प्रकाशितवाक्य 11 - बिलासपुरी नौआं नियम

दो गवाह

¹ फेरी मिन्जो नापणे खातर इक सरकन्डा दित्या गया, कने किन्हिये मिन्जो बोल्या, “उट्ठ,” परमेशरा रे मन्दरा कने बेदिया जो नापी लै, कने तिसच अराधना करने औल़यां जो गिणी लै।

² पर मन्दरा रे बाहरा रे अंगणा जो छड्डी देयां; तिस्सो देखां नापदा, काँह्भई सै अन्यजातियां रे खातर दित्या गईरा, तिन्हां बताल़ियां महीनयां तक पवित्र नगरा जो रौंदणा।

³ मांह अपणयां दुईं गवांह जो ये अधिकार देणा कने तिन्हां बिलाप करने औल़ा कपड़ा यनि टाट ओडीने इक हज़ार दो सौ साट्ठ दिनां तका भविष्यवाणी करनी।

⁴ ये जैतून्ना रे दो डाल़ कने दो दिऊये सै जे धरतिया रे प्रभुये रे सामणे खड़े रैं।

⁵ जे कोई तिन्हौं नुक्शान करना चाओ, तां तिन्हांरे मुँआं ते आग्ग निकल़ीने तिन्हांरे दुश्मणां जो भस्म कराँ इ, कने जे कोई तिन्हांरा नुक्शान करना चाहंगा, तां जरूर इसा इ रितिया ते मारी दित्या जाणा।

⁶ तिन्हौं ये अधिकार आ भई अम्बरा जो बन्द करे, ताकि तिन्हांरी भविष्यवाणिया रे वगत बरसात नीं हो; तिन्हांजो सारे पाणिये पर अधिकार आ भई तिस्सो खून्ना च बदली दो, ये बी भई ताहली जे चाओ तां धरतिया पर हर किस्मा री महामारी ल्याओ।

⁷ ताहली जे सै लोकां जो परमेशरा रे वचना रा प्रचार करीने खत्म करी बैट्ठे, तां सै पशु सै जे अथाह कुण्डा चते निकल़णा, तिन्हां पर हमला करना कने तिन्हांजो हराईने मारी देणा।

⁸ तिन्हांरियां लाशां तिस बड्डे नगरा री गल़िया च पई रियां रैहणियां, सै जे प्रतीक तौर पर सदोम नगर कने मिस्र देशा साई आ; तित्थी जे तिन्हांरा प्रभु क्रूसा पर चढ़ाया गईरा था।

⁹ कने सरयां राष्ट्राँ, कुल़ां, भाषां कने जातियां चते लोक साढे तिन्नां दिनां तक तिन्हांरियां लाशां जो देखदयां रैहणा, पर तिन्हांरियां लाशां जो कब्राँ च रखणे री किसी जो इजाज़त नीं देणी।

¹⁰ धरतिया रे रैहणे औल़यां तिन्हां रिया मौती ते खुश हूणा कने जशन मनाणा, तिन्हां इक्की दुज्जे ला तोफे भेजणे, काँह्भई इन्हें दुईं भविष्यवक्तयां धरतिया रे रैहणे औल़यां जो सताया था।

¹¹ पर साढे तिन्नां दिनां ते बाद परमेशरे तिन्हांजो भीं ते जिऊंदा कित्या। सै अपणे पैराँ पर खड़े हुईगे, कने तिन्हांरे देखणे औल़यां पर बौहत सारा डर छाईग्या।

¹² तिन्हांजो स्वर्गा ते इक बड्डी अवाज़ सुणीं, “येत्थी ऊपर औआ!” ये सुणीने सै बद्दल़ां पर स्वार हुईने अपणे दुश्मणां रे देखदे-देखदे स्वर्गा पर चढ़ीगे।

¹³ फेरी तिस इ वगत इक बड्डा हिलण हुआ, कने नगरा रा दसवां हिस्सा टिरीग्या; तिस हिलणा ते सात्त हज़ार माहणु मरीगे, कने बाकी बचीरे लोक डरीगे कने स्वर्गा रे परमेशरा री महिमा कित्ती।

¹⁴ दुज्जी विपत्ति खत्म हुई; हुण तिज्जी विपत्ति छोड़े औणे औल़ी।

सत्तवीं तुरही

¹⁵ ताहली जे सतवें स्वर्गदूते अपणी तुरही बजाई, तां स्वर्गा च बड़ियां आवाज़ां हुणे लगियां; “संसारा रा राज अहांरे प्रभुये रा कने तिसरे मसीह रा बणीग्या कने तिस युग-युग राज करना।”

¹⁶ फेरी चौबी प्राचीन सै जे परमेशरा रे सामणे अपणे-अपणे संघासणा पर बैठिरे थे, धरतिया पर मुँआं रे भार पईने परमेशरा री अराधना करीने

¹⁷ ये बोलणे लगे, “हे सर्वशक्तिमान प्रभु परमेशर, सै जे हया कने सै जे था, अहें तेरा धन्यवाद कराँ ये भई तैं अपणिया बड़िया सामर्था जो कम्मां च ल्याईने राज्ज करना शुरु कित्या।

¹⁸ होरीं जातियें गुस्सा कित्या कने तेरा कोप तिन्हां पर पैया, कने सै बगत आई पुज्जीरा, भई मूईरयां रा न्याय कित्या जाओ, कने तेरे दास भविष्यवक्तयां कने परमेशरा रे लोकां जो कने तिन्हां छोट्टे-बड्डयां जो सै जे तेरे नौआं ते डराँ ये, ईनाम दित्या जाओ, कने धरतिया रे बगाड़ने औल़े नाश कित्ते जाओ।”

¹⁹ फेरी परमेशरा रा सै मन्दर जे स्वर्गा चा, सै खोल्या गया, कने तिसरे मन्दरा च तिसरिया वाचा रा सन्दूक दुस्या; कने तित्थी बिजल़ियां, अवाज़, गर्जन, हिलण हुये कने बड्डे-बड्डे आणी रे गोल़े पै।