प्रकाशितवाक्य 9 - बिलासपुरी नौआं नियमपँजवीं तुरही 1 ताहली जे पँजवें स्वर्गदूते अपणी तुरही बजाई, तां मैं स्वर्गा ते धरतिया परा इक तारा टिरदा देख्या, कने तिस्सो अथाह कुण्डा री चाबियां दित्तियां गईयां। 2 ताहली जे तिने अथाह कुण्डा जो खोल्या, तां कुण्डा चते बड्डिया भट्ठिया साई धुआँ निकल़या, सूरज कने अम्बर दोयो तिस धुआँ ने अन्धेरे हुईगे। 3 तिस धुआँ चते धरतिया पर टिड्डियां भरीगियां कने तिन्हांजो धरतिया रे बिच्छुये साई ताकत दित्ति गई। 4 तिन्हौं ये हुक्म बी दित्या गया भई सै नां धरतिया रे घा, नां किसी पेड़-पौधे रा नुक्शान करयां, पर सिर्फ तिन्हां माहणुआं रा नुक्शान करयां तिन्हांरे मत्थे पर जे परमेशरा री सील नीं। 5 तिन्हौं जानी ते मारने रा हक नीं दित्या गया, पर पंज्जां महीनयाँ तक पीड़ा देणे री इजाज़त थी। कने तिन्हांरी पीड़ा येढ़ि थी, तियां जे बिच्छुये रे ढंक मारने ते माहणुये जो हुआं इ। 6 तिन्हां दिनां च माहणुआं मौत टोलणी, पर तिन्हांजो सै मिलणी नीं; तिन्हां मरने री इच्छा करनी, पर मौती तिन्हांते दूर नठणा। 7 ये टिड्डियां देखणे च तिन्हां घोड़यां साई थिआं सै जे लड़ाईया रे खातर त्यार ये, तिन्हांरे सिराँ पर मन्नया सोने रे मुकट थे; तिन्हांरे मुँह माहणुआं रे मुँआं साई थे। 8 तिन्हांरे बाल जनानां रे बाल़ां साई कने तिन्हांरे दान्द शेराँ रे दन्दां साई थे। 9 तिन्हांरे कवच लोहे रे कवचा साई थे, कने तिन्हांरे फंगां री अवाज़ येढ़ि थी तियां जे रथां कने बौहत सारे घोड़यां रा, सै जे लड़ाईया च दौड़ां ये। 10 तिन्हांरी फूंटी बिच्छुआं साई थी, तिन्हां च येढ़े डंग थे, तिन्हां डंगा ते लोकां जो पँज्जां महीनयां तका पीड़ा देणे री ताकत थी, सै तिन्हां रिया फूंटीयां च थी। 11 इक अथाह कुण्डा रा दूत तिन्हां पर राजा था; तिसरा नौं इब्रानी भाषा च अबद्योन, कने यूनानी च अपुल्लयोन आ। इन्हां दुईं नौआं रा मतलब नाश करने औल़ा हुया। 12 पैहली विपत्ति खत्म हुई; देक्खा, इन्हां सरियां गल्लां ते बाद दो होर विपत्तियां औणे औल़ियां इ। छेऊँइ तुरही 13 ताहली जे छेऊँये स्वर्गदूते अपणी तुरही बजाई, तां सै जे सोने री बेदी परमेशरा रे सामणे इ तिसारे चार कुणयां रे सिंगां चते मैं येढ़ि अवाज़ सुणी, 14 तां छेऊंये स्वर्गदूता ने, तिसले जे तुरही थी, गलाया राँ था, “तिन्हां चार दूतां जो सै जे बड्डी नदी फरात ले बझीरे, अजाद करी दो।” 15 सै चारों दूत सै जे तिस वगत, दिन, महीने कने साल्ला खातर कैद कित्ते गईरे, अजाद करी ते ताकि सै धरतिया री सारिया जनसंख्या रे इक तिहाई जो मारी देओ। 16 मैं सेना रे घुड़स्वाराँ री गिणती सुणी सै जे बीह करोड़ थी। 17 मिन्जो इस दर्शणा च घोड़े कने तिन्हांरे स्वार इयां दिस्से: सै स्वार कवच पैहनीरे थे सै जे भड़कदी आग्ग, निल्ले कने पील़े रंगा रे थे। कने तिन्हां घोड़यां रे सिर शेराँ रे सिराँ साई थे; कने तिन्हांरे मुँआं ते आग्ग, कने धुआँ कने गन्धक निकल़ां था। 18 इन्हां तिन्नां महामारियां; यनिके तिन्हां घोड़यां रे मुँआं ते निकल़णे औल़ी आग्ग, धुआँ कने गन्धका ते माहणु जातिया रे इक तिहाई मारी दित्ते गै। 19 तिन्हां घोड़यां री ताकत तिन्हांरे मुँआं कने फूंटिया च थी; काँह्भई तिन्हांरी फूंट सर्पां साई थी, तिन्हां च जे सिर थे; इन्हां तेई सै पीड़ देआं थे। 20 फेरी भीं महामारिया ते बचीरे लोक सै जे नीं मरे थे, मन नीं फिराया, ये भई तिन्हें बुरीआत्मा री कने बेजान सोने, चाँदी, पीतल, पत्थराँ कने लकड़ां रियां मूर्तियां री पूजा करना बन्द नीं कित्या। ये मूर्तियां नांत देक्खी सकदियां, नां सुणी सकदियां, नां चली सकदियां। 21 महामारिया ते बचीरे लोकें हत्या करना, जादू टोणा, व्यभिचार, कने चोरी करना नीं छड्डया। |
This work is licensed under Creative Commons Attribution-ShareAlike 4.0 License.