रोमियो 8 - बिलासपुरी नौआं नियम

पवित्र आत्मा रे जरिये जीवन

¹ इस खातर हुण सै जे मसीह यीशु पर विश्वास कराँ ए, तिन्हां पर सजा रा कोई हुक्म निआं।

² काँह्भई पवित्र आत्मे अहांजो जीवन देआं सै जे यीशु मसीह ते औआं कने मिन्जो पाप कने मौती ते अजाद करी देआं।

³ काँह्भई सै काम्म जे मूसा री व्यवस्था हमारे पापी स्वभावा रिया वजह ने कमजोर हुईने नीं करी सक्की, तिसजो परमेशरे कित्या, यनिके अपणे इ पुत्रा जो अहां पापियां साई हुणे रे खातर कने अहांरे पापा रा बलिदान हुणे रे खातर भेज्जीने, मसीह रे शरीरा रे जरिये परमेशरे पापा रिया सामर्था जो तोड़या।

⁴ परमेशरे ये इस खातर कित्या ताकि अहांरे पापी स्वभावा रे मुतावक नीं, पर पवित्र आत्मा रे मुतावक चलीने व्यवस्था सै हुक्म जे अहांजो देईं तिसरा अहें पालन करी सक्को।

⁵ सै लोक जे पापी स्वभावा रे मुतावक चलां ये सै पापा रे बारे च सोच्चां ये, पर सै लोक जे पवित्र आत्मा रे मुतावक जीवन जींये सै आत्मिक गल्लां रे बारे ची सोच्चां ये।

⁶ जे अहांरा मन अहांरे पापी स्वभावा रे जरिये चलां तां अहां मरना, पर जे अहांरा मन आत्मा रे जरिये चलां तां अहांले जीवन कने शान्ति हूणी।

⁷ काँह्भई पापी स्वभावा रे मुतावक चलना त परमेशरा ने बैर रखणा, काँह्भई नांत पापी स्वभाव परमेशरा रिया व्यवस्था रे अधीन आ कने नां तिसरिया व्यवस्था रा पालन करी सक्कां;

⁸ कने सै जे पापी स्वभावा रे मुतावक जींये, सै परमेशरा जो खुश नीं करी सकदे।

⁹ पर तां जे भई परमेशरा रा आत्मा तुहां च वास कराँ, तां तुहें पापी स्वभावा ने नीं पर पवित्र आत्मा रे मुतावक जीयें। जे किसी च मसीह रा आत्मा निआं तां सै मसीह रा जन नींआं।

¹⁰ पर जे मसीह तुहां च वास कराँ, हलाँकि पापा रिया वजह ने तुहांरे शरीराँ री मौत हूणी फेरी बी तुहांरा आत्मा जिऊंदा, काँह्भई परमेशरे तुहांजो धर्मिये रे रुपा च ग्रहण कित्तिरा।

¹¹ कने जे परमेशरा रा आत्मा तिने जे यीशु मसीह जो मूईरेयां चते जिऊंदा कित्या, तुहांरे अन्दर वास कराँ। तां सै परमेशर तिने जे यीशु मसीह जो मूईरयां चते जिऊंदा कित्या था, तुहांरे नाशवान शरीरा जो अपणी आत्मा ते सै जे तुहांरे अन्दर बसीरा, जिऊंदा करना।

¹² इस खातर मेरे साथी विश्वासियो, अहांजो इयां जीणा चाहिन्दा तियां जे परमेशरा रा आत्मा अहांने बोलां, पर अपणे पापी स्वभाव रे मुतावक नीं,

¹³ काँह्भई जे तुहें अपणे पापी स्वभावा रे मुतावक जींगे तां मरगे, पर जे तुहें पवित्र आत्मा रे मुतावक अपणे पापी स्वभावा रे कम्मां जो मारगे तां तुहां जिऊंदा रैहणा।

¹⁴ काँह्भई जितने लोक परमेशरा रिया आत्मा जो अपणे जीवना च अगुवाई करने री अनुमति दें, सैई परमेशरा रे बच्चे।

¹⁵ काँह्भई सै आत्मा जे तुहांजो मिलीरी, तुहांजो फेरी भीं दास बणीने डरने खातर नीं, वल्कि सै तुहांजो परमेशरा रे बच्चे बणाईं, तिसरे जरिये अहें परमेशरा जो, हे अब्बा, हे पिता करीने पुकाराँ ये।

¹⁶ पवित्र आत्मा कने अहांरा आत्मा दोन्नों बोलां ये भई अहें परमेशरा रे बच्चे;

¹⁷ काँह्भई अहें तिसरे बच्चे, इस खातर सै आशीष जे परमेशर अपणे लोकां खातर रखां तिसजो अहां पाणा, कने मसीह रे खातर बी सै जे परमेशरे रखीरा, तिस्सो बी अहां मसीह ने सौगी पाणा; काँह्भई जे अहें मसीह साई दुख सैं तां अहां बी तिस सौगी महिमा पाणी।

भबिष्य च परगट हुणे औल़ी महिमा

¹⁸ मिन्जो ये यकीन आ भई सै महिमा जे अहां पर परगट हुणे औल़ी तिसारे सामणे अहांरे ये दुख सै जे अहें हुण सही राँये किछ बी नींये।

¹⁹ काँह्भई ये सृष्टि बड़िया आशा ने तिसा घड़िया रा इन्तजार करी राईं ताहली जे परमेशरा अपणयां बच्चयां जो परगट करना।

²⁰ काँह्भई सै जे किछ परमेशरे बणाईरा, तिन्हें अपणी कीमत गवाईती, इस खातर नीं काँह्भई सै खुद चांह थे, पर परमेशरे येढ़ा कित्या था।

