रोमियो 9 - बिलासपुरी नौआं नियम

परमेशर कने तिसरे चुणीरे लोक

¹ हऊँ मसीह रा, कने मेरा दिल कने पवित्र आत्मा ये पक्का कराँ ये भई हऊँ सच्च बोलां कने हऊँ झूठ नीं बोलीराँ

² ताहली जे हऊँ बोलां भई मेरा दुख कितना बड्डा, कने मेरे अपणे लोकां यनि मेरे यहूदी भाई भैणां रे खातर मेरे दिला च कितना दर्द आ।

³ तिन्हां रिया भलाईया रे खातर हऊँ ये चाँह था भई हऊँ खुद परमेशरा रे श्रापा रे अधीन हुईने मसीह ते लग हुई जान्दा।

⁴ सै इस्राएली लोक ये, तिन्हांजो जे परमेशरे गोद लेईरा कने पुत्र हुणे रा अधिकार दित्तिरा, सै जे परमेशरा रिया महिमा रा दर्शण करी बैठिरे, सै जे परमेशरा रे करारा रे भागीदार ये, तिन्हांजो जे मूसा री व्यवस्था दित्ति गईरी कने सच्ची अराधना कने परमेशरा रे वायदे तिन्हांरे इ हाये।

⁵ अब्राहम, इसहाक कने याकूब तिन्हांरे पूर्वज ये, कने सै जे यीशु मसीह रे बी पूर्वज थे, सै जे परमेशर आ कने सै जे सब्बीं रे ऊपर राज कराँ, तिसरी हमेशा प्रशंसा ओ! आमीन।

⁶ पर येढ़ा निआं भई परमेशरे अपणा वायदा पूरा नीं कित्या, काँह्भई सै जे इस्राएल रे बंशज ये, हकीकत च सै सारे इस्राएली नींये;

⁷ कने नांई अब्राहम रे वंशज हुणे रिया वजह ने सै सारे तिसरे सच्चे बच्चे बणी जान्दे, काँह्भई परमेशरे अब्राहम जो बोल्या था, “सै जे इसहाक रे वंशा ते जन्म लें सैई तेरे बंशज मन्ने जाणे।”

⁸ यनिके इसरा मतलब ये निआं भई सारे अब्राहम रे बच्चे परमेशरा रे बच्चे मन्ने जाणे, पर सिर्फ वायदे रे बच्चे इ अब्राहम रे वंशज मन्ने जाणे।

⁹ काँह्भई परमेशरे इस तरिके ने वायदा कित्या था, “मांह अगले साल इस वगत दोबारा औणा, कने सारा ते इक पुत्र हूणा।”

¹⁰ इतणा इ नीं पर रिबका रे जुड़वा बच्चयां रा इक इ पिता था, सै जे अहांरा पूर्वज इसहाक था।

^11-12 जुड़वा बच्चयां रे जमणे ते पैहले कने सै किछ बी भला बुरा करने ते पैहले परमेशरे रिबका जो बोल्या, भई “तेरे बड्डे बेटे छोट्टे री सेवा करनी।” परमेशरे ये दसणे खातर ये बोल्या भई सै अपणा चुनाब खुद कराँ कने इसरी वजह ये नीं थी भई तिन्हां चते किन्हिये किछ कित्या था।

¹³ तियां जे पवित्रशास्त्रा च लिखिरा, “पर मैं याकूब जो चुणया कने एसाव रा इन्कार कित्या।”

¹⁴ इस खातर अहें क्या बोलिये? क्या परमेशर अन्यायी आ? कदीं मनी।

¹⁵ काँह्भई परमेशर मूसा ने बोलां, “हऊँ जिस किसी पर बी दया करना चाऊँ तिस पर दया करगा, कने जिस किसी पर किरपा करना चाऊँ तिस पर बी किरपा करगा।”

¹⁶ इस खातर ये नांत किसी माहणुये रिया इच्छा पर निर्भर कराँ कने नां किसी रे कोशिश करने पर वल्कि दया करने औल़े परमेशरा पर निर्भर कराँ।

¹⁷ काँह्भई पवित्रशास्त्रा च परमेशरे मिस्र देशा रे राजे (फिरौन) जो गलाया था, “मैं तिज्जो इस खातर राजा बणाया था भई तेरा इस्तेमाल करीने हऊँ सब्बीं जो अपणी सामर्थ दस्सी सक्कूं, कने मेरा नौं हर जगह तित्थी जे लोक ये तिन्हौं प्रचार कित्या जाओ।”

