प्रकाशितवाक्य 4 - बिलासपुरी नौआं नियम

स्वर्गा च अराधना

¹ इन्हां गल्लां ते बाद ताहली जे मैं इक होर दर्शण देख्या, तां क्या देक्खां भई स्वर्गा च इक दरवाजा खुल्हीरा, कने तिस्सो जे मैं पैहले तुरहिया री अवाज़ा साई अप्पूँ ने गल्लां करदे सुणया था, सैई मेरने बोलां, “येत्थी ऊपर आई जा; कने मांह तिज्जो सै गल्लां दसणियां, तिन्हांरा जे इन्हां गल्लां ते बाद हूणा जरूरी आ।”

² इकदम मिन्जो परमेशरा रे आत्मे अपणे वशा च करील्या; कने तित्थी मैं स्वर्गा च इक संघासण देख्या, तिस पर जे कोई बैठिरा,

³ सै जे तिस पर बैठिरा सै यशब कने माणिक्य साई दिस्सां, कने तिस संघासणा रे चऊँ पासयां मरकता साई इक मेघ-धनुष दुस्याराँ।

⁴ तिस संघासणा रे चऊँ पासयां चौबी संघासण थे; कने इन्हां संघासणा पर चौबी प्राचीन चिट्टे कपड़े पैहनीं ने बैठिरे थे, कने तिन्हांरे सिराँ पर सोने रे मुकट थे।

⁵ तिस संघासणा बिच्चा ते बिजलियां री लोय कने बद्दल़ां री गड़गड़ाट हुआं थी कने संघासणा रे सामणे अग्गी रे सात्त दिऊये बल़या राँ थे, सै परमेशरा रियां सात्त आत्मां इयां।

⁶ कने तिस संघासणा रे सामणे साफ कच्चा साई समुद्र था, संघासणा रे बिच्च कने संघासणा रे चऊँ पासयां चार जिऊंदा प्राणी थे, तिन्हांरे अग्गे-पिच्छे आक्खीं इ आक्खीं थिआं।

⁷ पैहला प्राणी शेरा साई, दुज्जा प्राणी बैल्ला साई, तिज्जे प्राणिये रा मुँह माहणुये साई, कने चौथा प्राणी उड़दे हुये ऊकाबा साई था।

⁸ इन्हां चऊँ जिऊंदा प्राणियां रे छे-छे फंग थे, कने चऊँ पासयां अन्दर बाहर आक्खीं इ आक्खीं थिआं। कने सै रात-दिन बिणा रुके ये बोलदे रैं, “पवित्र, पवित्र, पवित्र प्रभु परमेशर, सर्वशक्तिमान, सै जे था, सै जे हया कने सै जे औणे औल़ा।”

⁹ ताहली जे सै जिऊंदा प्राणी तिसरी सै जे संघासणा पर बैठिरा, कने युगां-युगां तकौ जिऊंदा, महिमा कने आदर कने धन्यवाद कराँ ये।

¹⁰ तां इन्हें चौबी प्राचीनें सै जे संघासणा पर बैट्ठीरे परमेशरा रे सामणे धरतिया पर मुँआ रे भार पैईने अराधना कित्ती, कने सै अपणे-अपणे मुकट संघासणा रे सामणे येढ़ा बोलदे हुये रखी दें,

¹¹ “हे अहांरे प्रभु कने परमेशर, तूई महिमा, आदर कने सामर्था रे लायक आ; काँह्भई तैंई सब चिज़ां बणाई रियां कने तेरिया इ इच्छा ते इन्हांरी रचना हुई कने सै मौजूद इ।”