रोमियो 10 - बिलासपुरी नौआं नियम

¹ मेरे साथी विश्वासियो, ये मेरे दिला री इच्छा इ कने हऊँ परमेशरा ने इस्राएल रे लोकां खातर प्राथना कराँ भई तिन्हांरा छुटकारा ओ।

² काँह्भई हऊँ जाणाँ भई तिन्हां च परमेशरा रे प्रति उत्साह हया, पर तिन्हांरा ये उत्साह सच्चे ज्ञाना रे मुतावक नींआ।

³ काँह्भई सै तिसा धार्मिकता जो नीं जाणी पाये सै जे परमेशरा ते मिलां इ, कने तिन्हें अपणी इ धार्मिकता जो बनाणे री कोशिश कित्ती, इस खातर तिन्हे परमेशरा रिया धार्मिकता रे खातर अप्पूँजो नीं सौंपया।

⁴ काँह्भई मसीह तिस मकसदा जो पूरा करी चुक्कीरा, जिस मकसदा खातर जे व्यवस्था दित्ति गई थी, ताकि सै जे कोई तिस पर विश्वास करो सै परमेशरा रिया नज़राँ च धर्मी हुई सक्को।

छुटकारा सबनीं रे खातर

⁵ मूसे ये लिखिरा भई धार्मिकता व्यवस्था रा पालन करने ते मिलां इ : “सै जे कोई व्यवस्था रे हुक्मां रा पालन कराँ सै जिऊंदा रैहणा”

⁶ पर विश्वासा ते मिलणे औल़ी धार्मिकता रे बारे च, पवित्रशास्त्र ये बोलां, “तू अप्पूँ ते ये मत पुछदा भई स्वर्गा जो किस जाणा?” (यनिके मसीह जो थल्ले लौणे खातर!)

⁷ या, ये मत पुछणा भई “थल्ले अधोलोका च किस जाणा?” (यनिके मसीह जो मूईरेयां चते जिऊंदा करीने ऊपर लौणे खातर!)

⁸ पर पवित्रशास्त्र ये बोल्लां, “परमेशरा रा बचन तेरे नेड़े आ, तेरे मुँआं पर आ कने तेरे मना चा,” ये सै वचन आ, सै जे अहांजो परमेशरा पर विश्वास करने रे बारे च बोलां, तिसरा जे अहें प्रचार कराँ ये।

⁹ जे तू अपणे मुँआं ते स्वीकार करो, भई यीशु मसीह प्रभु आ, कने तू अपणे दिला ते ये विश्वास करो, भई परमेशरे तिस्सो मूईरयां चते जिऊंदा कित्या, तां तिज्जो परमेशरा छुटकारा देणा।

¹⁰ काँह्भई अहांरे विश्वासा रे जरिये माहणु परमेशरा रियां नज़राँ च धर्मी बणां कने अपणे मुँआं ते स्वीकार करने रे जरिये अहें छुटकारा पाया।

¹¹ काँह्भई पवित्रशास्त्र ये बोलां, “सै जे कोई तिस पर विश्वास करगा तिस शर्मिन्दा नीं हूणा।”

¹² ये इस खातर आ भई यहूदियां कने अन्यजातियां च कोई फर्क निआं, काँह्भई सारयां रा प्रभु त इक इ हाया कने सै जे तिसजो पुकाराँ ये तिन्हांजो सै बौहत आशीष देआं।

¹³ काँह्भई, “सै जे कोई प्रभुये जो पुकारगा, तिसरा इ छुटकारा हूणा।”

इस्राएल रा खुशखबरिया जो नकारना

¹⁴ पर सै जे प्रभुये पर विश्वास नीं करदे, सै तिस्सो कियां पुकारगे? कने सै तिन्हे जे तिसरे बारे च सुणया इ निआं, तिस पर कियां विश्वास करी पांगे? कने फेरी भला तदुआं तक जे कोई तिन्हांजो तिसरे बारे च प्रचार नीं करगा, सै कियां सुणी पांगे?

¹⁵ कने जे कोई तिन्हांजो प्रचार करने जो नीं भेज्या जाओ, तां सै कियां दस्सी सक्कां ये? तियां जे पवित्रशास्त्रा च लिखिरा, “खुशखबरी ल्यौणे औल़यां रे चरण कितणे छैल़ ये, सै जे खुशखबरी सणवायें।”

¹⁶ पर सारयां तिसा खुशखबरिया पर विश्वास नीं कित्या : यशायाह भविष्यवक्ता बोलां, “प्रभु, अहांरे सन्देशा पर कोई विश्वास नीं करदा”

¹⁷ इस खातर ताहली जे तुहें सन्देश सुणां ये, तां विश्वास औआं, कने सन्देश यीशु मसीह रा बचन आ।

¹⁸ पर हऊँ बोलां, “सच्चीजो यहूदी लोकें परमेशरा रा सन्देश सुणीरा” काँह्भई पवित्रशास्त्रा च लिखिरा, “तिन्हांरे बोलीरे बचन सारिया धरतिया पर, कने तिन्हांरे बचन संसारा री सारियां जगहां च पुज्जी चुक्कीरे।”

¹⁹ ये सच्च आ भई इस्राएली लोक परमेशरा रे सन्देशा जो समझीगे। पैहले मूसा रे जरिये प्रभु ये बोल्लां, “मांह तिन्हांरे जरिये इस्राएली लोकां जो जल़ण कराणी सै जे सच्चमुच कोई जाति नींये; मांह मूर्ख जाति रे जरिये तुहांजो गुस्सा दिलाणा।”

²⁰ फेरी यशायाह भविष्यवक्ता परमेशरा रे खातर बड़िया हिम्मता ने बोलां, “सै जे मिन्जो नीं खोज्जां थे, तिन्हें मिन्जो पाईल्या: कने सै जे मिन्जो पुछदे बी नीं थे, तिन्हां पर हऊँ प्रगट हुईग्या।”

²¹ पर परमेशरे इस्राएली लोकां रे बारे च गलाया, “हुक्म नीं मनणे औल़े अपणे सारे विरोधियां जो अप्पूँ ले वापस औणे रे खातर हऊँ सारा दिन सददा रैयाँ।”