मत्ती 9 - बिलासपुरी नौआं नियम

लकवे रे रोगिये जो चंगा करना

¹ फेरी यीशु इक्की किश्तिया च बैट्ठया कने नदिया ते पार अपणे तिस नगरा च आईग्या तिसच जे सै रैई कराँ था।

² तिस वगत किछ लोक लकवे रे इक रोगिये जो पाल़किया पर रखीने तिसले ल्याये। तिन्हांरा विश्वास देखीने यीशुये तिस लकवे रे रोगिये ने बोल्या, “हे पुत्र, हौंसला रख; तेरे पाप माफ हुईगे।”

³ कने कई यहूदी शास्त्रियें अप्पूँ चियें गलाया, भई “ये माहणु त परमेशरा री निंध्या कराँ।”

⁴ यीशुये तिन्हांरे मना रियां गल्लां जाणीने बोल्या, “तुहें लोक अपणे-अपणे मनां च बुरा बचार काँह करी रायें?

⁵ जादा ठीक क्या? ये बोलणा, भई ‘तेरे पाप माफ हुये’, या ये बोलणा, भई ‘खड़ा ओ कने चली पौ।’

⁶ पर इस खातर भई तुहें जाणी लवा भई मिन्जो यनि माहणुये रे पुत्रा जो धरतिया पर पाप माफ करने रा अधिकार आ।” तिने लकवे रे रोगिये जो गलाया, “उट्ठ, अपणिया पाल़किया चक कने घरौ चली जा।”

⁷ सै इकदम खड़ा हुया कने अपणे घरौ चलिग्या।

⁸ लोक येढ़ा देखीने डरीगे कने परमेशरा रे गीत गाणे लगे तिने जे माहणुआं जो येढ़ा अधिकार दित्या।

यीशुये रा मत्तिये जो चुणना

⁹ ऊत्थीते अग्गे बधीने यीशुये मत्ती नौंवां रे इक्की माहणुये जो चुंगी लेणे औल़े नाक्के पर बैठिरा देख्या कने तिसजो बोल्या, “मेरे सौगी औ।” इस खातर सै उट्ठया कने तिसरे पिच्छे चलीप्या।

¹⁰ कने ताहली जे सै घरें रोटी खाणे बैट्ठया, तां मते सारे चुंगी लेणे औल़े कने पापी आईने यीशु कने तिसरयां चेलयां सौगी खाणे बैट्ठे।

¹¹ ये देखीने फरीसियें तिसरे चेलयां ने बोल्या, “तुहांरा गुरू चुंगी लेणे औल़यां ने कने पापियां ने सौगी खाणा कजो खां?”

¹² ये सुणी ने यीशुये तिन्हांने गलाया, “भले चंगयां जो नीं पर बमाराँ जो डाक्टरा री जरूरत हुआंईं।

¹³ इस खातर तुहें जाईने इसरा मतलब सिक्खी लौआ, भई हऊँ बलिदान नीं चाहन्दा पर दया चाँह; काँह्भई हऊँ धर्मियां जो नीं, पर पापियां जो सदणे आईरा।”

उपवासा पर स्वाल

¹⁴ फेरी बपतिस्मा देणे औल़े यूहन्ने रे चेलयां तिसले आईने बोल्या, “क्या वजह इ भई अहें कने फरीसी इतणा उपवास कराँ ये, पर तेरे चेले उपवास नीं करदे?”

¹⁵ यीशु तिन्हांजो उदाहरण देईने ये दसणा चाँह, भई “क्या बरातिये, तदुआं तक जे लाड़ा तिन्हां सौगी आ, दुख मनाई सक्कां ये? पर सै दिन औणे भई ताहली जे लाड़ा तिन्हाते लग कित्या जाणा, तिस बगत सै दुखी हुणे कने उपवास रखणा।

¹⁶ नये कपड़े री टल्ही पुराणे कपड़े पर कोई नीं लान्दा, काँह्भई सै टल्ही कपड़े ते होर किछ खिंजी लेईं, कने सै जादा फटी जां।

¹⁷ नौआं अंगूरी रस पुराणियां चमड़े रिया थैलियां च नीं भरदे, काँह्भई येढ़ा करने ते सै फटी जाईयां, कने अंगूरी रस बगीने बिखरी जां कने मशकां बी खत्म हुई जाईयां; पर नया अंगूरी रस नई मशकां च भराँ ये कने सै दोन्नों बची रैईयां।”

मुईरी कुड़ी कने बमार जनाना

¹⁸ यीशु तिन्हां लोकां जो ताहली जे ये गल्लां बोल्या इ कराँ था, भई यहूदियां रा इक मुखिया तिसले आया कने तिसले झुकीने विनती करदे हुये गलाया, “मेरी कुड़ी येब्बां इ मरी! तू चल्लीने जे तिसा पर अपणा हात्थ रखी दो, तां सै भीं ते ज्यून्दी हुई जाणी।”

¹⁹ यीशु उट्ठीने अपणे चेलयां ने तिस सौगी चलीप्या।

²⁰ तित्‍थी इक जनाना थी तिसौ जे बारा साल्लां ते खून बगणे री बमारी थी, सै पिच्छे ते यीशुये रे नेड़े आई कने तिसरे कपड़े री कनारी छुई ली।

