मरकुस 3 - बिलासपुरी नौआं नियम

सुक्के हत्था औल़े माहणुये जो चंगा करना

¹ फेरी भीं यीशु ताहली जे यहूदी सभा घरा च गये, तां तिन्हें इक सुक्कीरे हत्था औल़े माहणुये जो देख्या।

² तिन्हां चते किछ फरीसी यीशुये पर दोष लगाणे रे खातर कोई इक वजह टोल़ीरां थे, इस खातर सै तिस्सो ध्यान्ना ने देखणे लगे भई सै विस्राम रे दिन तिस्सो ठीक करगा कि नीं।

³ यीशुये सुक्कीरे हत्था औल़े माहणुये जो बोल्या, “सब्बीं लोकां रे सामणे खड़ा हुई जा।”

⁴ फेरी यीशुये फरीसियां ते पुच्छया, “क्या परमेशर अहांजो विस्राम रे दिन लोकां रा भला करने रा हुक्म देआं या बुरा करने रा? क्या सै अहांजो किसी री जिन्दगी बचाणे रा हुक्म देआं या तिसजो मारने रा?” पर सारे चुप रै।

⁵ यीशुये तिन्हांरे अड़ियल स्वाभावा ते उदास हुईने बड़े गुस्से ने तिन्हांरी तरफ देख्या, कने तिस माहणुये जो गलाया, “अपणा हात्थ मेरी तरफ कर।” तियां जे तिने हात्थ अग्गे कित्या, सै ठीक हुईग्या।

⁶ फेरी फरीसी इकदम यहूदी सभा घरा ते बाहर जाईने राजा हेरोद रे समर्थकां सौगी मिलीने सलाह मशवरा करने लगे भई यीशुये जो कियां मारीये।

भीड़ा रा यीशुये रे पिछे हूणा

⁷ इसते बाद यीशु अपणयां चेलयां सौगी गलील दरयावा री तरफ चलीप्या कने गलील जिले ते इक बड्डी भीड़ तिसरे पिछे चलीपी।

⁸ ये सुणीने भई यीशु केढ़े महान काम्म कराँ, यहूदिया कने इदूमिया जिले ते, यरूशलेम नगरा ते, यरदन नदिया रे पारा ते, कने सूर-सैदा नगराँ रे अक्खा-बक्खा रे इलाकयां ते बौहत बड्डी भीड़ तिसले आई।

^9-10 काँह्भई तिने मतयां लोकां जो ठीक कित्तिरा था; इस खातर जितने लोक बमारिया ने जकड़ोईरे थे, सै तिसरे नजदीक आईने तिस्सो छूणे री बौहत कोशिश करीराँ थे, ताकि सै लोक ठीक हुई सक्को। इस खातर तिने अपणयां चेलयां ने बोल्या भई, “मेरे खातर इक छोट्टी किश्ती त्यार रक्खा, ताकि लोक मेरने छोणे जो औणे रिया वजह ने मिन्जो घेरी नीं सक्को।”

¹¹ जाहलुँ बी बुरीआत्मायें यीशुये जो देक्खां इयां, सै तिसरे सामणे तिसजो आदर देणे खातर पई जांईयां, कने चीखां मारीने बोलां थिआं भई “यीशु परमेशरा रा पुत्र आ।”

¹² पर यीशुये बार-बार तिन्हांजो सावधान कित्या भई सै मेरे बारे च लोकां जो किछ नीं दस्सो।

बारा प्रेरितां जो नियुक्त करना

¹³ इसते बाद यीशु नजदीक रे इक्की पहाड़ा पर गया कने तिन्हां माह्णुआं जो सद्दया तिन्हांजो जे तिने अपणे चेले बणने खातर चुणया था कने सै लोकां बिच्चा ते तिसले आये।

¹⁴ फेरी यीशुये खुशखबरी सुनाणे रे खातर भेज्जे जाणे औल़े बारा लोकां जो चुणया, भई सै तिसने सौगी रैईने प्रचार करो, कने तिन्हांजो तिने प्रेरित बोल्या,

¹⁵ ये बी भई तिन्हौं लोकां ते बुरीआत्मा जो नकाल़णे रा अधिकार दित्या।

¹⁶ सद्दीरे इन्हां लोकां रे नौं: शमौन तिसरा नौं जे यीशुये पतरस रखया,

¹⁷ जब्दिये रा पुत्र याकूब, कने याकूब रा छोट्टा भाई यूहन्ना, तिसरा नौं यीशुये बुअनरगिस रख्या, इसरा मतलब आ बद्दल़ा रे गर्जणे साई माहणु,

