प्रकाशितवाक्य 19 - बिलासपुरी नौआं नियम1 इसते बाद मैं स्वर्गा च मन्नो बडिया भीड़ा जो ऊच्चिया अवाज़ा ते ये बोलदे सुणया, “हालेलूय्याह! छुटकारा, महिमा कने सामर्थ सिर्फ अहांरे परमेशरा री हई। 2 काँह्भई तिसरे न्याय सच्चे कने ठीक ये, इस खातर भई तिने तिसा बड्डिया वेश्या रा न्याय कित्या, सै जे सारिया धरतिया जो अपणे व्यभिचारा ने गुमराह कराँ थी, कने तिसाते अपणे दास्सां रे खून्ना रा बदला लित्या।” 3 फेरी दुज्जी बार तिन्हें पुकारी ने बोल्या, “हालेलूय्याह! तिसारे फुखणे रा धूँ युग-युग तक उठदा रैहणा।” 4 कने चौबी प्राचीनें कने चऊँ जिऊंदे प्राणियें मुँआ रे भार धरतिया पर पैईने परमेशर री अराधना कित्ती सै जे संघासणा पर बैठिरा था, कने बोल्या, “आमीन! हालेलूय्याह!” मेमने रा ब्याह 5 कने संघासणा चते इक अवाज़ निकली, “हे अहांरे परमेशरा ते सारे डरने औल़े सेबको, क्या छोट्टे, क्या बड्डे; तुहें सारे तिसरी स्तुति करा।” 6 फेरी मिन्जो बौहत भीड़ा साई कने मते पाणिये रे बगणे साई अवाज़, कने गर्जना साई बौहत अवाज़ सुणी, “हालेलूय्याह! काँह्भई प्रभु अहांरा सर्वशक्तिमान परमेशर राज कराँ। 7 औआ, अहें खुश कने मगन हुईगे, कने तिसरी स्तुति करिये, काँह्भई मेमने रे ब्याह रा वगत आई गरा, कने तिसरिये दुल्हने अप्पूँजो त्यार करी लरा। 8 पैहनणे रे खातर तिस्सो अच्छिया किस्मा री साफ कने चमकदी मलमल दित्ति गई, काँह्भई अच्छिया किस्मा री मलमल रा मतलब परमेशरा रे लोकां रे धर्मा रे काम्म ये।” 9 फेरी स्वर्गदूते मेरने गलाया, “ये लिख, भई आशीषित सै ये, तिन्हौं जे मेमने रे ब्याह रिया धाम्मा च सद्दया गया।” फेरी तिने मेरने गलाया, “ये वचन परमेशरा रे सच्चे वचन ये।” 10 फेरी तिसरी अराधना करने खातर हऊँ तिसरे पैराँ पर पैईग्या। तिने मेरने गलाया, “देख, येढ़ा मत करा! हऊँ तेरा कने तेरे साथी विश्वासियां साई इक दास इ हाया, सै जे यीशुये री गवाही देणे पर मजबूत आ। परमेशरा री अराधना कर; काँह्भई यीशु मसीह री गवाही भविष्यवाणिया री आत्मा इ।” चिट्टे घोड़े रा स्वार 11 फेरी मैं स्वर्गा जो खुल्हीरा देख्या, कने तित्थी मेरे सामणे इक चिट्टा घोड़ा था; तिस पर इक स्वार आ, सै जे बफादार आ कने सच्चा कहलाया जां; कने सै धार्मिकता ने न्याय कने लड़ाई कराँ। 12 तिसरियां आक्खीं अग्गी रियां लपटां साई, कने तिसरे सिरा पर बौहत सारे मुकुट ये। कने तिसरा इक नौं तिस पर लिख्या हुया, तिसजो जे तिसते इलावा होर कोई नीं जाणदा। 13 तिने येढ़े कपड़े पैहनीरे सै जे खून्ना च डुबोईरे, कने तिसरा नौं परमेशरा रा वचन आ। 14 कने स्वर्गा री सेना चिट्टयां घोड़यां पर स्वार कने चिट्टे साफ कने बड़िया मलमला रे कपड़े पैहनीरे तिसरे पिच्छे-पिच्छे चलीरे। 15 जाति-जाति जो मारने खातर तिसरे मुँआं ते तेज धार तलवार निकल़ां इ। तिस तिन्हांरे ऊपर लोहे री रौड़ा ने राज करना। तिस सर्वशक्तिमान परमेशरा रे भयानक गुस्से री जलजलाहटा री मदिरा रे कुण्डा च अंगूरां जो पीहणा। 16 कने तिसरे कपड़े कने लत्ता पर ये नौं लिखिरा : “राजयां रा राजा कने प्रभुआं रा प्रभु।” 17 फेरी मैं इक्की स्वर्गदूता जो सूरजा पर खढ़िरे देख्या, तिने बौहत जोरा रिया अवाज़ा च हाक्क पाईने अम्बरा च उडणे औल़े सारे पंछियां ने गलाया, “औआ, कने परमेशरा रे बड्डे भोज्जा च कट्ठे हुई जावा, 18 ताकि तुहें राजयां, प्रधानां, कने ताकतवर लोकां, घोड़यां, तिन्हांरे स्वाराँ कने सब तरह रे लोक; क्या अजाद, गुलाम, छोट्टयां कने बड्डयां रा माँस खाई सक्को।” 19 फेरी मैं तिस पशुये कने धरतिया रे राजयां कने तिन्हां रिया सेना जो घोड़े पर बैठिरे स्वार कने तिसरिया सेना ने लड़ने खातर कट्ठे हुईरे देख्या। 20 सै पशु कने झूट्ठे भविष्यवक्ते जो सै जे तिसरे सामणे येढ़े नशाण दस्से थे, तिन्हांरे जरिये तिने तिन्हांजो भरमाया, तिन्हां पर जे पशुये री छाप थी, कने सै जे तिसरी मूर्तियां री पूजा कराँ थे। इन्हां दुईं जो जीते जी तिसा अग्गी रिया झीला च, सै जे गन्धका ने जल़ां इ, पाये गये। 21 कने बाकी लोकां जो घोड़े रे स्वारा रिया तलवारा ने सै जे तिसरे मुँआं ते निकल़ां थी मारे गये; कने सब पंछी तिन्हांरे माँसा ते रज्जीगे। |
This work is licensed under Creative Commons Attribution-ShareAlike 4.0 License.