मरकुस 7 - बिलासपुरी नौआं नियम

रितिया रे पालना रा स्वाल

¹ तां फरीसी कने किछ यहूदी शास्त्री सै जे यरूशलेम नगरा ते आईरे थे यीशुये रे चऊँ पासयां कट्ठे हुये,

² तिन्हें देख्या भई तिसरे किछ चेले बिणा हात्थ धोये रोटी खाया रां थे सै जे यहूदी रीति-रिवाजा रे मुतावक ठीक नीं था,

³ काँह्भई फरीसी कने सब यहूदी खाणा खाणे ते पैहले हमेशा पूर्वजां रिया रितिया रे मुतावक अपणे हात्थां जो धोआं थे।

⁴ ताहली जे सै बज़ारा ते औआं थे बिणा हात्थ धोये नीं खान्दे थे; कने बौहत सारियां होर रितियां जो बी मन्नां थे, तियां जे भई कटोरियां, लोटे, ताँबे रे बरतना जो धोणा कने माँजणा।

⁵ इस खातर फरीसियें कने शास्त्रियें यीशुये ते पुच्छया, “तेरे चेले बजुर्गां रियां रितियां पर काँह नीं चलदे, कने बिणा हात्थ धोये रोटी खायें?”

⁶ यीशुये तिन्हांजो जवाब दित्या, “यशायाह ठीक था ताहली जे तिने पवित्र शास्त्रा च तुहां साई पखण्डियां रे बारे च भविष्यवाणी कित्ती; तियां जे लिखिरा : “ ‘तुहें लोक मेरे बारे च बौहत अच्छा बोलां ए, पर तुहें हकीकत च माहने प्यार नीं करदे।

⁷ तिन्हांरी अराधना मेरे खातर कोई मायना नीं रखदी, काँह्भई सै परमेशरा रे हुक्मा जो छड्डिने माहणुआं रा हुक्म सखांये।’

⁸ काँह्भई तुहें परमेशरा रे हुक्मां रा पालन करना बन्द करितरा कने माहणुआं रियां रितियां रा पालन करां ए।”

⁹ यीशुये तिन्हांजो गलाया, “तुहें अपणियां रितियां जो मनणे खातर बड़िया चलाकिया ने परमेशरा रे हुक्मा जो तोड़ां ये!

¹⁰ काँह्भई मूसे बोलीरा, भई ‘अपणे पिता कने अपणिया माता रा आदर कर’ कने जो कोई माता-पिता जो बुरा बोल्लो सै जरूर मारी दित्या जाओ।

^11-12 पर तुहें लोकां जो ये सखांये भई अपणे माता-पिता री सहायता नीं करना ठीक आ, काँह्भई तुहें अपणे माता पिता जो ये गलाणे जो बोलां ये भई ‘मैं तुहांजो देणे रे बदले परमेशरा जो देणे री कसम खाद्दीरी, इस वजह ते हऊँ तिन्हांरी सहायता नीं करी पान्दा।’

¹³ इयां इ तुहें अपणिया बणाई रिया रितिया जो मनणे खातर लोकां जो बोलां ये, कने तुहें ये करने पर परमेशरा रे हुक्मां रा आदर नीं करदे।”

माहणुये जो अशुद्ध करने औल़ी गल्लां

¹⁴ तां यीशुये लोकां जो अप्पूँ ले सद्दीने तिन्हांने गलाया, “तुहें सारे मेरी गल्ल सुणा, कने जो किछ हऊँ दस्सां तिसजो समझणे री कोशिश करा।

¹⁵ येढ़ि कोई चीज़ नीं तिसाजो जे माहणु खाईने अपवित्र हुआं; पर सै जे किछ माहणुये रे अन्दरा ते निकल़ां, सै तिस्सो अपवित्र कराँ।

¹⁶ जो बी मेरी गल्ल सुणां, सै ध्यान देईने सुणो कने समझो।”

¹⁷ तंजे सै भीड़ा ते दूर इक्की घरा च गया, तां तिसरे चेलयां इस उदाहरणा रे मतलबा रे बारे च तिसते पुच्छया।

¹⁸ यीशुये चेलयां ने गलाया, “क्या तुहें बी येढ़े नासमझ ये? क्या तुहें नीं समझदे भई सै चीज़ जे माहणु खां, सै तिस्सो अपवित्र नीं करी सकदी?