²¹ पर आशा इ भई सृष्टिया बी नाश हुणे ते छुटकारा पाणा कने परमेशरा रे बच्चयां री महिमा रिया अजादिया च भागीदार हूणा।

²² काँह्भई अहें जाणाँ ये भई आदमा रे पाप करने रे वगता ते अज्जा तक, येढ़ा लगा भई परमेशरा री सारी सृष्टि बच्चा जणने औल़िया इक्की जनाना साई पीड़ित हुआं इ।

²³ न सिर्फ ये सृष्टि बल्कि अहें बी तिन्हां च जे हुणे औल़ी महिमा रे पैहले ते स्वाद चखणे रे रुपा च पवित्र आत्मा रा निवास आ, खुद अन्दरा ते बिलखां ये; पर हुण परमेशर अहांजो सच्चे बच्चयां साई गोद लेणे रा इन्तजार कराँ, ये तां हूणा ताहली जे तिस अहांरे शरीराँ रा छुटकारा करी देणा।

^24-25 ताहली जे अहें बचाये गये तां परमेशरे अहांजो ये आशा दित्तिरी। अहें हल्तियें तक तिन्हां सारयां जो नीं पाईरा तिन्हाजो देणे रा जे परमेशरे वायदा कित्तिरा था, इस खातर अहें हुण बी तिस्सो पाणे री उम्मीद कराँ ये। कने इस खातर इस वगत धैर्य ने इन्तजार कराँ ये तदुआं तक जे अहें इस्सो पाई नीं लेन्दे।

²⁶ इस तरिके ने पवित्र आत्मा बी अहांरी कमजोरियां च मदद कराँ, काँह्भई अहें नीं जाणदे भई प्राथना किस तरिके ने करनी चाहिन्दी, पर पवित्र आत्मा खुद इ येढ़े सुसकार भरी-भरी ने, तिन्हारा जे शब्दां च ब्यान नीं कित्या जाई सकदी, अहांरे खातर विनती कराँ;

²⁷ पर मना जो जाँचणे औल़ा परमेशर जाणाँ भई पवित्र आत्मा क्या बोलीराँ? काँह्भई सै पवित्र लोकां रे खातर परमेशरा री इच्छा रे मुतावक विनती कराँ।

²⁸ अहें जाणाँ ये भई परमेशर तिन्हां सारयां लोकां रे खातर अच्छी चीजां ल्यौआं सै जे तिस्सो प्यार कराँ ये; यनिके तिन्हांरे खातर सै जे तिसरिया मर्जिया रे मुतावक तिस्सो जे तिने चुणीरा।

²⁹ काँह्भई तिन्हांजो जे तिने पैहले ते चुणीरा कने तैह कित्या भई सै तिसरे पुत्रा साई बणी जाओ ताकि तिसरा पुत्र कई भाईयां च पैहला हूणा।

³⁰ फेरी तिन्हांजो जे तिने पैहले ते तैह कित्या, तिन्हाजो बी तिने चुणया, कने सै जे तिने चुणे, सै तिने धर्मी घोषित कित्ते, कने तिन्हाजो जे तिने धर्मी घोषित कित्या, तिन्हां सौगी तिने अपणी महिमा बी बन्डी।

परमेशरा रा अनन्त प्यार

³¹ इन्हां सारयां जो ध्याना च रखदे हुये, अहें ये बोल्ली सक्कां ये भई जे परमेशर अहां सौगी आ, तां कोई अहांजो हराई नीं सकदा।

³² परमेशरे अपणे पुत्रा जो बी नीं बचाया, पर तिस्सो अहां सारयां रे खातर अपणे दुश्मणा रे हवाले करित्या, तिस अहांजो अपणे पुत्रा सौगी सै सब किछ देणा तिस्सो देणे रा जे तिने अहांने वायदा कित्तिरा था।

³³ कोई बी अहांजो परमेशरा रे सामणे दोष नीं देई सकदा काँह्भई सैई हाया सै जे अहांजो धर्मी घोषित कराँ।

³⁴ कोई बी अहांरी निन्दा नीं करी सकदा, काँह्भई ये यीशु मसीह आ सै जे अहांरे खातर मरया कने मूईरयां चते जिऊंदा हुया, हुण परमेशरा रे सज्जे पासे आ कने सै जे अहांरे खातर विनती बी कराँ।

³⁵ किछ बी अहांजो मसीह रे प्यारा ते लग नीं करी सकदा। नां कलेश, या संकट, या अत्याचार, या नकाल़, या नंगापन, या जोखिम, या तलवार।

³⁶ तियां जे पवित्रशास्त्रा च लिखिरा, “परमेशरा रे खातर हर रोज लोक अहांजो मारने री धमकी दें; कने अहां लोकां जो सै बढणे औल़ी भेड्डां साई समझां ये।”

³⁷ फेरी भीं तिसरे जरिये तिने जे अहांने प्यार कित्या, इन्हां सब बुरियां गल्लां च अहांरी पूरी जीत इ।

^38-39 काँह्भई हऊँ निश्चित आ भई परमेशरा रा प्यार सै जे अहांरे प्रभु यीशु मसीह चे तिसते किछ बी अहांजो लग नीं करी सकदा; इसते कोई फर्क नीं पौन्दा भई अहें मरी जायें या जिऊंदा रैं; स्वर्गदूत, राजा, उपरा रियां या थल्ले रियां शक्तियां अहांजो परमेशरा रे प्यारा ते लग करने च सामर्थी नींआ, हुण क्या हुया राँ कने भविष्य च क्या हूणा कने नां कोई सृष्टि अहांजो तिसरे प्यारा ते लग करी पांगे।