मत्ती 24 - बिलासपुरी नौआं नियम

मन्दरा रे बिनाशा री भविष्यवाणी

¹ ताहली जे यीशु मन्दरा रे मैदाना ते निकल़ीने जाई कराँ था, तां तिसरे चेलयां तिस्सो मन्दराँ रियां कई इमारतां खौ ईशारा कित्या।

² पर यीशुये तिन्हाने गलाया, “तुहें इसा इमारता जो सिधा येत्थी खढ़िरा देखी रायें! हऊँ तुहांजो सच्च बोलां, ये सारियां दीवाराँ कने इमारतां नष्ट हुई जाणियां।”

संकट कने कल़ेश

³ ताहली जे यीशु जैतून पहाड़ा पर बैठिरा था, तां चेलयां चुपचाप तिसले आईने गलाया, “अहांजो ये दस्स भई ये गल्लां कदीं हूणी? ताहली जे तू वापस औणा कने इस संसारा रा खात्मा हुणे रा बगत औंणा तां तिसरे क्या संकेत हुणे?”

⁴ यीशुये तिन्हांजो जबाब दित्या, “हऊँ सिर्फ तुहांजो येई बोलणा चाँह भई हुणे औल़ियां घटनां रे बारे च तुहांजो कोई धोखे च नीं रक्खो,

⁵ हऊँ ये इस खातर बोलीराँ भई येढ़े कई ये तिन्हांजे मेरा नौं लेईने औणा कने बोलणा ‘हऊँ मसीह आ,’ कने तिन्हां मते लोक भरमाणे।

⁶ तुहां नेड़े री लड़ाईयां री गल्लां या दूरा री अफवांह सुणनियां, पर देक्खा तुहें घबराई नीं जायों काँह्भई येढ़ा त हूणा इ हाया, पर हल्तियें अंत नीं आईरा।

⁷ हर इक्की जातिया दुज्जिया जातिया रे बरोधा च खढ़ना, कने इक्की देशा दुज्जे देशा रे बरोधा च खढ़ना, कने जगह-जगह नकाल़ पौणे, कने हिल्लण हुणे।

⁸ ये गल्लां पैहले हुणियां, पर ये तियां हुणियां तियां जे इक औरत बच्चा जणने ते पैहले दर्द सैंई फेरी बच्चे जो जन्म देईं।

⁹ “फेरी तुहांरे शत्रुआं तुहांजो सताणे खातर पकड़वाणा, कने तुहें मरवाई देणे, काँह्भई मांह पर विश्वास करने रिया वजह ते सारी जातियां रे लोकां तुहांजो बैर रखणा।

¹⁰ तिस बगत बौहत लोकां माह पर विश्वास नीं करना, कने इक दुज्जे जो दुश्मणां रे हत्थे पकड़वाणा, कने अप्पूँ बाटियें बैर रखणा।

¹¹ बौहत सारे झूट्ठे भविष्यवक्तयां औणा, कने तिन्हां बौहत सारे लोकां जो धोखा देणा।

¹² हर तरफ अधर्म-ही-अधर्म फैली जाणा तिसते जे कई विश्वासी लोकां रा प्यार परमेशरा रे कने इक्की दूये रे परति नीं रैहणा,

¹³ पर सै जे आखिर तक माह पर विश्वास रखी रखगे, सैई परमेशरा बचाणे।

¹⁴ स्वर्गा रे राज्जा री ये खुशखबरी सारी जातियां रे लोकां जो प्रचार कित्ती जाणी ताकि सारे लोकां जो विश्वास करने रा मौका मिलो, फेरी तांई अन्त औणा।

महांसंकटा री शुरुआत

¹⁵ “इस खातर ताहली जे तुहें तिसा ज्वाड़ने औल़िया गन्दिया चीज़ा जो पवित्र जगह खढ़ी रिया जो देखगे तिसरी चर्चा जे दानिय्येल भविष्यवक्ते रे जरिये किति थी (सै जे पढ़ो, सै समझो)।

