रोमियो 1 - बिलासपुरी नौआं नियम

नमस्कार

¹ हऊँ पौलुस यीशु मसीह रा दास आ कने प्रेरित होणे रे खातर परमेशरा रे जरिये चुणया गया, कने परमेशरा रिया खुशखबरिया रा प्रचार करने खातर लग कित्या गया।

² तिसरी पैहले तेई तिने अपणे भविष्यवक्तयां रे जरिये पवित्रशास्त्रा च,

³ अपणे पुत्र अहांरे प्रभु यीशु मसीह रिया खुशखबरिया रे बारे च प्रतिज्ञा कित्तिरी थी; सै जे माहणुये रे रुपा च राजा दाऊद रे बंशा ते पैदा हुया,

⁴ कने पवित्र आत्मा रे जरिये यीशु मसीह मूईरेयां चते जिऊंदा हुईने सामर्था सौगी परमेशरा रा पुत्र घोषित कित्या गया।

⁵ मसीह रे जरिये अहांजो अनुग्रह कने प्रेरित हुणे रा गौरब मिलया ताकि तिसरे नौआं रिया वजह ने सारी जातियां रे लोक विश्वास करीने तिसरे हुक्मा जो मन्नो,

⁶ तिन्हां चते तुहें लोक बी यीशु मसीह रे हुणे खातर सद्दीरे।

⁷ हऊँ ये चिट्ठी रोम नगरा च रैहणे औल़े तुहां सारयां जो लिखिराँ तिन्हौं जे परमेशर प्यार कराँ कने अपणे पवित्र लोक हुणे खातर चुणीरा। अहांरे पिता परमेशर कने प्रभु यीशु मसीह रिया तरफा ते तुहांजो अनुग्रह कने शान्ति मिलदी रौ।

धन्यवाद री प्राथना

⁸ सब्बीं ते पैहले हऊँ तुहां सबनीं रे खातर यीशु मसीह रे जरिये अपणे परमेशरा रा धन्यवाद कराँ, काँह्भई मसीह पर तुहांरे विश्वासा री चर्चा सारे संसारा रे लोकां च हुया राईं।

⁹ परमेशर तिसरी सेवा जे हऊँ अपणे पूरे दिला ते तिसरे पुत्रा री खुशखबरिया रा प्रचार करने रे जरिये कराँ, सैई मेरा गवाह भई हऊँ कियां तुहांजो हमेशा अपणियां प्राथनां च याद करदा रैयां,

¹⁰ कने हऊँ अपणिया हरेक प्राथना च सदा येई विनती कराँ भई परमेशरा रिया इच्छा ते, किसी न किसी तरिके ने मिन्जो आखिर च तुहांले औणे रा मौका मिलो।

¹¹ काँह्भई मेरी बौहत इच्छा इ भई हऊँ तुहांजो मिलीने तुहांजो आशीषां बंडी सक्कूँ सै जे परमेशरा रे आत्मे मिन्जो दित्ति रियां, ताकि तुहें विश्वासा च मजबूत हुई सक्को;

¹² यनि मेरा मतलब येआ भई ताहली जे हऊँ तुहांले होऊं, तां अहें तिस विश्वासा रे जरिये सै जे माह च कने तुहां चा, इक्की दुज्जे ते प्रेरणा पाओ।

¹³ मेरे साथी विश्वासियो, हऊँ नीं चांहन्दा भई तुहें इसते अंजाण रौ भई मैं तुहांले बार-बार औणा चाहया ताकि हऊँ तुहांरी आत्मिक तरक्किया च मदद करी सक्कूँ, तियां जे अन्यजातियां रे लोकां रे बिच कित्तिरा, पर हुण तक किसी वजह ने रुकिरा रैया।

¹⁴ ये मतलब नींआ भई पढ़े लिखे कने यूनानी भाषा जाणने औल़े लोक ओ या असभ्य लोक ओ, या समझदार या नासमझ ओ, मांह सारयां जो खुशखबरी सुनाणी।

¹⁵ इस खातर हऊँ तुहां रोम वासियां जो बी खुशखबरिया रा सन्देश सुनाणे जो बौहत इच्छुक आ।

खुशखबरिया री सामर्थ

¹⁶ हऊँ यीशु मसीह रिया खुशखबरिया रे बारे च गर्व कराँ, काँह्भई सै हरेक विश्वास करने औल़े जो छुटकारा देणे रे खातर परमेशरा री सामर्थ इ, फेरी चाये पैहले सै यहूदी ओ या फेरी अन्यजातियां रे लोक ओ।

