मरकुस 4 - बिलासपुरी नौआं नियम

ब्यू बाहणे औल़े‍ रा उदाहरण

¹ फेरी यीशु गलील दरयावा रे कनारे उपदेश देणे लगया : कने येढ़ि बड्डी भीड़ तिसले कट्ठी हुईगी भई सै तिस दरयावा च इक्की किश्तिया पर चढ़ीने बैठिग्या, कने सारी भीड़ धरतिया पर दरयावा रे कनारे खढ़ी रैई।

² कने सै तिन्हांजो उदाहरणां च बौहत सारियां गल्लां सखाणे लगया, कने अपणे उपदेशा च तिन्हांने गलाया,

³ “सुणा! इक करसाण खेता च ब्यू बाहणे खातर निकल़या।

⁴ कने बाहन्दे बगत किछ ब्यू रस्ते रे कण्डे पैया कने पंछियें आईने तिस्सो चुगील्या।

⁵ कने किछ ब्यू पत्थरीली धरतिया पर पै तित्थी तिस्सो जादा मिट्टी नीं मिली, कने डुग्गी मिट्टी नीं मिलणे रिया बजह ते सै इकदम उगीगे।

⁶ कने तंजे सूरज निकल़या, तां डाल़ू फुखीगे, काँह्भई जड़ कमजोर हुणे रिया वजह ते सै सुकीगे।

⁷ किछ ब्यू येढ़िया जगह च पै तित्थी जे झाड़ियां थिआं, कने झाड़ियें बधीने तिन्हांजो दबाईत्या, कने तिसच फल़ नीं आया।

⁸ पर किछ ब्यू खरिया धरतिया पर पै, कने सै उगीने सौ गुणा फल़ ल्याया।”

⁹ तां तिने गलाया, “जो बी मेरी गल्ल सुणां, सै ध्यान देईने सुणो कने समझो।”

उदाहरण रा मकसद

¹⁰ तंजे यीशु कल्हा था, तां बारा चेले कने होर सै लोक सै जे ऊत्थी कट्ठे हुईरे थे, तिसते तिन्हें इन्हां उदाहरणां रा मतलब पुच्छया।

¹¹ यीशुये तिन्हांने गलाया, “परमेशरे अपणे राज्जा रे भेत्तां जो तुहां पर परगट कित्या, पर तिन्हांजो सै जे माह पर विश्वास नीं करदे तिन्हांरे खातर ये सारियां गल्लां उदाहरणां च हुआं इयां।

¹² तियां जे पवित्रशास्त्र बोलां, “‘तिन्हां मेरे काम्म देखीने सिखणा निआं, कने मेरी गल्ल सुणीने समझणा नींआ; जे सै समझी जाओ, तां तिन्हां अपणे कित्तिरे पापां ते पश्चाताप करना कने पाप नीं करने रा फैसला करना, कने परमेशर तिन्हांजो माफ करी सक्कां।’”

ब्यू बाहणे औल़े‍ उदाहरणा री व्याख्या

¹³ फेरी यीशुये तिन्हांने गलाया, “पर जे तुहें इस उदाहरणा जो नीं समझी सकदे तां फेरी होरीं सब्बीं उदाहरणां जो कियाँ समझगे सै जे हऊँ दसणे औल़ा?

¹⁴ इस उदाहरणा च मैं तुहांजो दस्या भई ब्यू बाहणे औल़ा माहणु परमेशरा रे बचना रा प्रचार कराँ।

¹⁵ किछ लोक येढ़े तिन्हांरी बराबरी जे तिस ब्यूआ ते कित्ती जाई सक्कां इ सै जे बाट्टा च पैईरा। सै परमेशरा रा वचन जरूर सुणां ये, पर शैतान छोड़चा ने जां कने तिन्हांरे मनां ते तिस वचना जो मटाई देआं सै जे तिन्हें सुणया था।

¹⁶ किछ लोक येढ़े तिन्हांरी बराबरी तिन्हां ब्यूआं ते कित्ती जाई सक्कां इ सै जे पत्थरीली जमीन्ना पर पैया। ये सैए सै जे परमेशरा रा बचन खुशिया ने सुणां ये कने इकदम ग्रहण बी कराँ ये।

¹⁷ पर वचन तिन्हांरे दिलां री गहराईया तक नीं जान्दा, सै सिर्फ किछ वगता खातर विश्वास कराँ ये। सै तिन्हां बुटयां साई हुआं ये तिन्हांरियां जड़ां जे डुग्गियां नीं हुन्दियां; ताहली जे कोई दुज्जा तिन्हां सौगी बुरा बर्ताव करो या परमेशरा रे बचना पर विश्चास करने रिया वजह ने तिन्हांजो परेशान करो, तां सै लोक परेशान हुईने इकदम बचना पर विश्वास करना छड्डी दें।

¹⁸ किछ लोक येढ़े तिन्हांरी बराबरी अहें झाड़ियां औल़िया धरतिया ने करी सक्कां ए, ये सै लोक ये तिन्हेंजे परमेशरा रा सन्देश सुणया,

¹⁹ सै बौहत सारी चिज़ां रा लालच करीने अमीर हुणे री इच्छा कराँ ये, इस खातर सै सिर्फ इन्हां चिज़ां री चिन्ता कराँ ये; इयां सै परमेशरा रे सन्देशा च अड़चन पाएं कने सै तिसरिया इच्छा पर नीं चली पान्दे।