¹⁶ फेरी सै लोक जे यहूदिया प्रदेशा च ओ, सै पहाड़ा पर नट्ठी जायों।

¹⁷ सै जे अपणे घरा रिया छत्ता पर ओ, सै घरा ते बाहर किछ बी लेणे खातर थल्ले नीं उतरो;

¹⁸ कने सै जे बाहर खेतां च काम्म करया दा ओ, सै पिच्छे मुड़ीने अपणा कपड़ा लेणे जो नीं हटो।

¹⁹ “तिन्हां जनानां खातर सै जे भारहत्थियां हूणी कने तिन्हारे जे दुध पीन्दे बच्चे हुणे, सै दिन बौहत पीड़ा देणे औल़े हुणे।

²⁰ प्राथना करा भई तुहांजो ठण्डा रे दिन या विस्राम रे दिन नट्ठणे नीं पौ।

²¹ तिन्हें दिनें येढ़ि बिपत्ति औणी, तऊँआं ते जे परमेशरे ये संसार रचया तेढ़ी आज्ज तक कदीं नीं आई कने न कदीं औणी।

²² कने जे परमेशरे दुखा रे वगता जो घटाणे रा निश्चा नीं कित्या हुन्दा तां सारे लोक मरदे, पर चुणी रयां रिया बजह ने तिने तिस वगता जो घटेरी रा।

²³ तिन्हें दिनें जे कोई तुहांजो बोल्लो, ‘देक्खा, मसीह येत्थी आ!’ या ओत्थी आ! तां तिसरा विश्वास देक्खां करदे।

²⁴ “काँह्भई झूट्ठे मसीह कने झूट्ठे भविष्यवक्ते उट्ठीने आई जाणे, कने बड़े हैरान करने औल़े नशाण दसणे, कने अजीब काम्म करने, भई जे हुई सक्को तां चुणी रयां जो बी चकमा देई दो।

²⁵ देक्खा, मैं पैहले तेई ये सब किछ तुहांजो गलाई तरा।

²⁶ इस खातर जे सै तुहांजो बोल्लो, देक्खा, सै जंगला चा, तां तित्थी देक्खां जान्दे; कने जे सै बोल्लो, देक्खा, सै तिन्हां कमरयां अन्दर लुखिरा, तां तिन्हांरा विश्वास नीं करना।

²⁷ “हऊँ ये बोलीराँ काँह्भई तियां जे बिज्जल़ पूरबा ते शुरु हुईने पच्छमा रे अम्बरा तक चमकां इ, माहणुये रे पुत्रा रा औणा बी तियां इ हूणा।

²⁸ तित्थी जे किति मूईरे जानबरा री लाश हूणी ईल्लां बी तिसा इ जगह कट्ठियां हूणी।

माहणुये रे पुत्रा रा भीं ते औणा

²⁹ “तिन्हें दिनें सै जे मुशीवत पौणी तिसते इकदम बाद सूरज काला हुई जाणा, कने चन्द्रमे री लोय जान्दी रैहणी, कने अम्बरा ते तारे पौणे लगणे, कने अम्बरा री शक्तियां हिलाई जाणियां।

³⁰ तिस बगत माहणुये रे पुत्रा रे औणे रा नशाण अम्बरा च परगट हूणा, कने फेरी धरतिया पर सारी जातियां रे लोकां छाती पिट देयां बलाप करना; कने तिन्हां माहणुये रे पुत्रा जो बड्डिया सामर्थ कने महिमा सौगी स्वर्गा रे बद्दल़ा पर औन्दे देखणा।

³¹ तिस जोरा रिया अवाज़ा च बजणे औल़े बाजयां सौगी अपणे स्वर्गदूत भेजणे, कने तिन्हां सारिया धरतिया परा ते अपणे चुणीरे लोक कट्ठे करने।

अंजीरा रे डाल़ा रा उदाहरण

³² “अंजीरा रे डाल़ा ते शबक लेवा: ताहली जे तिसरे डाल़ू कोमल हुई जायें कने कुमल़ियां निकल़णे लगां इयां, तां तुहें जाणी लें भई गर्मियां रे दिन औणे औल़े।