¹⁷ काँह्भई खुशखबरी अहांजो ये दस्सां इ भई परमेशर कियां माहणुये जो अपणिया नज़राँ च धर्मी बणाँ; सै शुरु ते लेईने आखिर तक विश्वासा पर टिकिरा; तियां जे भई पवित्रशास्त्रा च लिखिरा, “धर्मी माहणु विश्वासा ते जिऊंदा रैहणा।”

माहणु जाति रा पाप

¹⁸ परमेशरा रा गुस्सा स्वर्गा ते तिन्हां सारे अविश्वासी कने पापी लोकां रे ऊपर भड़कां सै जे सच्चाईया जो अपणिया बुराईया ने दबाई रखां ये।

¹⁹ काँह्भई ये सब लोक जाणी सक्कां ये भई परमेशर केढ़ा, काँह्भई परमेशरे खुद अप्पूँजो तिन्हां पर परगट कित्तिरा।

²⁰ काँह्भई परमेशरा री अनन्त सामर्थ कने स्वाभाव कोई बी देक्खी नीं सकदा। पर संसारा रिया सृष्टिया रे बगता तेई परमेशरे अपणे कम्मां रे जरिये ये साफ-साफ दस्सीरा। इस खातर लोकां ले कोई बहान्ना निआं।

²¹ जबकि सै परमेशरा जो जाणाँ ये, पर सै तिस्सो परमेशरा रे रुपा च आदर या धन्यवाद नीं देन्दे, बल्कि सै उट-पटांग सोचणे लगे, कने तिन्हांरे दमाग फिरी गरे।

²² हलाँकि तिन्हें अप्पूँजो समझदार हुणे रा दावा कित्या, पर सै मूर्ख बणिगे,

²³ कने तिन्हें तेजोमय कने अविनाशी परमेशरा री अराधना करने रे बजाय, तिन्हें नाश हुणे औल़े माहणुआं, चिड़ियां, पशुआं कने सर्पां साई मूर्तियां री अराधना कित्ती।

²⁴ इस खातर परमेशरे सै मनां रियां लालसां रे मुतावक बुरी इच्छां रे बशा च करी ते; तिसरिया वजह ते जे सै बुरयां कम्मां च पैईने इक्की-दूये रे जिस्मां रा अनादर करने लगे।

²⁵ काँह्भई तिन्हे परमेशरा रिया सच्चाईया जो छड्डिने झूट्ठा पर विश्वास कित्या कने परमेशरा री बणाईरी चिज़ां री अराधना कने सेवा कित्ती, पर सै दुनिया रे बनाणे औल़े जो भुल्ली गये, सै जे सदा प्रशंसा रे काबिल आ! आमीन।

²⁶ इस खातर परमेशरे तिन्हांजो बुरी इच्छां रे बशा च करित्या; येत्थी तक भई तिन्हां रियें जनानें बी अपणा सिधा-साधा स्वाभाव छड्डिने बासना रा बुरा स्वाभाव अपणाईल्या।

²⁷ तियां इ मर्दें बी जनानां ने अपणा स्वाभाविक गलाणा छडित्या कने सै अप्पूँ चियें बासना रिया अग्गी च जल़णे लगे, कने मर्दें-मर्दा ने बेशर्म काम्म कित्या इसा बुराईया रिया वजह ने परमेशरे तिन्हांजो ठीक सजा दित्ति।

²⁸ कने काँह्भई तिन्हे परमेशरा जो पछयाणने ते मना करित्या, इस खातर परमेशरे तिन्हौं तिन्हांरे मूर्ख बचाराँ पर छड्डीत्या, कने सै येढ़े बुरे काम्म करने लगे सै जे तिन्हौं नीं करने चाहिन्दे थे।

²⁹ इस खातर सै हर तरह रे अधर्म, पाप, लालच, कने बैरभावा ने भरीगे; सै हिरख, खून करना, लड़ाई झगड़े, छल-कपट कने बुरयां विचाराँ ने भरीरे; कने दुज्जेयां रा सदा बुराई सोच्चया।

³⁰ सै कहाणियां मढ़दे रैं, सै निंध्या करने औल़े, कने परमेशरा ते नफरत करने औल़े, दुज्जेयां री बेज्जति करने औल़े, घमण्डी, डींग मारने औल़े, बुरा करने खातर नई-नई स्कीमां बनाणे औल़े कने माता-पिता रा हुक्म नीं मनणे औल़े,

³¹ निहरे मूर्ख, विश्वास तोड़ने औल़े, कठोर कने निर्दयी माहणु हुईगरे।

³² इयां त सै परमेशरा री विधि जाणाँ ये भई येढ़ि जिन्दगी जीणे औल़े मौती रिया सजा रे हकदार ये, तां बी न सिर्फ सै अप्पूँ इस तरिके रे काम्म कराँ ये, पर येढ़े काम्म करने औल़यां ते सै बड़े खुश हुआं ये।