तीतुस 2 - बिलासपुरी नौआं नियम

कलीसिया रे लग-लग समूहा जो निर्देश

¹ पर तीतुस, तेरी शिक्षा सच्चिया शिक्षा साई हूणी चाहिन्दी।

² बजुर्गां जो अनुशासित कने हरेक हालता च अपणे बर्ताव कने भावनां जो काबू करने खातर कने ईज्जतदार हुणे खातर, कने विश्वास, प्यार, कने धीरजा च मजबूत हुणे खातर निर्देश देओ।

³ इस तरिके ने बजुर्ग औरतां जो जीणे खातर सखां तिसते जे परमेशरा रा आदर हुआं; सै दोष लाणे औल़ियां कने पियक्कड़ नीं, पर खरियां गल्लां सखाणे औल़ियां हो

⁴ ताकि सै जवान औरतां जो ये सखाई सक्को भई तिन्हांजो अपणे पतियां कने बच्चयां ने कियां प्यार करना चाहिन्दा;

⁵ कने अपणे बर्तावा जो काबू करने औल़ियां, कने अपणे पतियां रे प्रति बफादार, परिवारा री देखभाल करने औल़ियां, दुज्यां रे प्रति दयालु कने अपणे-अपणे पतिये रे अधीन रैहणे औल़ियां हो, ताकि कोई परमेशरा रे वचना री निंध्या नीं करी सक्को।

⁶ इस तरिके ने जवान मर्दां जो बी अपणा बर्ताव काबू करने खातर विनती कर।

⁷ तिज्जो हर गल्ला च खरयां कम्मां रे जरिए उदाहरण पेश करना चाहिन्दा, तिसरा जे दूज्जे लोक हमेशा पालन करी सक्को। ताहली जे तू विश्वासियां जो परमेशरा रे बारे च सखां, तां तिज्जो खरे ईरादे ने सखाणा चाहिन्दा कने इस तरीके ने भई लोक तेरा आदर करो।

⁸ कने सै सिखा सै जे सच्च आ कने तिसरी जे कोई निंध्या नीं करी सक्को, ताकि तेरे शत्रु शर्मिन्दा हो, काँह्भई किछ बी बुरा नीं हुणा सै जे सै अहांरे बरोधा च बोल्ली सक्को।

⁹ विश्वासी सै जे दास ए, तिन्हांजो सखा भई सै अपणे-अपणे मालकां रे अधीन रौ। तिन्हांजो दस्स भई सै हर गल्ला च अपणे स्वामियां जो खुश करने री कोशिश करो कने तिन्हा ने झगड़ा नीं करो;

¹⁰ कने चोरी चलाकी नीं करो; पर ये साबित करो भई सै हमेशा ईमानदार ए, ताकि लोक तिन्हांरे खरे बर्तावा पर ध्यान देओ कने जो किछ बी सै करां ए सै लोकां रे जरिए अहांरे छुटकारा करने औल़े परमेशरा रे बारे च सन्देश सुनाणे री वजह बणो।

¹¹ विश्वासियां जो इस तरीके ने सिखा, काँह्भई परमेशरे सारयां लोकां जो पापा ते छडवाणे रा रस्ता दस्सीने अपणा अनुग्रह प्रगट कित्तिरा।

¹² परमेशर अपणे अनुग्रह रिया वजह ते अहांजो सिखां भई तेढ़ा वर्ताव करना बन्द करा सै जे तिस्सो खुश नीं करदा कने तिन्हां चीजां रा लालच नीं करो तिन्हांरी इच्छा जे अविश्वासी लोक करां ए, कने जबकि अहें हल्तियें इसा इ पृथ्विया पर ए, तां समझदारिया ने कने धार्मिकता सौगी इस तरीके ने काम्म करा सै जे परमेशरा जो खुश करां।

¹³ अहें इस तरीके ने वर्ताव करां ए ताहली जे अहें उम्मीदा सौगी तिस अदभुत दिना रा इन्तजार करी रांए, तिसरी जे अहांजो आशा इ: सै दिन ताहली जे यीशु मसीह, सै जे अहांरा महान परमेशर कने छुटकारा करने औल़ा, अपणी सारी महिमा सौगी पृथ्विया पर वापिस औणा।

¹⁴ तिने अप्पूँजो अहांरे खातर बलिदान करित्या ताकि अहांजो हरेक पापा ते छडवाई लो कने शुद्ध करीने अपणे खास लोक बणाई लो, सै जे भले काम्म करने च पूरे समर्पित ये।

¹⁵ इस खातर तीतुस हऊँ चाँह भई तू क्रेते टापुए रे विश्वासियां जो ये गल्लां सखा सै जे मैं तिज्जो दस्सी रियां। अपणयां लोकां तिन्हांजो करने रे खातर प्रोत्साहन दे, तित्थी तक जे जरुरी हो, तित्थी तिन्हां च सुधार कर। तिज्जो येढ़ा करने रा पूरा अधिकार आ। ध्यान रख भई सै जे किछ तू सिखां, कोई बी तिज्जो अनदेखा नीं करो।