मरकुस 8 - बिलासपुरी नौआं नियम

चार हजार लोकां जो ख्वाणा

¹ तिन्हां दिना च बौहत सारे लोक यीशुये ले आए कने तिसरे चऊँ पासयां कट्ठे हुए, कने तिन्हां लोकां ले खाणे जो किछ मनी था, तां तिने अपणे चेलयां जो अप्पूँ ले सद्दीने तिन्हांने गलाया,

² “मिन्जो इसा भीड़ा पर तरस आया रां, काँह्भई ये तिन्नां दिना ते मेरने सौगी ये, कने इन्हांले हुण किछ बी खाणे जो नींआ।

³ जे हऊँ इन्हांजो भुक्खा इ घरा जो भेजी दूँ, तां ये रस्ते ची थक्कीने रई जाणा; काँह्भई इन्हां चते कोई-कोई दूरा ते आईरे।”

⁴ तिसरे चेलयां यीशुये जो जवाब दित्या, “इस सुनसान जगह च इतणी रोटी कोई बी किता ते ल्याओ भई ये रज्जी जाओ?”

⁵ यीशुये तिन्हांते पुच्छया, “तुहांले कितणी रोटियां ईं?” तिने गलाया, “सात्त।”

⁶ तां तिने लोकां जो धरतिया पर बैठणे रा हुक्म दित्या, कने तिने सात्त रोटियां लईयां कने परमेशरा रा धन्यवाद करीने तोड़ियां, कने अपणयां चेलयां जो देन्दा गया भई तिन्हांजो खाणे जो देओ, कने तिन्हें लोकां जो खाणे जो दित्तियां।

⁷ तिन्हांले थोड़ियां छोट्टियां मच्छियां बी थिआं; तिने परमेशरा रा धन्यवाद करीने तिन्हांजो बी लोकां जो देणे रा हुक्म दित्या।

⁸ सै खाईने रज्जीगे कने चेलयां बचीरे टुकड़यां रे सात्त छड़ोलु भरी ने चक्के।

⁹ कने लोक चार हजार ते बी जादा थे; तां तिने तिन्हांजो विदा कित्या,

¹⁰ सै इकदम अपणयां चेलयां सौगी किश्तिया पर बैठीने दलमनूता प्रदेशा जो चलीगे।

फरीसियां रिया तरफा ते स्वर्गीय नशाणा री मंग

¹¹ फेरी फरीसी आईने तिसने बैहस करने लगे, कने तिस्सो परखणे खातर तिसते कोई स्वर्गीय नशाण मंगया, ताकि अहें जाणी लो भई तिज्जो परमेशरे भेज्जिरा।

¹² तिने आह! भरी ने गलाया, “इसा पीढ़िया रे लोकां जो कोई नशाण नीं दित्या जाणा।”

¹³ कने सै तिन्हाजो छड्डिने किश्तिया पर चढ़या कने गलील रे समुद्रा पार चलिग्या।

फरीसियां कने हेरोदेसा रा मलेड़ा

¹⁴ चेले रोटी लेणा भुल्ली गरे थे; किश्तिया च तिन्हांले इक इ रोटी थी।

¹⁵ तिने तिन्हांजो खबरदार कित्या भई, “फरीसियां कने हेरोदेस रे मलेड़े ते कने तिन्हांरे अविश्वासा कने झुट्ठिया शिक्षा ते बचीने रौआ।”

¹⁶ चेले अप्पूँ चियें बचार करीने बोलणे लगे, “अहांले रोटी नीं।”

¹⁷ ये जाणीने यीशुये तिन्हाजो गलाया, “अहांले रोटी नीं बोल्लीने तुहें कजो अप्पूँ चियें विचार करी रायें? तुहौं हूणा तक समझी जाणा चाहिन्दा था भई जे रोटी चाहिन्दी तां हऊँ तुहांजो अदभुत रितिया ने रोटी देई सक्कां! पर तुहें येढ़ा नीं सोच्ची रायें!

¹⁸ तुहांले आक्खीं त हईयां पर तुहें तिसजो जे देक्खां ये तिस्सो समझदे नींये, तुहांले कान्न त हये पर तुहें सै जे सुणां ये तिस्सो नीं समझदे; तुहांजो याद रखणा चाहिन्दा।

¹⁹ भई तंजे मैं पंज्जां हज़ाराँ लोकां जो ख्वाणे खातर पांज्ज रोटियां तोड़ियां थिआं, तां बची रियां रोटियां रे कितणे टोकरु तुहें चक्के?” तिन्हें तिसने गलाया, “बारा टोकरु।”

²⁰ कने “तंजे चार हज़ार लोकां खातर सात्त रोटियां तोड़ियां थिआं कने सारयां रज्जीने रोटी खाद्दि, तां तुहें बचीरी रोटियां रे कितणे टोकरु भरी ने चक्के थे?” तिन्हें तिस्सो गलाया, “सात्त टोकरु।”

