प्रकाशितवाक्य 6 - बिलासपुरी नौआं नियम

पैहली सील—चिट्टे घोड़े पर स्वार

¹ फेरी मैं देख्या ताहली जे मेमना तिन्हां सत्तां सीलां चते इक्की जो तोड़ां, कने तिन्हां चऊँ जिऊंदे प्राणियां चते इक्की री गर्जणे साई अवाज़ा च ये बोलदे सुणया, “औ।”

² फेरी मैं तित्थी इक चिट्टे रंगा रा घोड़ा देख्या, कने तिसरे स्वारे धनुष लेईरा, कने तिस्सो इक मुकुट दित्या गया; कने सै इक विजेते साई निकल़या भई होर बी विजय पाओ।

दुज्जी सील—लड़ाई

³ ताहली जे मेमने दुज्जी सील तोड़ी, तां मैं दुज्जे जिऊंदे प्राणिये जो ये बोलदे सुणया, “औ!”

⁴ फेरी इक होर घोड़ा निकल़या सै जे लाल रंगा रा था; तिसरे स्वारा जो ये अधिकार दित्या गया भई धरतिया परा ते शान्तिया जो चक्की लो, ताकि लोक इक्की दुज्जे जो बढी दो; कने तिस्सो इक बड्डी तलवार दित्ति गई।

तिज्जी सील—नकाल़

⁵ ताहली जे मेमने तिज्जी सील तोड़ी, तां मैं तिज्जे जिऊंदे प्राणिये जो येढ़ा बोलदे सुणया, “औ!” मैं तित्थी इक काल़े रंगा रा घोड़ा देख्या, तिसरे स्वारा रे हत्था च इक तकड़ी थी।

⁶ फेरी मैं तिन्हां जिऊंदे चऊँ प्राणियां रे बिच्चा ते इक अवाज़ ये बोलदे सुणी, “इक दिनारा री इक किलो कणक, कने दिनारा रा तिन्न किलो जौ, पर तेल कने दाखरसा रा नुक्शान नीं करना।”

चौथी सील—मौत

⁷ कने ताहली जे मेमने चौथी सील तोड़ी, तां मैं चौथे जिऊंदा प्राणिये जो ये बोलदे सुणया, “औ!”

⁸ मैं इक हल्के पिऊल़े रंगा रा घोड़ा देख्या, कने तिसरे स्वारा रा नौं मौत आ; कने अधोलोक तिसरे पिच्छे-पिच्छे जाया राँ था; कने तिन्हांजो धरतिया रे चौथे हिस्से पर ये अधिकार दित्या गया, भई तलवार, नकाल़, महामारी, कने धरतिया रे वन पशुआं रे जरिये लोकां जो मारी दो।

पंजवी सील—शहीद

⁹ ताहली जे मेमने पंजवीं सील तोड़ी, तां मैं बेदिया रे थल्ले तिन्हांरे प्राणां जो देख्या, सै जे परमेशर रे वचनां रिया वजह ते, कने तिसा गवाहिया रिया वजह ने सै जे तिन्हें दित्ति, मारी दित्ते गये थे।

¹⁰ तिन्हें ऊच्चिया अवाज़ा च हाक पाईने बोल्या, “हे सब्बीं ते महान प्रभु, पवित्र कने सच्चे; तू कदुआं तक इन्साफ नीं करगा? कने धरतिया च रैहणे औल़े लोकां ते अहां रिया मौती रा बदला कदुआं तका नीं लेंगा?”

¹¹ तिन्हां चते हरेक जो चिट्टा चोल़ा दित्या गया, कने तिन्हांने गलाया भई किछ देर होर रमान करा, तदुआं तका जे तुहांरे संगी दास्सां कने विश्वासियां री गिणती पूरी नीं हुई जाओ, सै जे तुहां साई मारे जाणे औल़े।

छेऊँइ सील—आतंक

¹² ताहली जे मैं मेमने जो छेऊँइ सील तोड़दे हुये देख्या, तां इक बड्डा हिलण हुआ, कने सूरज बाल़ां रे बणाईरे कम्बल़ा साई काला कने पूरा चन्द्रमा खून्ना साई लाल हुईग्या।

¹³ अम्बरा ते तारे धरतिया पर इयां टिरीगे, तियां जे बड्डिया आँधिया रे औणे ते अंजीरा रे डाल़ा ते कच्चे फल़ झड़ां ये।

¹⁴ अम्बरा फटीने चर्म पत्रा साई कट्ठा हुईग्या; कने हरेक पहाड़, कने टापु अपणिया-अपणिया जगह ते खिसकी गे।

¹⁵ फेरी धरतिया रे राजा, प्रधान, सेना रे अफसर, धनवान, ताकतवर लोक, हरेक दास, हरेक अजाद माहणु पहाड़ा रियां गुफां च कने पत्थराँ हेठ लुखीगे,

¹⁶ सै पहाड़ कने टरयां ने बोलणे लगे, “अहांरे ऊपर पैई जावा; कने अहांजो तिसरिया नज़राँ ते सै जे संघासणा पर बैठिरा, कने मेमने रे गुस्से ते बचाई लै।

¹⁷ काँह्भई तिन्हांरे गुस्से रा भयानक दिन आई चुक्कीरा, हुण कुण जिऊंदा रैई सकगा?”