मत्ती 26 - बिलासपुरी नौआं नियम

यीशुये रे खलाफ चाल चलना

¹ ताहली जे यीशु ये सारी गल्लां करी बैट्ठया तां अपणे चेलयां जो बोलणे लगया,

² “तुहें लोक जाणाँ ये भई दुईं दिनां बाद फसह रा त्योहार आ, कने माहणुये रा पुत्र क्रूसा पर चढ़ाये जाणे खातर पकड़वाया जाणा।”

³ तां मुखियायाजक कने बजुर्ग नेता कैफा नौआं रे महायाजका रे घरा रे अंगणा च कट्ठे हुये,

⁴ तिन्हें किसी तरकीबा रे मुतावक यीशुये जो पकड़ने कने मारने री योजना बणाई।

⁵ पर सै बोलीराँ थे, “अहांजो ये त्योहारा रे दिनां च नीं करना चाहिन्दा, नैत किति येढ़ा नीं ओ भई लोक कोई दंगा फसाद करो।”

बैतनिय्याह च यीशुये रा अभिषेक

⁶ यीशु ताहली जे बैतनिय्याह गाँवा च शमौन कोढ़िये रे घरें था,

⁷ जिस बगत सै रोटी खाणे लगीरा था, ताहली इक जनाना संगमरमरा रिया शीशिया च बड़ा मैहन्गा असली इत्र लेईने तिसले आई, कने ताहली जे सै रोटी खाणे बैट्ठया, तां तिसरे सिरा पर मलीत्या।

⁸ तां जे तिसरे चेलयां देख्या तां सै गुस्सा हुईगे, “इस सैन्टा री बर्बादी कजो किति?

⁹ ये सैन्ट मतयां पैसयां च बिकी सक्कां था कने फेरी तिस पैसे जो गरीबां च बंडया जाई सक्कां था।”

¹⁰ यीशु जाणिग्या भई ये क्या बोल्ली राँये फेरी तिने तिन्हांने गलाया, “तुहें इसा जनाना जो कजो परेशान करी रायें? तिसे त मेरे खातर इक भला काम्म कित्या।

¹¹ काँह्भई दीन-दुखियां त सदा जो तुहां सौगी रैहणा, पर मांह सदा जो तुहां सौगी नीं रैहणा।

¹² तिसे मिन्जो दफनाये जाणे री त्यारी करने खातर पैहले तेई मेरे शरीरा पर खुशबुदार तेल मल़ीत्या।

¹³ हऊँ तुहांजो सच्च बोलां, भई सारे संसारा च तित्थी जे किति बी इसा खुशखबरिया रा प्रचार कित्या जाणा, तित्थी इसारे इस कम्मां रा चर्चा तिसारिया यादा च कित्या जाणा।”

यहूदा इस्करियोति रा विश्वासघात

¹⁴ फेरी यहूदा इस्करियोति सै जे तिसरे चेलयां चते इक था, मुखियायाजकां ले गया कने तिन्हाने गलाया,

¹⁵ “जे यीशुये जो हऊँ तुहांजो पकड़वाई दूँ तां तुहें लोक मिन्जो क्या देंगे?” तिन्हे तिस्सो चान्दिया रे तीह सिक्के तोल्ली ने देईते।

¹⁶ कने यहूदा तिसा इ घड़िया ते यीशुये जो पकड़वाणे रा मौका देखणे लगया।

चेलयां सौगी फसह री आखरी धाम

¹⁷ बिणा मलेड़े री रोटिया रे त्योहारा ते इक दिन पैहले यीशुये रे चेलयां नेड़े आई ने पुच्छया, “तुहें क्या चाँये भई अहें तेरे खाणे खातर फसह रिया धाम्मा री त्यारी किति जाईने करिये?”

¹⁸ तिने गलाया, “गाँवां च तिस माहणुये ले जवा कने तिसने बोल्ला, गुरुये बोल्या भई मेरा बगत नेड़े आ, हऊँ तेरे घरें अपणयां चेलयां सौगी फसह रा त्योहार मनाणे औल़ा।”

¹⁹ फेरी चेलयां यीशुये री आज्ञा रा पालन कित्या कने फसह रे त्योहारा री त्यारी किति।

²⁰ दिन ढलदे यीशु अपणे बारा चेलयां सौगी रोटी खाणे खातर बैट्ठया।

²¹ ताहली जे सै रोटी खाईराँ थे तां तिने गलाया, “हऊँ सच-सच बोलां भई तुहां चते इक्की हऊँ धोखे ने पकड़वाणा।”

²² इस पर सै बड़े दुखी हुये, कने तिन्हां चते हर इक तिसते पुछणे लगया, “गुरू जी, क्या सै हऊँ त निआं?”

