प्रकाशितवाक्य 17 - बिलासपुरी नौआं नियम

बड्डी बैश्या

¹ तिन्हां सत्तां स्वर्गदूतां ले जे सै सात्त कटोरे थे, तिन्हां चते इक्की आईने मेरने ये गलाया, “इतखा औ, हऊँ तिज्जो तिसा बड्डी वेश्या री सजा दसगा सै जे बौहत सारे पाणिये रे ऊपर बैठीरी।

² तिसा सौगी जे धरतिया रे राजयां व्यभिचार कित्या; कने धरतिया रे रैहणे औल़े तिसारे व्यभिचारा रिया मदिरा ते मतवाले हुईगरे थे।”

³ फेरी परमेशरा रिया आत्मे मिन्जो अपणे बशा च करील्या कने स्वर्गदूत मिन्जो सुनसान जगह च लेईग्या, तित्थी मैं सात्त सिर कने दस सिंगा औल़े इक लाल रंगा रे पशुये जो देख्या, सै जे निंध्या रे नौआं ते भरीरा था कने इस जानवरा पर इक औरत बैठीरी थी।

⁴ इसे औरते बैंगणी कने लाल रंगा रे कपड़े पैहनीरे थे, कने सोने, कने बड़ी कीमती मणियां कने मोतियां ने सजीरी थी। तिसारे हत्था च इक सोने रा कटोरा था सै जे घिनौनी चीजां ने कने तिसारे व्यभिचारा रिया गन्दी चिज़ां ने भरीरा था।

⁵ तिसरे मत्थे पर ये नौं लिखिरा था; “भेत बड्डा बेबीलोन, धरतिया रियां वैश्यां कने गन्दियां चिज़ां री मौ।”

⁶ मैं तिसा औरता जो परमेशरा रे लोकां कने यीशुये रे गवाहां रा खून पीणे ते मतवाली हुईरी देख्या; कने ताहली जे मैं तिसाजो देख्या हऊँ हैरान हुईग्या।

औरत कने पशुये रा मतलब

⁷ तिने स्वर्गदूते मेरने गलाया, “तू काँह हैरान हुया? हऊँ सात्त सिराँ कने तिस सिंगा औल़े पशुये कने तिस पर बैठी रिया जनाना रा भेत तिज्जो दसगा।

⁸ सै पशु जे तैं देख्या, ये पैहले त था, पर हुण निआं; सै अथाह कुण्डा ते निकल़ीने विनाशा च पैई जाणा। धरतिया रे रैहणे औल़े तिन्हांरे नौं जे संसारा रिया सृष्टिया रे वगता ते जीवना रिया कताबा च नीं लखोईरे, सै इस पशुये री ये दशा देखीने चम्भा करगे, काँह्भई सै पैहले था कने हुण नींआ, पर औणे औल़ा।

⁹ “इसजो समझणे खातर ज्ञान जरूरी आ: सै सात्त सिर सात्त पहाड़ ये, तिन्हां पर जे सै औरत बैठीरी।

¹⁰ कने सै सात्त राजा बी ये, तिन्हां चते पांज मरी चुक्कीरे, इक राज करी रां, कने इक हूणा तक नीं आईरा; पर ताहली जे सै औणा, तिस सिर्फ किछ बगता खातर राज करना।

¹¹ सै पशु जे पैहले था, कने हुण निआं, सै खुद अठवां राजा; कने तिन्हां सत्तां चते इक आ, सै जे नाश हुणे औल़ा।

¹² दस सिंग सै जे तैं देखीरे, सै दस राजा ये तिन्हौं जे हुण तक राज नीं मिलीरा, पर इन्हां राजयां जो इक्की घण्टे रे खातर पशुये सौगी राजयां साई राज करने रा अधिकार मिलणा।

¹³ इन्हां राजयां रा इक इ मकसद आ; तिन्हां अपणी सामर्थ कने अधिकार पशुये जो देणा।

मेमने खातर विजय

¹⁴ “तिन्हां सारयां मेमने ने लड़ना, पर मेमने तिन्हां पर जय पाणी; काँह्भई सै प्रभुआं रा प्रभु कने राजयां रा राजा, सै जे सद्दीरे, चुणीरे कने बफादार ये, तिस सौगी ये, तिन्हां बी जय पाणी।”

¹⁵ फेरी स्वर्गदूते मेरने गलाया, “जिस पाणिये पर तैं वैश्या जो बैठीरी देख्या, सै लोक, कुल़, जातियां कने भाषां इ।

¹⁶ कने सै जे दस सिंग तैं देक्खे, सै होर पशु तिसा वैश्या ते नफरत करगे, तिन्हां तिसाजो लाचार कने नंगा करी देणा कने तिसरा मांस खाई जाणा कने तिसाजो अग्गी च फुकी देणा।

¹⁷ काँह्भई परमेशरे अपणे मकसदा जो पूरा करने खातर तिन्हांजो इक मन दित्या, ताकि तदुआं तक जे परमेशरा री बोल्ली री गल्ल पूरी नीं हुईजो तदुआं तक इक मन हुईने अपणा-अपणा राज पशुये जो देई देआ।

¹⁸ सै औरत, तिसौ जे तैं देखीरा, सै बड्डा नगर आ सै जे इसा धरतिया रे राजयां पर राज कराँ।