मरकुस 12 - बिलासपुरी नौआं नियम

दुष्ट करसाणां रा द्रष्टान्त

¹ फेरी यीशु उदाहरण देईने मुखियेयाजकां, यहूदी शास्त्रियां कने यहूदी स्याणयां जो बोलणे लगया : “किसी माहणुये अंगूरां रा बगीचा लगाया, कने तिसरे चऊँ पासयां बाड़ बन्ही, कने अंगूरां रा रस निकाल़णे खातर इक कोहलू लगाया। तिने बगीचे री रखवाल़ी करने खातर इक गुम्मट बी बणाया; कने करसाणां जो तिसरा ठेका देईने प्रदेशा जो चलिग्या।

² फेरी ताहली जे फसल त्यार हुईगी, तां तिने अपणे दास्सां चते इक्की जो करसाणा ले अपणा हिस्सा लेणे खातर भेज्या।

³ पर करसाणें तिस्सो पकड़ीने कुट्टया कने बिणा किछ दित्ते मालका ले वापस भेजित्या।

⁴ फेरी बगीचे रे मालके इक होर दास तिन्हां लौ भेज्या, तिन्हें तिसरा बी सिर फाड़ित्या कने तिसरी बेज्जति कित्ती।

⁵ फेरी तिने इक होर दास्सा जो भेज्या; तिन्हें तिस्सो मारीत्या। तां तिने होर कई दास्सां जो भेज्या; तिन्हां चते तिने कईयां जो कुट्टया, कने थोड़यां जो मारीत्या।

⁶ हुण भेजणे खातर मालका ले सिर्फ इक इ माह्णु था। सै माह्णु तिसरा अपणा प्यारा पुत्र था; आखिर बिच तिने तिस्सो बी तिन्हां लौ ये सोच्चीने भेज्या, ‘भई सै मेरे पुत्रा रा आदर करगे।’

⁷ पर ताहली जे करसाणें तिसरे पुत्रा जो औन्दे हुये देख्या, तां तिन्हें इक्की दूये ने गलाया, ‘येई त बगीचे रा बारस आ। आओ, अहें इस्सो मारी दईये, तां सब किछ अहांरा हुई जाणा।’

⁸ कने तिन्हें तिस्सो पकड़ीने मारीत्या, कने लाश अंगूरां रे बगीचे ते बाहर सट्टीत्ती।”

⁹ यीशुये पुच्छया “तुहांजो क्या लगां भई अंगूरां रे बगीचे रा मालक क्या करगा? हऊँ तुहांजो बोलां तिस आईने सै करसाण मारी देणे, कने अंगूरां रा बगीचा दुज्जेयां जो दई देणा।

¹⁰ क्या तुहें पवित्रशास्त्रा च ये वचन नीं पढ़या : “‘तिस पत्थरा जो जे राज मिस्त्रीये बेकार समझया था, सैई मकाना रा खास पत्थर हुईग्या;

¹¹ ये परमेशरा रिया तरफा ते हुआ, कने ये अहां रिया नज़राँ च अदभुत आ!’”

¹² तां यहूदी अगबेयां यीशुये जो पकड़ना चाहया; काँह्भई सै समझीगे थे भई इने आहंरे बारे च ये उदाहरण बोलीरा : पर सै लोकां ते डरे; कने तिस्सो छड्डिने चलीगे।

कैसरा जो कर देणा

¹³ फेरी यहूदी अगबेयां यीशुये जो गल्लां च फसाणे खातर किछ फरीसी अगुवेयां कने राजा हेरोद रे समर्थकां जो तिसले भेज्या।

¹⁴ तिन्हें आईने तिस्सो गलाया, “गुरू जी, अहें जाणाँ ये, भई तू सच्चा, कने किसी री परवाह नीं करदा काँह्भई तू माहणुआं रा मुँह देखीने गल्लां नीं करदा, (यनि किसी रा पक्षपात नीं करदा) पर परमेशरा रा रस्ता सच्चाईया ने दस्सां। तां मूसा रिया व्यवस्था रे मुताबक क्या बादशाह कैसरा जो यनि रोमी सरकारा जो कर देणा ठीक आ की नीं?

