मत्ती 10 - बिलासपुरी नौआं नियम

खुशखबरिया रा प्रचार करने खातर चेलयां रा भेजणा

¹ इस खातर यीशुये अपणे बारा चेलयां जो अप्पूँ ले सद्दीने, तिन्हांजो बुरीआत्मा जो बाहर कडणे कने कई किस्मा रे रोगां कने दुख तकलीफां जो दूर करने रा अधिकार दित्या।

² इन्हां बारा प्रेरितां रे नौं थे : पैहला शमौन, सै जे पतरसा रे नौआं ते जाणया गया, कने तिसरा भाई अन्द्रियास, जब्दिये रा पुत्र याकूब कने तिसरा भाई यूहन्ना।

³ फिलिप्पुस, बरतुल्मै, थोमा, टैक्स लेणे औल़ा मत्ती, हलफई रा पुत्र याकूब कने तद्दै।

⁴ शमौन कनानी, कने यहूदा इस्करियोति तिने जे यीशुये जो धोखे ने पकड़वाया था।

बारा प्रेरितां रे सेवा रे काम्म

⁵ यीशुये इन्हां बाराँ चेलयां जो कई लाकयां च अपणा सन्देश सुनाणे खातर भेजणे ते पैहले ये हुक्म दित्या : भई अन्यजातियां रे लाके च नीं जायों, कने सामरियां रे किसी नगरा च दाखल नीं हुयां।

⁶ पर इस्राएलियां लेई जायों काँह्भई सै तिन्हां भेड्डां साई ये सै जे अपणे चरवाहे ते दूर हुईगरे।

⁷ कने तिन्हांजो ये उपदेश देयों भई परमेशर अहां सब्बीं लोकां पर राज करने जो बड़े जल्दी आई कराँ।

⁸ सै बमार लोकां जो ठीक करो, मूईरयां जो जिन्दगी देओ, कोढ़ियां जो चंगा करो, कने बुरीआत्मां जो कड्डो। किसी ते सेवा रे बदले च पैसा नीं लेणा काँह्भई परमेशरे तुहांरी सहायता रे बदले च किछ नीं लेईरा।

⁹ अपणिया जेबा च न त सोना, न त चान्दी, न ताँबा रखयों;

¹⁰ रस्ते खातर न कोई झोल़ा रक्खयों, कोई फालतू कमीज, चप्पल़ कने सोट्ठी मत रखा, काँह्भई मजदूरा जो तिसरी रोटी मिलणी चाहिन्दी।

¹¹ तुहें ताहली जे कदीं किसी नगरा या गाँवां च जाओ, तां ये पता करा भई तित्थी रुकणे जो विश्वास लैक कुण आ? कने तदुआं तक जे तित्थी ते आई नीं जाओ, तदुआं तक तिस इ घरा च रुकीरे रौआ।

¹² कने घरा च प्रवेश करदे हुये तिन्हांजो आशीष देआं।

¹³ जे तिस घरा रे लोक लायक हुंगे तां तुहांरा आशीर्वाद तिन्हां रिया सौगी-सौगी हूणा, पर जे सै इसरे लायक नीं हुंगे तां तुहांरा आशीर्वाद तुहांले बापस आई जाणा।

¹⁴ कने जे कोई तुहांरा स्वागत नीं करो या तुहांरी गल्ल नीं सुणो, तां तिस घरा या गाँवां ते निकल़दे हुये अपणे पैराँ रिया धूड़ी जो तित्थी झाड़ी देआं।

¹⁵ हऊँ तुहांजो सच्च बोलां, भई ताहली जे न्याय हूणा, तिस दिन तिस गाँवां री दशा ते सदोम कने अमोरा रे नगराँ री हालत जादा सैहणे लायक हूणी।