²³ फेरी यीशुये जबाब दित्या, “सैई सै जे मेरने सौगी इक्की थालिया च खां तिस इ हऊँ पकड़वाणा।

²⁴ माहणुये रे पुत्रा त मरना इ हाया, तियां जे भई पवित्र शास्त्रा च तिसरे बारे च लिखिरा, पर तिसजो भयानक सजा भुगतणे पौणी सै जे माहणुये रे पुत्रा जो पकड़वां : तिस माहणुये रे खातर भला था भई तिसरा जन्म इ नीं हुईरा हुन्दा।”

²⁵ फेरी तिसरा पकड़वाणे औल़ा यहूदा बोलणे लगया, “हे गुरू, क्या सै हऊँ आ?” यीशुये तिसजो गलाया, “हाँ, येढ़ा इ हाया तेढ़ा जे तैं गलाया।”

प्रभु-भोज

²⁶ ताहली जे सै खाणा खाई इ कराँ थे तां यीशुये रोटी लेई, कने शीष देईने तोड़ी, फेरी सै चेलयां जो देन्दे हुये तिने गलाया, “लवा इसाजो खावा, ये मेरी देह इ।”

²⁷ फेरी तिने प्याल्ला चक्कया कने धन्यवाद करने ते बाद तिस्सो तिन्हाजो देन्दे हुये गलाया, “तुहें सारे इसच ते थोड़ा-थोड़ा पीओ।

²⁸ काँह्भई ये वाचा रा मेरा सै खून आ, सै जे मते लोकां खातर बगाया जाईराँ, ताकि तिन्हांरे पापां जो माफ करना सम्भब हुई सक्को।

²⁹ हऊँ तुहांजो बोलां भई अंगूरां रा ये रस तिस दिन तक कदीं नीं चखणा, तदुआं तक जे अपणे पिता रे राज्जा च तुहां सौगी नौआं दाखरस नीं पी लुँ।”

³⁰ फेरी सै फसह रा भजन गाई ने जैतून पहाड़ा पर चलिये।

पतरसा रे इन्कार करने री भविष्यवाणी

³¹ फेरी यीशुये तिन्हांने गलाया, “आज्ज राति जो तुहां सारयां रा माह परा ते विश्वास टुटी जाणा, काँह्भई पवित्रशास्त्रा च लिखिरा : माह चरवाहा मारना, कने भेड्डां बिखरी जाणियां।

³² पर फेरी भीं ते जिऊंदा हुणे ते बाद माह तुहांते पैहले इ गलील चली जाणा।”

³³ पतरसे तिस्सो जबाब दित्या, “चाये सारयां रा विश्वास तुहां परा ते टुटी जांगा, पर मेरा विश्वास कदीं नीं टुटणा।”

³⁴ यीशुये तिसने गलाया, “हऊँ तेरने सच्च बोलां आज्ज इसा राति कुकड़ा रे झांग देणे ते पैहले तू तिन्न बार मेरा इन्कार करना।”

³⁵ फेरी पतरसे तिसने गलाया, “जे मिन्जो तेरिया सौगी मरने बी पौ, तां बी मांह तेरे बारे च कदीं नीं मुकरना।” कने बाकी सारयां चेलयां बी येढ़ा इ गलाया।

गतसमनी च प्राथना

³⁶ फेरी यीशु तिन्हां सौगी गतसमनी नौआं री इक्की जगह च आया कने अपणे चेलयां ने बोलणे लगया, “येत्थी बैठिरे रैयां, तदुआं तक जे हऊँ ओत्थी जाऊँ कने प्राथना करूँ।”

³⁷ सै पतरस कने जब्दिये रे दुईं पुत्राँ जो सौगी लेईया, कने दवास कने व्याकुल हुणे लगया।

³⁸ फेरी तिने तिन्हाने गलाया, “मेरा मन बड़ा दुखी आ, येढ़ा लगीराँ भई मेरे प्राण निकल़णे लगीरे। तुहें येत्थी रुका कने मेरे सौगी जागदे रौआ।”

³⁹ फेरी थोड़ा अग्गे खिसकणे ते बाद सै मुँआं रे भार पैईने, प्राथना करने लगया, “हे मेरे पिता, जे हुई सक्को तां माह पर ये दुख नीं औणे दे, तां बी तेढ़ा जे हऊँ चाँह तेढ़ा नीं, पर तियां जे तू चाँह तियां इ ओ।”

⁴⁰ फेरी सै अपणे चेलयां ले गया कने तिने तिन्हाजो सुत्तीरा देख्या, तिने पतरसा ने गलाया, “क्या तुहें मेरिया सौगी इक घण्टा बी नीं जाग्गी सक्के?