²⁰ पर किछ लोक उपजाऊ धरतिया पर बाहीरे ब्यूआ साई ये, सै परमेशरा रे वचना जो सुणीने ग्रहण करी लैं कने सै इस पर विश्चास बी कराँ ये। सै परमेशरा रिया इच्छा पर चलां ये। सै तिन्हां खरयां बुट्टयां साई ये तिन्हांरी पैदावार जे तीह गुणा, साठ गुणा कने सौ गुणा हुआं इ।”

दिऊए रा उदाहरण

²¹ फेरी यीशुये तिन्हांने गलाया, “क्या कोई इक दिऊए जो बाल़ीने तिस्सो टोकरे या मंजे हेठ रक्खां ताकि तिसरिया लोई जो लुकोई सक्को? बिल्कुल नी। इक दिऊए जो इक ऊच्चिया ठारी रख्या जां, तित्थी ते जे तिसरी लोय चमकी सक्को।

²² काँह्भई गल्लां सै जे छिपि रियां इक दिन सै हरेक लोकां जाणनियां; कने किछ गल्लां सै जे चोरी-चुपके हुआं इयां, सै इक दिन हर माहणुये पूरिया रौशनिया च देखणियां।

²³ जो बी मेरी गल्ल सुणां, सै ध्यान देईने सुणो कने समझे।”

²⁴ फेरी तिने तिन्हांने गलाया, “चकन्ने रौआ भई तुहें मेरते क्या सुणां यें? जितने ध्यान्ना ने तुहें सुणगे, उतणी ही जादा समझ तुहांजो दित्ति जाणी वल्कि परमेशरा तुहांजो उसते बी जादा समझ देणी।

²⁵ काँह्भई सै जे कोई मेरिया गलाई रिया गल्ला जो ध्याना ने सुणा कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा, तिस सै बी भुल्ली जाणा तिसजो जे सै पैहले ते जाणदा हुन्गा।”

उगणे औल़े ब्यूआ रा द्रष्टान्त

²⁶ फेरी यीशुये गलाया, “परमेशर रा राज येढ़ा, तियां जे कोई करसाण धरतिया पर ब्यू बांह,

²⁷ कने सै बाहीरे ब्यूआ रे बारे च बिणा चिन्ता कित्ते सुत्तया कने जागया। तिस वगत ब्यू अप्पूँ उगया कने बधया तिस्सो सै जाणी नीं पाया।

²⁸ जमीन खुद अप्पूँ फसल पैदा कराँ इ, पैहले लुंग, फेरी सिल्लु, कने इसते बाद सिल्लुआं च दाणा त्यार हुआं।

²⁹ पर तंजे दाणा पक्की जां, तां सै डाटिया लईने कटणे लगां, काँह्भई फसला जो लुणने रा बगत आई गरा हुआं।”

राईया रे दाणे रा द्रष्टान्त

³⁰ फेरी यीशुये गलाया, “अहें परमेशरा रे राज्जा री बराबरी इस तरिके ने करी सक्कां ए। हऊँ तुहांजो इक उदाहरण दस्सां।

³¹ परमेशरा रा राज राईया रे दाणे रे बराबर आ; तंजे धरतिया च बाहया जां, तां धरतिया रे सबनी ब्यूआं ते छोट्टा हुआं,

³² पर तंजे बाही दें, तां उगीने सारे सागापाता ते बड्डा हुई जां, कने तिसरी येढ़ि बड्डियां डाल़ियां निकल़ां इयां भई अम्बरा रे पंछी तिसरी छावां च बसी सक्कां ये।”

³³ सै तिन्हाजो येढ़े कई उदाहरण देईने तिन्हां रिया समझा रे मुतावक वचन सुणावां था,

³⁴ ताहली जे यीशु अपणयां चेलयां ने गल्लां था, तां सै सदा उदाहरणां रा इस्तेमाल कराँ था; पर ताहली जे सै एकान्त च अपणे चेलयां सौगी हुआं था, तां तिन्हांजो सब्बीं गल्लां रा मतलब दस्सां था।

आन्धिया जो शान्त करना

³⁵ तिस दिन तंजे सांझ हुई, तां यीशुये चेलयां जो गलाया, “औआ अहें, गलील दरयावा रे पार चलिये।”

³⁶ यीशु पैहले तेई किश्तिया च था इस खातर तिन्हें भीड़ा जो छड्डया कने दरयावा च यात्रा करने लगीपे, होर लोक बी दुज्जियां किश्तियां च तिन्हांरे सौगी चलीपे।

³⁷ फेरी बड्डा तूफान आया, कने छालियां किश्तिया परा जो येढ़ियां आईयां भई सै पाणिये ने भरने लगी कने डुबणे औल़ी थी।

³⁸ कने सै अप्पूँ किश्तिया रे पिछले हिस्से च गद्दिया पर सिर रक्खीने सुत्तीरा था; फेरी तिन्हें तिस्सो जगाईने गलाया, “गुरू जी, अहें सारे डुबणे औल़े कने तिज्जो कोई चिन्ता नीं!”

³⁹ तां तिने उठ्ठीने तूफाना जो थिड़क्या, कने पाणिये रियां छालियां जो गलाया, “शान्त रै, रुकी जा!” कने तूफान रुकिग्या कने पूरा चैन हुईग्या;

⁴⁰ कने तिन्हांने गलाया, “तुहें काँह डराँ ये? क्या तुहांजो अजें तकौ बी माह पर विश्वास निआं?”

⁴¹ सै बौहत डरीगे कने अप्पूँ चियें गलाये, “ये कुण आ तिसरा हुक्म जे नां सिर्फ बुरीआत्मा, पर तूफान कने छालियां बी मन्नां ये?”