प्रकाशितवाक्य 16 - बिलासपुरी नौआं नियम

परमेशरा रे कोपा रा पैहला कटोरा

¹ फेरी मैं मन्दरा च किसी जो ऊच्चिया अवाज़ा च तिन्हां सत्तां स्वर्गदूतां ते ये बोलदे सुणया, “जाओ परमेशरा रे गुस्से रे सत्तों इ कटोरयां जो धरतिया पर लटी दवा।”

² इस खातर पैहले स्वर्गदूते जाईने अपणा कटोरा धरतिया पर लटीत्या। कने तिन्हां लोकां पर तिन्हाले जे पशुये री छाप थी, कने सै जे तिसरिया मूर्तिया री पूजा कराँ थे, तिन्हांरे शरीरा पर इक्की किस्मा रा बुरा कने तकलीफ देणे औल़ा फोड़ा निकल़या।

दुज्जी कटोरा

³ दुज्जे स्वर्गदूते अपणा कटोरा समुद्रा पर लट्टित्या कने पाणी मूईरे रे खून्ना साई बणीग्या, कने समुद्रा रा हरेक प्राणी मरीग्या।

तिज्जा कटोरा

⁴ तिज्जे स्वर्गदूते जाईने अपणा कटोरा नदियाँ, कने पाणिये रे स्रोतां पर लटीत्या, कने सै खून बणिगे।

⁵ फेरी मैं पाणिये रे अधिकारी स्वर्गदूता जो परमेशरा ते ये बोलदे हुये सुणया, “हे पवित्र, सै जे हया कने सै जे था, तू न्यायी आ कने तैं ये न्याय कित्तिरा।

⁶ काँह्भई तिन्हें परमेशरा रे लोकां रा, कने भविष्यवक्तयां रा खून बहाया था, कने तैं तिन्हांजो खून प्याया; काँह्भई सै इस इ लायक ये।”

⁷ फेरी मैं बेदिया ते ये अवाज़ सुणी, “हाँ, हे सर्वशक्तिमान प्रभु परमेशर, तेरा न्याय ठीक कने सच्चा।”

चौथा कटोरा

⁸ कने चौथे स्वर्गदूते अपणा कटोरा सूरजा पर लटीत्या, कने माहणुआं जो अग्गी ते झुलसाणे रा अधिकार सूरजा जो दित्या गया।

⁹ माहणु भयंकर गर्मिया ते झुलसिगे, कने तिन्हें परमेशर रे नौआं री निंध्या कित्ती, तिसजो जे इन्हां विपत्तियां पर अधिकार आ; कने तिन्हें मन फिराणे कने तिसरी महिमा करने ते इन्कार कित्या।

पंजवा कटोरा

¹⁰ फेरी पंजवें स्वर्गदूते जाईने कटोरा तिस पशुये रे संघासणा पर लटीत्या, कने तिसरे राज्जा पर अन्धेरा छाई गया। कने लोक पीड़ा रे मारे अपणी-अपणी जीभ चबाणे लगे,

¹¹ कने अपणियां पीड़ां कने फोड़यां रिया वजह ते स्वर्गा रे परमेशरा री निंध्या कित्ती; पर अपणे-अपणे बुरे कम्मां ते मन फिराणे रा इन्कार कित्या।

छेऊँआ कटोरा

¹² फेरी छेऊंये स्वर्गदूते जाईने अपणा कटोरा महानदी फरात पर लटीत्या, कने तिसरा पाणी सुक्की गया, ताकि पूरब दिशा रे राजयां खातर रस्ता त्यार हुईजो।

¹³ फेरी मैं तिस अजगरा रे मुँआं ते, कने तिस पशुये रे मुँआं ते, कने तिस झूट्ठे भविष्वक्ते रे मुँआं ते, तिन्नो बुरीआत्मां जो मेनकां रे रुपा च निकल़दे देख्या।

¹⁴ ये सै बुरीआत्मां इयां सै जे चमत्कार करदियां हुईयां सारे संसारा रे राजयां ले जांईयां; ताकि तिन्हौं सर्वशक्तिमान परमेशरा रे तिस बड्डे दिना री लड़ाईया रे खातर कट्ठा करो।

¹⁵ “देख, हऊँ चोरा साई औआं; आशीषित सै आ सै जे जागदा रैयां, कने अपणे कपड़यां री चौकसी कराँ, ताकि सै नंगा नीं फिरो कने लोकां रे सामणे शर्मिन्दा नीं हुणे पौ।”

¹⁶ फेरी दुष्टात्में राजयां जो, इब्रानी भाषा च बोल्ली जाणे औल़ी जगह हर-मगिदोन पर कट्ठा कित्या।

सत्तवां कटोरा

¹⁷ फेरी सतवें स्वर्गदूते जाईने अपणा कटोरा हवा च लटीत्या, कने मन्दरा रे संघासणा ते ये जोरा री अवाज़ आई, “सब किछ पूरा हुईग्या!”

¹⁸ फेरी बिजल़ियां, कने आवाज़ां कने गड़गड़ाहट, कने इक येढ़ा बड्डा हिलण हुया; ये इतणा जबरदस्त हिलण था, तियां जे धरतिया पर माहणुआं रे रक्खे जाणे रे वगता ते कदीं बी नीं हुया था।

¹⁹ इसते तिस बड्डे नगरा रे तिन्न टुकड़े हुईगे, कने जाति-जाति रे नगर नाश हुईगे। परमेशरे बड्डे नगर बेबीलोन जो याद कित्या, ताकि तिसरे गुस्से री मदिरा बेबीलोन रे लोकां जो प्याई जाओ।

²⁰ कने हर इक टापु अपणिया जगह ते हटिग्या, कने पहाड़ां रा त पता नीं चलया।

²¹ अम्बरा ते माहणुआं परा तकरीवन पंजताल़ी ते पंजाह किलो री बड्डी आण पई, कने इस खातर भई ये विपत्ति बौहत इ भारी थी, लोकें आणीं रिया इसा विपत्तिया रिया वजह ते परमेशरा री निंध्या कित्ती।