मरकुस 14 - बिलासपुरी नौआं नियम

यीशुये रे खलाफ चाल

¹ दुईं दिना ते बाद लोक फसह कने अखमीरी रोटिया रा त्योहार मनाणे जो त्यार थे। तिन्हें दिनें मुखियायाजक कने शास्त्री इसा गल्ला रिया टोल़ा च थे भई यीशुये जो कियां धोखे ने पकड़ीने मारया जाओ;

² पर सै इक्की दूये ने गलाईरां थे, “अहांजो त्योहारा रे दिन ये करना ठीक निआं,” काँह्भई जे अहें येढ़ा करगे तां “लोकां अहां पर बौहत गुस्से हूणा कने दंगा भड़की नीं जाओ।”

बैतनिय्याह च यीशुये रा अभिषेक

³ ताहली जे यीशु बैतनिय्याह गाँवां च शमौन कोढ़ी तिस्सो जे यीशुये कोढ़ा ते ठीक कित्तिरा था तिसरे घरें रोटी खाणे बैठिरा था, तां इक जनाना संगमरमरा रिया शीशिया च जटामांसी रा बौहत मैंहगा खुशबुदार असली तेल लईने आई; कने शीशी तोड़ीने तेल तिसरे सिरा पर मल़ीत्या।

⁴ पर जितने लोक ओत्थी मौजूद थे तिन्हां चते किछ लोक गुस्सा हुईगे कने होरीं ने गलाणे लगे, “तिसे इस खुशबुदार तेला जो खराब काँह करित्या?

⁵ काँह्भई येत तिन्न सौ दिनारा (सै जे इक्की साल्ला री मजदूरिया) ते जादा कीमता रा बेच्चीने, तिस पैसे जो गरीबां च बन्डी सक्कां थे।” इस खातर सै तिसाजो बुरे हाल्ले झिड़कणे लगे।

⁶ यीशुये गलाया, “इसाजो छडी दे,” “इसाजो काँह तंग कराँ? इसे त मेरने भला कित्या।

⁷ गरीब सदा तुहां सौगी रैं कने तुहें ताहलूं जे चाओ तां तिन्हाने भलाई करी सक्कां ये; पर मांह सदा तुहां सौगी नीं रैहणा।

⁸ जो किछ सै करी सक्की, तिसे कित्या; तिसे मेरे दफनाये जाणे री त्यारी करने खातर पैहले तेई मेरे शरीरा पर खुशबुदार तेल मल़ीत्या।

⁹ हऊँ तुहांजो सच बोलां भई सारे संसारा च तित्थी जे मसीह री खुशखबरी प्रचार कित्ती जाणी, तित्थी तिसारे इस कम्मां री चर्चा बी इसा रिया यादा च कित्ती जाणी।”

यहूदा रा विश्वासघात

¹⁰ फिर यहूदा इस्करियोति सै जे बाराँ चेलयां चते इक था, तिने मुखियायाजकां ले जाईने बोल्या भई यीशुये जो पकड़वाणे च हऊँ तुहांरी सहायता करगा।

¹¹ सै ये सुणी ने खुश हुये, कने यहूदा जो इसरे बदले पैसे देणे रा वायदा कित्या; कने यहूदा यीशुये जो पकड़वाणे खातर तिस पर नजर रखणे लगया।

चेलयां ने फसह री आखरी धाम

¹² अखमीरी रोटियां रे त्योहारा रे पैहले दिन, तिसच जे सै फसह रा बलिदान कराँ थे, तिसरे चेलयां पुच्छया, “तू कित्ती चाँह भई अहें तेरे खातर फसह रे खाणे री त्यारी करिये?”

¹³ तिने अपणे चेलयां चते दुईं जो ये बोलीने भेज्या, “यरूशलेम नगरा च जावा, कने इक माहणु तिने जे पाणिये रा घड़ा चक्कीरा हूणा तुहांजो मिलणा, तिसरे पिछे जायों;

¹⁴ कने सै माहणु तिस घरा जे जाओ, तिस घरा रे मालका ने गलायों, ‘अहांरा गुरू बोलां, भई मेहमान्नां रा कमरा किति आ, तित्थी जे हऊँ अपणयां चेलयां सौगी फसह री रोटी खाऊं?’

