रोमियो 3 - बिलासपुरी नौआं नियम

¹ तां यहूदी हुणे रा क्या फायदा या खतने री क्या कीमत इ?

² हाँ, इसरी बौहत बड्डी कीमत इ। काँह्भई पैहले हत्थे परमेशरा रा बचन यहूदी लोकां जोई सौंपीरा।

³ जे तिन्हां चते किछ धोखेबाज बी हुईगे तां क्या हुया? क्या तिन्हांरे धोखेबाज हुणे ते परमेशरा री सच्चाई बेकार हुई जाणी?

⁴ कदीं मनी! जे हर कोई झूट्ठा बी हुई जांगा, तां बी परमेशर सच्चा इ रैहणा, तियां जे पवित्रशास्त्र परमेशरा रे बारे च बोलां, “जिसते तुहें अपणियां गल्लां च सही साबित हुणे कने अपणा मुकद्दमा तुहां जीतणा।”

⁵ इस खातर जे अहांरे बुरे काम्म ये परगट करो भई परमेशर सही आ, तां अहें क्या बोल्ली सक्कां ये? क्या ये परमेशरा रे खातर गल़त आ भई सै गुस्सा करो कने अहौं सजा देओ? (हऊँ अपणी ये गल्ल माहणुये रे स्वभावा पर बोलीराँ)।

⁶ कदी बी नीं! जे परमेशर सही नींआ, तां सै संसारा रा न्याय कदीं नीं करी सकदा।

⁷ पर कोई ये स्वाल करी सक्कां, जे मेरे झूट्ठा रिया वजह ने परमेशरा री सच्चाई तिसरिया महिमा रे खातर जादा करीने परगट हुई, तां फेरी कांह् मिन्जो पापिये साई सजा रे लैक समझया जां?

⁸ “अहें कांह् बुराई नीं करिये भई तिसते जे भलाई प्रगट हुई जाओ?” तियां जे भई अहांरे बारे च निंध्या करदे हुये किछ लोक अहां पर दोष लगायें, भई अहें येढ़ा बोलां ये। पर येढ़े लोक त सजा रे काबिल हुणे चाहिन्दे।

कोई धर्मी निआं

⁹ तां फेरी क्या अहें यहूदी अन्यजातियां ते खरे? नां बिल्कुल नीं, काँह्भई अहें दस्सी चुक्कीरे भई चाये कोई यहूदी ओ या अन्यजातियां रे लोक ओ, सारे पापां रे बशा चे।

¹⁰ तियां जे पवित्रशास्त्र बोलां, “परमेशरा रे सामणे कोई बी धर्मी निआं, इक बी नीं।

¹¹ कोई बी माहणु नीं समझदा भई क्या ठीक आ; कोई बी परमेशरा जो जाणना नीं चाहन्दा।

¹² सारे परमेशरा ते भटकीरे, सारे रे सारे तिसरे खातर बेकार हुईगरे; कोई भलाई करने औल़ा निआं, इक बी नीं।

¹³ तिन्हांरे मुँह खुल्हिया कब्रा साई बदबूदार हुईगरे, सै अपणियां गल्लां ते छल-कपट कराँ ये, तिन्हांरियां गल्लां नागां रे बिषा साई आं।

¹⁴ तिन्हांरे मुँह शरापा ने कने नफरता ने भरीरे रैं।

¹⁵ सै किसी रा खून करने जो मिनट नीं लगान्दे,

¹⁶ सै तित्थी जे किति जायें नाश इ कराँ ये कने दुख इ दें,

¹⁷ सै नीं जाणदे भई शान्तिया ने कियां रैहणा।

¹⁸ तिन्हां च परमेशरा रा कोई डर निआं।”

¹⁹ हुण अहें ये जाणाँ ये भई व्यवस्था सै जे किछ बोलां इ सै तिन्हांने इ बोलां इ, सै जे व्यवस्था रे मुतावक चलां ये; इस खातर भई हर इक मुँह बन्द कित्या जाओ कने सारे संसारा रे लोक परमेशरा री सजा रे लायक ठैहरो;

²⁰ काँह्भई व्यवस्था रा पालन करने ते कोई बी माहणु परमेशरा रे सामणे धर्मी नीं हूणा, पर व्यवस्था माहणुआं जो ये जाणने च मदद कराँ इ भई तिन्हें पाप कित्तिरा।

विश्वासा रे जरिये परमेशरा री धार्मिकता

²¹ पर हुण बिणा व्यवस्था रे पालन करने ते परमेशरा री धार्मिकता परगट हुई, तिसरी गवाही जे व्यवस्था कने भविष्यवक्ता दें,

²² यनिके सारे विश्वासियां खातर यीशु मसीह पर विश्वास करने ते परमेशरा री धार्मिकता बिणा किसी भेदभावा रे परगट हुई;

²³ इस खातर भई सारयां पाप कित्तिरा कने सारे परमेशरा रिया महिमा ते दूर ये,

²⁴ पर परमेशरा रे अनुग्रह ते तिने अहांजो यीशु मसीह रे जरिये मुख्ता च ग्रहण कित्या कने अहांरे पापां रिया सजा ते छुटकारा दित्या।

^25-26 परमेशरे यीशु मसीह जो अहांरे पापां रे खातर बलिदान हुणे जो भेज्या कने मसीहे अपणा खून्न बहाया ताकि तिस पर विश्वास करने रे जरिये अहें परमेशरा ले आई सक्को। परमेशरे ये दसणे खातर येढ़ा कित्या भई पैहले सै सहनशील कने पापियां जो माफ करने च सही था। यह ये बी दस्सां भई परमेशर सही आ ताहली जे सै मसीह पर विश्वास करने औल़यां जो ग्रहण कराँ।

²⁷ तां फेरी येढ़ि कोई गल्ल इ तिसरे बारे च जे अहें घमण्ड करी सक्कां ये? किछ बी नींआ! कने इसरी वजह क्या इ? क्या ये इसरी वजह इ भई अहें व्यवस्था रा पालन कराँ ये? नां, पर ये यीशु मसीह पर विश्वास करने रिया बजह नेआ।

²⁸ इस खातर अहें जाणाँ ये भई माहणु व्यवस्था रा पालन करने ते नीं, पर विश्वासा रे जरिये इ परमेशरा रिया नज़राँ च धर्मी बणी सक्कां।

²⁹ क्या परमेशर सिर्फ यहूदियां राई परमेशर हाया? क्या सै अन्यजातियां रा परमेशर निआं? हाँ, परमेशर तिन्हांरा बी आ।

³⁰ काँह्भई इक इ परमेशर आ, सै जे खतना औल़यां जो विश्वासा ने कने बिणा खतना औल़यां जो बी विश्वासा रे जरिये धर्मी बणां।

³¹ तां क्या अहें व्यवस्था जो अहांरे विश्वासा रे जरिये खत्म करी रायें? कदीं मनी! पर अहें त व्यवस्था जो तिसरी सही कीमत देई राँये।