अपणयां चेलयां जो यीशुये री चेतावनी

¹⁶ खबरदार! हऊँ तुहांजो असहाय भेड्डां साई लोकां रे बिच भेज्जां सै जे भेड़िये साई खतरनाक ये। इस खातर सर्पां साई चलाक कने समझदारिया ने काम्म करा, कने कबूतरां साई भोल़े-भाल़े कने खरयां गुणां जो परगट करा।

¹⁷ पर धार्मिक अगुवेयां ते चौकस हुईने रौआ, काँह्भई तिन्हां तुहांजो धोखे च बन्दी बणाईने यहूदी पंचैतां रे हवाले करना, कने तिन्हांरे सभा घरा च तुहां पर कोड़े बरसाणे।

¹⁸ तुहें मांह पर विश्वास करने रिया वजह ने राजपालां कने राजयां रे सामणे पेश कित्ते जाणे, काँह्भई तुहें मेरे चेले; तुहांजो मौका दित्या जाणा भई तुहें तिन्हांजो कने अन्यजातियां जो मेरे बारे च गवाही देओ।

¹⁹ ताहली जे तिन्हां तुहांजो पकड़वाणा तां इसा गल्ला री चिन्ता नीं करयों भई तुहां कियां बोलणा कने क्या बोलणा; काँह्भई जो किछ तुहांजो बोलणा हुँगा सै तिस वगत तुहांजो दस्सी दित्या जाणा।

²⁰ याद रखा बोलणे औल़े तुहें नींये, पर पवित्र आत्मे तुहांजो गलाणे खातर बोलणा।

²¹ तुहांजो अविश्वासी लोकां पकड़ीने हाकिमां ले मारने जो सौंपणा, काँह्भई तुहें माह पर विश्वास कराँ ये, उदाहरणा रे तौरा पर भाईये अपणे भाई पकड़वाई ने हाकिमां ते मौती री सजा दवाणी, मौ-बुढ़यां अपणयां बच्चयां जो पकड़वाणा कने बच्चयां तिन्हांरे खलाफ हुई जाणा; तिन्हां सै मरवाई देणे।

²² माह पर विश्वास करने रिया बजह ने कईयां लोकां तुहांते बैर रखणा, पर सै जे आखिर तक माह पर विश्वास करदा रैहन्गा तिसजो बचाया जाणा।

²³ ताहली जे सै तुहांजो इक्की नगरा च सताणे लगो, तां दुज्जे नगरा जो चली जायों। हऊँ तुहांजो सच्च बोलां भई तुहें माहणुये रे पुत्रा रे औणे ते पैहले इस्राएल रे सारे नगराँ चियें गये बी नीं हुणे।

²⁴ चेला अपणे गुरुये ते बड़ा खास नीं हुन्दा कने नांई कोई दास अपणे मालका ते बड़ा खास हुआं।

²⁵ चेले जो गुरुये रे, कने दास्सा जो अपणे स्वामिये रे बराबर हुणे ची सन्तोख करना चाहिन्दा; तां जे सै मिन्जो यनि घरा रे मालका जोई शैतान बोलां ये, तां तुहें तिन्हांते केढ़े व्यवहारा री आशा रक्खां ये?

परमेशरा ते डरा, लोकां ते नीं?

²⁶ “इस खातर तिन्हां लोकां ते मत डरा, सै जे तुहांजो धमकी दें। सै वगत आया रां ताहली जे सब किछ सामणे आई जाणा; सै नीं चाहन्दा भई तिसरी सच्चाई छुपीरी रौ, सै जे किछ छुपीरा सब सामणे ल्यान्दया जाणा।

²⁷ सै गल्लां जे हऊँ तुहांजो गुप्त मंझ बोलां, तिन्हौं सब्बीं जो सुणावा; कने सै जे हऊँ तुहांरयां कन्नां च हौल़यां-हौल़यां बोलां तिन्हांजो ऊच्चिया अवाज़ा च सुणावा।

²⁸ तिन्हां लोकां ते मता डरदे सै जे तुहांरे शरीरा जो खत्म करी सक्कां ये, पर तुहांरिया आत्मा जो नीं मारी सकदे, बस तिस परमेशरा ते डरा सै जे तुहांरे शरीरा जो कने तुहांरिया आत्मा जो नरका च पाईने खत्म करी सक्कां।

