मरकुस 9 - बिलासपुरी नौआं नियम

¹ फेरी यीशुये अपणयां चेलेयां जो गलाया, “हऊँ तुहांजो सच बोलां भई तुहां चते किछ लोक सै जे येत्थी खढ़िरे, तदुआं तक नीं मरना, तदुआं तक जे परमेशरा जो सामर्था सौगी राज करदे हुए नीं देक्खी लो।”

यीशुये रा रुप बदलना

² छेआं दिनां ते बाद यीशुये, पतरस, याकूब, याकूब रे छोट्टे भाई यूहन्ने जो सौगी लया, कने तिन्हांजो ऊच्चे पहाड़ा पर लईग्या; तित्थी जे सै कल्हे थे। तित्थी तिन्हारे सामणे परमेशरे यीशुये रा रुप बदलील्या।

³ येत्थी तक भई तिसरे कपड़ेयां रा रुप बी लग था। सै चमकदार कने बड़े सफेद हुईगै। तिन्हां रिया सफेदिया री इसा धरतिया पर कोई बराबरी नीं थी।

⁴ फेरी ये दो भविष्यवक्ते मूसा कने एलिय्याह सै जे बौहत पैहले थे तिन्हांजो यीशुये सौगी गल्लां करदे दिक्खे।

⁵ इस पर पतरसे यीशुये जो गलाया, “गुरू जी, अहांरा येत्थी रैहणा ठीक आ : इस खातर अहां तिन्न तम्बू बनाणे; इक तेरे खातर, इक मूसा खातर, इक एलिय्याह खातर।”

⁶ काँह्भई सै नीं जाणदा था भई क्या जवाब देओ, इस खातर भई सै कने दुज्जे दो चेले बौहत डरी गरे थे।

⁷ फेरी इक्की बद्दल़े तिन्हांजो ढकीत्या, कने परमेशरे बद्दल़ा चते बोल्या, “ये मेरा प्यारा पुत्र आ, इस खातर तुहें इसरी सुणा।”

⁸ मूसा कने एलिय्याह चलीगरे थे, कने तिन्हें सिर्फ यीशुये जो तिन्हां सौगी देख्या।

⁹ ताहली जे यीशु कने तिसरे तिन्न चेले पहाड़ा परा ते उतरया रां थे, तां यीशुये तिन्हांजो ये हुक्म दित्या भई किसी जो बी तदुआं तक ये नीं दस्यों भई तुहें क्या देख्या, तदुआं तक जे माहणुये रा पुत्र यनि हऊँ मूईरेयां चते जिऊंदा हुईने नीं आई जाऊँ।

¹⁰ फेरी चेलयां इसा गल्ला जो याद रखया; पर तिन्हें इस बारे च गलाणा शुरु कित्या, भई “मूईरयां चते जी उठणे रा क्या मतलब आ?”

¹¹ फेरी चेलयां यीशुये ते ये पुच्छया, “शास्त्री काँह बोलां ये भई एलिय्याह भविष्यवक्ते जो मसीह ते पैहले औणा चाहिन्दा?”

^12-13 यीशुये जवाब दित्या, “ये सच्च आ, भई परमेशरे एलिय्याह जो पैहले भेजणे रा वायदा कित्तिरा, ताकि लोक मेरे औणे रे वगत त्यार रैहन्गे। पर हऊँ तुहांजो बोलां भई एलिय्याह त आई चुक्कीरा, कने लोकें तिसने जो किछ करना चाहया सै करी चुक्कीरे, तियां जे पवित्रशास्त्रा च तिसरे बारे च लिखिरा। पर माहणुये रे पुत्रा यनि मेरे बारे च काँह येढ़ा लिखिरा भई मिन्जो बौहत दुख सैहणे पौणा, कने लोकां मेरा त्याग करना?”

बुरीआत्मा रे सताईरे मुण्डुये जो चंगा करना

¹⁴ ताहली जे यीशु कने तिसरे तिन्न चेले दुज्यां चेलेयां ले वापस आये, तां देख्या भई तिन्हांरे चऊँ पासयां मती भीड़ लगीरी कने किछ शास्त्री तिन्हांने बैहस करया रायें।

¹⁵ तियां जे सारयां लोकें यीशुये जो देख्या, तां सै बौहत हैरान हुणे लगे, कने तिस खौ दौड़ीने तिस्सो मत्था टेकणा कित्या।

¹⁶ यीशुये तिन्हांते पुच्छया, “तुहें इन्हांने क्या बैहस करया रायें?”

