प्रकाशितवाक्य 20 - बिलासपुरी नौआं नियमहजार साल्लां रा राज 1 फेरी मैं स्वर्गा ते इक स्वर्गदूता जो उतरदे देख्या, तिसले जे अथाह कुण्डा री चाबी कने इक बड्डी जंजीर थी। 2 कने तिने तिस अजगरा, यनि पुराणे सर्पा जो, सै जे इबलिश या शैतान आ; पकड़ीने इक हज़ार साल्लां तक बन्हीत्या। 3 कने तिस्सो अथाह कुण्डा च पाईने बन्द करित्या कने इक सील लगाईती ताकि तदुआं तक जे हजार साल नीं बित्तो, सै जाति-जाति रे लोकां जो भरमाई नीं सक्को। इसते बाद जरूरी आ भई तिस्सो थोड़िया देरा खातर फेरी खोल्या जाओ। मसीह सौगी इक हजार साल्ला तक राज करना 4 फेरी मैं संघासण देक्खे, कने तिन्हां पर सै जे लोक बैठिरे थे तिन्हांजो न्याय करने रा अधिकार दित्या गया। कने मैं तिन्हांरियां आत्मां जो बी देख्या तिन्हांरे सिर जे यीशुये री गवाही देणे कने परमेशरा रे वचनां रिया वजह ते धड़ा ते लग कित्ते गईरे थे। तिन्हें पशु या मूर्तियां री पूजा नीं कित्ती थी, नांई अपणे मत्थे कने हत्था पर तिसरी छाप लई थी। सै जिऊंदा हुईने मसीह ने सौगी हज़ार साल्लां तक राज करदे रै। 5 तदुआं तक जे ये हज़ार साल पूरे नीं हुये तदुआं तका बाकी मरीरे नीं जिऊंदा हुये। ये पैहले लोक थे सै जे मूईरयां चते जिऊंदा हुईरे। 6 आशीषित कने पवित्र सै आ सै जे पैहले मूईरयां ते जिऊंदा हुणे च शामिल ये। येढ़यां लोकां पर दुज्जिया मौती रा किछ बी अधिकार निआं, पर तिन्हां परमेशर कने मसीह रे याजक हूणा कने यीशु मसीह सौगी हज़ार साल्लां तक राज करना। शैतान्ना रा नाश 7 ताहली जे हज़ार साल पूरे हुई जाणे, तां शैतान कैदा ते अजाद कित्या जाणा। 8 कने तिस तिन्हां जातियां रे लोकां जो सै जे सारिया धरतिया पर हुणे, यनि गोग कने मगोग तिन्हांरी गिणती जे समुद्रा रे रेता रे बराबर हूणी, भरमाई ने लड़ाईया खातर कट्ठा करने जो निकलणा। 9 कने तिन्हां सारिया धरतिया पर फैल्ली जाणा कने परमेशरा रे लोकां रे डेरयां कने प्यारे नगरा जो घेरी लेणा; पर अग्गी स्वर्गा ते उतरीने इसा सेना जो भस्म करी देणा। 10 कने शैतान सै जे तिन्हांजो धोखे च रक्खां था आग्ग कने गन्धका रिया नदिया च पाया जाणा, तित्थी जे सै पशु कने झूट्ठा भविष्यवक्ता बी हूणा, कने सै रात-दिन युग-युग पीड़ा च तड़फदे रैहणे। चिट्टा बड्डा संघासण कने आखरी न्याय 11 फेरी मैं इक बड्डा चिट्टा संघासण कने तिसजो देख्या सै जे तिस पर बैठिरा; तिसरे सामणे ते धरती कने अम्बरा नट्ठीगे, कने तिन्हांरे खातर कोई जगह नीं मिली। 12 कने मैं तिन्हां मूईरयां जो सै जे छोट्टे या बड्डे थे, परमेशरा रे सामणे खढ़िरे देख्या, कने कताबां खोल्ली गईयां; फेरी इक होर कताब खोल्ली गई, यनि जीवना री किताब। मूईरयां रा न्याय तिन्हां कम्मां रे मुतावक हुया तियां जे तिन्हां कताबां च लिख्या हुया था। 13 कने समुद्रे तिन्हां मूईरयां जो सै जे तिसच थे दईत्या; कने मौती कने अधोलोके तिन्हां मूईरयां जो सै जे तिन्हां च थे देईत्या; कने तिन्हां चते हरेक रे कम्मां रे मुतावक तिन्हांरा न्याय कित्या गया। 14 मौत कने अधोलोक बी अग्गी रिया नदिया च पाई दित्ते गये। ये अग्गी री झील दुज्जी मौत इ; 15 कने तिस किसी रा नौं जे जीवना रिया कताबा च लिखिरा नीं मिलया, सै अग्गी रिया नदिया च पाया गया। |
This work is licensed under Creative Commons Attribution-ShareAlike 4.0 License.