¹⁹ काँह्भई सै चीज़ जे तुहें खांये सै तुहांरे मना च नीं, पर पेट्टा च जांई कने शरीरा ते बाहर निकल़ी जांई?” येढ़ा बोलीने तिने सब खाणे रियां चिज़ां जो पवित्र ठहराया।

²⁰ फेरी यीशुये गलाया, “सै जे माहणुये रे अन्दरा ते निकल़ां, सैई माहणुये जो परमेशरा रिया नज़राँ च अपवित्र कराँ।

²¹ काँह्भई अन्दरा ते, यनिके माहणुये रे मना ते, बुरे-बुरे बचार, व्यभिचार, चोरी, हत्या, परस्त्रीगमन,

²² लोभ, दुष्टता, छल, लुचपन, बुरी नज़र, निंध्या, घमण्ड, कने मूर्खता निकलां इ।

²³ ये सब बुरियां गल्लां माहणुये रे अन्दरा तेई निकल़ां इयां कने माहणुये जो अपवित्र कराँ इयां।”

सुरुफिनीकी जनाना रा विश्वास

²⁴ फेरी यीशु गलील प्रदेशा जो छड्डिने सूर कने सैदा रे नगर च आया; कने इक्की घरा च गया कने चाँह था भई किसी जो पता नीं लगो; पर सै लुक्खी नीं सक्कया।

²⁵ कने इकदम इक जनाना तिसारिया छोट्टिया कुड़िया च जे बुरीआत्मा थी, तिसरी चर्चा सुणीने आई, कने तिसरे पैराँ पईगी।

²⁶ ये यूनानी कने सीरिया प्रदेश फोनिशिया नगरा री थी। तिसे यीशुये ने विनती कित्ती भई मेरिया कुड़िया चते बुरीआत्मा जो कड्डी दे।

²⁷ यीशुये जनाना जो गलाया, “घरा रे बच्चयां जो सै जे यहूदी ये तिन्हांजो पैहले रज्जीने रोटी खाणे दे, काँह्भई बच्चयां ते रोटी लेईने कुत्तयां जो देणा ठीक निआं।”

²⁸ तिसे यीशुये जो जवाब दित्या, “ये सच्च आ प्रभु; फेरी बी कुत्ते बी त बच्चयां रे खाणे रे मेज़ा हेठ पैईरे टुकड़यां जो खाई लें।”

²⁹ यीशुये तिसाजो गलाया, “ये गल्ल बोलीने तैं माह पर अपणा विश्वास दस्या इस वजह ते मैं तुहांरी कुड़ी ठीक कित्ती, इस खातर हुण तू अपणे घरौ चली जा।”

³⁰ तिसे अपणे घरें आईने देख्या भई कुड़ी मंजोलिया पर पैईरी कने बुरीआत्मा निकल़ी गरी।

बैहरे कने हकले माहणुये जो चंगा करना

³¹ फेरी यीशु सूर प्रदेशा रे लाकयां जो छड्डिने सैदा नगरा ते कने दिकापुलिस इलाके ते हुन्दे हुये गलील दरयावा पुज्जे।

³² तां लोकें इक्की टौणे जो सै जे थत्था बी था यीशुये लौ ल्याईने तिसले अरज किति भई सै ठीक हुई जाओ।

³³ तां यीशु तिस्सो भीड़ा ते लग लईग्या, कने अपणी गुट्ठियां तिसरे कन्ना च पाईयां, कने गुट्ठी कन्ना ते कड्डीने तिस पर थुक्कीने तिसरिया जीभा जो छुया;

³⁴ कने स्वर्गा खौ देखीने बड्डा सुसकार भरया, कने यीशुये तिस माहणुये ने गलाया, “इप्फत्तह!” मतलब “खुली जा!”

³⁵ सै इकदम सुणने लगया, कने बगैर किसी परेशानिया ते साफ-साफ बोलणे लगया।

³⁶ तां यीशुये लोकां ने बोल्या भई किसी ने देखां बोलदे; पर जितना तिने तिन्हांजो चिताया तितना इ सै होर प्रचार करने लगे।

³⁷ सै बौहत इ हैरान हुईने बोलणे लगे, “तिने जो किछ कित्या सब खरा कित्या; सै बैहरयां जो सुणने री, कने गुंगयां जो बोलणे री बी ताकत देआं।”