मत्ती 13 - बिलासपुरी नौआं नियम

किसान कने ब्यूआ रा उदाहरण

¹ ये घटना तिस दिना री ताहली जे यीशु घरा ते बाहर दरयावा रे कनारे जाईने उपदेश देणे बैट्ठया।

² कने लोकां री इतणी बड्डी भीड़ तिसले कट्ठी हुईगी, भई सै जाईने इक्की किश्तिया पर चढ़ीग्या, कने सारी भीड़ कनारे पर खढ़ी रैई।

³ कने तिने तिन्हांजो उदाहरणां च कई सारी गल्लां गलाईयां, “इक करसाण ब्यू बाहणे निकल़या।

⁴ बाहन्दे बगत किछ ब्यू बाटा रे कण्डे पै कने पंछियें आईने सै चुगी ले।

⁵ किछ ब्यू पत्थरीली धरतिया पर पै, तित्थी तिन्हांजो बौहत मिट्टी नीं मिली कने तिसरिया वजह ते सै इकदम उगीने बाहर निकल़िये।

⁶ पर ताहली जे सूरज निकल़या सै डाल़ू धुप्पे ने झुलसिगे, कने जड़ नीं पकड़ने ते सुकीगे।

⁷ किछ ब्यू झाड़ियां च पै कने झाड़ियें बड्डी हुईने सै डाल़ू दब्बी ले।

⁸ पर किछ ब्यू खरिया धरतिया पर पै, कने खरी फसल ल्याये, फसल जितणी जे बाहीरी थी, तिसते कोई सौ गुणा, साठ गुणा, कने तीह गुणा हुई।

⁹ जो बी मेरी गल्ल सुणां, सै ध्यान देईने सुणो कने समझो।”

उदाहरण-कथां रा मकसद

¹⁰ यीशुये रे चेलयां तिसले आईने तिसते पुच्छया, “तू लोकां ने उदाहरणां च कजो गल्लां कराँ?”

¹¹ तिने जबाब दित्या, तुहांजो परमेशरा रे राज्जा री छुपी रियां गल्लां जो समझणे री अक्कल दित्तिरी, पर तिन्हांजो नीं।

¹² काँह्भई सै जे मेरिया गल्ला जो ध्याना ने सुणा कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा कने समझदा तिस सै बी भुल्ली जाणा तिसजो जे सै पैहले ते जाणदा हो।

¹³ हऊँ तिन्हांने उदाहरणां रा इस्तेमाल करदे हुये इस खातर गल्ल कराँ काँह्भई सै मेरियां गल्लां जो देक्खां ये भई हऊँ क्या कराँ, पर सै हकीकत च नीं देखदे, सै सुणां ये भई हऊँ क्या बोलां, पर सै हकीकता च सुणदे नींये कने सै तिन्हां रिया समझा च औन्दा नींआ।

¹⁴ इस तरिके ने तिन्हां पर यशायाह री ये भविष्यवाणी खरी उतरी : “ ‘तुहां सुणना कने सुणदयां इ रैहणा, पर तुहांरिया समझा च किछ बी नीं औणा; तुहां बस देखदयां इ रैहणा, पर तुहांजो किछ बी नीं सुझणा।

¹⁵ काँह्भई ये लोक मेरियां गल्लां सुणने रे लायक नींये, मेरियां गल्लां तिन्हांरे मनां च नीं उतरदियां; ताकि सै अपणियां आक्खीं ते किछ बी नीं देक्खो, कने सै कन्नां ते किछ नीं सुणी पाओ या भई अपणे मना ते कदीं नीं समझो, कने कदीं मेरेखौ मुड़ीने आओ, कने तिसते जे हऊँ तिन्हांरा छुटकारा करूँ।’ ”

¹⁶ पर परमेशरे तुहांजो आशीष दित्ति काँह्भई जो किछ मैं कित्या तिसजो तुहें देख्या, कने सै जे मैं गलाया तिसजो तुहें समझया।