⁴¹ जागदे रौआ, कने प्राथना करा ताकि तुहें किसी परीक्षा च नीं पौ! तुहांरी आत्मा त त्यार इ, पर शरीर कमजोर आ।”

⁴² फेरी इक बार भीं तिने जाईने प्राथना कित्ती कने गलाया, “हे मेरे पिता, जे इस तरिके ने मेरे खातर दुख सैहणा जरूरी आ, तां तेरी इच्छा पूरी ओ।”

⁴³ फेरी तिने आई ने सै भीं सुत्तीरे देक्खे, काँह्भई तिन्हांरियां आक्खीं निन्दा ने भरोई रियां थी।

⁴⁴ तिन्हांजो छड्डिने सै फेरी भीं चलीया, कने तिज्जी बार भीं पैहले साई तिन्हांई शब्दां च प्राथना किति।

⁴⁵ फेरी यीशु अपणे चेलयां ले गया कने तिन्हांते पुच्छया, “क्या तुहें हुण बी अरामा ने सुत्तीरे? देक्खा, सै वगत आई पुज्जीरी, ताहली जे माहणुये रा पुत्र पापियां रे हवाले कित्या जाणा।

⁴⁶ उट्ठा, आओ चलिये; देक्खा, मिन्जो पकड़वाणे औल़ा नेड़े आई पुज्जीरा।”

यीशुये रा धोखे ने पकड़वाया जाणा

⁴⁷ यीशु ताहली जे गलाणे इ लगीरा था भई यहूदा सै जे बाराँ चते इक था आया, तिस सौगी मुखियायाजकां कने लोकां रे बजुर्गां रिया तरफा ते इक बड्डी भीड़, तलवारां कने डन्डे लेईने आई।

⁴⁸ तिसजो पकड़वाणे औल़े तिन्हांजो ये संकेत दित्या : “तिसजो जे हऊँ चुमगा सैई यीशु आ; तिस्सो पकड़ीने सावधानिया ने लेई जायां।”

⁴⁹ फेरी सै यीशुये ले गया कने गलाया, “हे गुरू, नमस्ते!” कने तिसजो गल़े लगाया।

⁵⁰ यीशुये तिसने गलाया, “दोस्त, जिस कम्मां रे खातर तू आईरा, तिस्सो करी लै।” फेरी तिन्हे तिसले आई ने यीशुये जो पकड़ीने बन्दी बणाईल्या।

⁵¹ फेरी सै लोक जे यीशुये सौगी थे तिन्हां चते इक्की अपणी तलवार कड्डी कने महायाजका रे सेवका पर बार कित्या कने तिसरा कान्न डवाईत्या।

⁵² फेरी यीशुये तिन्हाने गलाया, “अपणिया तलवारा जो म्याना च रख काँह्भई सै जे तलवार चलांये सै तलवारा नेई मारे जाणे।

⁵³ क्या तुहें नीं सोचदे भई हऊँ अपणे पिता ने बिनती करी सक्कां कने तिन्हां इकदम स्वर्गदूतां री बारा पलटणां ते बी जादा सेना मेरले हुण भेजी देणी?

⁵⁴ पर जे हऊँ येढ़ा करूँ तां पवित्रशास्त्रा च लिखी रियां ये गल्लां कियां पूरी हुणियां, भई सारा किछ इयां इ हूणा जरूरी आ?”

⁵⁵ तिस बगत यीशुये भीड़ा जो गलाया, “तुहें मिन्जो पकड़ने तलवारां कने डन्डयां लेईने इयां आये तियां जे किसी चोरा जो पकड़ने आईरे? हऊँ हर रोज मन्दरा च बैठीने उपदेश देआं था, पर ताहली तुहें हऊँ काँह नीं पकड़या।

⁵⁶ पर ये सब किछ इस खातर हुया भई भविष्यवक्तयां रा लिखिरा पूरा ओ।” फेरी तिसरे सारे चेले तिस्सो छड्डिने नट्ठीये।