²¹ तिने तिन्हांने गलाया, “कां तुहें नीं समझदे? काँह्भई हुण तक तुहांजो समझी जाणा चाहिन्दा था।”

बैतसैदा च इक अन्हे जो चंगा करना

²² यीशु कने तिसरे चेले बैतसैदा नगरा च आये; कने किछ लोक इक्की अन्हे जो यीशुये ली आये कने तिसने अरज किति भई तिस्सो छुओ।

²³ सै तिस अन्हे रा हात्थ पकड़ीने तिस्सो गाँवां ते बाहर लईग्या, कने तिसरियां आक्खीं पर थुक लाया कने तिस पर हात्थ रक्खया, कने तिसते पुच्छया, “क्या तू किछ देख्यारा?”

²⁴ तिने चऊँ पासयां देखीने गलाया, “हाँ, हऊँ माहणुआं जो देख्यारा, पर हऊँ तिन्हांजो साफ-साफ नीं देक्खी पाया राँ। सै मिन्जो डाल़ां साई चलदे दिस्या रायें।”

²⁵ तां तिने फेरी भीं तिसरियां आक्खीं पर हात्थ रखे, कने अन्हे बड़े गौरा ने देख्या। सै ठीक हुईग्या, कने सब साफ-साफ देखणे लगया।

²⁶ तिने तिस्सो घरा भेजित्या कने येढ़ा गलाया, “गाँवां जो जाणे ते पैहले अपणे घरा जो जा।”

पतरसा रा यीशुये जो मसीह स्वीकार करना

²⁷ यीशु कने तिसरे चेले बैतसैदा जो छड्डिने कैसरिया फिलिप्पी रे नेड़े रे गाँवां च चलीगे। रस्ते च तिने अपणे चेलयां ते पुच्छया, “हऊँ कुण आ, लोक मिन्जो क्या बोलां ये?”

²⁸ तिने जवाब दित्या, “यूहन्ना बपतिस्मा देणे औल़ा; पर कोई-कोई एलिय्याह, कने कोई-कोई भविष्यवक्तयां चते इक आ।”

²⁹ तिने तिन्हांजो पुच्छया, “पर तुहें मिन्जो क्या बोलां ये, भई हऊँ कुण आ?” पतरसे तिस्सो जवाब दित्या, “तुहें मसीह ये।”

³⁰ तां यीशुये तिन्हांजो खबरदार करीने गलाया भई मेरे बारे च येढ़ा किसी ने देखां बोलदे।

अपणिया मौती रे बारे यीशुये री भविष्यवाणी

³¹ तां यीशु चेलयां जो सखाणे लगया भई माहणुये रे पुत्रा यनि मेरे खातर जरूरी आ भई सै बौहत दुख सहो, कने यहूदी बजुर्ग, कने मुखियेयाजकां, कने शास्त्रियां तिस्सो घटिया समझीने मारी देणा, कने तिस तिज्जे दिन मूईरयां चते भीं ते जिऊंदा हुई जाणा।

³² तिने ये गल्ल तिन्हांने साफ-साफ बोल्ली ती। इस पर पतरस तिस्सो कण्डे नेईने डांटणे लगया;

³³ पर तिने मुड़ीने अपणयां चेलयां खौ देख्या, कने पतरसा जो डान्टी ने गलाया, “शैतान्न मेरे सामणे ते दूर हुई जा, काँह्भई तू परमेशरा साई नीं, पर माहणुआं साई सोच्चया राँ।”

यीशुये रे पिछे चलने रा मतलब

³⁴ तिने सारयां लोकां जो अपणे चेलयां समेत नेड़े सद्दीने तिन्हांजो गलाया, “सै जे कोई मेरा चेला बणना चाओ, सै खुद अपणा इन्कार करो कने अपणा क्रूस चक्कीने मेरे पिछे आई जाओ।

³⁵ काँह्भई सै जे कोई इस संसारा च अपणे प्राणा जो बचाणा चाँह, तिसजो तिस गवाई देणा, पर जे कोई मेरे कने मेरिया खुशखबरिया खातर इस संसारा च अपणा प्राण गवांगा, तिस अनन्त जीवन पाणा।

³⁶ जे लोक इस संसारा जो जित्ति लो, कने अपणा प्राण गवाई दो, तां तिस्सो क्या फैदा?

³⁷ कने सच्चीजो, माहणु अपणे प्राणा जो पाणे रे खातर क्या देई सक्कां?

³⁸ जे तुहें मेरे कने मेरिया शिक्षां ते इस दुष्ट कने पापी जुगा च शर्मिन्दा ये, तां माहणुये रा पुत्र यनि मांह बी तुहांते शर्मिन्दा हूणा, ताहली जे तिस पवित्र स्वर्गदूतां सौगी अपणे पिता रिया महिमा समेत औणा।”