²⁹ चिड़ियां रे बारे च सोच्चा, इन्हांरी कीमत इतणी घट इ भई इक्की पैसे च दो खरीदी जाई सक्कां इयां, फेरी बी परमेशरा रिया मर्जिया बगैर तिन्हां बिच्चा ते इक बी नीं मरी सकदी, काँह्भई सै सब किछ जाणाँ।

³⁰ परमेशर तुहांरे जीवना री हरेक गल्ला री परवाह करां। सै ये बी जाणां भई तुहांरे सिरा पर कितणे बाल़ ये।

³¹ इस खातर डरदे मता; सै तुहांजो बौहत जादा चिड़ियां ते बधीने मन्नां।”

यीशुये पर विश्वास

³² “सै जे कोई माहणुआं रे सामणे बिणा डरे ये मन्नी लो भई हऊँ तेरा चेला, तां हऊँ बी तिस्सो स्वर्गा च रैहणे औल़े अहांरे पिता रे सामणे अपणा चेला मन्नी लेंगा।

³³ पर सै जे कोई माहणुआं रे सामणे मेरा चेला हुईने मेरा इन्कार करगा, तां माह बी तिसरा स्वर्गीय पिता रे सामणे इन्कार करना भई सै मेरा चेला नींआ।”

यीशुये रे औणे रा नतीजा

³⁴ “ये नीं सोच्चा भई हऊँ धरतिया रे लोकां जो शान्ति देणे आईरा; हऊँ शान्ति देणे नीं, पर लोकां च झगड़े करवाणे आईरा।

³⁵ हऊँ त आया भई : “ ‘बेटे जो तिसरे पिता ते, कने कुड़िया जो तिसारिया मौआ ते, कने बहुआ जो तिसारिया सस्सा ते लग करी दूँ;

³⁶ माहणुये रे बैरी तिसरे अपणे घरा रेई लोक हुणे।’

³⁷ “सै जे अपणे माता-पिता जो मेरते जादा प्यार कराँ, सै मेरा चेला बणने रे लायक नींये; कने सै जे अपणे बेटे या बेटिया जो मेरते जादा प्यार कराँ, सै मेरा चेला बणने रे लायक निआं;

³⁸ जे कोई मेरा चेला होणे रे नाते दुख सैहणे रे खातर कने मरने रे खातर बी त्यार नींये, तां सै मेरा चेला बणने रे लायक नींआ।

³⁹ सै जे माहणु अपणा प्राण बचाणे री कोशिश कराँ, तिसजो अनन्त जीवन नीं मिलणा; कने सै जे मेरे खातर अपणा प्राण देआं, तिस प्रभुये सौगी अनन्त जीवन पाणा।”

ईनाम

⁴⁰ “सै जे तुहांजो ग्रहण कराँ, सै मिन्जो ग्रहण कराँ; कने सै जे मिन्जो ग्रहण कराँ, सै मेरे भेजणे औल़े जो ग्रहण कराँ।

⁴¹ सै जे भविष्यवक्ते जो भविष्यवक्ता जाणीने ग्रहण करो, तां परमेशर भविष्यवक्ते जो सै जे ईनाम देआं तेढ़ा इ ईनाम तिस्सो देणा; कने सै जे धर्मिये जो धर्मी जाणीने ग्रहण करो, तां परमेशर धर्मिये जो सै जे ईनाम देआं तेढ़ा इ ईनाम तिस्सो देणा।

⁴² कने जे कोई मेरे इन्हां भोल़े-भाल़े चेलयां चा ते किसी इक्की जो बी इस खातर इक गलास ठन्डे पाणिये रा देयो भई सै मेरा चेला, तां हऊँ तुहांजो सच्च बोलां भई तिस्सो इसरा ईनाम जरूर मिलणा।”