¹⁷ भीड़ा चते इक्की तिस्सो जवाब दित्या, “गुरू, हऊँ अपणे पुत्रा जो तेरले ल्याया, तिसच जे इक बुरीआत्मा इ सै तिस्सो गल्ल नीं करने देन्दी।

¹⁸ ताहली जे ये बुरीआत्मा तिस पर हमला कराँ ईं, तिस्सो जमीन्ना पर पटकी देईं : तिसरे मुँआं ते झगूड़ औआं, कने सै अपणे दांद पीहां, कने अकड़ी जां कने हिलदा नींआ। मैं तेरयां चेलयां जो बुरी आत्मा जो बाहर कड्डणे रे खातर बोल्या, पर सै नीं कड्डी सक्के।”

¹⁹ ये सुणीने यीशुये तिन्हांजो जवाब देईने गलाया, “इस जुगा रे अविश्वासी लोको, हऊँ कितणे वगता तक तुहां सौगी रैहन्गा? कने कदुआं तक तुहांरी सैहन्गा? तिस मुण्डुये जो मेरले ल्यावा।”

²⁰ इस खातर सै मुण्डुये जो यीशुये ले ली आये, कने तंजे बुरीआत्मे यीशुये जो देख्या, तां तिसे इकदम मुण्डुये जो मरोड़या; कने मुण्डु धरतिया पर पैईग्या, कने मुँआं ते झगूड़ नकाल़णे कने मरेलणे लगया।

²¹ यीशुये मुण्डुये रे पिता ते पुच्छया, “इसरी ये दशा कदुआं ते हुया रांई?” तिने गलाया, “बचपना ते।

²² कई बार बुरीआत्मे इस्सो अग्गी च कने पाणिये च सट्टीने मारने री कोशिश कित्ती; पर जे तुहें किछ करी सक्को, तां अहां परा तरस खाईने अहांरी सहायता कर।”

²³ यीशुये तिस्सो गलाया, “ये नीं बोलणा जे तुहें करी सक्कां ये, काँह्भई परमेशरा पर विश्वास करने औल़यां खातर सै सब किछ करी सक्कां।”

²⁴ मुण्डुये रा पिता इकदम चिल्लाया, “हे प्रभु, हऊँ विश्वास कराँ भई तुहें मेरी सहायता करी सक्कां ये, पर हऊँ विश्वासा च इतणा मजबूत नींआ, इस खातर मेरी सहायता कर ताकि हऊँ विश्वासा च मजबूत हुईजो।”

²⁵ तंजे यीशुये देख्या भई होर बी लोक अहांजो देखणे खातर कट्ठे हुया रायें, तां तिने बुरीआत्मा जो येढ़ा बोलीने झिड़कया, “गूँगा कने बैहरा करने औल़ी आत्मा, हऊँ तिज्जो हुक्म देआं, इस चाते निकल़ी जा, कने इसच भीं ते कदीं बी देखां जांदी।”

²⁶ तां बुरी आत्मा चिल्लाया कने तिस्सो बौहत मरोड़ीने, निकल़ीगी; कने मुण्डु मूईरेयां साई दिख्या, येत्थी तकौ भई बौहत लोक बोलणे लगे भई ये मरीगरा।

²⁷ पर यीशुये मुण्डुये रा हात्थ पकड़ीने खड़ा कित्या, कने सै ठीक हुईग्या।

²⁸ बाद बिच ताहली जे यीशु अपणे चेलेयां सौगी घरा च कल्हा था, तां तिन्हें तिसते पुच्छया, “अहें बुरीआत्मा जो काँह नीं कड्डी सक्के?”

²⁹ फेरी यीशुये जवाब दित्या, “तुहें इस तरिके रियां बुरियां आत्मां जो सिर्फ प्राथना रेई जरिये निकाल़ी सक्कां ये।”

अपणिया मौती रे बारे यीशुये री दुज्जी भविष्यवाणी

³⁰ फेरी यीशु कने तिसरे चेले तिस इलाके जो छड्डिने चले, कने गलील प्रदेशा चियें हुईने जायां राँ थे। यीशु नीं चाहन्दा था भई किसी जो बी इसा गल्ला रा पता लगो भई हऊँ किति आ,

³¹ काँह्भई सै अपणयां चेलयां सौगी जादा वगत बिताणा कने तिन्हांजो सखाणा चाँह था। यीशुये तिन्हांजो बोल्या, “माहणुये रे पुत्रा यनि मिन्जो माहणुआं रे हात्था च पकड़वाया जाणा, कने तिन्हां मिन्जो मारी देणा; कने मांह मरने ते बाद तिज्जे दिन जी उठणा।”

³² पर सै गल्ल तिन्हां रिया समझा नीं आई, कने सै तिसते पुछणे ते डराँ थे।

सब्बीं ते बड्डा कुण आ?

³³ फेरी यीशु कने तिसरे चेले कफरनहूम च अपणे घरें गए; ताहली जे सै घरा रे अन्दर थे यीशुये तिन्हाते पुच्छया, “तुहें रस्ते च क्या बैहस करयां राँ थे?”

