रोमियो 4 - बिलासपुरी नौआं नियम

अब्राहम विश्वासा ते धर्मी बणया

¹ हुण अहें यहूदी हुणे रे नाते अपणे पूर्वज अब्राहम रे बारे च क्या बोलिए? कने तिसरा तजुरबा क्या था?

² जे अब्राहमा जो तिसरे कम्मां रिया वजह ने धर्मी बणाया हुन्दा, तां ये तिसरे खातर घमण्डा री गल्ल थी; पर परमेशरा रे सामणे सै घमण्ड नीं करी सकदा।

³ पवित्रशास्त्र क्या बोलां? “अब्राहमे परमेशरा पर विश्वास कित्या कने तिसरे विश्वासा रिया वजह ने परमेशरे तिस्सो धर्मिये रे रुपा च ग्रहण कित्या।”

⁴ काम्म करने औल़े जो मजदूरी देणा कोई दान निआं, पर हक समझया जां।

⁵ माहणुये रे किसी कम्मा रिया वजह ते परमेशर तिसजो धर्मिये रे रुपा च ग्रहण नीं करदा, पर सै जे पापी लोकां जो धर्मी बनाणे औल़े परमेशरा पर विश्वास करां, तिसरा विश्वास तिसरे खातर धार्मिकता गिणया गया।

⁶ तियां इ दाऊद राजे तिस बारे च लिखिरा भई कियां परमेशर तिस माहणुये जो आशीष देआं तिसते जे परमेशर बगैर कम्मां ते धर्मी बणां :

⁷ भई “परमेशर तिन्हां लोकां जो आशीष देआं तिन्हांरे पाप जे माफ हुये, कने तिन्हारे बुरे काम्म माफ हुये।

⁸ परमेशर तिन्हां लोकां जो आशीष देआं तिन्हांरे पाप जे तिसरिया किताबा चते मिटाईतरे।”

⁹ तां ये आशीषां क्या खतना औल़यां रे खातर इ हाईयां या तिन्हारा जे खतना नीं हुईरा तिन्हांरे खातर बी हाईयां? अहें येढ़ा बोलां ये, “अब्राहमे परमेशरा पर विश्वास कित्या कने तिसरे विश्वासा रिया वजह ने परमेशरे तिस्सो धर्मिये रे रुपा च ग्रहण कित्या।”

¹⁰ पर ये कदीं हुया? ताहली जे तिसरा खतना हुई चुक्कीरा था या ताहली जे सै बिणा खतने ते था? खतना हुणे ते बाद नीं, पर खतना हुणे ते पैहले।

¹¹ तिसरा खतना बाद बिच हुईरा था, कने तिसरा खतना ये दिखाणे रा इक निशाण था भई तिसरे विश्वासा रिया वजह ने परमेशरे तिस्सो धर्मिये रे रुपा च ग्रहण कित्या था जबकि तिसरा खतना नीं हुईरा था। इस खातर परमेशरा पर विश्वास करने औल़े कने तिसरे इ जरिये धर्मिये रे रुपा च ग्रहण कित्तिरे सारयां लोकां रा आत्मिक पिता अब्राहम आ, हलाँकि तिन्हांरा खतना नीं हुईरा।

¹² अब्राहम खतना औल़यां रा बी आत्मिक पिता, पर तिन्हारा बी आ जे सै परमेशरा पर विश्वास करीने अहांरे पूर्वज अब्राहमा साई जीवन बितायें, तियां जे सै खतने ते पैहले जीया था।

बिश्वासा रे जरिये वायदे रा मिलणा

¹³ ताहली जे परमेशरे ये वायदा अब्राहम कने तिसरे वंशां ने कित्या था भई तिस तिन्हांजो ये संसार देणा। ये वायदा इस खातर नीं कित्या गया था भई अब्राहमे व्यवस्था रा पालन कित्या था, वल्कि परमेशरा पर तिसरे विश्वासा रिया वजह ने सै धर्मी गिणया गया।

¹⁴ जे अब्राहम कने तिसरे वंशा ने ये वायदा कित्या गया था भई तिन्हें व्यवस्था रा पालन कित्या था, तां विश्वास रा कोई मतलब नीं रैई जान्दा कने वायदा बी बेकार हुई जां।

¹⁵ ताहली जे लोक व्यवस्था रा पालन नीं करदे, तां परमेशर गुस्से हुआं, पर तित्थी जे व्यवस्था नीं तित्थी व्यवस्था रा तोड़ना बी निआं।

¹⁶ इस खातर, विश्वासा रे जरिये परमेशरा रा वायदा औआं, ताकि वायदा परमेशरा रे अनुग्रह रे जरिये अब्राहम रे सारे वंशां रे खातर पक्का हुई सक्को। न सिर्फ तिन्हां खातर सै जे व्यवस्था रा पालन कराँ ये बल्कि तिन्हां सारयां खातर बी सै जे अब्राहमा साई विश्वास रखां ये, सै जे अहां सारयां रा पूर्वज आ,

¹⁷ तियां जे पवित्रशास्त्र बोलां, भई “अब्राहम कई जातियां रा पूर्वज हूणा।” ये वायदा अब्राहमा ने इस खातर कित्या गया था, काँह्भई तिसरा विश्वास परमेशरा पर था, सै जे मूईरयां जो जिन्दगी देआं कने नई चीजां री सृष्टि कराँ।

¹⁸ अब्राहमे विश्वास कित्या कने आशा रखी, हलाँकि ताहली जे आशा करने री कोई वजह नीं थी, इसा वजह ने “सै बौहत सारी जातियां रा पूर्वज बणया।” काँह्भई परमेशरे तिसने बोल्या था, “तेरा वंश येढ़ा हूणा।”

¹⁹ सै तकरीवन सौआ साल्ला रा था, अपणे मूईरे शरीरा कने सारा रे मूईरे गर्भा रिया दशा जो जाणीने बी विश्वासा च कमजोर नीं हुया,

²⁰ फेरी बी तिने परमेशरा रे वायदे पर विश्वास बणाईने रखया, इतणा इ नीं, अपणे विश्वासा जो होर जादा मजबूत करदे हुये परमेशरा जो आदर कने महिमा दित्ति।

²¹ तिस्सो पूरा विश्वास था भई परमेशरे सै वायदा जे तिसने कित्या था, तिस्सो पूरा करने च सै पूरी तरह सामर्थी आ।

²² इस खातर, परमेशरे तिस्सो धर्मिये रे रुपा च ग्रहण कित्या।

²³ कने ये वचन, “तिस्सो धर्मिये रे रुपा च ग्रहण कित्या गया था,” न सिर्फ अब्राहमा खातर इ लिखया हुया था,

²⁴ बल्कि अहांरे खातर बी लिखया हुया था, काँह्भई अहें बी परमेशरा पर विश्वास करने रिया वजह ने धर्मिये रे रुपा च ग्रहण कित्ते जाणे, तिने जे अहांरे प्रभु यीशु मसीह जो मूईरआं चते जिऊंदा कित्या।

²⁵ यीशु मसीह तिस्सो जे अहांरे पापां रे खातर मारने जो सौंपया गया था, कने भीं ते परमेशरे तिस्सो जिऊंदा कित्या, ताकि परमेशर अहांजो धर्मिये रे रुपा च ग्रहण करी सक्को।