तीतुस 3 - बिलासपुरी नौआं नियममसीह लोकां रा बर्ताव 1 विश्वासियां जो याद दिला भई सै राजयां कने अधिकारियां रे अधीन रौ, तिन्हांरा हुक्म मन्नो, कने हरेक खरे कम्मां खातर त्यार रौ, 2 किसी जो बदनाम नीं करो, झगड़ने औल़े नीं बणो; पर दुज्यां लोकां रे प्रति दयालु हो, कने सब्बीं माहणुआं ने बड़िया नम्रता सौगी रौ। 3 काँह्भई अहें बी पैहले मूर्ख, परमेशरा जो नीं मनणे औल़े, कने धोखे च पईरे लोक थे, कने हरेक किस्मा री लालसां कने भोग विलासा रे दास थे। अहें अपणी जिन्दगी बुराई, कने जल़ण करने च बिताई, कने दुज्यां लोकें अहाते नफरत कित्ती, कने अहें तिन्हांते नफरत कित्ती। 4 पर ताहली जे अहांरा छुटकारा देणे औल़े परमेशरा री कृपा कने प्रेम माहणुआं पर प्रगट हुआ, 5 तां तिने अहांरे पापां रिया सजा ते अहांजो बचाया; कने ये भलयां कम्मां रिया वजह ते नीं, सै जे अहें अप्पूँ कित्ते थे, पर अपणी दया रिया वजह ते। परमेशरे अहांजो नया जीवन दित्या कने तिने अहांरे पापां जो अहांते दूर करीने इक नये तरिके ने बर्ताव करने खातर अहांरी मदद कित्ती; तिने अहांरे अन्दर पवित्र आत्मा जो रखणे रे जरिये ये कित्या। 6 परमेशरे मुख्ता च अहांजो अहांरा छुटकारा करने औल़े यीशु मसीह रे जरिये पवित्र आत्मा दित्या, 7 ताकि अहें तिसरे अनुग्रह रे जरिये परमेशरा रिया नज़राँ च धर्मी बणी सक्को, कने अनन्त जीवन पाणे रे खातर आशा करी सक्को, सै जे परमेशरे अहांजो देणे रा वायदा कित्तिरा। 8 सै गल्लां जे मैं लिखी रियां सै सच्चियां इ, कने हऊँ चांह भई तू इन्हां गल्लां रे बारे च मजबूतिया ने बोल्लो, ताकि तिन्हें जे परमेशरा पर विश्वासा कित्या, सै भले कम्मां च लगी रैहणे खातर ध्यान देओ। ये गल्लां भली कने सब्बीं रे फायदे रियां इ। 9 पर मूर्ख बैहस, पूर्वजां रियां वंशावलियां री बैहस, व्यवस्था रे बारे च झगड़े कने वाद-विवादा ते दूर रै; काँह्भई ये सब बेकार कने फायदे रे नींये। 10 सै माहणु जे कलीसिया च फूट पां तिस्सो इक या दो बार चेतावनी दे, कने इसते बाद तिसते लग रै, 11 तू जाणाँ भई येढ़ा माहणु भटकी गरा, कने तिसरे अपणे बुरे काम्म ये साबित कराँ ये भई सै दोषी आ। आखरी निर्देश कने नमस्कार 12 ताहली जे हऊँ तेरले अरतिमास या तुखिकुस जो भेजूँ, तां मेरले निकुपुलिस नगरा जो औणे री पूरी कोशिश करयां, काँह्भई मैं तित्थी ठण्डा रा मौसम कटणे रा निश्चा कित्तिरा। 13 ताहली जे जेनास नामक व्यवस्थापक कने अपुल्लोस यात्रा करने रे खातर त्यार हुणे, तां जितणी तू मदद करी सक्कां उतणी तिन्हांरी मदद कर, ताकि यात्रा खातर जो किछ तिन्हांजो चाहिन्दा सै सब तिन्हांले हो। 14 अहांरे लोक बी जरूरतां जो पूरा करने खातर भलयां कम्मां च लगी रैहणा सिखो, ताकि सै बेकार जिन्दगी नीं जींगे। 15 मेरे सौगी रैहणे औल़े सारे विश्वासी तिज्जो नमस्कार बोलां ये। अहांरे साथी विश्वासियो सै जे अहांने प्रेम रखां ये, तिन्हांजो नमस्कार बोल्यों। हऊँ प्राथना कराँ भई परमेशरा रा अनुग्रह तुहां सब्बीं पर बणीरा रौ। |
This work is licensed under Creative Commons Attribution-ShareAlike 4.0 License.