³⁴ पर सै चुप रै, काँह्भई रस्ते च तिन्हें अप्पूँ चियें ये बैहस कित्ती थी भई अहां चते महान कुण हूणा, ताहली जे यीशु राजा हूणा।

³⁵ यीशु बैट्ठीग्या कने बारा चेलयां जो अप्पूँ ले कट्ठा हुणे रे खातर सद्दया कने तिन्हाजो गलाया, “जे कोई महान बणना चाँह, तां सै सब्बींते छोट्टा कने सब्बीं रा सेवक बणो।”

³⁶ फेरी यीशुये इक बच्चे जो तिन्हांरे सामणे खड़ा हुणे जो बोल्या, तिने बच्चे जो गल़े लाईल्या कने चेलेयां जो बोल्या,

³⁷ “सै जे कोई माह्णु मेरिया वजह ते इस साई इक बच्चे पर दया करां, सै सच्चीजो मेरा आदर कराँ। जे कोई माह्णु मेरा आदर करां, तां सै हकीकत च परमेशरा रा आदर करां तिने जे मिन्जो भेज्जिरा।”

सै जे बरोधा च निआं, सै सौगी आ

³⁸ फेरी यूहन्ने तिसने बोल्या, “गुरू, अहें इक्की माहणुये जो तेरे नौंवां ते बुरीआत्मां जो निकाल़दे देख्या कने अहें तिस्सो मना करने लगे, काँह्भई सै अहां साई चेलयां चते नीं था।”

³⁹ यीशुये गलाया, “तिस्सो मता रोकदे; काँह्भई येढ़ा कोई निआं सै जे मेरे नौंवां ते सामर्था रे काम्म करो कने फेरी मिन्जो बुरा बोल्ली सक्को,

⁴⁰ सै जे अहांरा दुश्मण निआं, सै अहांरा मित्र आ।

⁴¹ हऊँ तुहांने सच्च बोलां, मसीह रे पिछे चलने रिया वजह ते, जे कोई तुहांरी थोड़ी जेई मदद बी करो तियां जे पाणी प्याणा, तां तिन्हांजो परमेशरा जरूर ईनाम देणा।”

ठोकरा री बजह बणना

⁴² यीशुये ये बी बोल्या “सै जे कोई माह पर विश्वास करने औल़यां चते इक्की जो बी पाप करने पर मजबूर करो, भले इ सै इक बच्चे साई कोई हो, ये तिसरे खातर बेहतर हूणा भई इक बजनी पत्थर तिसरे गल़े ने बन्हया जाओ कने तिस्सो डुबणे रे खातर समुद्रा च सट्टि दित्या जाओ, ये तिसरे खातर भयानक सजा हुई सक्का इ पर परमेशरा तिसजो इसते बी भयानक सजा देणी।

⁴³ पाप करने रिया हरेक वजह जो दूर करा! इसजो पूरे तरिके ने अस्वीकार करा तियां जे भई तुहें इक हात्थ बड्डया रांये सै जे तुहांरा पाप करने री वजह बणां। जे तुहें स्वर्गा जो जांये, भले इ तुहांले सिर्फ इक हात्थ हो, सै बधिया। पर तुहांले दो हात्थ हो कने तुहें नरका च जाओ, तां सै बुरा।

⁴⁴ तिसा जगह पर, सारयां जो खाणे औल़े कीड़े कदीं नीं मरदे कने आग्ग कदीं नीं बुझदी।

^45-46 पाप करने रिया हरेक वजह जो दूर करा! इसजो पूरे तरिके ने अस्वीकार करा तियां जे भई तुहें इक पैर बड्डया रांये सै जे तुहांरा पाप करने री वजह बणां। जे तुहें स्वर्गा जो जांये, भले इ तुहांले सिर्फ इक हात्थ हो, सै बधिया। पर तुहांले दो पैर हो कने तुहें नरका च जाओ, तां सै बुरा।

⁴⁷ पाप करने रिया हरेक वजह जो दूर करा! इसजो पूरे तरिके ने अस्वीकार करा। काणा हुईने तेरा स्वर्गा जो जाणा बौहत अच्छा, बजाये इसरे भई तेरियां दो आक्खीं हुन्दे हुये तिज्जो नरका रिया तिसा अग्गी च पाया जाओ सै जे कदीं मनी बुझणी।

⁴⁸ तित्थी मूईरे शरीरा जो खाणे औल़े कीड़े कने सै आग्ग कदीं नीं बुझदी।

⁴⁹ काँह्भई हर इक माहणु अग्गी च परखीने शुद्ध कित्या जाणा, तियां जे बलिदान्ना जो लूण पाईने शुद्ध कित्या जां।

⁵⁰ लूण खाणे च पाईने खाणे जो स्वादिष्ट बणां, पर जे लूणा रा स्वाद बिगड़ी जाओ, तां तिस्सो तुहें भीं ते इस्तेमाल लायक नीं बणाई सकदे; इक्की दूये सौगी तियां इ शांन्तिया ने रौआ तियां जे लूण खाणे च पाणे ते बाद मिली जां।”