रोमियो 13 - बिलासपुरी नौआं नियम

राज रे प्रति कर्तब्य

¹ हर इक्की माहणुये जो अधिकारियां रे अधीन रैहणा चाहिन्दा, काँह्भई कोई अधिकार येढ़ा निआं सै जे परमेशरा रिया तरफा ते निआं; कने सै जे अधिकार ये, सै परमेशरे दित्तिरे।

² इस खातर सै जे अधिकारिये रा बिरोध कराँ सै परमेशरा रे हुक्मा रा बिरोध कराँ, कने सै लोक जे परमेशरा रे हुक्मां रा बिरोध कराँ ये, तिन्हांजो सजा भुगतणे पौणी।

³ काँह्भई देक्खा राजा तिस माहणुये जो नीं डरान्दा, सै जे नेकी कमाँ, पर तिस माहणुये जो डराँ, सै जे बुरे काम्म कराँ। जे तुहें राजे ते नीं डरना चाहन्दे ओ, तां भले काम्म करदे रौआ, तुहांजो राजे रिया तरफा ते सराहना मिलणी;

⁴ सै जे राजा सै परमेशरा रा सेवक आ, सै तेरा भला करने खातर आ, पर जे तू बुरा कराँ तां तिसते डर, काँह्भई तिने तलवार बेमतलब नीं लेईरी; सै परमेशरा रा सेवक आ सै जे बुरा काम्म करने औल़यां पर परमेशरा रा कोप ल्यौआं।

⁵ इस खातर राजे रे प्रति तुहांरा समर्पण जरूरी आ, ये समर्पण सजा ते डरीने नीं हूणा चाहिन्दा, पर तुहांरिया आत्मा रिया गहराईया ने हूणा चाहिन्दा।

⁶ इस खातर तुहांजो टैक्स बी देणा चाहिन्दा, काँह्भई अधिकारी परमेशरा रे सेवक ये सै जे अपणे फर्जां जो पूरा करने च समर्पित रैं।

⁷ जिस किसी माहणुये री देणदारी जे तिज्जो देणे जोई, तिसजो तू चुकता कर; सै टैक्स जे तिज्जो देणे जोआ, तिस्सो दे। तिसरी चुंगी जे तूह पर निकल़ां इ, तिसजो चुंगी दे; तू सब अधिकारियां रे प्रति आदर दास्स।

पड़ेसिये ने प्यार

⁸ इक्की दुज्जे रे प्यारा ते इलावा किसी गल्ला च किसी रे कर्जदार नीं हुआ; काँह्भई सै जे अपणे साथियां ने प्यार कराँ, सै येढ़ा करीने व्यवस्था जोई पूरा कराँ।

⁹ काँह्भई मूसा री व्यवस्था च बौहत सारे हुक्म ये तियां जे, “व्यभिचार मत कर, खून मत कर, चोरी मत कर, लालच मत रख।” कने इन्हांजो छड्डिने होर कोई बी हुक्म ओ, तां सब्बीं रा निचोड़ इसा गल्ला च पाया जां, “अपणे पड़ेसिये ने अप्पूँ साई प्यार कर।”

¹⁰ प्यार अपणे पड़ेसिये रा बुरा कदीं नीं करदा, इस खातर सै जे प्यार कराँ सै व्यवस्था जो पूरा कराँ।

¹¹ इस खातर वगता जो समझीने ये करा। तुहें जाणाँ ये भई तुहांरे खातर अपणिया निन्दा ते जागणे रा बगत आई गरा, काँह्भई ताहली जे अहें विश्वास कित्या था, तिस वगता रे विचारा ने अहांरा छुटकारा हुण तिसते होर नेड़े आ।

¹² ये येढ़ा भई रात तकरीवन खत्म हुई चुक्कीरी, कने दिन सिरने जोआ; इस खातर अन्धकारा ने जुड़ीरे सारयां कम्मां जो करना बन्द करा कने जोतिया च रैहणे खातर त्यार हुई जावा।

¹³ इस खातर औआ अहें तिन्हां लोकां साई ठीक ढंगा ने व्यवहार करना शुरु करिये सै जे जोतिया च रैं कने अन्धकारा च नीं। कने तुहांजो हरेक किस्मा री नशाखोरी कने दुराचारा च शामिल नीं हूणा चाहिन्दा; कने तुहांजो इक्की दूये ने लड़ाई कने हिरख नीं करना चाहिन्दा।

¹⁴ बल्कि प्रभु यीशु मसीह साई जीओ, कने जिस्मा री इच्छां जो पूरा करने री कोशिश नीं करा।