóg tỹ ti krẽm ke pẽ jẽ, he ja tóg nĩ, João ti,” he tóg, Paulo ti.

²⁶ “Inh kanhkã', Abraão krẽ', ũ tỹ Topẽ kamẽg mũ', fóg kã mĩ'. Topẽ vỹ ẽg hã mỹ vẽnh vĩ tag jẽnẽ, ẽg krenkren jé.

²⁷ Jerusalém tá ke ag vỹ Jesus ki kagtĩg ja nỹtĩgtĩ. Ti tỹ tỹ Topẽ kósin nĩn ki kagtĩg ja ag tóg nỹtĩgtĩ, ag pã'i ag ke gé. Hã kỹ ag tóg vãsỹ rán kỹ nĩ ẽn han. Vẽnhkán ke kurã ki ag tóg vég tĩ, Topẽ vĩ tó tĩ ag tỹ nén rán ja ti. Hã ra ag tóg sir ag tỹ nén tó mũ ẽn ki króm, ag tỹ Jesus to: “ter jé tóg ke mũ, “ hen kỹ.

²⁸ Nén ũ kórég han ja tũ ti nĩ, kỹ ti ter ke tũ vẽ vẽ, hã ra ag tóg Pilatos mỹ: “ẽg tỹ ti tén há tóg tĩ vẽ,” he ja nĩgtĩ.

²⁹ Ag tỹ ti to rán kỹ nĩ ẽn ki króm kãn kỹ ag tóg krunh ẽn to ti térem ja nĩgtĩ, kỹ ag tóg vẽnh kej kã tá ti fi ja nĩgtĩ.

³⁰ Hã ra Topẽ tóg ti rĩn mãn ja nĩgtĩ, ti ter mũ ra.

³¹ Kỹ tóg ti mré ke ag mỹ vẽnh ven ja nĩgtĩ sir, Jesus ti, ũ tỹ ti mré Jerusalém ra mũ ja ag mỹ, Galiléia tá kãmũ kỹ. Ẽn ag tóg ti kãmén mũ sir, vẽnh kar mỹ.

³² Vẽnh vĩ tag tó ẽg tóg mũ,” he tóg, Paulo ti.

³³ “Ẽg jógjóg ag vỹ Topẽ vĩ ẽn mẽ ja nĩgtĩ. Hã ra tóg ũri han mũ, Topẽ ti, ti tỹ vãsỹ nén tó ja ẽn ti. Ẽg jógjóg ag krẽ'krẽ ag mỹ tóg han mũ, ti tỹ vãsỹ nén tó ja ẽn ti. Hã kỹ tóg Jesus rĩn mãn, ti ter kỹ. Kỹ tóg ti mỹ: “tỹ ã tóg inh kósin jẽ. Ũri sóg ã han,” he ja nĩgtĩ. Topẽ mỹ jãn jafã tỹ 2 ki tóg rán kỹ nĩ,” he tóg.

³⁴ “Hã ra tóg ti tỹ ti rĩn mãn ke tó ja nĩgtĩ gé, ti mur ke to hã. Ti vag ke tũ ẽn tó ja tóg nĩgtĩ gé, kỹ tóg: “sỹ Davi mỹ nén tó ja ẽn han jé sóg ke mũ,” he ja nĩgtĩ. “Ãjag mỹ sóg han mũ, sỹ ti mỹ nén tó ja ẽn ti,” he ja tóg nĩgtĩ, Topẽ ti,” he tóg.

³⁵ “Kỹ tóg tag tó ja nĩgtĩ gé: “ã tũ vỹ vag ke tũ nĩ,” he ja tóg nĩgtĩ gé, Topẽ ti,” he tóg.

³⁶ “Hã ra Davi vỹ ter ja nĩgtĩ, ti jógjóg ag nón. Kỹ tóg vag ja nĩ inhhã. Topẽ tỹ ti mỹ nén tó mũ ki tóg króm ja nĩgtĩ. Ge ra tóg ter kỹ vag ja nĩgtĩ inhhã.

³⁷ Ti jãvo Jesus tóg vag ja tũ nĩ inhhã, Topẽ tỹ ti rĩn mãn kỹ,” he tóg.

³⁸ “Ha vé, inh kanhkã'! Jesus tugrĩn Topẽ vỹ ãjag mỹ vẽnh pãte fón sór mũ, ãjag tỹ ti vĩ mranh ja ti. Hã kỹ sóg ãjag mỹ tó mũ.

³⁹ Ãjag tỹ Moisés vĩ mẽg mũ ra ãjag jykre tóg kuryj ja tũ nĩ ver. Ãjag tỹ hã ra Jesus ki ge kỹ tóg ãjag kugrynh ke mũ sir, Topẽ ti.