¹⁸ इस खातर परमेशर जिस पर चाँह तिस पर दया कराँ कने तिस्सो जे चाँह तिस्सो कठोर बणाई देआं।

परमेशरा रा कोप कने तिसरी दया

¹⁹ तां तुहां चते कोई मिन्जो ये पुछगे, “जे ये येढ़ा, तां परमेशर काँह अहांजो दोष लगां? काँह्भई कोई बी परमेशरा जो उसते रोकी नीं सकता तिसजो जे सै करना चाँह।”

²⁰ मेरे मित्र, परमेशरा ने बैहस करने औल़ा तू कुण हुआं? क्या कोई रचना अपणे रचणे औल़े ते पुछी सक्कां इ, “तैं मिन्जो येढ़ा कजो बणाया?”

²¹ क्या किसी कम्हारा जो मिट्टिया पर ये अधिकार निआं भई मिट्टिया रे इक्की पेड़े ते इक भान्डा आदर करने खातर कने दुज्जे जो बेकदरिया रे खातर बणाओ?

²² तां इसच कुण जेई हैरानिया री गल्ल इ? हलाँकि परमेशरा जो अपणा गुस्सा कने अपणी शक्ति दिखाणे रा अधिकार आ, पर सै तिन्हां लोकां सौगी बौहत धैर्य रखां तिन्हांरे ऊपर जे तिसरा गुस्सा पौआं कने सै जे विनाशा रे खातर तैह आ।

²³ कने परमेशरे बी अपणी जादा महिमा परगट करने खातर अहांजो तिसते भरीत्या सै जे तिसरिया दया रिया वजह ने हुया, अहां चते तिन्हांजो परमेशरे अपणी महिमा पाणे खातर त्यार कित्तिरा।

²⁴ यनिके अहें सै चुणीरे लोक ये चाये अहें यहूदी ओ या अन्यजातियां रे ओ।

²⁵ तियां जे होशे भविष्यवक्ते रिया कताबा च परमेशर बोलां, “सै लोक जे मेरे नीं थे, तिन्हांजो मांह अपणे लोक बोलणा; कने मांह तिन्हांने प्यार करना, तिन्हांजो जे मैं पैहले प्यार नीं कित्या।

²⁶ कने येढ़ा हूणा भई तिसा जगह च परमेशरे तिन्हाने ये गलाया था भई तुहें मेरे लोक नींये, तिसा जगह पर सै जिऊंदा परमेशरा रे बच्चे कहलाणे।”

²⁷ कने यशायाह भविष्यवक्ता इस्राएल रे बारे च चिल्लाई ने बोलां, “चाये इस्राएली लोक समुद्रा रे रेता रे बराबर हो, तां बी तिन्हां चते सिर्फ थोड़े इ बचणे।

²⁸ काँह्भई प्रभुये बौहत जल्द, संसारा रे सारयां लोकां रा न्याय मजबूतिया ने करना।”

²⁹ तियां जे यशायाह भविष्यवक्ते पैहले बी गलाया था, “जे सर्वशक्तिमान प्रभु अहांरे खातर किछ बंशज नीं छडदा, तां अहें सदोम साई कने अमोरा साई हुई जान्दे।”

इस्राएल रा अविश्वास

³⁰ तां फेरी अहें क्या बोलिये? अहें इस नतीजे पर पुज्जे भई अन्यजातियां रे लोक सै जे धार्मिकता रिया खोज्जा च नीं थे, तिन्हे धार्मिकता पाई ली यनिके सै जे विश्वासा रिया वजह ने धर्मी बणाये गये,

³¹ पर इस्राएल रे लोक, सै जे येढ़िया व्यवस्था जो टोल़ीराँ थे सै जे तिन्हौं परमेशरा सौगी ठीक रक्खी सक्कां थी, पर तिन्हांजो नीं मिली।

³² कोई पुच्छी सक्कां, तिन्हांजो व्यवस्था काँह नीं मिली? काँह्भई सै अपणे खरयां कम्मां पर निर्भर थे, पर परमेशरा पर विश्वास नीं करदे थे, तिन्हे तिस पत्थरा ने ठोकर खाद्दि सै जे ठोकर देआं,

³³ तियां जे पवित्रशास्त्रा च लिखिरा, “ध्याना ने सुणा, हऊँ यरूशलेम च इक पत्थर रखां तिसते जे लोकां जो ठोकर लगणी कने सै गिरने, पर सै जे कोई तिस पर विश्वास कराँ सै कदीं शर्मिन्दा नीं हूणा।”