प्रकाशितवाक्य 18 - बिलासपुरी नौआं नियम

बेबीलोन रा पतन

¹ “इन्हां गल्लां ते बाद मैं इक्की होर स्वर्गदूता जो स्वर्गा ते उतरदे हुये देख्या, तिस्सो जे बड्डा अधिकार मिलीरा था; कने तिसरे तेजा ते धरती चमकीगी।

² तिने ऊच्चिया अवाज़ा च हाक पाईने गलाया, टिरी गया, बड्डा बेबीलोन टिरी गया! सै शैतान्ना री रैहणे री जगह, कने हरेक बुरीआत्मा रा अड्डा, इक अशुद्ध कने घिनौने पंछिये रा अड्डा बणीग्या।

³ काँह्भई तिसरे व्यभिचार री तिखी मदिरा सारी जातियें पित्तीरी, धरतिया रे राजयां तिसने सौगी व्यभिचार कित्तिरा, कने धरतिया रे ब्यापारी तिसरे सुख-बलासा रे जादा हुणे ते अमीर हुईगरे।”

⁴ मैं स्वर्गा ते इक होर अवाज़ सुणी, “अरे मेरे लोको, तिस चते निकल़ी औआ ताकि तुहें तिसरे पापां रे भागी नीं बणो, कने तिसरी मुशीवतां चते कोई तुहां पर आई नीं सक्को।

⁵ काँह्भई तिसरे पापां रा ढेर स्वर्गा तका पुज्जी गरा, कने परमेशरे तिसरे बुरे कम्मां जो याद कित्तिरा।

⁶ तियां जे तिने तुहांजो दित्तिरा, तियां इ तिसजो देआ, कने तिसरे कम्मां रे मुतावक तिस्सो दो गुणा बदला देआ; तिस कटोरे चते जे तिने भरी तरा था, तिस ची तिसरे खातर दो गुणा भरी दे।

⁷ जितणी तिने अपणी बडयाई कित्ती कने सुख-बलास कित्या, तितनी इ तिस्सो पीड़ कने दुख देओ; काँह्भई सै अपणे मनां च बोलां इ, ‘हऊँ राणिया साई बैठीरी कने विधवा नीं; मिन्जो कदीं बी किछ दुख नीं हूणा।’

⁸ इस वजह ते इक इ दिन तिसा परा विपत्तियां आई जाणियां, यनि मौत, बिलाप, कने नकाल़; सै अग्गी च भस्म करी दित्ति जाणी, काँह्भई प्रभु परमेशर सै जे तिसारा न्यायकर्ता शक्तिमान आ।

⁹ “इसा धरतिया रे तिन्हें राजयां जे तिसा सौगी व्यभिचार कने सुख-विलास कित्या, तिन्हां ताहली जे तिसारे फुखणे रा धूँ देखणा, तां तिन्हां तिसारे खातर रोणा कने विलाप करना।

¹⁰ तिसारिया पीड़ा रे डरा रे मारे तिन्हां बड़िया दूरा ते खड़े रैईने बोलणा, ‘अरे बड्डे नगर, बेबीलोन! अरे ताकतवर नगर, लाणत, लाणत! इक्की घण्टे च तिज्जो सजा मिलीगी।’

¹¹ “धरतिया रे ब्यापारियां तिस खातर रोणा कने पीठणां, काँह्भई हुण किसी तिन्हांरा माल मुल्ले नीं लेणा;

¹² यनि सोना, चाँदी, रत्न, मोती, कने मलमल, कने बैंगणी, रेशमी, लाल रंगा रे कपड़े, कने हर किस्मा री खुशबुआ औल़ी लकड़ी, कने हाथी दंदा रियां बणाई रियां चिज़ां, कीमती लकड़ी, पीत्तल, लोहा कने संगमरमरा रियां सब्बीं किस्मा रियां चिज़ां,