¹⁵ अहें कर दईये की नीं दईये?” पर यीशुये तिन्हारा कपट जाणीने, तिन्हाजो गलाया, “हऊँ जाणा भई तुहें मेरे मुँआं ते किछ गल़त निकलवाणे री कोशिश करी रायें ताकि माह पर कोई दोष लाई सक्को।” कने तिने बोल्या, “इक दिनार (इक्की दिना रिया मजदूरिया रे बराबर था) मेरे लौ ल्यावा, भई हऊँ तिस्सो देक्खुँ।”

¹⁶ सै इक दिनारा रा सिक्का ली आये कने यीशुये तिन्हाते पुच्छया, “इस दिनारा पर शकल कने नौं किसरा?” तिन्हें गलाया, “बादशाह कैसर यनि रोमी सरकारा री।”

¹⁷ यीशुये तिन्हाजो गलाया, “सै जे रोमी सरकारा रा यनि बादशाह कैसरा रा, सै कैसरा जो देओ, कने सै जे परमेशरा रा सै परमेशरा जो देओ।” तां सै तिस पर बौहत हैरान हुणे लगे।

मूईरेयां ते जिऊंदा हूणा कने ब्याह

¹⁸ फेरी सदूकी समूह रे किछ लोक यीशुये ले आए। सदूकी समूह ये नीं मनदा भई मूईरे लोक भीं ते जिऊंदे हुई सक्कां ये, तिन्हें आईने यीशुये ते पुच्छया,

¹⁹ “गुरू, मूसे अहां खातर लिखिरा भई जे किसी रा भाई बिणा औल़ाद मरी जाओ कने तिसरी जनाना रई जाओ, तां तिसरा भाई तिसा विधवा ने ब्याह करी लौ कने अपणे भाई ये खातर बंश चलाओ।

²⁰ इक बार सात्त भाई थे। पहला भाई ब्याह करीने बिणा औल़ादे मरीग्या।

²¹ तां दुज्जे भाईये तिसा बिधवा ने ब्याह करील्या कने बगैर औल़ाद मरीग्या; कने तियां इ तिज्जे ने बी हुया।

²² कने सत्तां भाईयां री कोई औल़ाद नीं हुई। आखिर च सै बिधवा बी मरीगी।

²³ इस खातर जिऊंदा हुणे पर सै तिन्हां चते किसरी जनाना हुंगी? काँह्भई सै सत्तां री जनाना हुईगरी थी।”

²⁴ यीशुये तिन्हाजो जवाब दित्या, “तुहें इसा वजह ते गल़त ये काँह्भई तुहें पवित्रशास्त्रा जो कने परमेशरा री सामर्था जो नीं जाणदे।

²⁵ काँह्भई तंजे तिन्हां मूईरयां चते भीं ते जिऊंदेयां हुंणा, तां नां ब्याह हुणे कने नां खसमा री कोई ज्वाणस हूणी, नां ज्वाणसा रा कोई खसम हूणा, तिन्हां स्वर्गा च दूतां साई हूणा। स्वर्गदूत ब्याह नीं करदे।

²⁶ मूईरयां चते जिऊंदा हुणे रे बारे च: क्या तुहें मूसा रिया कताबा च परमेशर जल़दिया हुईया झाड़िया चते मूसा ने गल्ल करां, तिसा जगह परमेशर बोलां भई हऊँ अब्राहमा रा परमेशर, कने इसहाका रा परमेशर, कने याकूब रा परमेशर आ?

²⁷ तिस वगत, सै तिन्नो मरी चुक्कीरे थे। पर परमेशरा रे सामणे सै हुण बी जिऊंदा ये। इस खातर तिने येढ़ा बोल्या, सै मूईरेयां लोकां रा परमेशर नींआ, सै तिन्हां लोकां रा परमेशर आ सै जे जिऊंदे! तुहें इन्हां गल्लां रा विश्वास नीं करीने, बौहत गल़ती कित्ती।”

सब्बीं ते बड्डा हुक्म

²⁸ यहूदी शास्त्रियां चते इक्की आईने तिन्हांजो बैहस करदे सुणया, कने ये जाणीने भई यीशुये तिन्हां खरे हिसाबा ने जवाब दित्या, इस खातर तिसते पुच्छया, “सब्बीं हुक्मां चते खास हुक्म कुण जेआ?”

