मत्ती 1 - बिलासपुरी नौआं नियम

यीशु मसीह रा खानदान

¹ ये यीशु मसीह रे खानदाना री सूची, तिसरे पूर्वज जे राजा दाऊद कने अब्राहम आ।

² अब्राहमा रा पुत्र इसहाक था कने इसहाका रा पुत्र याकूब हुया फेरी याकूब ते यहूदा कने तिसरे ग्यारा भाई जम्मे,

³ फिरिस कने जेरह यहूदा रे बेटे थे (तिन्हां रिया मौआ रा नौं तामार था।) फिरिस हिस्रोन रा पिता था, कने हिस्रोन एराम रा पिता था,

⁴ एराम अम्मीनादाब रा पिता था, अम्मीनादाब ते नहशोन, कने नहशोन ते सलमोन रा जन्म हुया,

⁵ सलमोन ते बोअज रा जन्म हुया (बोअज री माता रा नौं राहाब था।) बोअज कने रुता ते ओबेद पैदा हुया, कने ओबेद यिशै रा पिता था,

⁶ कने यिशै ते राजा दाऊद पैदा हुया, कने (सुलैमान दाऊद रा पुत्र था) सै तिसा जनाना ते जम्मया सै जे पैहले उरिय्याह री घरा औल़ी थी,

⁷ सुलैमान रहबाम रा पिता था कने रहबाम अबिय्याह रा पिता था, अबिय्याह ते आशा रा जन्म हुया,

⁸ कने आशा यहोशाफात रा पिता बणया, फेरी यहोशाफात ते योराम कने योराम ते उज्जियाह रा जन्म हुया,

⁹ उज्जियाह योताम रा पिता था कने योताम आहाज रा, फेरी आहाजा ते हिजकिय्याह,

¹⁰ कने हिजकिय्याह ते मनश्शे रा जन्म हुया, मनश्शे आमोन रा पिता बणया, कने आमोन योशिय्याह रा,

¹¹ योशिय्याह, यकुन्याह कने तिसरे भाईयां रा दादा था, सै जे इस्राएलियां जो बेबीलोन च बन्दी बणाईने लेई जाणे ते पैहले पैदा हुईरे थे,

¹² इस्राएलियां जो बेबीलोन लैई जाणे ते बाद यकुन्याह शालतियेल रा पिता बणया, कने शालतिएल ते जरुब्बाबिल,

¹³ कने जरुब्बाबिल ते अबीहूद पैदा हुया, अबीहूद इल्याकीम रा, कने इल्याकीम अजोर रा पिता बणया,

¹⁴ अजोर सदोक रा पिता था, सदोक ते अखीम, कने अखीमा ते इलीहूद पैदा हुया,

¹⁵ इलीहूद इलियाजार रा पिता था, कने इलियाजार मत्तान रा, मत्तान याकूब रा पिता बणया।

¹⁶ कने याकूब ते यूसुफ पैदा हुया, सै जे मरियमा रा पति था, कने मरियमे यीशुये जो जन्म दित्या सै जे मसीह जाणया जां,

¹⁷ इआंई अब्राहम ते दाऊद तक सब चौदा पीढ़ियां हुईयां, कने राजा दाऊद रे वगता ते लेईने तिस वगता तक ताहली जे इस्राएल रे लोकां जो बंदी बणाईने बाबुल च लेई जाया गया, तदुआं ते लेईने मसीह रे जन्मा तक चौदा पीढ़ियां होर हुई।

यीशुये रा जन्म

¹⁸ यीशु मसीह रा जन्म इस तरिके ने हुया था : ताहली जे तिसरी माता मरियमा री मंगणी यूसुफा सौगी हुई थी, पर तिन्हांरे ब्याह ते पैहले ताहली जे सै कवारी थी पवित्र आत्मा रिया सामर्था ते भारहत्थी हुई।

¹⁹ पर तिसारा मंगेतर यूसुफ इक भला माहणु था कने इसा गल्ला जो लोकां रे बिच परगट करीने तिसारी बदनामी नीं करना चाहन्दा था, इस खातर तिने चुपचाप तिसाने मंगणी तोड़ने रा निश्चा कित्या (काँह्भई सै ब्याह ते पैहले इ भारहत्थी पाई गई सै जे व्यवस्था रे खलाफ था)।

²⁰ पर ताहली जे यूसुफ इस बारे च सोच्ची कराँ था, तां परमेशरा रा इक दूत सपने च तिसरे सामणे आया कने तिसने बोलणे लगया, “ओ यूसुफ! तू सै जे दाऊद राजे रे खानदाना ते आ, मरियमा जो अपणी घरा औल़ी बनाणे ते मत डर, काँह्भई सै बच्चा जे तिसारे पेट्टा चा सै पवित्र आत्मा रिया सामर्था ते आ।

²¹ तिसा इक पुत्र जणना तू तिसरा नौं यीशु रखयां, काँह्भई तिस अपणे लोकां जो तिन्हारे पापां ते छुटकारा दिलाणा।”

²² ये सब किछ इस खातर हुया भई सै गल्ल जे परमेशरे यशाय्याह भविष्यवक्ते रे जरिये यीशु मसीह रे बारे च बोल्ली थी, सै पूरी हुईजो :

²³ “सुणा, इक कवारिया कुड़िया गर्भवति हुईने इक मुण्डु जणना, तिसरा नौं इम्मानुएल रखया जाणा,” तिसरा मतलब येआ भई परमेशर अहां सौगी आ।

²⁴ फेरी यूसुफ ताहली जे निन्दा ते जाग्या, तां तिने परमेशरा रे दूता रे हुक्मा मुतावक मरियम ने ब्याह करील्या कने तिसाजो अपणे घरें ली आया,

²⁵ कने तदुआं तका जे तिसे मुण्डु नीं जणया, तदुआं तका सै मरियमा ले नीं गया: कने यूसुफे तिस मुण्डुये रा नौं यीशु रखया।