¹⁷ हऊँ तुहांजो सच्च बोलां भई कई सारे भविष्यवक्ता कने धर्मात्मा तिन्हां गल्लां जो जे देखणा चाँह थे, तिन्हांजो तुहें देखी रायें; सै तिन्हांजो नीं देक्खी सक्के; कने तिन्हां गल्लां जो जे सै सुणना चाँह थे, तिन्हांजो तुहें सुणीराँ ये, सै इन्हांजो नीं सुणी सक्के।

ब्यू बाहणे री उदाहरण-कथा रा मतलब

¹⁸ “हुण तुहें बाहणे औल़े रा उदाहरण सुणा:

¹⁹ लोक सै जे परमेशरा रे बारे च सुणां यें भई सै कियां लोकां रियां जिन्दगियां पर राज कराँ कने नीं समझदे भई जो किछ तिन्हें सुणया सै तिसा बाटा साई आ तित्थी जे सै किछ दाणे पैईरे, शैतान औआं कने जो किछ तिन्हें सुणीरा हुआं तिसजो भुलाई देआं।

²⁰ किछ लोक येढ़े तिन्हांरी बराबरी तिन्हां ब्यूआं ते कित्ती जाई सक्कां इ सै जे पत्थरीली जमीन्ना पर पैया। ये सैए सै जे परमेशरा रा बचन खुशिया ने सुणां ये कने इकदम ग्रहण बी कराँ ये।

²¹ पर वचन तिन्हांरे दिलां री गहराईया तक नीं जान्दा, सै सिर्फ किछ वगता खातर विश्वास कराँ ये। सै तिन्हां बुटयां साई हुआं ये तिन्हांरियां जड़ां जे डुग्गियां नीं हुन्दियां; ताहली जे कोई दुज्जा तिन्हां सौगी बुरा बर्ताव करो या परमेशरा रे बचना पर विश्चास करने रिया वजह ने तिन्हांजो परेशान करो, तां सै लोक परेशान हुईने इकदम बचना पर विश्वास करना छड्डी दें।

²² किछ लोक येढ़े तिन्हांरी बराबरी अहें झाड़ियां औल़िया धरतिया ने करी सक्कां ए, ये सै लोक ये तिन्हें जे परमेशरा रा सन्देश सुणया, सै बौहत सारी चिज़ां रा लालच करीने अमीर हुणे री इच्छा कराँ ये, इस खातर सै सिर्फ इन्हां चिज़ां री चिन्ता कराँ ये; इयां सै परमेशरा रे सन्देशा च अड़चन पाएं कने सै तिसरिया इच्छा पर नीं चली पान्दे।

²³ पर किछ लोक उपजाऊ धरतिया साई हुआं ये तिसच जे किछ ब्यू पैईरे, सै दाणे उगे कने पौध्यां साई बधे कने बौहत सारी फसल पज्जी, ये सै माहणु ये सै जे मेरा बचन सुणां ये कने इसजो समझां ये, कने परमेशरा जो खुश करने औल़े काम्म बौहत जादा कराँ ये।”

जंगली ब्‍यूआ रा उदाहरण

²⁴ यीशुये भीड़ा जो इक होर उदाहरण दित्या। तिने बोल्या, “ताहली जे परमेशरे अप्पूँजो राजे रे रुपा च दसणा शुरु कित्या, सै खेता रे इक्की मालका साई आ तिने जे अपणे दास्सां जो अपणे खेता च खरे ब्यू बाहणे जो भेज्या।

²⁵ पर ताहली दास सुत्तीरे थे, तिस खेता रे मालका रा दुश्मण आया कने कणका च जंगली ब्यू बखेरी ने चलिग्या।

²⁶ ताहली जे कणका जो कुम्मल़ निकल़े कने तिन्हां पर सिल्लु लगे, तां जंगली दाणे रे डाल़ू बी दिखणे लगे।

²⁷ फेरी खेता रे मालका ले आईने तिसरे दास्सें बोल्या, ‘स्वामी जी, तुहें त अपणे खेतां च खरा ब्यू बाहीरा था? फेरी इसच जंगली दाणयां रे डाल़ू कित्ते आये?’

