मत्ती 17 - बिलासपुरी नौआं नियम

तिन्न चेलयां जो मूसा कने एलिय्याह सौगी यीशुये रा दर्शण

¹ छेआं दिनां बाद यीशु पतरस, याकूब कने तिसरे भाईये यूहन्ने जो सौगी लेआ कने सुनसान जगह च ऊच्चे पहाड़ा पर गया।

² तित्थी तिन्हारे सामणे तिसरा रुप बदलिग्या, तिसरा मुँह सूरजा साई चमकया कने तिसरे कपड़े इयां चमकणे लगे तियां जे लोय चमकां इ।

³ फेरी अचानक मूसा कने एलिय्याह तिन्हारे सामणे परगट हुये कने यीशुये ने गल्ल करने लगे।

⁴ येढ़ा देखीने पतरसे यीशुये ने गलाया, “प्रभु, ये ठीक आ भई अहें येत्थी ये; जे तुहें चाओ तां हऊँ येत्थी तिन्न तम्बू बणाई दूँ; इक तेरे खातर, इक मूसा रे खातर, कने इक एलिय्याह रे खातर।”

⁵ सै हल्तियें गल्ल करयां इ कराँ था भई इक चमकदे हुये बद्दल़े सै ढक्कीले, कने बद्दल़ा चते अकाशवाणी हुई : भई “ये मेरा प्यारा पुत्र आ, तिसते जे हऊँ बड़ा खुश आ: इसरी सुणा।”

⁶ ताहली जे चेलयां ये सुणया, तां सै इतणे डरीगे भई धरतिया पर मुन्धे मुँयें पैईगे।

⁷ फेरी यीशु तिन्हांले गया कने तिन्हांने छुईने बोल्या, “डरदे मता, खड़े होआ।”

⁸ फेरी तिन्हें गासखा देख्या तां तित्थी सिर्फ तिन्हांजो यीशुये जो छड्डिने होर कोई नीं सुझया।

⁹ ताहली जे सै पहाड़ा परा ते उतरी राँ थे फेरी यीशुये तिन्हांजो ये हुक्म दित्या, भई “तदुआं तकौ जे माहणुये रा पुत्र यनि हऊँ मरीरयां चते नीं जी उठदा, तदुआं तकौ जो किछ तुहें देख्या सै किसी ने देहां बोलदे।”

¹⁰ फेरी तिसरे चेलयां तिसते पुच्छया, “यहूदी शास्त्री फेरी कजो बोलां ये भई एलिय्याह रा पैहले औणा जरूरी आ?”

¹¹ तिने जबाब दित्या, “एलिय्याह त जरूर औणा, तिस हर इक चीज़ा रा सुधार करना।

¹² पर हऊँ तुहांजो बोलां भई एलिय्याह त हुण तक आई पुज्जीरा, पर लोकें तिस्सो पछयाणया निआं; कने तिस सौगी तेढ़ा जे चाहया तेढ़ा कित्या। तियां इ माहणुये रे पुत्रा यनि मिन्जो बी तिन्हां सताणा।”

¹³ फेरी तिसरे चेले समझे भई तिने अहांने यूहन्ना बपतिस्मा देणे औल़े रे बारे च बोल्या था।

रोगी मुण्डुये रा चंगा कित्या जाणा

¹⁴ ताहली जे यीशु मुड़ीने लोकां च आया, तां इक माहणु तिसले आया, कने तिसजो झुकीने मत्था टेक्कया कने बोल्या,

¹⁵ “हे प्रभु, मेरे मुण्डुये पर दया कर! तिस्सो मिर्गिया रा दौरा पौआं, तिसरिया वजह ने सै बड़ा भरी तड़फां; कई बार अग्गी च कने कई बार पाणिये च पैई चुक्कीरा।

¹⁶ तिसजो हऊँ तेरे चेलयां ले ल्याया, पर सै इसजो ठीक नीं करी सक्के।”

¹⁷ यीशुये जबाब दित्या, “अड़ीमूर कने अविश्वासी लोको, माह कितणे बगता तक होर तुहां सौगी रैहणा? कितना बगत हऊँ इयां इ तुहांरी सैहन्दा रैहन्गा? तिस्सो येत्थी मेरले ल्यावा।”

¹⁸ फेरी यीशुये बुरीआत्मा जो हुक्म दित्या, कने सै तिस बिच्चा ते बाहर निकल़ीगी; कने सै मुण्डु तिस इ घड़ी ठीक हुईग्या।

¹⁹ फेरी तिसरे चेलयां कल्हिया जेईया जाईने यीशुये ते पुच्छया, “अहें इसा बुरीआत्मा जो बाहर काँह नीं कड्डी सक्के?”

²⁰ यीशुये तिन्हांजो दस्या, “काँह्भई तुहां च विश्वासा री कमी, हऊँ तुहांजो सच्च बोलां, जे तुहां च राईया रे दाणे जितना बी विश्वास हुन्दा, तां तुहें इस पहाड़ा ने बोल्ली सक्कां ये, येत्थीते हटिने ओतखा चली जा, कने तिस चली जाणा; तुहें किछ बी करी सक्कां ये।

²¹ पर येढ़ि बुरियां आत्मां सिर्फ प्राथना कने उपवास करने तेई निकल़ां इयां।”

यीशुये रा अपणिया मौती रे बारे च दसणा

²² ताहली जे यीशुये रे चेले आये कने तिस सौगी गलील च मिले तां यीशुये तिन्हांने बोल्या, “माहणुये रा पुत्र यनि मिन्जो माहणुआं रे हत्थों पकड़वाया जाणे औल़ा;

²³ सै तिन्हां मारी देणा, पर तिज्जे दिन तिस भीं ते ज्यून्दे हुई जाणा।” इसा गल्ला पर तिसरे चेले बड़े दवास हुईगे।

मन्दरा रा कर

²⁴ ताहली जे यीशु कने तिसरे चेले कफरनहूम नगरा च आये, तां मन्दरा रा कर बसूलणे औल़े पतरसा ले आये कने पुच्छया, “क्या तुहांरा गुरू मन्दरा रा कर नीं देन्दा?”

²⁵ पतरसे जबाब दित्या, “हाँ सै देआं।” कने घरा जो चली आया, पतरसा रे बोलणे ते पैहले इ यीशु बोल्लीप्या, तिसने गलाया, “हे शमौन, तेरा क्या विचार आ? धरतिया रे राजे किस ते कर लैं? खुद अपणयां बच्चयां ते या पराये बच्चयां ते?”

²⁶ पतरसे तिसने गलाया, “दुज्जे रे बच्चयां ते।” यीशुये तिसने गलाया, “यानि तिसरयां अपणयां बच्चयां जो छूट रैईं।

²⁷ पर अहां रिया बजह ने सै लोक नराज नीं हो इस खातर नदिया पर जा कने अपणा कांटा पाणिये च पा कने फेरी सै जे पैहली मच्छी निकल़ो, तिसारा मुँह खोल्यां तिज्जो इक चान्दिया रा सिक्का मिलणा, तिसजो लेईने मेरा कने अपणा कर चुकाई देआं।”