²¹ काँह्भई सै छोणे ते पैहले अपणे मना च सोच्चीराँ थी, “जे हऊँ जरा बी इसरे कपड़यां जो छुई लुँ, तां बी मांह ठीक हुई जाणा।”

²² मुड़ीने तिसाजो देखदे हुये यीशुये गलाया, “बेटी हौंसला रख; तेरे विश्वासे तिज्जो इसा बमारिया ते ठीक कित्या।” कने सै जनाना तिस इ पल ठीक हुईगी।

²³ ओतखा ताहली जे यीशु तिस मुखिये रे घरें पुज्जया, तां तिने देख्या भई शंख बजणे औल़े कने तित्थी कट्ठे हुईरे लोक कुड़िया रे मरने पर हल्ला करीराँ थे,

²⁴ फेरी यीशुये लोकां ने गलाया, “इत्थीते बाहर जावा, कुड़ी मरीरी नीं, पर ये सुत्ती री।” तिसरिया इसा गल्ला पर लोक यीशुये रा मजाक डवाणे लगे।

²⁵ फेरी ताहली जे लोक बाहर भेज्जीते, तां यीशुये कुड़िया रे कमरे च जाईने तिसारा हात्थ पकड़या, कने सै उट्ठीने बैठिगी।

²⁶ कने इसा गल्ला रा चर्चा सारे लाके च फैल्लीग्या।

दुईं अन्हेयां रियां आक्खीं च जोत पाणा

²⁷ यीशु ताहली जे तित्थी ते जाणे लगया, तां दो माहणु आक्खीं ते अन्हे तिसरे पिच्छे हाक पान्दे हुये चले, “ओ राजा दाऊद रे वंशज, अहां पर दया कर!”

²⁸ सै ताहली जे घरा रे अन्दर पुज्या, तां सै अन्हे तिसले आये, फेरी यीशुये तिन्हांते पुच्छया, “क्या तुहांजो विश्वास आ भई हऊँ तुहांजो ठीक करी सक्कां?” तिन्हें जबाब दित्या, “हाँ, प्रभु, अहें विश्वास कराँ ये भई तू अहांजो ठीक करी सक्कां।”

²⁹ फेरी तिने तिन्हांरियां आक्खीं ने छोईने बोल्या, “काँह्भई तुहें विश्वास कराँ ये भई हऊँ तुहांजो ठीक करी सक्कां इस खातर तुहां ठीक हुई जाणा।”

³⁰ कने सै दोन्नों अन्हे इकदम देखणे च सक्षम हुईगे, फेरी यीशुये तिन्हांजो चेतावनी देईने गलाया, “खबरदार, तुहें किसी ने नीं बोल्यों भई मैं तुहांरे खातर क्या कित्तीरा।”

³¹ पर तिन्हे ऊत्थीते जाईने ये खबर तिस लाके रे चऊँ पासयां फैलाईती।

इक गुंगे जो चंगा करना

³² ताहली जे सै अन्हे आदमी ऊत्थी ते जाईराँ थे, तां किछ लोक यीशुये ले इक गुंगे जो लेईने आये, सै गुंगा बुरीआत्मा रा सताईरा था, इस खातर सै बोल्ली नीं पान्दा था।

³³ ताहली जे यीशुए बुरीआत्मा जो तिस आदमिये चते बाहर कड्डीत्या, तां तिने गुंगे बोलणा शुरू करीत्या। फेरी इस पर लोकें चम्भा करीने गलाया, “इसते पैहले इस्राएल च येढ़ा कदीं नीं देख्या गया।”

³⁴ पर फरीसी गलाई कराँ थे, “येत बुरीआत्मां जो शैतान्ना रे मुखिये री सहायता ने बाहर कड्डां।”

यीशुये जो लोकां पर खेद

³⁵ फेरी यीशु कने तिसरे चेले गलील प्रदेशा रे बौहत सारे नगराँ कने गाँवां च गये कने तिन्हां रयां यहूदी सभा घराँ च उपदेश करदा, कने परमेशरा रे राज्जा री खुशखबरिया रा प्रचार करदा, कने हरेक किस्मा रियां बमारियां कने कमजोरियां जो दूर करदा रैया।

³⁶ यीशु ताहली जे कई लोकां जो देक्खां तां तिस्सो लोकां पर तरस आया, काँह्भई सै लोक तियां इ सताईरे कने मजबूर थे, तियां जे सै भेड्डां हुआं इयां तिन्हांरा जे कोई रखवाल़ा नीं हुन्दा।

³⁷ फेरी यीशुये अपणे चेलयां ने गलाया, “बौहत लोक सै जे मेरा सन्देश सुणने रे खातर त्यार ये सै तिस खेता साई ये सै जे फसला रिया बिजाईया खातर त्यार आ, पर मेरा सन्देश लोकां जो सुनाणे औल़े बड़े कम लोक ये।

³⁸ इस खातर परमेशरा ने प्राथना करा कने पुच्छा भई सै अपणिया फसला जो कठेरने कने मेरा सन्देश सुनाणे खातर बौहत मजदूर भेज्जी दो, तियां जे खेता रा मालक अपणे खेता रिया फसला जो कठेरने खातर बौहत सारे मजदूर भेज्जां।”