रोमियो 11 - बिलासपुरी नौआं नियम

इस्राएल पर परमेशरा री दया

¹ इस खातर हऊँ पुच्छां, क्या परमेशरे अपणयां लोकां जो छडित्या? विल्कुल नीं! काँह्भई हऊँ बी इक इस्राएली आ; अब्राहम रे वंशा ते कने बिन्यामीन रे गोत्रा चते आ।

² परमेशरे अपणे सै लोक नीं छड्डे, सै जे तिने पैहले ते चुणीरे थे। क्या तुहें नीं जाणदे भई एलिय्याह भविष्यवक्ते रे बारे च पवित्रशास्त्र क्या बोलां; भई जिसा कहाणिया पर सै इस्राएल रे बिरोधा च परमेशरा ने विनती कराँ?

³ तिने बोल्या, “प्रभु जी, तिन्हे तेरे भविष्यवक्ता मारीते, कने तेरी बेदियां तोड़ीने तहस-नहस करी तियां; कने हऊँ इ कल्हा भविष्यवक्ता सै जे जिऊंदा बचीरा कने सै जे तुहां पर विश्वास कराँ, कने हुण सै मिन्जो बी मारने री कोशिश करी रायें।”

⁴ पर परमेशरे एलिय्याह जो जबाब दित्या, “मैं अपणे खातर सात्त हजार मर्द बचाईने रखीरे, तिन्हेंजे बाल देबता रे अग्गे मत्था नीं टेक्कया।”

⁵ तियां इ आज्ज कल बी किछ येढ़े लोक बचीरे तिन्हौं जे परमेशरे अपणे अनुग्रह रिया वजह ने चुणीरा।

⁶ कने जे सै परमेशरा रे अनुग्रह ने हुया, तां लोक सै जे कर्म कराँ ये, ये तिन्हां कर्मां रा नतीजा निआं; नैत परमेशरा रा अनुग्रह फेरी अनुग्रह नीं रैया।

⁷ इस खातर नतीजा क्या हुया? ये भई इस्राएल रे लोक तिस्सो जे टोल़ीराँ थे, सै तिन्हांजो नीं मिलया; पर चुणी रेआं जो सै मिलया, कने बचीरे लोकां रे मन कठोर बणाईते।

⁸ तियां जे पवित्रशास्त्रा च लिखिरा, “परमेशरे तिन्हांरे मन कने दिलां जो सुस्त कित्या, तिन्हौं येढ़ियां आक्खीं दित्तियां ताकि सै देक्खी नीं सक्को कने येढ़े कान्न दित्ते सै जे सुणी नीं सकदे थे, कने ठीक येई दशा आज्ज तक बणीरी।”

⁹ कने राजा दाऊद बोलां, “हऊँ परमेशरा ने प्राथना कराँ भई सै तिन्हांजो तिन्हांरे त्योहारा पर पकड़ी सक्को कने तिन्हांजो फसाई सक्को, कने परमेशर तिन्हांजो झुकाओ कने तिन्हांजो सजा देई सक्को।

¹⁰ तिन्हांरियां आक्खीं अन्ही हुई जाओ तिसते जे सै देक्खी नीं सक्को, कने परमेशर तिन्हांजो तिन्हांरी परेशानियां री वजह ने दुखी करी सक्को।”

¹¹ फेरी हऊँ पुच्छां ताहली जे इस्राएली लोक गिरे, तां क्या तिन्हांरा गिरना तिन्हांरे खातर नाश होणे री वजह बणया? विल्कुल नीं! पर तिन्हारे अविश्वासा रिया वजह ने अन्यजातियां जो छुटकारा मिलया ताकि यहूदियां जो जल़ण हुईजो।

¹² जे तिन्हांरे अविश्वासा रिया वजह ने अन्यजातियां रा भला हुया, तां हकीकत च अन्यजातियां रे प्रति बौहत इ अच्छा हूणा ताहली जे इस्राएली लोक परमेशरा ले वापस औणे।

अन्यजातियां रा छुटकारा: कलम लगाणे रा उदाहरण

¹³ ये हुण हऊँ तुहांजो बोल्ली कराँ, सै जे यहूदी नींये, काँह्भई हऊँ खास कर अन्यजातियां रे खातर प्रेरित आ, तां मिन्जो अपणिया सेवकाईया पर गर्व आ,

¹⁴ ताकि इस आशा ने भई हऊँ अपणे लोकां च बी जल़ण पैदा करी सक्कूं कने तिन्हां चते कईयां लोकां रा छुटकारा करी सक्कूं।

¹⁵ काँह्भई जे परमेशरा रे जरिये तिन्हारे इन्कार कित्ते जाणे ते संसारा रे लोकां रा परमेशरा सौगी मेल-मलापा री वजह बणया, तां फेरी तिन्हांरा परमेशरा रे जरिये ग्रहण कित्या जाणा क्या मूईरयां चते जिऊंदा कित्या जाणे रे बराबर नीं हूणा?