¹⁵ घरा रे मालका तुहांजो इक सजीरा-सजाई रा, कने त्यार कित्तिरा बड्डा कमरा दस्सी देणा, तित्थी तुहें अहांरे खातर फसह रा खाणा बणायों।”

¹⁶ फेरी दो चेले निकल़ीने नगरा च आये, कने तेढ़ा जे यीशुये तिन्हाने बोलीरा था, तेढ़ा इ हुआ; कने फसह रा भोजन त्यार कित्या।

¹⁷ तंजे सांझ हुई तां यीशु बारा चेलयां सौगी आया।

¹⁸ तंजे सै रोटी खाया राँ थे, तां यीशुये गलाया, “हऊँ तुहांजो सच बोलां भई तुहां चते इक्की, सै जे मेरने सौगी रोटी खाया रां, मिन्जो पकड़वाणा।”

¹⁹ चेलेयां पर उदासी छाईगी कने सै इक-इक करीने यीशुये ते पुछणे लगे, “क्या सै हऊँ आ?”

²⁰ यीशुये चेलयां ने बोल्या, “सै बारा चेलयां चते इक आ सै जे मेरने सौगी मेरे कटोरे च रोटी डुबोईराँ।

²¹ काँह्भई माहणुये रा पुत्र यनि हऊँ त मरने इ औल़ा, तियां जे पवित्र शास्त्रा च भविष्यवक्तयां मेरे बारे च दस्सीरा, पर तिस माहणुये जो बौहत भयानक सजा मिलणी तिस जे माहणुये रे पुत्रा जो यनि मिन्जो पकड़वाणा! जे तिस माहणुये रा जन्म इ नीं हुईरा हुंदा, तां तिस खातर भला हुंदा।”

प्रभु-भोज

²² तंजे सै खाया राँ थे, यीशुये रोटी लई, कने परमेशरा रा धन्यवाद कित्या, फेरी तिने रोटिया रे कई टुकड़े करीने अपणे चेलयां जो दित्ते, कने तिन्हाजो गलाया, “ये रोटी लेईने खाओ, ये मेरी देह इ।”

²³ फेरी यीशुये अँगूरा रे रसा रा कटोरा लईने परमेशरा रा धन्यवाद कित्या, कने कटोरा तिन्हांजो दित्या; कने तिन्हें सब्बीं तिस चते पित्या।

²⁴ तिने चेलयां जो गलाया, “ये अँगूरी रस मेरे खून्ना साई आ। मेरा खून लोकां रिया तरफा ते बलिदान्ना रे रुपा च बहाया जाणा। इसते ये वाचा साबित हूणी सै जे परमेशर अपणयां लोकां ने करां।

²⁵ हऊँ तुहांजो सच बोलां, भई अँगूरी रस तिस दिना तकौ इयां फेरी कदीं नीं पीणा; तदुआं तकौ जे इक राजे साई राज करना नीं शुरु करी देंगा।”

²⁶ फेरी सै भजन गाई ने बाहर जैतून्ना रे पहाड़ा पर गये।

पतरसा रे मुकरने री भविष्यवाणी

²⁷ ताहली जे यीशु कने तिसरे चेले रस्ते च थे, तां यीशुये तिन्हांजो गलाया, तुहां सब्बीं मिन्जो छड्डिने नट्ठी जाणा, काँह्भई पवित्र शास्त्रा च लिखिरा : मांह रखवाल़े जो मारना, कने भेड्डां बिखरी जाणा।

²⁸ पर परमेशरा मिन्जो मुड़दयां चते जिऊंदा करना तिसते बाद मांह तुहांते पैहले गलील प्रदेशा जो जाणा।

²⁹ पतरसे तिसने गलाया, “जे सारे तिज्जो छड्डिने चली बी जांगे, तां मांह तुहांजो नीं छडणा।”

³⁰ यीशुये पतरसा ने गलाया, “हऊँ तेरने सच बोलां भई आज्ज इ इसा राति जो कुकड़ा रिया दो बारी झांग देणे ते पैहले, तू तिन्न बार मेरा इन्कार करना।”

³¹ पर तिने होर बी जोर देईने गलाया, “जे मिन्जो तेरे सौगी मरना बी पौ, फेरी बी मांह तेरा इन्कार कदीं नीं करना।” होरीं सारयां बी इयां इ गलाया।

गतसमनी च यीशुये री प्राथना

³² फेरी यीशु कने तिसरे चेले गतसमनी नौआं रे बगीचे च आये, कने तिने अपणयां चेलयां जो गलाया, “येत्थी बैट्ठीरे रौआ, तदुआं तकौ जे हऊँ प्राथना करीराँ।”

³³ कने सै पतरस, याकूब कने यूहन्ना जो अप्पूँ सौगी लईग्या; कने सै बौहत इ जादा परेशान हुणे लगया,

³⁴ कने तिन्हांने गलाया, “मेरा मन बौहत उदास आ, इतणा भई हऊँ मरने औल़ा।” “तुहें येत्थी रुका, कने जागदे रौआ।”

