मत्ती 22 - बिलासपुरी नौआं नियमब्याह रिया धाम्मा रा उदाहरण ( लूका 14:15-24 ) 1 यीशु फेरी भीं तिन्हांने उदाहरणां च गलाणे लगया, 2 “परमेशरा रा राज इक राजे साई आ तिने जे अपणे बेटे रे ब्याह च धाम दित्ति। 3 राजे अपणे दास्सां जो भेज्या भई सै तिन्हां लोकां जो सद्दीने ल्याओ तिन्हांजो जे ब्याह री धाम्मा च औणे रा नियून्दा दित्तिरा; पर सै लोक नीं आये। 4 तिने अपणे सेबक फेरी भीं भेज्जे, तिने गलाया भई सै लोक जे ब्याह रिया धाम च सद्दीरे तिन्हांजो बोल्ला, ‘देक्खा ब्याह री धाम बणीने त्यार हुईगरी, मेरे पाल़े हुये मोटे ताजे बकरे बड्डी तरे, कने सारा किछ बणीने त्यार आ; ब्याह री धाम खाणे जो औआ।’ 5 पर तिन्हें लोकें तिस पर कोई ध्यान नीं दित्या कने सै चलीगे : कोई अपणे खेता च काम्म करने जो चलिग्या, तां कोई अपणे काम्म धन्दे पर चलिग्या। 6 कने किछ लोकें त राजे रे सेवका जो पकड़ीने तिसने मार-कुट किति कने जानी ते मारीते। 7 ताहली जे राजे ये सुणया, तां तिने गुस्से च आईने अपणे सैनिक भेज्जे, तिन्हे तिन्हां खूनियां जो मारीत्या कने तिन्हारे नगरा च आग्ग लाईती। 8 फेरी राजे सेबकां ने गलाया, ‘ब्याह री धाम त त्यार इ पर सै लोक जे न्यून्दा देईने सद्दीरे थे सै लोक इसा ईज्जता रे लायक नीं हुये। 9 इस खातर तुहें गलियां कने चौकां पर जावा, तित्थी तुहांजो जितने बी लोक मिलो, सब्बीं जो ब्याह रिया धाम्मा च सद्दीने ली औआ।’ 10 सै दास फेरी गलियां कने चौकां च गये कने सै जे खरे बुरे लोक तिन्हाजो मिले तिन्हां सबनीं जो सै कट्ठा करीने ली आये, कने ब्याह रा घर मेहमान्नां ने भरीग्या। 11 “पर ताहली जे राजा मेहमान्नां जो देखणे अन्दर आया, तां तित्थी तिने इक येढ़े माहणुये जो देख्या, तिने जे ब्याह रे कपड़े नीं पैहनीरे थे। 12 राजे तिसते पुच्छया, ‘दोस्त, तू बिणा ब्याह रे कपड़े पैहने येत्थी अन्दर कियां आईग्या?’ पर सै माहणु चुप रैया। 13 फेरी राजे अपणे सेबकां जो गलाया, ‘इसरे हात्थ-पैर बन्हीने बाहर अन्धेरे च सट्टि दवा, तित्थी लोक रोन्दे कने दन्द किरड़दे हो।’ 14 काँह्भई सद्दीरे त मते पर चुणी रे त थोड़े इ हाये।” कैसरा जो कर देणा ( मरकुस 12:13-17 ; लूका 20:20-26 ) 15 फेरी फरीसियें जाईने इक सभा किति, तिसा च तिन्हे ये विचार कित्या भई कियां यीशुये जो तिसरिया गलाई रियां गल्लां च फसाई सक्कां ये। 16 तिन्हे अपणे चेले हेरोद राजे रे समर्थकां सौगी यीशुये ले भेज्जे, तिन्हें यीशुये जो गलाया, “गुरू जी, अहें जाणाँ ये भई तू सच्चा, कने तू परमेशरा रा रस्ता सच्चाईया ने सखां, कने कोई क्या सोच्चां तू किसी री परवाह नीं करदा, काँह्भई तू माहणुआं रिया हैसियता पर नीं जान्दा। 17 इस खातर अहांजो दस्स तू क्या सोच्चां? रोमी बादशाह जो कर देणा ठीक आ कि नीं?” 18 यीशु तिन्हारे बुरे इरादे जाणीने गलाया, “कपटियो, तुहें मिन्जो कजो परखणा चाँये? 19 मिन्जो कोई सिक्का दस्सा तिसने जे तुहें कर चुकायें।” फेरी सै तिसले इक रोमी सिक्का ली आये। 20 तिने तिन्हाते पुच्छया, “इस पर किसरी मूरत कने नौं लिखिरा?” 21 तिन्हे तिसने गलाया, “रोम रे बादशाह रा।” फेरी यीशुये तिन्हाजो गलाया, “अच्छा तां फेरी सै जे बादशाह रा, तिस्सो बादशाह जो देआ, कने सै जे परमेशरा रा, तिस्सो परमेशरा जो देआ।” 