²⁸ फेरी मालके तिन्हांने गलाया, ‘ये किसी दुश्मणा रा काम्म आ।’ तिसरयां दास्सें तिसते पुच्छया, ‘क्या तू चाँह भई अहें जाईने तिन्हांजो पटी दईये?’

²⁹ तिने गलाया, ‘नां, येढ़ा नीं ओ भई तुहें जंगली दाणयां रे डाल़ूआं जो कठेरदे बगत तिन्हां सौगी कणका रे डाल़ूआं जो पट्टीने ली आओ।

³⁰ फसला रिया कटाईया तक इन्हां दुईं जो सौगी-सौगी बधणे देआ, कने कटाईया रे बगत हऊँ कटणे औल़यां ने गलांगा भई पैहले जंगली दाणयां रे डाल़ूआं रे पुल्ले बन्हीने तिन्हांजो फुकी दवा, कने कणका जो कठेरीने मेरे पेड़ुये च पाई दवा।’ ”

राईये रे दाणे रा उदाहरण

³¹ यीशुये तिन्हांजो इक होर उदाहरण दित्या : “स्वर्गा रा राज राईया रे छोट्टे जे दाणे रे बराबर आ, तिसजो किसी माहणुये लेईने अपणे खेतां च बाहीत्या।

³² सै सारयां ब्यूआं च सब्बींते छोट्टा त हुआं पर ताहली जे बधां तां सारे साग पत्तयां ते बड्डा हुई जां; कने सै येढ़ा डाल़ बणी जां भई अम्बरा रे पंछी आईने तिसरियां डाल़ियां पर शरण लैं।”

मलेड़े रा उदाहरण

³³ तिने इक होर उदाहरण तिन्हांजो सणवाया : “स्वर्गा रा राज फैल्लीरे मलेड़े साई आ तिसजो किसी जनाने बौहत सारे आट्टे च मलाया कने तदुआं तक सै रखी रखया तदुआं तक जे सै सारे रा सारा आट्टा मलेड़ा नीं बणीग्या।”

उदाहरणां रा इस्तेमाल

³⁴ ये सारियां गल्लां यीशुये लोकां जो उदाहरण देईने बोल्ली, कने सै तिन्हांने हमेशा उदाहरणा ची गलां था,

³⁵ येढ़ा इस खातर था भई सै बचन जे भविष्यवक्ते रे जरिये गलाईरा था, सै पूरा ओ : “मांह उदाहरण देईने बोलणा हऊँ तिन्हां गल्लां जो सै जे संसारा रिया सृष्टिया ते छुपी रियां तिन्हांजो प्रगट करगा।”

जंगली ब्यूआ रे उदाहरणा री व्याख्या

³⁶ फेरी यीशु लोकां रिया तिसा भीड़ा जो विदा करीने घरें आया कने तिसरयां चेलयां तिसले आईने बोल्या, “खेता रे जंगली दाणे रा उदाहरण अहांजो समझा।”

³⁷ यीशुये तिन्हांजो जबाब दित्या, तिने करसाणे जे खरा ब्यू बाहया सै माहणुये रा पुत्र यनि हऊँ आ।

³⁸ कने खेत संसारा रे लोक ये, खरे ब्यू परमेशरा रे राज्जा रे लोक ये, कने जंगली ब्यू शैतान्ना रे लोक ये।

³⁹ सै दुश्मण तिने जे जंगली ब्यू बाहे थे, शैतान आ; कने कटाईया रा बगत आ इस संसारा रा अंत कने कटाई करने औल़े स्वर्गदूत ये।

⁴⁰ ठीक तियां इ तियां जे जंगली ब्यूआं जो कट्ठा करीने अग्गी च फुकी दित्या जां, तियां इ सृष्टिया रे अन्त बिच हूणा।

⁴¹ माहणुये रे पुत्रा यनि मांह अपणे स्वर्गदूत भेजणे, कने तिन्हां तिसरे राज्जा ते सारे पापियां जो कने तिन्हांजो सै जे लोकां जो कुकर्म करने जो मजबूर कराँ ये,

⁴² कट्ठे करीने नरका रिया अग्गी च पाई दित्ते जाणे, तित्थी सिर्फ दान्द किरड़ना कने रोण-पिट्टण इ हूणा।