³⁵ फेरी सै थोड़ा अग्गे बधीने, धरतिया पर गोडयां रे भार प्राथना करने लगया, भई जे हुई सक्को तां दुखा री ये घड़ी मेरे परा ते, टल़ी जाओ,

³⁶ कने गलाया, “हे अब्बा, हे पिता, तेरते सब किछ हुई सक्कां। इस दुखा ते मिन्जो बचाई लै तिस्सो जे हऊँ भोगणे औल़ा : तां बी तेढ़ा जे हऊँ चाँह तेढ़ा नीं, पर सै जे तू चाँह सैई हो।”

³⁷ फेरी यीशु वापस आया कने तिन्हां तिन्नां चेलेयां जो सुत्तीरे देखीने गलाया शमौन यनि पतरसा, “तू सया राँ? क्या इक घण्टा बी नीं जाग्गी सक्कया?

³⁸ जागदे कने प्राथना करदे रौआ भई तुहें परीक्षा रा सामना करी पाओ। मन त त्यार आ, पर शरीर कमजोर आ।”

³⁹ फेरी यीशु चलिग्या कने जाईने सैई प्राथना कित्ती सै जे तिने पैहले कित्ती थी।

⁴⁰ कने फेरी आईने तिन्हां तिन्नां जो सुत्तीरा देख्या, काँह्भई तिन्हांरियां आक्खीं च निन्द इतणी जादा थी भई सै आक्खीं खोल्ही नीं पाया राँ थे : कने नीं जाणदे थे भई तिस्सो क्या जवाब दईये।

⁴¹ फेरी सै तिज्जी बार प्राथना करने गया कने वापस आईने गलाया, “तुहें हुण बी सैईने आराम करी रायें? बस! वगत आई चुक्कीरा! देक्खा माहणुये रा पुत्र यनि हऊँ पापियां रे हात्था च पकड़वाया जाणा।

⁴² उट्ठा, चला! देक्खा, मेरे पकड़वाणे औल़ा नेड़े आई गरा!”

यीशुये रा धोखे ने पकड़वाया जाणा

⁴³ यीशु येढ़ा गलाया इ कराँ था, भई यहूदा सै जे बाराँ चेलेयां चते इक था, अपणे सौगी मुखियायाजकां कने यहूदी शास्त्रियां कने यहूदी बजुर्गां रिया तरफा ते इक बौहत भीड़ लईने ताहलूं आई पुज्जया, सै जे तलवार कने सोठयां लईने आईरे थे।

⁴⁴ तिसरे पकड़वाणे औल़े तिन्हांजो ये संकेत दित्या था : “तिसजो जे हऊँ गल़े लगांगा सैई यीशु आ; तिस्सो पकड़ीने सावधानिया ने लेई जायां।”

⁴⁵ ताहली जे यहूदा कने लोकां री भीड़ यीशुये ले पुज्जी, तां यहूदे इकदम यीशुये ले जाईने गलाया, “गुरू जी!” नमस्कार! कने तिसजो गल़े लगाया।

⁴⁶ तां तिन्हें यीशुये जो पकड़ीने बन्दी बणाईल्या।

⁴⁷ तिन्हां चते सै चेले जे नेड़े खढ़िरे थे इक्की तलवार खिंजीने महायाजका रे दास्सा पर चलाई, कने तिसरा कान्न बडीत्या।

⁴⁸ यीशुये तिन्हाने गलाया, “क्या तुहें डाकू जाणीने मिन्जो पकड़ने खातर तलवारां कने सोठियां लईने निकल़ीरे?

⁴⁹ हऊँ त हर दिन मन्दरा रे अंगणा च तुहां सौगी इ उपदेश देआं था, कने तां तुहें मिन्जो नीं पकड़या : पर ये इस खातर हुआ भई पवित्रशास्त्रा च जो किछ लिखिरा सै पूरा हुई सक्को।”

⁵⁰ इस पर सब चेले तिस्सो छड्डिने नट्ठीगे।

⁵¹ इक जवान सिर्फ चादर ओड्डीने यीशुये रे पिछे जाई कराँ था; ताहली जे लोकें तिस्सो पकड़या।

⁵² तां सै चादर छड्डिने नंगा इ नट्ठीग्या।

पंचैती रे सामणे यीशु

⁵³ फेरी सै यीशुये जो महायाजका रे घरें ली आये; कने सब मुखियायाजक कने बजुर्ग कने शास्त्री तिसले कट्ठे हुईगे।

⁵⁴ पतरस दूरा-दूरा ते तिसरे पिछे-पिछे महायाजका रे अंगणा रे अन्दरा तक गया, कने पैहरेदाराँ सौगी बैठीने आग्ग सेकणे लगया।