³³ तियां इ ताहली जे तुहें इन्हां गल्लां जो हुन्दे हुये देक्खो, तां समझी जायों भई मेरे वापस औणे रा बगत नेड़े आई गरा।

³⁴ हऊँ तुहांजो सच्च बोलां भई इसा पीढ़िया रे लोकां रे जीते जी ये सारियां गल्लां हूणी।

³⁵ इक दिन अकाश कने धरती खत्म हुई जाणे, पर मेरा बचन कदीं नीं मिटणा।

जागदे रौआ

³⁶ “तिस दिना कने तिसा घड़िया रे बारे च कोई किछ नीं जाणदा, न स्वर्गा च स्वर्गदूत कने न खुद पुत्र, पर सिर्फ पिता परमेशर जाणाँ।

³⁷ तेढ़ा जे नूँह रे दिनां च हुया, तियां इ माहणुये रे पुत्रा रा औणा बी हूणा।

³⁸ काँह्भई तियां इ तियां जे लोक जलजला औणे ते पैहले रे दिनां तक खान्दे-पीन्दे रै, ब्याह करदे रैये, तदुआं तक जे नूँह जहाजा पर नीं चढ़या।

³⁹ कने ताहलुआं तक जे जलजला आईने तिन्हां सब्बीं जो बहाई ने नीं लेईग्या, तदुआं तक तिन्हांजो कोई पता नीं था; तियां इ माहणुये रे पुत्रा रा औणा बी हूणा।

⁴⁰ तिस बगत खेतां च काम्म करदे दुईं माहणुआं चते इक चक्की ने लेई जाणा कने दुज्जा छडीत्या जाणा।

⁴¹ चकोड़ू फेरदियां दुईं जनानां चते इक चक्की ने लेई जाणी कने दुज्जी ऊत्थी रैई जाणी।

⁴² इस खातर तुहें लोक खबरदार हुई जावा काँह्भई तुहें नीं जाणदे भई तुहांरे परमेशरा किस दिन औणा।

⁴³ पर ये जाणी लवा भई जे घरा रा मालक जाणदा हुन्दा भई चोरा राति जो किसा घड़िया आई जाणा तां सै जागदा रैहन्दा, कने चोरा जो अपणे घरें बड़ने नीं देन्दा।

⁴⁴ इस खातर तुहें बी त्यार रौआ, काँह्भई तिसा घड़िया रे बारे च तुहें सोच्चया बी नीं हुंगा, तिसा घड़िया माहणुये रे पुत्रा आई जाणा।

विश्वास लायक दास कने दुष्ट दास

⁴⁵ “फेरी सोच्चा सै भरोसे रे लायक सेबक कुण आ तिस्सो जे स्वामिये अपणे घरा रे नोकराँ-चाकराँ रे ऊपर सरदार बणाया भई सही बगता पर तिन्हांजो रोटी देयो?

⁴⁶ आशीषित आ सै दास, ताहली जे तेरा स्वामी औआं तां तिज्जो काम्म करदे हुये देक्खां।

⁴⁷ हऊँ तुहांजो सच्च बोलां, तिस स्वामिये तू अपणिया सारिया जायदाता पर अधिकारी बणाई लेणा।

⁴⁸ पर जे सै बुरा दास सोचणे लगो भई मेरे मालका रे औणे जो देर इ,

⁴⁹ कने सै अपणे साथी दास्सा ने मार कुट करने लगो कने शराबियां सौगी खाणा-पीणा शुरु करी दो।

⁵⁰ तां तिस मालका येढ़े दिन औणा, तिस दिन जे तिने तिसरे औणे रे बारे च सोच्चया तक निआं, कने तिसा घड़िया जो सै जाणदा नीं हो,

⁵¹ कने तिसरे मालका तिस्सो बौहत-बुरी सजा देणी कने कपटियां रे बिच तिसरी जगह तैह करनी तिसा जगह जे लोक रोन्दे कने दान्द किरड़दे हुणे।”