22 ये सुणी ने सै चम्भे च पैईये कने तिस्सो छड्डिने चलीगे। मूईरयां ते जिऊंदा हूणा कने ब्याह ( मरकुस 12:18-27 ; लूका 20:27-40 ) 23 तिस दिन किछ सदूकी सै जे मरने ते बाद जिऊंदा हुणे जो नीं मनदे, तिसले आये कने तिसते पुच्छया, 24 “गुरू जी, मूसे गलाया था भई जे कोई माहणु बिणा सन्तान मरी जाओ, तां तिसरा भाई तिसरिया बिधवा ने ब्याह करीने अपणे भाईये रा बंश बढ़ाणे खातर सन्तान पैदा करी सक्कां। 25 हुण मन्ना अहें सात्त भाई ये; पैहले रा ब्याह हुया कने बाद च तिसरी मौत हुईगी, फेरी काँह्भई तिसरे कोई सन्तान नीं हुई, इस खातर तिसरे भाईये तिसरिया बिधवा जो अपणाईल्या। 26 तदुआं तक जे भई सातों भाई मरी नीं गये, दुज्जे कने तिज्जे भाईये ने बी तेढ़ा इ हुया। 27 सारयां ते बाद सै जनाना बी मरीगी। 28 हुण अहांरे पुछणे रा मतलब येआ भई जिऊंदा हुणे पर तिन्हां सत्तां चते सै किसरी जनाना हूणी? काँह्भई सै सारयां री जनाना बणी चुक्कीरी थी।” 29 यीशुये तिन्हाजो जबाब दित्या, “तुहें पवित्रशास्त्रा कने परमेशरा रिया सामर्था जो नीं जाणदे; इसा वजह ने तुहें भूला च पैईरे। 30 तुहांजो समझणा चाहिन्दा भई जिऊंदा हुणे पर लोकां न त ब्याह करने कने नांई कोई ब्याह च दित्या जाणा, पर स्वर्गा च परमेशरा रे स्वर्गदूतां साई हुणे। 31 पर मूईरयां चते जिऊंदा हुणे रे बारे च क्या तुहें ये बचन नीं पढ़या सै जे परमेशरे तुहांजो गलाया : 32 हऊँ अब्राहम रा परमेशर, इसहाक रा परमेशर, कने याकूब रा परमेशर आ? सै मूईरयां रा नीं, पर जिऊंदेयां रा परमेशर आ।” 33 ताहली जे लोकें ये सुणया तां तिसरे उपदेशा पर सै बड़े हैरान हुये। सब्बीं ते बड्डा हुक्म ( मरकुस 12:28-34 ; लूका 10:25-28 ) 34 जिस बगत फरीसियें सुणया भई यीशुये सदूकियां रा मुँह बन्द करित्या, तां सै सब कट्ठे हुईगे। 35 तिन्हां चते इक व्यवस्थापके तिस्सो परखणे खातर तिसते पुच्छया, 36 “गुरू जी, व्यवस्था च सबनीं ते बड्डी आज्ञा क्या इ?” 37 यीशुये तिसने गलाया, “तू प्रभु अपणे परमेशरा ने अपणे सारे मन कने सारे प्राण कने अपणी सारिया समझा ने प्यार कर। 38 बड्डी कने खास आज्ञा त येई हाई। 39 फेरी येढ़ि इ दुज्जी आज्ञा येई भई अपणे पड़ेसिये ने तियां इ प्यार कर जिआं जे तू अप्पूँ ने प्यार कराँ। 40 सारी व्यवस्था कने भविष्यवक्तयां रे ग्रन्थ इन्हां दुईं हुक्मां पर टिकिरे।” मसीह किसरा पुत्र आ ( मरकुस 12:35-37 ; लूका 20:41-44 ) 41 ताहली जे फरीसी हल्तियें कट्ठे इ थे, भई यीशुये तिन्हांते इक स्वाल पुच्छया, 42 “मसीह रे बारे च तुहें क्या सोच्चां ये भई सै किसरा पुत्र आ?” तिन्हे तिसने गलाया, “दाऊद रा वंशज।” 43 यीशुये तिन्हांते पुच्छया, “तां दाऊद आत्मा च हुईने तिस्सो प्रभु कजो बोलां? 44 ‘प्रभुये मेरे प्रभुये ने गलाया, मेरे सज्जे पासे बैठीने राज कर, तदुआं तक जे हऊँ तेरे सारयां दुश्मणां जो नीं हराई दूँ।’ 45 भला, तां जे दाऊद मसीह जो अपणा प्रभु बोलां, तां सै तिसरा पुत्र कियां हुया?” 46 इसरे जबाबा च कोई बी तिसने किछ नीं बोल्ली सक्कया। कने नांई तिस दिना ते बाद किसी जो तिसते किछ होर पुछणे री हिम्मत हुई। |
This work is licensed under Creative Commons Attribution-ShareAlike 4.0 License.