मत्ती 16 - बिलासपुरी नौआं नियम

यहूदी नेतयां री चाल

¹ फेरी फरीसी कने सदूकी यीशुये ले आये, सै तिस्सो परखणा चाँह थे इस खातर तिन्हे तिसजो कोई स्वर्गीय नशाण दसणे जो बोल्या ताकि पता लगी सक्को भई तिस्सो परमेशरे भेज्जिरा।

² तिने तिन्हांजो जबाब दित्या, “सूरज छपणे पर तुहें लोक बोलां ये, आज मौसम ठीक रैहणा, काँह्भई अम्बरा लाल आ,

³ कने सूरज उगणे पर तुहें बोलां ये, ‘आज तूफान औणा, काँह्भई अकाश धुंधला कने लाल आ।’ तुहें अम्बरा रे लक्षणां जो पढ़ना जाणाँ ये, पर अपणे बगता रे लक्षणां जो नीं पढ़ी सकदे।

⁴ इस जुगा रे दुष्ट लोको तुहें नशाण देखणा चाँये, पर तुहांजो सिवाय योना रे नशाणा ते कोई होर दुज्जा नशाण नीं दस्या जाणा।” फेरी सै तिन्हांजो छड्डिने चलिग्या।

यीशुये री चेतावनी

⁵ यीशुये रे चेले दरयावा रे पार चलीगे, पर सै रोटी लेणा भुल्ली गरे थे।

⁶ यीशुये तिन्हाने गलाया, “देक्खा, फरीसियां कने सदूकियां रे मलेड़े ते कने तिन्हांरे अविश्वासा कने झुट्ठिया शिक्षा ते बचीने रौआ।”

⁷ सै अप्पूँ चियें बचार करदे हुये गलाणे लगे, “हुई सक्कां तिने ये इस खातर बोल्या काँह्भई अहें रोटी सौगी नीं ल्याये।”

⁸ सै क्या सोच्ची रायें, यीशु ये जाणाँ था, इस खातर तिने बोल्या, “अरे कमजोर विश्वासियो, तुहें अप्पूँ चियें कजो सोच्ची रायें भई अहांले रोटी नीं?

⁹ क्या तुहें हुण बी नीं समझदे? क्या तुहांजो पांज्ज हजार लोकां खातर पांज्ज रोटियां याद नीं, कने ये बी याद निआं भई कितणियां टोकरियां भरी ने तुहें चक्कियां थी?

¹⁰ कने क्या तुहांजो चऊँ हजाराँ लोकां रे खातर सात्त रोटियां, कने फेरी कितणी टोकरियां भरी ने तुहें चक्की थीं याद निआं?

¹¹ तुहें काँह नीं समझदे भई मैं तुहांजो रोटियां रे बारे च नीं गलाया? पर मैं त तुहांजो फरीसियां कने सदूकियां रे धोखे ते चौकन्ना रैहणे जो गलाया था सै जे मलेड़े साई आ।”

¹² फेरी सै समझीगे भई रोटिया रे मलेड़े ते नीं, पर तिसरा मतलब फरीसियां कने सदूकियां री गल़त शिक्षां ते बचीने रैहणे तेआ।

पतरसा रा यीशुये जो मसीह स्वीकारना

¹³ ताहली जे यीशु कैसरिया फिलिप्पी रे प्रदेशा च आया, तां तिने अपणे चेलयां ते पुच्छया, “लोक क्या बोल्लां ये भई हऊँ माहणुये रा पुत्र कुण आ?”

¹⁴ तिन्हे बोल्या, “किछ बोलां ये भई तू बपतिस्मा देणे औल़ा यूहन्ना, कने किछ बोलां ये भई तू एलिय्याह कने किछ होर बोलां ये भई तू यिर्मयाह या भविष्यवक्तयां चते कोई इक आ।”

¹⁵ यीशुये तिन्हाने बोल्या, “कने मेरे बारे च तुहांरा क्या बचार आ भई हऊँ कुण आ?”