¹⁶ काँह्भई अब्राहम कने होर पूर्वज बी पवित्र थे तां तिन्हांरे वंश बी पवित्र हुणे, तियां जे परमेशरा जो दित्या गया भेन्टा रा पैहला पेड़ा पवित्र आ, तां गुन्हिँरा पूरा आट्टा बी पवित्र हुया; जे डाल़ा री जड़ पवित्र इ, तां तिसरियां डाल़ियां बी पवित्र हुईयां।

¹⁷ इस्राएली लोक जैतून डाल़ां रियां डाल़ियां साई ये कने पूर्वज अब्राहम, इसहाक कने याकूब डाल़ां रियां जड़ां साई ये। जे किछ डाल़ियां तोड़ी दित्तियां जाओ, कने तुहें अन्यजातियां रे लोक जंगली डाल़ां रियां डाल़ियां साई ये कने तिन्हां डाल़ां पर कलम कित्ते गईरे तां तुहें तिन्हां जैतून रे खरयां डाल़ां री जड़ां री खुराका रा हिस्सा हुईगे,

¹⁸ तां तिज्जो तिन्हां डाल़ियां रे अग्गे घमण्ड नीं करना चाहिन्दा, सै जे तोड़ीने सट्टि दित्ति रियां; कने जे तू घमण्ड कराँ तां याद रखयां भई तू जड़ां जो नी पाल़ीराँ, पर येत सै जड़ इ सै जे तिज्जो पाल़ी कराँ ईं।

¹⁹ फेरी तू बोलणा, “हाँ, पर डाल़ियां इस खातर तोड़ियां भई मेरी कलम लगी जाओ।”

²⁰ ये सच्च आ, सै तिन्हांरे अविश्वासा रिया वजह ने तोड़ीने सट्टीतियां, पर तुहें अपणे विश्वासा रे दमा पर अपणिया जगह टिक्कीरे रैयों, इस खातर इसरा घमण्ड देखां करदे बल्कि डरदे रैयां,

²¹ काँह्भई तां जे परमेशरे असली डाल़ियां पर दया नीं कित्ती, तां तिस तूह पर बी दया नीं करनी।

²² इस खातर तू परमेशरा रिया दया जो देख कने तिसरिया सख्तिया पर ध्यान दे। सै सख्ती तिन्हांरे खातर इ सै जे अविश्वासा रिया वजह ने गिरीगरे पर तिसरी दया तेरे खातर इ, तू अप्पूँ पर तिसरी दया बणीरी रैहणे दे, नैत डाल़ा ते तू बी बड्डीने सट्टि दित्या जाणा।

²³ जे सै बी मसीह पर विश्वास कराँ ये, तां सै बी डाल़ा ने कलमा साई जोड़ी दित्ते जाणे; काँह्भई परमेशर तिन्हांजो भीं ते जोड़ने च सामर्थी आ।

²⁴ काँह्भई जे तू तिस जैतून्ना रे डाल़ा ते, सै जे स्वाभावा च जंगली आ, बड्डया कने तिसरे स्वाभावा रे बिरुद्ध खरे जैतून्ना रे डाल़ा पर लगाया, तां ये जे तिस डाल़ा री अपणियां इ डाल़ियां इयां, अपणे इ डाल़ा पर सानिया ने फेरी भीं कांह् नीं जोड़ी जाई सकदियां।

सारे इस्राएल रा छुटकारा

²⁵ अन्यजातियां रे मेरे साथी विश्वासियो, हऊँ चाँह भई तुहें इस भेता जो समझो ताकि तुहें अपणे बारे च घमण्ड नीं करो। इस्राएल रे किछ लोक येढ़े इ कठोर बणाई दित्तिरे, कने येढ़े इ कठोर बणीने रैहणे तदुआं तक जे भई कई अन्यजातियां रे लोक मसीह च नीं आई जाणे।

²⁶ कने इस तरिके ने सारे इस्राएल रा छुटकारा हूणा। तियां जे पवित्रशास्त्रा च लिखिरा, “छुटकारा करने औल़ा यरूशलेम ते औणा, कने याकूबा इस्रायली लोकां ते सारी बुराईयां दूर करनियां;

²⁷ कने तिन्हां सौगी मेरी ये वाचा तां हूणी, ताहली जे हऊँ तिन्हांरे पापां जो माफ करी देंगा।”

²⁸ तित्थी तक जे खुशखबरिया रा सबन्ध आ, सै तुहांरे खातर परमेशरा रे दुश्मण ये, पर तित्थी तक जे परमेशरा रे चुणे जाणे रा सबन्ध आ, तिन्हांरे पूर्वजां जो दित्तिरे बचना रिया वजह ने परमेशर तिन्हांजो प्यार कराँ।

²⁹ काँह्भई परमेशर अपणे बरदानां ते कने अपणिया बुलाहटा ते कदीं अपणा मन नीं बदलदा।

^30-31 काँह्भई तियां जे तुहें लोक पैहले कदीं परमेशरा रा हुक्म नीं मनदे थे, पर हुण इस्रायली लोकां रे हुक्म नीं मनणे रिया वजह ते परमेशरा री दया तुहां पर हुईरी; काँह्भई तुहां पर दया हुईरी, तां तिन्हां पर बी दया हूणी,

³² काभई सारयां लोकें परमेशरा रा हुक्म नीं मन्नया इस खातर सै कैदिये साई बणीगरे। पर परमेशरे ये इस खातर कित्या ताकि सै तिन्हां सब्बीं पर दया करी सक्को।

परमेशरा री स्तुति

³³ ओह! हकीकत च परमेशर सारयां रे खातर भला कने सै बौहत बुद्धिमान कने ज्ञानी आ। कोई बी तिसरे विचाराँ रा बखान करी नीं सकदा, कने कोई बी तिसरे मार्गां जो समझी नीं सकदा।

³⁴ तियां जे पवित्रशास्त्र बोलां : “कोई बी नीं जाणदा भई प्रभु कियां सोच्चां; कने कोई तिस्सो सलाह देई नीं सकदा।

³⁵ किन्हिये बी परमेशरा जो किछ नीं दित्या भई सै तिन्हौं तिसरा भुगतान करी सक्को।”

³⁶ काँह्भई सब किछ परमेशरा तेई औंआं। तिने सब किछ बणाईरा कने सब किछ तिसरा इ हाया। तिसजो सदा आदर मिलदा रौ। आमीन।