⁵⁵ मुखियायाजक कने सारी महासभा यीशुये जो मारने खातर तिसरे बरोधा च गवाहिया रिया टोल़ा च थे, पर नीं मिली।

⁵⁶ काँह्भई बौहत सारे तिसरे बरोधा च झूट्ठी गवाही देया राँ थे, पर तिन्हांरियां गवाहियां इक्को जेईयां नीं थिआं।

⁵⁷ तां किछ लोकें उट्ठीने तिसरे खलाफ ये झूट्ठी गवाही दित्ति,

⁵⁸ “अहें इस्सो ये बोलदे सुणीरा, ‘मांह इस हत्था रे बणाईरे मन्दरा जो रुढ़ाई देणा, कने तिन्नां दिनां च दुज्जा बनाणा, सै जे हत्था ते नीं बणीरा हो।’ ”

⁵⁹ इस पर बी तिन्हारी गवाही इक्को जेई नीं निकल़ी।

⁶⁰ तां महायाजके बिच खड़े हुईने यीशुये ते पुच्छया, ये लोक तेरे बरोधा च क्या गवाही देई रायें? “तू कोई जवाब नीं देन्दा?”

⁶¹ पर सै चुप-चाप रैया कने किछ जवाब नीं दित्या। महायाजके तिस्सो फेरी पुच्छया, “क्या तू परमधन्य परमेशरा रा पुत्र मसीह आ?”

⁶² यीशुये गलाया, “हऊँ हया : कने तुहां माहणुये रे पुत्रा यनि मिन्जो सर्वशक्तिमाना रे सज्जे पासे बैठिरा, कने अम्बरा ते बद्दल़ां पर उतरदा हुया बी देखणा।”

⁶³ तां यीशुये रे जबाबा पर महायाजके गुस्से च अपणे चोल़े जो फाड़दे हुये गलाया, “अहांजो किसी होर गवांह री क्या जरूरत इ?

⁶⁴ काँह्भई तुहें सुणील्या भई यीशुये परमेशरा रे बरोधा च बुरा बोल्या! इस खातर तुहांरा क्या फैसला?” तिन्हें सब्बीं गलाया भई यीशु दोषी था, कने मौती रे लायक आ।

⁶⁵ तां किछ लोक तिस पर थुकणे लगे, कोई तिसरा मुँह ढकणे लगे कने घसुन्ने मारने लगे, किछ तिसने बोलणे लगे, “जे तू इक भविष्यवक्ता, तां अहांजो दस्स भई तिज्जो किने मारया!” कने सपाहियें तिन्हें जे तिस्सो पकड़ीरा था थप्पड़ मारे।

पतरसा रा इन्कार करना

⁶⁶ ताहली जे पतरस महायाजका रे घरा रे अंगणा च था, तां महांयाजका रे घरें काम्म करने औल़ी इक दासी तिसले आई,

⁶⁷ कने पतरसा जो आग्ग सेकदा हुआ देखीने तिस्सो घूरीने देख्या कने बोलणे लगी, “तू बी त तिस नासरी यीशुये सौगी था।”

⁶⁸ पर सै मुकरी गया कने गलाया, “हऊँ नीं जाणदा कने नांई समझां भई तू क्या गलाया राईं।” फेरी सै बाहर गल़िया च चलिग्या; कने कुकड़े झांग दित्ति।

⁶⁹ सै दासी तिस्सो देखीने तिन्हाने सै जे सौगी खढ़िरे थे, फेरी भीं बोलणे लगी, “ये तिन्हां चते इक आ।”

⁷⁰ पर सै फेरी मुकरी गया। थोड़िया देरा बाद तिने सै जे नेड़े खढ़िरे थे भीं ते पतरसा जो गलाया, “जरूर तू बी तिन्हां चते इक आ; काँह्भई तू गलीली बी आ।”

⁷¹ पर सै अप्पूँजो कोसणे कने कसम खाणे लगया, भई “हऊँ तिस माहणुये जो नीं जाणदा, तिसरी जे तुहें चर्चा करया रायें; काँह्भई परमेशर जाणाँ भई हऊँ सच्च बोलीराँ। जे इसच थोड़ा बी झूठ आ, तां सै मिन्जो इसरी सजा देओ।”

⁷² तां ताहलूं दुज्जी बारी कुकड़े झांग दित्ति। पतरसा जो यीशुये री गलाई री गल्ल याद आई, भई “कुकड़ा रे दो बार झांग देणे ते पैहले तू तिन्न बारी मेरा इन्कार करना।” सै इसा गल्ला जो सोच्चीने दुखी हुया कने रोणे लगया।