⁴³ तिस वगत धर्मियां अपणे पिता रे राज्जा च सूरजा साई चमकणा। जो बी मेरी गल्ल सुणां, सै ध्यान देईने सुणो कने समझो।

छुपीरे खजाने रा उदाहरण

⁴⁴ परमेशर तिन्हां लोकां पर राज कराँ सै जे खेता च छिपीरे धन-दौलता साई आ, सै किसी माहणुये जो मिलया कने फेरी तिने सै तित्थी गड्डीत्या, कने खुशिया रे मारे अपणा सारा किछ बेच्चीने तिस खेता जो खरीदिल्या।

अनमोल मोतिये रा उदाहरण

⁴⁵ परमेशर तिन्हां लोकां पर राज कराँ सै जे इक येढ़े व्यापारिये साई ये सै जे खरे मोतियां री खोज्जा च हो।

⁴⁶ ताहली जे तिस्सो इक अनमोल मोती मिलया, तां जाईने सै जे किछ तिसले था, तिस्सो बेचीत्या कने मोती खरीदिल्या।

मच्छी पकड़ने रा जाल़

⁴⁷ स्वर्गा रा राज मच्छी पकड़ने खातर नदिया च पाईरे इक्की जाल़ा साई आ, तिसच कई किस्मा री मच्छियां पकड़ोईयां।

⁴⁸ ताहली जे सै जाल़ पूरा भरीग्या, तां तिस्सो किनारे जो खिंजील्या, कने बैठीने खरी-खरी मच्छियां छान्टीने टोकरियां च भरी लियां कने बेकार मच्छियां सट्टीतियां।

⁴⁹ सृष्टिया रे अन्त च येढ़ा इ हूणा। स्वर्गदूतां आईने पापियां जो धर्मियां चते छान्टीने लग करना,

⁵⁰ कने पापियां जो नरका रिया अग्गी च पाई देणा; तित्थी तिन्हां रोणा कने दान्द किरड़ने।

पुराणी कने नौंईं शिक्षा रा महत्व

⁵¹ यीशुये अपणयां चेलयां ते पुच्छया, “क्या तुहें इन्हां सारियां गल्लां जो समझे?” तिन्हे जबाब दित्या, “हाँ।”

⁵² यीशुये तिन्हांने गलाया, “देक्खा, इस खातर हरेक यहूदी शास्त्री सै जे परमेशरा रे राज्जा रा चेला बणीरा, इक येढ़े घरा रे मुखिये साई आ, सै जे अपणे भण्डारा ते नौंईयां कने पुराणियां चिज़ां जो बाहर कड्डां।”

नासरत च यीशुये रा बेज्जति

⁵³ ताहली जे यीशु ये सारे उदाहरण देई चुक्कया, तां ऊत्थीते चलिग्या।

⁵⁴ कने अपणे देशा च आईग्या, फेरी तिने यहूदियां रे यहूदी सभा घरा च उपदेश देणा शुरु करित्या; इसते हर कोई हैरान हुईने बोलणे लगया, “इस्सो येढ़ि सूझ-बूझ कने चमत्कारी शक्ति किति ते मिली?

⁵⁵ क्या ये तिस लकड़िया रे मिस्त्रीये राई मुण्डु निआं? कने क्या इसरिया मौआ रा नौं मरियम कने इसरे भाईयां रे नौं याकूब, यूसुफ, शमौन कने यहूदा नींये?

⁵⁶ कने क्या इस रियां सारी बैहणीं अहांरे बिच नीं रैहन्दियां? फेरी इस्सो ये सारा किछ किति ते मिलया?”

⁵⁷ इस तरिके ने तिन्हे तिसजो स्वीकार नीं कित्या; पर यीशुये तिन्हाने गलाया, “भविष्यवक्ते रा अपणे गाँवां कने परिवारा जो छड्डिने सारे आदर कराँ ये।”

⁵⁸ इस खातर तिने तित्थी तिन्हांरे अविश्वासा रिया वजह ने जादा चमत्कारा रे काम्म नीं कित्ते।