प्रकाशितवाक्य 14 - बिलासपुरी नौआं नियम

मेमना कने तिसरे लोक

¹ फेरी मैं देख्या भई सै मेमना सिय्योन पहाड़ा पर खढ़िरा, कने तिस सौगी इक लाख चौताली हज़ार लोक थे, तिन्हांरे मत्थे पर मेमने रा कने तिसरे पिता रा नौं लिखिरा था।

² कने स्वर्गा ते इक येढ़ि अवाज़ सुणी, सै जे पाणिये रे बौहत झरनयां कने गर्जणे साई अवाज़ थी, कने सै अवाज़ जे मैं सुणी सै येढ़ि थी, मन्नया वीणा बजाणे औल़े वीणा बजाया राँये।

³ कने सै संघासणा रे सामणे कने चऊँ जिऊंदे प्राणियां कने प्राचीनां रे सामणे मन्नो इक नया गीत गाया राँ थे, कने सै जे धरतिया ते कीमत देईने छडवाईरे थे, तिन्हां इक लाख चौताली हज़ार लोकां जो छड्डिने कोई तिस गीता जो सिक्खी नीं सकदा था।

⁴ ये सै लोक ये, सै जे कदीं औरतां सौगी अशुद्ध नीं हुये, पर कुवारे रै; ये सैई हाये, भई तित्थी जे कित्ती मेमना जां, सै तिसरे पिच्छे हुई लेआं ये; येत परमेशर कने मेमने रे खातर पैहले फल़ा साई माहणुआं चते खरीदी लरे।

⁵ कने तिन्हांरे मुँआ ते कदीं झूट्ठ नीं निकल़या था, सै निर्दोष ये।

तिन्न स्वर्गदूत

⁶ फेरी मैं इक होर स्वर्गदूता जो अम्बरा रे बिच उडदे हुये देख्या, तिसले जे धरतिया रे रैहणे औल़यां री हरेक जाति, कुल़, भाषा कने लोकां जो सुनाणे खातर अनन्त खुशखबरी थी।

⁷ कने तिने ऊच्चिया अवाज़ा च गलाया, “परमेशरा जो आदर देआ, कने तिसरी महिमा करा, काँह्भई तिसरे न्याय करने रा बगत आईगरा; तिसरी अराधना करा, तिने जे स्वर्ग कने धरती कने समुद्र कने पाणिये रे सोते बणाये।”

⁸ फेरी इसते बाद इक होर दुज्जा स्वर्गदूत ये बोलदा हुआ आया, “टिरीग्या, सै बड़ा बेबीलोन नगर टिरी गया, काँह्भई तिसे अपणे व्यभिचारा री तिखी मदिरा सब्बीं जातियां जो प्याईरी।”

⁹ फेरी इन्हांते बाद इक होर, तिज्जा स्वर्गदूत ऊच्चिया अवाज़ च ये बोलदा हुआ आया, “सै जे कोई तिस पशुये कने तिसरिया मूर्तिया री पूजा करो, कने अपणे मत्थे या अपणे हत्था पर तिसरी छाप लाओ,

¹⁰ तां सै परमेशरा रे गुस्से री निरी मदिरा, सै जे तिन्हांरे गुस्से रे कटोरे च भरी-भरी ने पाई दित्ति गईरी, पींगा। तिस पवित्र स्वर्गदूतां रे सामणे कने मेमने रे सामणे आग्ग कने गन्धका री पीड़ा च पौणा।

¹¹ तिन्हां रिया पीड़ा रा धुआं युग-युग उठदा रैहणा, कने सै लोक जे तिस पशुये कने तिसरिया मूरता री पूजा करगे कने तिसरे नौआं री छाप लेंगे, तिन्हांजो रात-दिन चैन नीं मिलणा।”

¹² इस खातर ये जरूरी आ भई परमेशरा रे लोकां जो धीरज रखणा चाहिन्दा, सै जे परमेशरा रे हुक्मा जो मन्नांये कने प्रभु यीशुये पर विश्वास रखां ये।

¹³ फेरी मैं स्वर्गा ते ये अवाज़ सुणी, “लिख: सै मृतक जे प्रभुये च मराँ ये, सै हुण आशीषित ये।” पवित्र आत्मा बोलां, “हाँ, काँह्भई तिन्हां अपणिया मेहणता ते आराम पाणा, कने तिन्हांरे भले काम्म तिन्हां सौगी ये।”

धरतिया रिया फसला री उपज

¹⁴ फेरी मैं इक चमकीरा बद्दल़ देख्या, कने तिस बद्दल़ा पर माहणुये साई कोई प्राणी बैठिरा, तिसरे सिरा पर जे सोने रा मुकट कने हत्था च तेज़ डाटी।

¹⁵ फेरी इक होर स्वर्गदूत स्वर्गा रे मन्दरा चते निकल़ीने तिसने सै जे बद्दल़ां पर बैठिरा था, जोरा रिया अवाज़ा च हाक्क पाईने गलाया, “अपणी डाटी लईने फसल लुणि लै, काँह्भई फसला लुणने रा वगत आई पुज्जीरा इस खातर धरतिया री खेती पक्की चुक्कीरी।”

¹⁶ फेरी सै जे बद्दल़ां पर बैठिरा था तिने धरतिया पर अपणी डाटी लगाई कने धरतिया रिया फसला जो लुणया।

¹⁷ फेरी इक होर स्वर्गदूत स्वर्गा रे मन्दरा चते बाहर निकल़या, तिसरे हत्था च बी इक तेज़ डाटी थी।

¹⁸ फेरी इक होर स्वर्गदूत बेदिया ते बाहर आया, तिस्सो जे अग्गी पर अधिकार था; तिने तिस स्वर्गदूता ले जे तेज़ डाटी थी, तिसजो ऊच्चिया अवाज़ा च गलाया, “अपणी तेज डाटिया जो लाईने धरतिया रे अंगूरां रिया बेल्ला रे गुच्छे कट्टी लै, काँह्भई अँगूर पक्की चुक्कीरे।”

¹⁹ फेरी स्वर्गदूते अपणिया डाटिया जो धरतिया पर घुमाईने धरतिया रे अंगूरां रे बगीचे चते अंगूर कट्टीने अपणे परमेशरा रे गुस्से रे बड्डे रस कुण्डा च पाईत्या;

²⁰ कने नगरा ते बाहर तिस रस कुण्डा च अंगूर पीह्ते, कने रस कुण्डा चते इतणा खून निकल़या भई घोड़यां री लगामां तक पुज्या, कने तकरीवन तिन्न सौ किलोमीटरा तक बगदा गया।