⁴⁰ Hã ra ti to é he tũg nĩ. Ke tũ nĩ mũ ra ãjag tóg venh ke mũ, vãsỹ Topẽ vĩ tó tĩ tỹ nén tó ja ẽn ti,

⁴¹ hã vỹ: iso ãjag tóg é he mũ, he mũ. Sỹ nén han mũ ve jé ãjag tóg ke mũ, kỹ ãjag tóg kanẽ jur ke mũ, he ja tóg nĩgtĩ, Topẽ ti. Ãjag tỹ kri finh ke tũ vẽ vẽ, ũ tỹ ãjag mỹ tó mũ ra. Hã ra ãjag tóg venh ke mũ, he ja tóg nĩgtĩ, Topẽ vĩ tó tĩ ti,” he tóg, Paulo ti.

⁴² Ag tỹ Paulo vĩ mẽ kar kỹ ag tóg ĩn ẽn kã tá kãpa mũ. Kỹ ag tóg ti mỹ: “vẽnh kán ke kurã ũ kã ẽg mỹ kãmén mãn nĩ,” he mũ.

⁴³ Kỹ Judeu tỹ hẽn ri ke ag tóg Paulo ag nón mũ mũ. Fóg ag tóg ag nón mũ mũ gé, fóg tỹ Judeu jykre han mũ ag, ũ tỹ Topẽ kamẽg mũ ag. Kỹ Paulo ag tóg ag jyvẽn mũ, ag tỹ Topẽ to tar nỹtĩ jé, ag tỹ ti tỹ ẽg jagãgtãn to jykrén kỹ nỹtĩ jé.

⁴⁴ Vẽnhkán ke kurã ũ kã ẽmã ẽn tá ke kar ag vỹ vẽnh mãn mũ, Topẽ vĩ jẽmẽ jé.

⁴⁵ Kỹ Judeu ag tóg ũn e ẽn ag vég mũ. Kỹ ag tóg jũgjũ mũ, vẽnh kar tỹ Paulo ag to há nỹtĩn kỹ. Hã kỹ ag tóg Paulo vĩ kafãn mũ sir, ti tỹ ag mỹ Topẽ vĩ tón kỹ. Ti to ag tóg vĩ vĩ he mũ gé.

⁴⁶ Hã ra Paulo ag tóg ag kamẽg tũ nĩ. Ag mỹ ag tóg: “ãjag hã mỹ ẽg tóg tó vén, Topẽ vĩ ti,” he mũ, “ti tỹ ẽg mỹ: Judeu ag mỹ tó vén, hen kỹ. Hã ra ãjag tóg mẽ jãvãnh nỹtĩ, kỹ ãjag tóg ẽg rĩr krỹg ja tũ venh ke tũ nĩ. Hã kỹ ẽg tóg sir fóg ag hã mỹ tónh ke mũ, Topẽ vĩ ti,” he ag tóg.

⁴⁷ “Topẽ vỹ ẽg mỹ: ãjag tỹ sóg néj gru ri ke han mũ, he mũ, fóg kar ag tỹ ãjag ki Topẽ ve jé, kanhgág ag ke gé. Ãjag ki ag tóg mẽnh ke mũ, Jesus tỹ ag krenkren han ke ti, fag ke gé, ga fyn ja mĩ hã, he ja tóg nĩ ẽg mỹ, Topẽ ti,” he ag tóg, Paulo ag.

⁴⁸ Fóg ag tỹ tag mẽ kỹ tóg ag mỹ sér tĩ sir. Kỹ ag tóg Topẽ vĩ to há nỹtĩ, ti mỹ vĩ há han kỹ. Kỹ ag tóg Jesus ki ge mũ, Topẽ tỹ ũn kuprẽg mũ ag, ag tỹ ẽg rĩr krỹg ja tũ ve jé.

⁴⁹ Kỹ ga ẽn tá ke kar ag vỹ Topẽ vĩ jẽmẽg mũ.

⁵⁰ Hã ra Judeu ag tóg ũn tỹtá há ũ fag mré vĩ mũ, fóg tỹ Judeu jykre han mũ fag. Pã'i ag mré ag tóg vĩ mũ gé. Paulo ag kato ag tóg vĩ mũ. Kỹ ag tóg ag vóg kónãn mũ. “Ha mũ jẽg, ẽmã ũ ra,” he ag tóg mũ sir, ag vóg kónãn kar kỹ.

⁵¹ Kỹ Paulo ag tóg ag pẽn kykũkũg mũ, ag mỹ: “Topẽ tovãnh ãjag huri,” he jé. Kỹ ag tóg ẽmã tỹ Icônio ra mũ mũ sir.

⁵² Jesus mré ke ag mỹ tóg hã ra sér tĩ. Topẽ kuprĩg vỹ tỹ ag jagrẽ nĩ, kỹ tóg ag mỹ sér tĩ sir.