मरकुस 5 - बिलासपुरी नौआं नियम

बुरी आत्मा रे सताईरे माहणुये जो चंगा करना

¹ ताहली जे यीशु कने तिसरे चेले गलील दरयावा रे पार गिरासेनियां रे इलाके च पुज्जे,

² कने ताहली जे यीशु किश्तिया परा ते उतरया तां इकदम इक माहणु सै जे बुरीआत्मा रे वशा च था, कब्राँ चते निकल़ीने यीशुये जो मिल्या।

³ सै कब्राँ च रैई कराँ था कने कोई बी तिस्सो लोहे रियां जंजीराँ ने बी नीं बन्ही सकदा था, काँह्भई सै बौहत खतरनाक था,

⁴ काँह्भई तिस्सो बार-बार लोहे रियां जंजीराँ ने बन्हां थे, पर तिने सै तोड़ी तियां कने तिसरे पीस-पीस करी ते, कने कोई तिस्सो अपणे बशा च नीं करी सकदा था।

⁵ सै दिन-रात कब्राँ कने पहाड़ां च रड़ांदा कने अप्पूँजो पत्थराँ ने जख्मी करदा रैयाँ था।

⁶ सै यीशुये जो दूरा तेई देखीने दौड़या, कने आदर देणे खातर तिसरे सामणे घुटने पर आईने मत्था टेक्कया,

^7-8 यीशु तिसने गल्लां था, “बुरीआत्मा, इस माहणुये चते निकल़ी जा!” पर बुरे आत्मे तिसजो जल्दी छड्डया नींआ, सै जोरा ने रड़ान्दे हुये गलाया, “यीशु, हऊँ जाणाँ भई तू महान परमेशरा रा पुत्र आ! तू काँह मिन्जो परेशान करया राँ? तू परमेशरा रे नौआं ते मेरने ये वायदा कर भई तू मिन्जो पीड़ा नीं देंगा।”

⁹ यीशुये तिसते पुच्छया, “तेरा नौं क्या?” तिने तिसने गलाया, “मेरा नौं आ सेना; काँह्भई अहें बौहत ए सै जे इस माहणुये च वास कराँ ये।”

¹⁰ कने बुरीआत्मे यीशुये ते बार-बार बिनती कित्ती भई, “अहांजो इस इलाके ते बाहर नीं भेज।”

¹¹ तित्थी पहाड़ा पर सूराँ रा इक झुण्ड चरने लगीरा था।

¹² कने बुरीआत्में यीशुये ते विनती करीने बोल्या, भई “अहांजो इन्हां सूराँ च भेजी दे भई अहें तिन्हांरे अन्दर जाओ।”

¹³ इस खातर यीशुये तिन्हांजो अनुमति दित्ति कने सै बुरीआत्मां तिस माहणुये चते निकल़ीने सूराँ च बड़ी गियां। सै झुण्ड पहाड़ा ते कण्डे दौड़ीने दरयावा च पैईग्या कने डुब्बीग्या। तिन्हां सूअरां री गिणती तकरीवन दो हज़ार थी।

¹⁴ कने तिन्हांरे चरवाहयां नट्ठीने नगर कने गाँवां च जाईने ये खबर सुणाई, कने सै जे हुईरा था, लोक तिस्सो देखणे आये।

¹⁵ यीशु तित्थी जे था तिसा जगह आईने लोकें तिस माहणुये जो तिसच जे बुरीआत्मां समाई रियां थिआं, कपड़े पैहनीरा कने होशा च बैठिरा देखीने डरीगे।

¹⁶ कने देखणे औल़यां लोकें तिसरा, तिसच जे बुरीआत्मा थिआं, कने सूराँ जो, सै जे किछ हुया था तिसरा पूरा हाल तिन्हाजो सुणाया।

¹⁷ कने सै यीशुये ने विनती करीने बोलणे लगे अहांरे इलाके ते चली जा।

¹⁸ कने तंजे सै किश्तिया परा जो चढ़ने लगया, तां सै माहणु तिसच जे पैहले बुरीआत्मा थिआं यीशुये ते विनती करने लगया, “मिन्जो अप्पूँ सौगी रैहणे री इजाजत दे।”

¹⁹ पर यीशुये तिस्सो अपणे सौगी औणे री इजाजत नीं दित्ति, कने तिस्सो गलाया, “अपणे घरा जाईने अपणे परिवारा जो दस भई तेरे पर दया करीने प्रभुये तेरे खातर कितणे बड्डे-बड्डे काम्म कित्तिरे।”

²⁰ फेरी सै माह्णु अपणे इलाके च चलिग्या। तिने पूरे दिकापुलिस च ये प्रचार करना शुरु करित्या भई यीशुये तिसरे खातर कितना किछ कित्या; कने सारे लोक हैरान रैई जांए।

यीशुये रा याईर री कुड़िया जो जिऊंदा करना

²¹ इक बार फेरी यीशु किश्तिया च गलील दरयावा रे दुज्जे कनारे गया। ताहली जे सै ऊत्थी पुज्जया कने कनारे पर ही खढ़िरा था, फेरी बौहत सारे लोक यीशुये ले कट्ठे हुईगै।

²² कने याईर नौआं रा इक माहणु आया सै जे यहूदी सभा घरा रे सरदाराँ चते था, सै तिस्सो आदर देणे खातर तिसरे पैराँ इ पैईग्या,

