प्रकाशितवाक्य 3 - बिलासपुरी नौआं नियम

सरदीम जो सन्देश

¹ तिने बी मिन्जो बोल्या, “सरदीस नगरा रिया कलीसिया रे दूता जो ये सन्देश लिख: मेरले परमेशरा रियां सात्त आत्मां कने सात्त तारे, हऊँ तुहांजो ये बोलां भई हऊँ तेरयां कम्मां जो जाणाँ, भई तू जिऊंदेयां साई त दिखां, पर असल च तू मूईरा।

² इस खातर जाग्गी जा! कने सै गल्लां जे बाकी बची गरियां कने सै जे मिटणे औल़ियां, तिन्हांजो मजबूत कर; काँह्भई मैं तेरे किसी बी कम्मां जो अपणे परमेशरा रिया नजरा च पूरा नीं पाया।

³ इस खातर याद कर भई तैं किस तरिके री शिक्षा पाई कने सुणी थी, तिस्सो मनदा रै कने मन फिरा। पर जे तू नीं जाग्या, तां मांह चोरा साई औणा, कने तू जाणी बी नीं पाणा भई मांह किस वगत तेरे लौ आई जाणा।

⁴ पर हाँ, सरदीस नगरा च तेरे ले किछ येढ़े लोक बी ये, तिन्हेंजे अपणे कपड़े गन्दे नीं कित्तिरे, तिन्हां सफेद कपड़े पैहनीने मेरे सौगी चलना, काँह्भई सै इस लायक ये।

⁵ सै जे जय पांगा तिस्सो इयां इ सफेद कपड़े पहनाये जाणे, मांह तिसरा नौं जीवना रिया कताबा चते कदीं नीं कटणा; पर तिसरा नौं अपणे पिता कने तिसरे स्वर्गदूतां रे सामणे मन्नी लेणा।

⁶ सै जे मेरी गल्ल समझणा चाँह सै ध्यान देईने सुणी लो भई परमेशरा रा आत्मा कलीसियां ने क्या बोलां।”

फिलदिलफिया जो सन्देश

⁷ तिने बी मिन्जो बोल्या, “फिलदिलफिया नगरा रिया कलीसिया रे दूता जो ये सन्देश लिख: हऊँ इ पवित्र कने सच्चा, कने मेरले दाऊद री चाबी, कने सै जे हऊँ खोल्लां तिस्सो कोई बन्द नीं करी सकदा, कने सै जे हऊँ बन्द कराँ तिस्सो कोई खोल्ही नीं सकदा, ये हऊँ बोलां:

⁸ हऊँ तेरे कम्मां जो जाणाँ; देख, मैं तेरे सामणे इक दरवाजा खोल्हीरा, तिस्सो जे कोई बन्द नीं करी सकदा। हऊँ जाणाँ भई तेरी सामर्थ थोड़ी, फेरी बी तैं मेरे वचनां रा पालन कित्तिरा कने मेरे नौआं रा इन्कार नीं कित्या।

⁹ देख, हऊँ शैतान्ना री तिन्हां सभा औल़यां जो तेरे अधीन करी देन्गा सै लोक जे अप्पूँजो यहूदी बोलां ये, कने हये नींये, पर झूट्ठ बोलां ये। देख, मांह येढ़ा करना भई तिन्हां आईने तेरे पैराँ पर मत्था टेकणा, कने तिन्हां ये जाणी लेणा भई मैं तेरने प्यार कित्तिरा।

¹⁰ काँह्भई तैं मेरे धीरजा रे वचनां रा पालन कित्तिरा, इस खातर मांह बी तिज्जो परीक्षा रे तिस वगत बचाई रखणा सै जे संसारा रे रैहणे औल़यां रे परखणे खातर सारे संसारा पर औणे औल़ी।

¹¹ हऊँ जल्दी आया रां; जो किछ तेरले आ तिस्सो थम्मी रख, भई कोई तेरा मुकट तेरते खोई नीं लओ।

¹² सै जे जय पाओ तिस्सो मांह अपणे परमेशरा रे मन्दरा च इक खम्भा बनाणा, तित्थी ते तिस कदीं बाहर नीं निकल़णा। कने मांह अपणे परमेशर रा नौं कने अपणे परमेशर रे नगर यनिके नये यरूशलेम रा नौं, सै जे मेरे परमेशरा रिया तरफा ते स्वर्गा ते उतरने औल़ा, कने मांह अपणा नया नौं बी तिस पर लिखणा।

¹³ सै जे मेरी गल्ल समझणा चाँह सै ध्यान देईने सुणी लो भई परमेशरा रा आत्मा कलीसियां जो क्या बोलां।”

लौदीकिया जो सन्देश

¹⁴ तिने बी मिन्जो बोल्या, “लौदीकिया नगरा रिया कलीसिया रे दूता जो ये सन्देश लिख: हऊँ इ आमीन कने बफादार कने सच्चा गवाह, कने परमेशरा रिया सृष्टिया री मूल वजह इ, हऊँ ये बोलां:

¹⁵ हऊँ तेरे कम्मां जो जाणाँ भई तू तिस पाणिये साई आ सै जे नांत ठण्डा कने नांत गर्म आ; भला हुन्दा भई तू ठण्डा या गर्म हुन्दा।

¹⁶ इस खातर भई तू मिसना, कने नां ठण्डा कने नां गर्म, हऊँ तिज्जो अपणे मुँआं चते मिसने पाणिये साई उगलणे औल़ा।

¹⁷ तू बोलां भई हऊँ अमीर आ, कने धन कमाईरा, कने मिन्जो किसी चीज़ा री जरूरत नीं; पर तू नीं जाणदा भई तू अभागा, नीच, गरीब, अन्हा कने नंगा।

¹⁸ इस खातर हऊँ तिज्जो सलाह देआं भई अग्गी च सेक्कीरा सोना मेरते खरीदी लै ताकि तू अमीर हुई जाओ, कने पैहनणे खातर चिट्टे कपड़े लई लै ताकि तिसजो पैहनीने तिज्जो अपणे नंगे हुणे री शर्म नीं हो, कने अपणियां आक्खीं च लाणे खातर सुरमा लैं ताकि तू साफ-साफ देखणे लगो।

¹⁹ हऊँ तिस-तिसने जे प्यार कराँ, तिन्हां सब्बीं जो थिड़कीने सधेराँ; इस खातर ईमानदारिया ने अपणयां पापां ते मन फिरा।

²⁰ देख, हऊँ दरवाजे पर खड़ीने भित ठल़काँ; जे कोई मेरी अवाज़ सुणी ने खोलगा, तां मांह अन्दर आईने तिसने सौगी रोटी खाणी कने तिस मेरे सौगी रोटी खाणी।

²¹ सै जे जय पाओ मांह तिस्सो अपणे सौगी अपणे संघासणा पर बठालणा, तियां जे हऊँ बी जय पाईने अपणे पिता सौगी तिसरे संघासणा पर बैठिरा।

²² सै जे मेरी गल्ल समझणा चाँह सै ध्यान देईने सुणो भई परमेशरा रा आत्मा कलीसियां ने क्या बोलां।”