प्रकाशितवाक्य 8 - बिलासपुरी नौआं नियम

सतवीं सील कने सोने रा धूपदान

¹ ताहली जे मेमने सतवीं सील तोड़ी, तां स्वर्गा च अधे घण्टे तक सन्नाटा छाईग्या।

² फेरी मैं तिन्हां सत्तां स्वर्गदूतां जो देख्या सै जे परमेशरा रे सामणे खड़े रैं, कने तिन्हांजो सात्त तुरहियां दित्तियां गईयां।

³ फेरी इक होर स्वर्गदूत सोने रा धूपदान लईने आया, कने बेदिया रे नेड़े खड़ा हुआ; कने तिसजो बौहत धूप दित्या गया भई सब परमेशरा रे लोकां रिया प्राथना सौगी सोने री तिसा वेदिया पर चढ़ाओ, सै जे संघासणा रे सामणे इ।

⁴ कने धूपा रा धुआँ परमेशरा रे लोकां रिया प्राथना सौगी स्वर्गदूतां रे हत्थां ते परमेशरा रे सामणे पुज्जीग्या।

⁵ फेरी स्वर्गदूते धूपदान लईने तिसच बेदिया री आग्ग भरी कने धरतिया पर सट्टीती; कने बद्दल़ां री गड़गड़ाहट, कने अवाज़ कने बिजलियां रा चमकणा कने हिल्लण हुणे लगे।

पैहली तुरही

⁶ फेरी सै सत्तों स्वर्गदूत तिन्हांले जे सात्त तुरहियां थिआं तिन्हौं बजाणे जो त्यार हुये।

⁷ पैहले स्वर्गदूते अपणी तुरही बजाई, कने खून मिलीरे ओल़े कने आग्ग धरतिया पर सट्टि गई; इसते धरतिया रा इक तिहाई हिस्सा फुखीग्या, कने इक तिहाई डाल़ कने सारा हरा घा बी फुखीग्या।

दुज्जी तुरही

⁸ दुज्जे स्वर्गदूते अपणी तुरही बजाई, तां मन्नो अग्गी साई जल़दा हुआ इक बड्डा पहाड़ समुद्रा च पाई दित्या गया; तिसते जे समुद्रा रा इक तिहाई हिस्सा खून बणीग्या,

⁹ कने समुद्रा रे इक तिहाई हिस्से रे सारे जिऊंदा प्राणी मरीगे, कने इक तिहाई पाणिये रे जहाज बी नाश हुईगे।

तिज्जी तुरही

¹⁰ तिज्जे स्वर्गदूते अपणी तुरही बजाई, कने इक बड्डा तारा सै जे मशाला साई जल़या राँ था स्वर्गा ते टुट्टया, तिसते जे नदियां रे इक तिहाई हिस्से पर कने पाणिये रे झरनयां पर पईग्या।

¹¹ कने तारे रा नौं नागदौणा; इसते पाणिये रा इक तिहाई हिस्सा नागदौणे साई कौड़ा हुईग्या, कने मते सारे लोकां री तिस पाणिये रे कौड़े हुणे ते मौत हुईगी।

चौथी तुरही

¹² चौथे स्वर्गदूते अपणी तुरही बजाई, कने सूरजा रा इक तिहाई, कने चन्द्रमे रा इक तिहाई कने तारयां रा बी इक तिहाई नष्ट हुईग्या, येत्थी तक भई तिन्हांरा इक तिहाई हिस्सा अन्धेरा हुईग्या कने दिना रे इक तिहाई च रौशनी नीं रैई कने तियां इ राति रा बी।

¹³ ताहली जे मैं फेरी देख्या, तां अम्बरा रे बिच इक्की ऊकाबा जो उड़दे कने ऊच्चिया अवाज़ा च येढ़ा बोलदे सुणया, “इन्हां तिन्नां स्वर्गदूतां री तुरहिया री अवाज़ा रिया वजह ते, तिन्हांरा बजणा जे अजें बाकी आ, धरतिया पर रैहणे औल़यां पर हाय, हाय, हाय!”