²³ कने तिने येढ़ा बोलीने यीशुये ते बौहत अरज कित्ती, “मेरी छोट्टी कुड़ी मरने इ औल़ी : इस खातर तुहें मेरे घरें आईने तिसा पर हात्थ रक्खा भई सै ठीक हुईने जिऊंदी रौ।”

²⁴ फेरी सै अपणयां चेलयां ने तिस सौगी चलीप्या; कने बड्डी भीड़ तिसरे पिछे हुईगी, येत्थी तकौ भई लोक तिसरे नेड़े जाणे खातर तिसजो चऊँ पासयां ते दबाया राँ थे।

²⁵ तित्थी इक जनाना थी, तिसाजो जे बारा साल्लां ते खून बैहणे री बमारी थी।

²⁶ तिसे मत्यां डाक्टरां ते अपणा इलाज करवाया, कने अपणा सारा पैसा लाईने बी सै ठीक नीं हुई, पर तिसारी हालत होर बी खराब हुईगी।

^27-28 ताहली जे तिसे जनाने यीशुये रा लोकां जो ठीक करने रे बारे च सुणया, तां तिसे सोच्या, “जे हऊँ सिर्फ तिसरे कपड़े जोई छुई लेऊँ, तां मांह ठीक हुई जाणा।” इस खातर सै भीड़ा चते तिसरे पिछे आई कने तिसरे कपड़े जो छुईल्या।

²⁹ कने इकदम तिसारा खून बैहणा रुकिग्या, कने तिसाजो अपणे शरीरा च पता लगीग्या भई हऊँ इसा बमारिया ते ठीक हुईगी।

³⁰ यीशुये जो ताहलूं इ महसूस हुईग्या भई मेरे चते सामर्थ्य निकल़ीरी, कने भीड़ा च चऊँ पासयां देखीने पुच्छया, “मेरे कपड़यां ने कुण छोया?”

³¹ तिसरे चेलयां तिस्सो गलाया, “तुहें देख्या रायें भई भीड़ धक्का मुक्का करयां राईं, कने तू बोलां भई किने तिज्जो छुया?”

³² यीशु लगातार इक्खा-उक्खा देखदा रैया ये जाणने रे खातर भई ये किने कित्या था।

³³ तां सै जनाना डरदी कने कंबदी हुई आई, काँह्भई तिसे सोच्या भई यीशुये माह पर गुस्सा करना भई तिसे व्यवस्था जो तोड़या था, पर सै जाणाँ थी भई यीशुये तिसाजो ठीक कित्या। इस खातर सै तिसरे पैराँ पर पैईने तिस्सो सारियां गल्लां सच-सच दस्सी तियां।

³⁴ यीशुये तिसाने गलाया, “पुत्री, तू ठीक हुईगी काँह्भई तैं विश्वास कित्या भई हऊँ तिज्जो ठीक करी सक्कां: बेफिक्र हुईने जा, कने तेरी दर्दनाक बमारी हुण नीं औणी।”

³⁵ सै येढ़ा गलाया इ कराँ था भई यहूदी सभा घरा रे सरदार याईर रे घरा ते किछ लोकें आईने गलाया, “तेरी कुड़ी त हुण मरीगी, गुरुये जो अपणे घरें सद्दीने परेशान करने री जरूरत नीं।”

³⁶ तिसा गल्ला जो जे सै गलाया राँ थे, यीशुये तिन्हां गल्लां जो अणसुणी करीने यहूदी सभा घरा रे सरदारा ने गलाया, “मत डरदा, सिर्फ विश्वास रख।”

³⁷ कने तिने सिर्फ पतरस, याकूब कने याकूब रा भाई यूहन्ना कने याईर जोई अप्पूँ सौगी औणे री अनुमति दित्ति। तिने भीड़ा चते होर किसी जो औणे नीं दित्या।

³⁸ यहूदी सभा घरा रे सरदारा रे घरा च पुज्जीने, तिने लोकां जो बौहत रोंदे कने रड़ांदे देख्या।

³⁹ तां यीशुये अन्दर जाईने तिन्हांजो गलाया, “बच्ची मरीरी नीं, सिर्फ सुत्तीरी। इस खातर तुहांजो इयां हल्ला करने कने रोणे री जरूरत नीं।”

⁴⁰ पर लोक तिस पर हसणे लगे, पर तिने तिन्हां सारयां जो बाहर जाणे जो बोल्या, कने कुड़िया रे मौ-बुढ़यां कने अपणे तिन्नां चेलयां जो अपणे सौगी अन्दर लेईग्या, तित्थी जे कुड़ी रखीरी थी।

⁴¹ कने तिसा कुड़िया रा हात्थ पकड़ीने तिसाजो गलाया, “तलीता कूमी!” मतलब “छोट्टी जेई कुड़िये, हऊँ तिज्जो बोलां, उट्ठ!”

⁴² कने सै कुड़ी इकदम उट्ठीने चलने-फिरने लगी; (काँह्भई सै बाराँ साल्लां री थी) येढ़ा देखीने लोक बड़े हैरान हुईगे।

⁴³ फेरी यीशुये सख्तिया ने चेतावनी दित्ति भई सै इसा खबरा जो नीं फैलाओ भई तिने कुड़िया जो मूईरेयां चते जिऊंदा कित्या था। यीशुये तिसारे माता-पिता जो गलाया, “इसाजो किछ खाणे जो देआ।”