¹³ कने दाल-चीनी, मसाले, धूप, इत्र, लोबान, मदिरा, तेल, मैदा, कणक, गाय, बल़द, भेड़, बकरियां, घोड़े, रथ, कने दास, कने माहणुआं रे प्राण।

¹⁴ ब्यापारियां तिसाने बोलणा, हुण तेरे मना जो खरे लगणे औल़े फल़ तेरे लाते जान्दे रै, तेरी सारी धन-दौलत कने तिज्जो सुन्दर बनाणे औल़ियां चिज़ां तेरते दूर हुई गईयां, कने सै फेरी कदीं मनी मिलणियां।

¹⁵ इन्हां चीजां रे ब्यापारी सै जे तिसरिया वजह ते अमीर बणीगरे थे, तिन्हां तिसारिया पीड़ा रे डरा रे मारे दूर खड़यां हूणा, कने रोंदयां कने पिठदेयां बोलणा,

¹⁶ ‘लाणत! लाणत! ये बड्डा नगर सै जे मलमल, बैंगणी कने लाल रंगां रे कपड़े पैहनीरा था, कने सोने कने रत्नां कने मोतियां ने सजीरा था;

¹⁷ इक्की घण्टे ची तिसारी धन-दौलत गायब हुईगी।’ कने जहाजा रा हरेक कप्तान कने जहाजा च सै जे यात्रा कराँ ये, मल्लाह, कने सै जे समुद्री ब्यापार कराँ ये, सब दूर खड़े हुये,

¹⁸ ताहली जे लोकें तिसरे फुखणे रा धूँ देख्या, तां रड़ाईने बोलणा, ‘क्या इस बड्डे नगरा साई कोई नगर था?’

¹⁹ कने अपणे-अपणे सिरा पर धूल पान्गे, कने ऊच्चिया अवाज़ा च रोन्दे हुये कने बिलखदे हुये रड़ाई-रड़ाईने बोलणा, ‘लाणत! लाणत! ये बड्डा नगर तिसारिया धन-दौलता रिया वजह ने जे समुद्रा रे सारे जहाजा रे मालक अमीर हुईगरे थे; इक्की घण्टे च तिसरा सब किछ बर्बाद हुईग्या।’

²⁰ हे स्वर्ग, कने हे परमेशरा रे लोको, कने प्रेरितो, कने भविष्यवक्तयो, तिस पर आनन्द करा, काँह्भई परमेशरे न्याय करीने तिसाते बदला लेईरा!”

²¹ इक्की ताकतवर स्वर्गदूते घराटा रे बट्टा साई इक पत्थर चक्कया, कने ये बोलीने समुद्रा च सट्टीत्या, “इस तरिके ने बड्डा नगर बेबीलोन बड़े जोरा ने येढ़ा सट्टीत्या जाणा; भई तिसरा नौं नशाण तक नीं मिलणा।

²² वीणा बजाणे औल़यां, कने गाणा गाणे औल़यां, कने बांसरी बजाणे औल़यां, कने तुरही बजाणे औल़यां री अवाज़ फेरी कदीं तेरे च नीं सुणाई देणी; कने किसी किस्मा रा कोई कारीगर कदीं तुज च नीं मिलणा; कने घराटां रे चलने री अवाज़ फेरी कदीं तूह च नीं सुणाई देणी;

²³ किसी दिऊये रिया लोई फेरी कदीं तुज च नीं चमकणा, कने दुल्हे कने दुल्हना री अवाज़ फेरी कदीं तुज च नीं सुणाई देणी; काँह्भई तेरे ब्यापारी संसारा रे बड्डे लोक थे कने तेरे जादू-टोणे ते सारी जातियां भरमाये गैईरे थे।

²⁴ इसा धरतिया पर सै लोक जे मारीते गये थे तिन्हांरा, कने भविष्यवक्तयां कने पवित्र लोकां रा खून तिसा च पाया गया।”