पंचैती रे सामणे यीशु

⁵⁷ तिन्हे जे यीशुये जो पकड़या था, सै तिस्सो कैफा नौआं रे महायाजका रे सामणे लेईगे, तित्थी शास्त्री कने बजुर्ग यहूदी नेता बी कट्ठे हुईरे थे।

⁵⁸ पतरस तिसते दूर-दूर रैईने तिसते पिच्छे-पिच्छे महायाजका रे अंगणा तक चलीया, कने अन्त देखणे जो तित्थी पैहरेदाराँ सौगी तिन्हांरे बिच बैठीया।

⁵⁹ मुखियायाजक कने सारी महांसभा यीशुये जो मारने खातर तिसरे बरोधा च झूट्ठी गवाहिया रिया खोज्जा च थे,

⁶⁰ पर कई झूट्ठे गवाह अग्गे आये कने तिन्हे बड़े झूट्ठ बोल्ले। बाद बिच दो माहणु अग्गे आये,

⁶¹ कने गलाया, “इने गलाया था भई हऊँ परमेशरा रे मन्दरा जो ढाई सक्कां, कने तिज्जे दिन भीं बणाई सक्कां।”

⁶² फेरी महायाजके खड़े हुईने यीशुये ते पुच्छया, “क्या जबाबा च तू किछ नीं बोलणा चाँह? भई ये लोक तेरे खिलाफ क्या गवाही देई कराँ ये?”

⁶³ पर यीशु चुप रैया। फेरी महायाजके तिसते पुच्छया, “हऊँ तिज्जो जिऊंदे परमेशरा री सगन्द देआं भई जे तू परमेशरा रा पुत्र मसीह आ तां अहां ने गलाईदे।”

⁶⁴ यीशुये जबाब दित्या, “तैं अप्पूँ इ बोल्या; पर हऊँ तुहांजो बोलां भई तुहां माहणुये रा पुत्र सर्वशक्तिमान परमेशरा रे सज्जे पासे बैठिरा कने अम्बरा रे बद्दल़ां पर बड़े छोड़ औन्दे देखणा।”

⁶⁵ महायाजक येढ़ा सुणी ने इतणा गुस्सा हुईग्या भई सै अपणे कपड़े फाड़दे हुये बोलणे लगया, “इने परमेशरा री निंध्या किति, हुण अहांजो होर गवाह नीं चाहिन्दे? तुहें सारयां इसजो परमेशरा रे बरोधा च बोलदे हुये सुणया।

⁶⁶ तुहें क्या सोच्चां ये?” तिन्हे जबाब दित्या, “ये अपराधी आ, इसजो मरना इ चाहिन्दा।”

⁶⁷ फेरी तिन्हे तिसरे मुँआं पर थुक्कया कने तिस्सो मुक्के मारे, किछ लोकें थप्पड़ मारया कने गलाया,

⁶⁸ “मसीह, भविष्यवाणी कर भई सै कुण आ तिने जे तू मारया?”

पतरसा रा इन्कार

⁶⁹ पतरस हल्तियें बाहर अंगणा च इ नीचे बैठिरा था भई इक दासी तिसले आई कने गलाया, “तू बी त तिस गलीली यीशुये सौगी था।”

⁷⁰ पर पतरस सबनी रे सामणे मुकरीग्या तिने गलाया, “मिन्जो निआं पता भई तू क्या बोल्ली राईं।”

⁷¹ ताहली जे सै बाहर दरवाजे तक इ गया था भई इक होर जनाने सै देख्या कने जितने लोक ऊत्थी थे, तिन्हाने गलाया, “ये बी त यीशु नासरिये ने था।”

⁷² इक बार भीं पतरसे नां किति कने कसम खाई ने गलाया, “हऊँ तिस माहणुये जो नीं जाणदा।”

⁷³ थोड़िया जेआ देरा बाद ऊत्थी खढ़िरे लोक पतरसा ले आये कने तिसने गलाया, “तेरी बोल्ली साफ दस्सी राईं भई तू असल च तिन्हां चते इक आ।”

⁷⁴ फेरी सै अप्पूँजो धिक्कारने कने सगन्द खाणे लगया: “हऊँ तिस माहणुये जो नीं जाणदा।” तिस इ बगत कुकड़े झांग दित्ति।

⁷⁵ ताहली इ पतरसा जो यीशुये री गलाई री गल्ल आद आईगी तिने गलाया था, भई “कुकड़ा रे झांग देणे ते पैहले तू तिन्न बार मेरा इन्कार करना।” फेरी पतरस बाहर जाईने बड़ा भरी रोया।