प्रकाशितवाक्य 13 - बिलासपुरी नौआं नियम

दो पशु

¹ मैं इक्की येढ़े पशुये जो समुद्रा चते निकल़दे देख्या, तिसरे दस सिंग कने सात्त सिर थे। तिसरयां सिंगां पर दस मुकट, कने तिसरे हरेक सिरा पर परमेशर री निंध्या रे नौं लिखिरे थे।

² सै पशु जे मैं देख्या, सै इक चीते साई था; कने तिसरे पैर भालुये साई, कने मुँह शेरा साई था। अजगरे इस पशुये जो अपणी सामर्थ, कने अपणा सघासण, कने बड्डा अधिकार तिसजो देईत्या।

³ मैं तिसरे सिराँ चते इक्की सिरा पर बड्डा जख्म देख्या, येढ़ा लगया सै मरने औल़ा; फेरी तिसरा जानलेवा जख्म ठीक हुईग्या, कने सारी धरतिया रे लोक हैरान हुईने इस पशुये जो मनणे लगीगे।

⁴ तिन्हें अजगरा री पूजा कित्ती, काँह्भई तिने पशुये जो अपणा अधिकार देईत्या था, कने ये बोल्लीने पशुये री पूजा कित्ती, “इस पशुये साई कुण आ? कुण इसने लड़ी सक्कां?”

⁵ बड्डे बोल बोलणे कने निंध्या करने खातर तिसजो इक मुँह दित्या गया, कने तिस्सो बताल़ियां महीनयां तक काम्म करने रा अधिकार दित्या गया।

⁶ कने तिने परमेशरा री निंध्या, कने तिसरे नौं कने तिसरे तम्बू यनि स्वर्गा रे रैहणे औल़यां री निंध्या करने खातर मुँह खोल्या।

⁷ तिस पशुये जो ये अधिकार दित्या गया भई सै परमेशरा रे लोकां रे खलाफ लड़िये कने तिन्हां पर जय पाओ। तिस पशुये जो हरेक कुल़ कने लोकां कने भाषा कने जातिया पर राज करने रा अधिकार दित्या गया।

⁸ कने धरतिया पर रैहणे औल़े सारे लोकां इस पशुये री पूजा करनी, यनिके सै लोक तिन्हांरा नौं जे बल़ि कित्ते गये मेमने रिया जीवना रिया कताबा च, संसारा रिया शुरुआता रे बगता ते नीं लखोईरे।

⁹ जो कोई मेरी गल्ल समझणा चाँह, सै ध्यान देईने सुणो।

¹⁰ तिस्सो जे कैदी हुणे रे खातर तैह कित्या गया, सै जेल्ला च पाया जाणा; तिस्सो जे तलवारा ने मरने खातर तैह कित्या गया, जरूर सै तलवारा ने मारया जाणा। इसरा मतलब परमेशरा रे लोकां जो ईमानदारिया ने सैहण करना चाहिन्दा।

¹¹ फेरी मैं धरतिया चते इक होर पशुये जो निकल़दे देख्या, तिसरे मेमने साई दो सिंग थे; कने सै अजगरा साई बोलां था।

¹² ये तिस पैहले पशुये रा सारा अधिकार तिसरे सामणे कम्मां च ल्यौआं था; कने धरती कने तिसरे रैहणे औल़यां ते तिस पैहले पशुये री, तिस राजे खतरनाक जख्म ठीक हुई चुक्कीरा था, पूजा कराँ था।

¹³ सै बडे-बडे नशाण दस्सां था, येत्थी तका भई माहणुआं रे सामणे स्वर्गा ते धरतिया परा आग्ग बरसाई देआं था।

¹⁴ तिन्हां चमत्काराँ रिया वजह ते, तिन्हौं जे तिस पशुये रे सामणे दसणे रा अधिकार तिस्सो मिलीरा था, सै धरतिया पर रैहणे औल़यां जो इस तरिके ने धोखा देआं था। सै तिन्हांजो ये हुक्म देआं था भई तिस पशुये री मूर्ति बणावा, तिसरे शरीरा पर जे तलवारा रा घाव था कने सै जे फेरी भीं जिऊंदा हुईगरा था।

¹⁵ कने तिस्सो तिस पशुये रिया मूर्तिया च प्राण पाणे रा अधिकार दित्या गया, ताकि पशुये री मूर्ति बोलणे लगो; कने जितने लोक जे तिस पशुये रिया मूर्तिया जो पूजणे ते इन्कार करो, तिन्हांजो मरवाई दे।

¹⁶ तिने छोट्टे-बड्डे, अमीर-गरीब, अजाद-गुलाम, सब्बीं रे सज्जे हत्था या मत्थे पर इक-इक छाप लगवाणे पर मजबूर कित्या,

¹⁷ ताकि तिस पर जे ये छाप यनि तिस पशुये रा नौं या अंक हो, सैई लेण-देण करी पाओ, जबकि होर कोई बगैर इसा छापा ते लेण-देण नीं करी पाओ।

¹⁸ इसरे खातर ज्ञान जरूरी आ: तिसच जे समझ इ सै तिस पशुये रा अंक जोड़ी लो, काँह्भई सै माहणुआं रा अंक आ, कने तिसरा अंक छे सौ छयाह्ट आ।