¹⁶ शमौन पतरसे जबाब दित्या, “तू मसीह आ, साक्षात परमेशरा रा पुत्र।”

¹⁷ यीशुये तिस्सो जबाब दित्या, योना रे पुत्र, शमौन, परमेशर आशीष देओ तिज्जो, काँह्भई माहणुये नीं, पर स्वर्गा च रैहणे औल़े मेरे पिता, तूह पर जाहिर किति।

¹⁸ हऊँ बोलां भई तू पतरस आ, कने तू माह च विश्वास करने औल़यां निऊँ हूणा, तियां जे भई इक बड्डी चट्टान किसी घरा री निऊँ हुआं इ; कने तिस पर मौती रा कोई जोर नीं चलना।

¹⁹ मांह तुहौं मेरयां लोकां पर राज करने खातर परमेशरा ते अधिकार दिलाणा ताकि जो किछ तुहें धरतिया पर लोकां जो करने री अनुमति नीं देंगे तिस्सो करने री परमेशरा बी अनुमति नीं देणी, कने जो किछ तुहें धरतिया पर लोकां जो करने री अनुमति देंगे तिस्सो परमेशरा बी करने री अनुमति देणी।

²⁰ फेरी तिने अपणे चेलयां जो शख्त हिदायत दित्ति भई “किसी जो येनी दस्यों भई हऊँ मसीह आ।”

यीशुये रे जरिये अपणिया मौती री भविष्यवाणी

²¹ तिस बगत यीशु अपणे चेलयां जो दसणे लगया, भई “मिन्जो यरूशलेम जाणा चाहिन्दा कने तित्थी यहूदी शास्त्रियां, बजुर्ग यहूदी नेतयां, कने मुखियायाजकां रे जरिये बड़ा दुख सहीने; मारया जाऊँ; फेरी तिज्जे दिन मूईरयां चा ते माह जिऊंदे हुई जाणा।”

²² फेरी पतरस तिस्सो इक्की बक्खा लेईग्या कने गुस्सा हुईने बोलणे लगया, “प्रभु, परमेशर तू पर दया करो भई तूहने येढ़ा कदीं नीं ओ!”

²³ यीशु तिसरी तरफ मुड़या कने गलाया, “पतरस, मेरे रस्ते ते हटि जा! अरे शैतान! तू मेरे खातर इक अड़चन ई: काँह्भई तू परमेशरा साई नीं, पर माहणुआं साई सोच्चां।”

यीशुये रे पिच्छे चलने रा मतलब

²⁴ फेरी यीशुये अपणे चेलयां ने बोल्या, “सै जे कोई मेरा चेला बणना चाओ, सै खुद अपणा इन्कार करो कने अपणा क्रूस चक्कीने मेरे पिछे आई जाओ।

²⁵ सै जे कोई अपणा प्राण बचाणा चाँह, तिस सै पक्का गवाई देणा; पर सै जे कोई मेरे खातर अपणी जान गवांगा, तिस सदा जिऊंदा रैहणा।

²⁶ जे माहणु इस संसारा जो जित्ति लो कने अनन्त जीवन नीं पाओ, तां तिस्सो क्या फैदा? सच्चीजो, माहणु अनन्त जीवन पाणे रे खातर क्या देई सक्कां?

²⁷ माहणुये रा पुत्र स्वर्गदूतां सौगी अपणे पिता रिया महिमा च औणे औल़ा, तिसजे हर किसी जो तिसरे कर्मां रे मुतावक ईनाम देणा।

²⁸ हऊँ तुहांजो बोलां भई येत्थी किछ येढ़े तिन्हां तदुआं तक नीं मरना, तदुआं तक जे माहणुये रे पुत्रा जो तिसरे राज्जा च औन्दे हुये नीं देक्खी लो।”