²⁹ यीशुये तिस्सो जवाब दित्या, “सारयां हुक्मा चते ये खास हुक्म आ,” “इस्राएल रे लोको ‘सुणा, प्रभु अहांरा परमेशर इक इ प्रभु आ।

³⁰ इस खातर, तू प्रभु अपणे परमेशरा ते अपणे सारे मन, अपणे सारे प्राण, अपणी सारी अक्कल, अपणी सारिया ताकता ते प्रेम रख।’

³¹ कने दुज्जा खास हुक्म येआ, ‘तू अपणे पड़ेसिये ने अप्पूँ साई प्रेम रख।’ इसते बड्डा होर कोई हुक्म निआं।”

³² यहूदी शास्त्रिये यीशुये ने गलाया, “गुरू, बौहत ठीक बोल्या।” “तू ये सच्च बोलां भई सिर्फ इक इ परमेशर आ, कने इसते इलावा होर कोई परमेशर निआं।

³³ कने तिसने अपणे सारे मना, कने सारिया अक्ला, कने सारिया ताकता सौगी प्रेम रखणा; कने अपणे पड़ेसिये ने अप्पूँ साई प्रेम रखणा, ये सारयां भेन्टां कने बलिदान्नां ते बधी नेआ।”

³⁴ तंजे यीशुये देख्या भई तिने समझा ने जवाब दित्या, तां तिसने गलाया, “परमेशरा जो राजे रे रुपा च ग्रहण करने ते तुहें बड़ा दूर नींये।” कने इसते बाद फेरी किसी जो यीशुये ते किछ पुछणे री हिम्मत नीं हुई।

मसीह किसरा पुत्र आ

³⁵ फेरी यीशुये मन्दरा रे अंगणा च उपदेश देन्दे हुये ये गलाया, “शास्त्री काँह बोलां ये भई मसीह दाऊद रा पुत्र आ?

³⁶ राजा दाऊदे अप्पूँ इ पवित्र आत्मा च हुईने मसीह रे बारे च बोल्या : “ ‘परमेशरे मेरे प्रभुये ने गलाया, “मेरे सज्ज़े पासे बैठ, तदुआं तकौ जे भई हऊँ तेरे सारयां दुश्मणां जो, तेरे बशा च नीं करी दूँ।” ’

³⁷ दाऊद तां अप्पूँ इ मसीह जो अपणा प्रभु बोलां, फेरी सै तिसरा पुत्र कियां हुआ? कने भीड़ा रे लोक तिसरे उपदेशा जो मज़े ने सुणां थे।”

यहूदी शास्त्रियां ते खबरदार

³⁸ ताहली जे यीशु तिन्हां लोकां जो उपदेश देई कराँ था, तां तिने तिन्हांजो गलाया, “यहूदी शास्त्रियां ते बचीने रौआ, सै जे लम्मे-लम्मे कपड़े पैहनीने घुमणा कने बज़ाराँ च लोकां ते ईज्जत पाणा पसन्द कराँ ये,

³⁹ कने सै यहूदी सभा घरा च सब्बीं ते खास जगहां पर बैठणा पसन्द कराँ ये। धाम्मां च सै तिन्हां जगहां च बैठणा पसन्द कराँ ये तित्थी जे सब्बींते ईज्ज़तदार लोक बैट्ठां ये।

⁴⁰ सै विधवां जो धोखा देईने तिन्हांरे घराँ कने धन-दौलता जो ठगी लैं, फेरी सै लोकां जो ये दस्सां ये भई बड्डिया देरा तक प्राथना करीने सै बधिया करी रांये। येढ़यां लोकां जो भयानक सजा मिलणी।”

गरीब बिधवा रा दान

⁴¹ यीशु मन्दरा रिया दान-पेट्टिया रे सामणे बैठीने देख्या राँ था भई लोक मन्दरा रिया पेट्टिया च कियां दान पांये; कने अमीर लोकें दान-पेट्टिया च बौहत जादा दान पाया।

⁴² इतणे च इक गरीब विधवे आईने ताँबे रे दो छोट्टे सिक्के (दमड़ियाँ), सै जे इक्की धेले रे बराबर हुआं इयां, पाईयां।

⁴³ तां यीशुये अपणे चेलयां जो अप्पूँ ला सद्दीने तिन्हांने गलाया, “हऊँ तुहांजो सच्च बोलां भई मन्दरा रिया दान-पेट्टिया च पाणे औल़यां चते इस गरीब विधवे सब्बीं ते जादा दान दित्या;

⁴⁴ काँह्भई सारयां देणे औल़यां अपणे बौहत पैसे चते किछ हिस्सा दान दित्या, पर इस बिधवे अपणा सब किछ देईत्या येत्थी तक भई तिसाले जिऊंदा रैहणे खातर बी किछ नीं रैया।”