मत्ती 4 - बिलासपुरी नौआं नियम

यीशुये रा परखया जाणा

¹ बपतिस्मे ते बाद पवित्र आत्मा यीशुये जो सुनसान जगह च लेईग्या ताकि शैतान तिसजो परखी सक्को।

² चाल़ी दिन, कने चाल़ी रात तिने किछ नीं खाया, इसते बाद तिस्सो भूक्ख लगी।

³ तां परखणे औल़े शैताने नेड़े आईने तिसजो गलाया, “जे तू परमेशरा रा पुत्र आ, तां इन्हां पत्थराँ जो हुक्म देईने साबित कर, भई ये रोटियां बणी जो, ताकि तू खाई सक्को।”

⁴ यीशुये जबाब दित्या, “ये पवित्रशास्त्रा च लिखिरा, ‘माहणु सिर्फ रोटिया तेई नीं, पर हरेक बचन सै जे परमेशर बोलां तिसरा पालन करने ते जिऊंदा रैहणा।’ ”

⁵ फेरी शैतान तिस्सो पवित्र नगर यरूशलेम च लेईग्या कने मन्दरा री सब्बीं ते ऊच्चिया ठारी खड़ा कित्या,

⁶ कने गलाया, “तू दावा कराँ भई तू परमेशरा रा पुत्र आ, येत्थीते छाल़ मारीने साबित कर। काँह्भई पवित्रशास्त्रा च लिखिरा, सै अपणे स्वर्गदूतां जो तेरे बारे च ये हुक्म देंगा, भई सै तेरी रक्षा करो। कने तिन्हां इकदम तिज्जो अपणे हत्था पर इयां थम्मी लेणा, तिसते जे तेरे पैराँ जो बी पत्थराँ ते चोट तक नीं लगणी।”

⁷ यीशुये तिसजो गलाया, “पवित्रशास्त्रा च ये बी लिखिरा, ‘तू प्रभु अपणे परमेशरा जो ये साबित करने खातर परखणे री कोशिश मत करदा भई सै अपणे वायदयां जो पूरा कराँ या नीं कराँ।’ ”

⁸ फेरी शैतान यीशुये जो इक बड़े ऊच्चे पहाड़ा पर लेईग्या कने तिस्सो संसारा रे सारे राज-पाठ (धन-दौलत) दस्सीने

⁹ तिस्सो गलाया, “जे तू मेरे अग्गे मत्था टेक्कीने मेरी अराधना करो, तां मांह ये सब किछ तिज्जो देई देणा।”

¹⁰ फेरी यीशुये तिसजो गलाया, “शैतान दूर हुई जा, काँह्भई पवित्रशास्त्रा च लिखिरा: ‘तू प्रभु अपणे परमेशरा री अराधना कर, कने सिर्फ तिसरी इ सेवा टैहल कर।’ ”

¹¹ फेरी शैतान तिस्सो छड्डिने चलिग्या, कने स्वर्गदूत आईने तिसरी सेवा करने लगे।

यीशुये रे कम्मां री शुरुआत

¹² यीशुये ताहली जे सुणया भई यूहन्ना पकड़या जाई चुक्कीरा, तां यीशु यहूदा प्रदेशा जो छड्डिने गलील प्रदेशा जो बापस गया।

¹³ कने सै नासरत जो छड्डिने कफरनहूम रे तिस इलाके च गया सै जे गलील दरयावा रे कनारे बसीरा था, तित्थी जे जबूलून कने नप्ताली गोत्राँ रे लोक रैयां थे।

¹⁴ ये इस खातर हुया भई परमेशरे यशायाह भविष्यवक्ते रे जरिये जो किछ गलाया था, सै पूरा ओ।

¹⁵ “तुहें लोक सै जे जबूलून कने नप्ताली गोत्राँ रे कव्जे औल़यां इलाकेयां च रैं, सै जे तिस रस्ते पर ये सै जे गलील झीला ले कने यरदन नदिया रे पूर्वी कनारेयां पर बसीरे। ये गलील प्रदेशा रे येढ़े इलाके तित्थी जे कई गैर यहूदी रैं,

¹⁶ ये लोक परमेशरा जो नीं जाणदे ये तिन्हां लोकां साई ये सै जे अन्धेरे च बैठिरे थे, तिन्हौं परमेशरा रा सनेहा पापां ते छुटकारा देआं; कने सै जे अनन्त काल रिया मौती रे अन्धकारा रे देशा च थे, तिन्हां पर परमेशरा रे सनेहे री लोय चमकी।”

¹⁷ तिस बगता ते यीशुये प्रचार करना कने ये बोलणा शुरु कित्या : “अपणे पापां ते मन फिरावा काँह्भई परमेशरा रा राज नेड़े आईरा।”

यीशुये रे जरिये चेलयां रा चुणया जाणा

¹⁸ ताहली जे यीशु गलील दरयावा रे कण्डे फिरदे हुये दो भाईयां यनिके शमौन (सै जे पतरस था) कने तिसरा भाई अन्द्रियास जो, सै जे दरयावा च जाल़ पाईराँ थे; काँह्भई सै मच्छुआरे थे।

¹⁹ यीशुये तिन्हांने गलाया, “मेरे सौगी औआ; तियां जे तुहें मच्छियां जो कठेराँ थे, मांह तुहांजो सखाणा भई लोकां जो मेरा चेला बणने खातर कियां कठेरना।”

²⁰ सै इकदम मच्छियां पकड़ने औल़े अपणे सारे कम्मा जो छड्डिने तिसरे पिच्छे चलीपे।

²¹ फेरी सै तित्थी ते अग्गे बधीने, तिने कने दो भाईयें यनिके जब्दिये रे पुत्र याकूब कने तिसरा भाई यूहन्ने जो अपणे पिता जब्दिये सौगी किश्तिया पर अपणे जाल़ां जो सधेरदे देख्या; कने तिन्हांजो बी सद्दया।

²² सै इकदम किश्तिया कने अपणे पिता जो छड्डिने तिसरे पिच्छे चलीपे।

यीशुये रा लोकां जो उपदेश देणा कने तिन्हौ चंगा करना

²³ यीशु सारे गलील प्रदेशा च फिरदा हुआ तिन्हां रयां यहूदी सभा घराँ च उपदेश करदा कने स्वर्ग राज्जा री खुशखबरिया रा प्रचार करदा, कने हरेक किस्मा री बमारी कने कमजोरियां जो दूर करदा रैया।

²⁴ सारे सीरिया प्रदेशा च तिसरी खबर फैलीगी; इस खातर लोक येढ़े सारयां माहणुआं जो सै जे बमार थे, कने कई तरह री बमारियां कने दुखां ने जकड़ोईरे थे, कने तिन्हां च जे बुरी आत्मां थिआं, तिन्हांजो जे मिर्गी औआं थी कने लकवे रे मारीरे थे, तिसले लौणे लगे। यीशुये तिन्हांजो ठीक कित्या।

²⁵ कने गलील प्रदेश कने दिकापुलिस, यरूशलेम शहर, यहूदिया प्रदेश कने यरदन नदिया रे पारा रे लोकां री बड्डी-बड्डी भीड़ तिसरे पिच्छे चलीपी।