¹⁸ कने अन्द्रियास, फिलिप्पुस, बरतुल्मै, मत्ती, थोमा, हलफईया रा पुत्र याकूब, तद्दै, शमौन सै जे यहूदी दला रा इक सदस्य था सै दल जे रोमी सरकारा रे बिरोधा च लोकां जो बिद्रोह करने रे खातर उत्साहित कराँ था।

¹⁹ कने यहूदा इस्करियोति तिने जे यीशुये जो धोखा देईने पकड़वाया था।

यीशु कने बालजबूल

²⁰ कने यीशु घरा जो आया कने येढ़ि भीड़ कट्ठी हुईगी भई सै रोटी बी नीं खाई सक्के।

²¹ ताहली जे यीशुये रे घरा औल़यां ये सुणया, तां सै तिस्सो पकड़ने रे खातर निकल़े, काँह्भई तिन्हांजो लगया भई यीशु पागल हुईगरा।

²² शास्त्री बी सै जे यरूशलेम नगरा ते आईरे थे, येढ़ा बोलणे लगे, “येत बुरीआत्मां रे मुखिये शैतान्ना रे सहारे बुरीआत्मां जो बाहर नकाल़ां।”

²³ इस खातर यीशु तिन्हांजो नेड़े सद्दीने तिन्हांने उदाहरणा च गलाणे लगया, “शैतान अपणिया बुरिया आत्मा जो नीं कड्डी सक्कां,

²⁴ जे इक्की देशा च रैहणे औल़े लोक इक्की दूये ने झगड़दे रैहन्गे, तां सै देश टुकड़यां च बटी जाणा।

²⁵ कने जे इक्की घरा च रैहणे औल़े लोक अप्पूँ बाटियें लड़दे रौ, तां सै परिवार टुट्टीने बिखरी जां।

²⁶ कने जे शैतान अपणा इ दुश्मण हुईने अप्पूँ चियें लड़ी जो, तां तिसरा राज कियां बणीरा रई सक्कां? तिसरा त अन्त हुई जाणा।

²⁷ पर कोई शैतान्ना साई किसी ताकतवर माहणुये रे घरा च घुसीने तिसरा समान नीं लुट्टी सकदा, तदुआं तकौ जो जे सै पैहले तिस ताकतवर माहणुये जो बन्ही नीं लओ, कने तांई सै तिसरे घरा जो लुट्टी सक्कां।

²⁸ हऊँ तुहांजो सच-सच बोलां, भई माहणुआं रिया औलादा रे सारे पाप कने निंध्या तिन्हांजो जे सै कराँ ये, परमेशरा माफ करी देणे; जे सै पश्चाताप करगे,

²⁹ पर सै जे कोई पवित्र आत्मा रे कम्मां री निंध्या करीने तिसरा वरोध करो, तिस्सो कदीं बी माफ नीं कित्या जाणा : पर सै सदा रे पापा रा अपराधी बणां।”

³⁰ यीशुये तिन्हांजो ये इस खातर बोल्या काँह्भई सै बोलां थे भई, “तिसच बुरीआत्मा।”

यीशुये री मौ कने भाई

³¹ फेरी यीशुये री माता कने तिसरे छोट्टे भाई आये, कने बाहर खड़ीने यीशुये जो सदणे खातर किसी जो भेज्या।

³² लोकां री भीड़ तिसरे अक्खा-बक्खा बैठीरी थी, तिन्हां चते इक्की माहणुये तिस्सो गलाया, “देख, तेरी माता, कने तेरे भाई-भैण बाहर तेरने मिलणा चाँये।”

³³ यीशुये तिन्हांजो जवाब दित्या, “मेरी माता कने मेरे भाईये साई कुण आ?”

³⁴ कने लोकां पर सै जे तिसरे अक्खा-बक्खा बैठिरे थे, देखीने यीशुये गलाया, “देक्खा, मेरी माता कने मेरे भाई येवे।

³⁵ काँह्भई सै जे परमेशरा रिया इच्छा पर चलां यें, सैई मेरी माता, मेरी बैहणीं, कने मेरे भाई ये।”