मरकुस 16 - बिलासपुरी नौआं नियम

यीशुये रा मूईरेयां ते जी उठणा

¹ तंजे विस्रामा रा दिन बीतिग्या, तां मगदल गाँवां री मरियम, याकूब री माता मरियम, कने सलोमीये खुशबुदार मसाले खरीदी ले, भई आईने यीशुये रिया लाशा पर मल़ो।

² हफ्ते रे पैहले दिन बड़े भ्यागा, तंजे सूरज निकल़या इ था, सै कब्रा पर आईयां,

³ कने अप्पूँ चियें गलाणे लगियां, “अहां खातर कब्रा रे दरवाजे परा ते पत्थर किस हटाणा?”

⁴ तंजे तिन्हें कब्रा खौ देख्या भई पत्थर हटिरा! सै पत्थर बौहत इ बड्डा था।

⁵ कब्रा रे अन्दर जाईने तिन्हें इक जवाना जो चिट्टे कपड़े पैहनीरे सज्जे पासे बैठिरा देख्या, कने बौहत हैरान हुईयां।

⁶ तिने तिन्हांने बोल्या, “हैरान मत हुंदियां, तुहें यीशु नासरिये जो टोल़ां इयां, सै जे क्रूसा पर चढ़ाया था। सै जिऊंदा हुईगरा, येत्थी निआं; देक्खा, ये सैई जगह इ, तित्थी जे तिन्हें तिस्सो रखीरा था।

⁷ पर तुहें जाओ, कने तिसरे चेलयां कने पतरसा जो बोल्ला भई तिस तुहांते पैहले गलील जिले जो जाणा। तेढ़ा जे तिने तुहांजो गलाया था, तुहां तित्थी तिस्सो देखणा।”

⁸ कने सै निकल़ीने कब्रा ते नट्ठी गियां; काँह्भई कंबणवात कने घबराणा तिन्हां पर छाई गरा था; कने तिन्हें किसी ने किछ नीं गलाया, काँह्भई सै डराँ थिआं।

मरियम मगदलिनी जो यीशुये रा दिसणा

⁹ रविवार रे दिन भ्याग हुंदे इ यीशु जिऊंदा हुईने सब ते पैहले मरियम जो दुस्या सै जे मगदला गाँवां ते थी, तिसा चते जे सात्त बुरीआत्मां कड्डियां थिआं।

¹⁰ तिसे जाईने यीशुये रे साथियां जो ये खबर सुणाई, सै जे दुखा च डुब्बीरे थे कने रोया राँ थे।

¹¹ कने चेलेयां ये सुणीने भई यीशु जिऊंदा कने मरियमे तिस्सो देखीरा, सच्च नीं मन्नया।

दुईं चेलयां जो यीशुये रा दिखाई देणा

¹² इसते बाद यीशु दुज्जे रुपा च तिन्हां चते दुईं चेलयां जो दिस्या, ताहली जे सै यरूशलेम ते आस्से-पास्से रे लाकयां चियें गाँवां रिया तरफा जाया राँ थे, पर सै तिस्सो इकदम पैहचाणी नीं सक्के काँह्भई सै बौहत लग दिख्या रां था।

¹³ तिन्हे वापस यरूशलेम नगरा च जाईने होरसीं जो ये खबर सुणाई, पर तिन्हे बी तिन्हांरा सच्च नीं मन्नया।

ग्याराँ जो यीशुये रा दिखाई देणा

¹⁴ फेरी यीशु तिन्हां ग्याराँ चेलयां जो बी दुस्या, तंजे सै रोटी खाणे बैठिरे थे। तिने लोकां रे लगातार विश्वास करने जो नकारने कने ढिठाईया पर ल़ुहामा दित्या, काँह्भई तिन्हेंजे तिसजो मुड़दयां चते जिऊंदा हुणे ते बाद देख्या था, तिन्हें बी तिसरा विश्वास नीं कित्या।

¹⁵ कने यीशुये अपणे चेलेयां जो गलाया, “तुहें सारे संसारा च जाईने सारिया सृष्टिया रे लोकां जो खुशखबरी प्रचार करा।

¹⁶ सै जे विश्वास करो कने बपतिस्मा लओ तिसरा इ छुटकारा हूणा, पर सै जे विश्वास नीं करगा सै दोषी समझया जाणा;

¹⁷ कने विश्वासियां जो चमत्कार करने री सामर्थ दित्ति जाणी भई तिन्हां मेरे नौआं ते बुरीआत्मा जो बाहर कडणा; तिन्हां सै भाषा बोलणी सै जे तिन्हें कदीं सिक्खी री नीं हूणी;

¹⁸ जे तुहें जहरीले सर्पां जो पकड़ी लैं, तां तिन्हां तुहांरा कोई नुक्शान नीं करना कने जे तुहें खतरनाक जहर बी पी लैं, तां इसते तुहांरा कोई नुकशान नीं हूणा; तुहां बमाराँ पर हात्थ रखणे, कने तिन्हां ठीक हुई जाणा।”

यीशुये रा स्वर्गा जो जाणा

¹⁹ तिन्हांने गल्लां करने ते बाद परमेशर प्रभु यीशुये जो स्वर्ग लेईग्या, कने अपणे संघासणा रे सज्जे पासे बठाया।

²⁰ कने चेलयां यरूशलेम नगरा ते निकल़ीने सारियें जगहें प्रचार कित्या, कने प्रभु तिन्हां सौगी काम्म करदा रैया, कने चमत्कारी नशाण दस्सीने तिने लोकां जो साबित कित्या भई परमेशरा रा वचना सच्चा। आमीन।