लूका 4 - बिलासपुरी नौआं नियम

प्रभु यीशुये रा परखया जाणा

¹ फेरी यीशु पवित्र आत्मा रिया अगुवाईया च, यरदन ते वापस आया; कने चाल़ियां दिनां तक आत्मा रे सखाणे ते सुनसान जगह च फिरदा रैया।

² कने शैतान तिसरी परीक्षा करदा रैया। तिन्हें दिनें तिने किछ नीं खादया कने ताहली जे सै दिन पूरे हुईगे, तां तिसजो भुख लगी।

³ फेरी शैताने तिसजो गलाया, “जे तू परमेशरा रा पुत्र आ तां इन्हां पत्थराँ जो बोल भई ये रोटी बणी जाओ।”

⁴ पर यीशुये तिसजो जवाब दित्या, “पवित्रशास्त्रा च येढ़ा लिखिरा भई माहणु सिर्फ रोटिया तेई नीं जिऊंदा रैहणा।”

⁵ फेरी शैतान यीशुये जो इक ऊच्चिया ठारी लैईया कने इक्की पला च तिस्सो संसारा रे सारे राज पाठ दखाई ते।

⁶ कने शैताने तिसने गलाया, “हऊँ ये सारा अधिकार कने इन्हांरा सारा राज-पाठ तिज्जो देंगा, काँह्भई ये सब किछ मिन्जो सौंपीरा; कने हऊँ तिस्सो जे चाऊँ तिस्सो देई सक्कां।

⁷ इस खातर जे तू मेरे अग्गे मत्थाटेकगा कने मेरी अराधना करगा, तां ये सब किछ तेरा हुई जाणा।”

⁸ यीशुये तिस्सो जवाब दित्या, “पवित्रशास्त्रा च ये बी लिखिरा भई, तू सिर्फ अपणे प्रभु परमेशरा री अराधना कर कने तिसरी इ सेवा टैहल कर।”

⁹ फेरी शैतान तिस्सो यरूशलेम च नेईने मन्दरा री सब्बीं ते ऊच्चिया ठारी खड़ा कित्या कने गलाया, “तू दावा कराँ भई तू परमेशरा रा पुत्र आ, येत्थीते छाल़ मारीने साबित कर।

¹⁰ काँह्भई लिखिरा, सै अपणे स्वर्गदूतां जो तेरे बारे च ये हुक्म देंगा, भई सै तेरी रक्षा करो।

¹¹ कने तिन्हां इकदम तिज्जो अपणे हत्था पर इयां थम्मी लेणा, तिसते जे तेरे पैराँ जो बी पत्थराँ ते चोट तक नीं लगणी।”

¹² पर यीशुये तिस्सो जवाब दित्या, भई पवित्रशास्त्रा च ये बी लिखिरा, “तू प्रभु अपणे परमेशरा रा इम्तेहान नीं लेआं।”

¹³ ताहली जे शैतान सारी परीक्षा करी चुक्कया, तां फेरी किछ वगत रे खातर तिस्सो छड्डिने चलिग्या।

प्रभु यीशु री सेवा रे कम्मां री शुरुआत

¹⁴ फेरी यीशु पवित्र आत्मा रिया सामर्थय च गलील प्रदेशा जो वापस आया, कने आस-पड़ोस रे सारेयां लाकयां च तिसरे कम्मां रे चर्चे हुणे लगे।

¹⁵ कने सै तिन्हां इ यहूदी सभा घराँ च उपदेश करदा रैया, कने सब लोक तिसरी बडयाई करदे रैये।

नासरत च यीशुये रा निरादर

¹⁶ फेरी यीशु नासरत नगरा च वापस आया, तित्थी जे सै पल़या-बढ़या था, तां अपणी रीता रे मुतावक सै विस्रामा रे दिन यहूदी सभा घरा च गया कने ऊथी पवित्रशास्त्र पढ़ने खातर खड़ा हुआ।

¹⁷ कने तिन्हाजो यशायाह भविष्यवक्ता री कताब पढ़ने खातर दित्ति, सै कताबा जो खोल्ली ने तिसा जगह ते पढ़ने लगे तित्थी जे येढ़ा लिखिरा था,

¹⁸ “प्रभुरा आत्मा मेरे ऊपर आ, काँह्भई तिने गरीबां जो खुशखबरी सुनाणे रे खातर मेरा अभिषेक कीतिरा। तिने हऊँ भेजीरा, भई हऊँ सै जे शैतान्ना रिया कैदा चे तिन्हाजो छुटकारे रा, कने अन्हेयां जो नज़र पाणे री खुशखबरी देऊं, कने दुख तकलीफां च फसीरे लोकां जो छड़वाऊँ।

¹⁹ कने सै वगत आईगरा भई प्रभु अपणयां लोकां जो बचाओ।”

²⁰ फेरी तिने कताब बन्द करीने यहूदी सभा घर रे सेवका रे हत्था च देईती कने फेरी बैठिग्या कने यहूदी सभा घर रे सारे लोकां री नज़राँ तिस पर थी।

²¹ कने सै तिन्हाने गलाणे लगया, “जो किछ तुहें पवित्रशास्त्रा री गल्ल हुण सुणी सै आज्ज पूरी हुई!”

²² कने सारयां लोकें यीशुये री सराहना कित्ती, कने तिसरे मुँआं ते निकल़णे औल़े अनुग्रह रे वचन सुणीने सै सब हैरान हुईगे; कने गलाणे लगे, “क्या ये यूसुफा रा पुत्र निआं?”

²³ फेरी यीशुये तिन्हाजो गलाया, “शायद तुहां मेरे ऊपर ये कहावत जरूर बोलणी, भई बैद अप्पूँजो ठीक कर! कने जो किछ अहें सुणया भई जिस तरिके ने जे तैं कफरनहूम नगरा च सामर्था रे काम्म कित्ते, तिस तरिके ने येत्थी अपणे नगरा च काँह नीं करदा?

²⁴ पर हऊँ तुहांजो सच्ची गल्ल दस्सां भई कोई बी भविष्यवक्ता अपणे देशा च आदर नीं पान्दा।”

²⁵ पर हऊँ तुहांजो सच्च बोल्लां भई, “एलिय्याह भविष्यवक्ते रे बगत ताहली जे साढ़े तिन्न साल्लां तक अम्बरा ते बरखा नीं हुई कने सारे इस्रायल देशा च बड़ा नकाल़ पैया; तां पक्का इस्राएल च येढ़ियां बौहत जरूरत मन्द विधवां थिआं।

²⁶ पर एलिय्याह भविष्यवक्ते जो तिन्हां चते किसी बी विधवा ले नीं भेज्या; पर तिस्सो सीदोन प्रदेशा रे सारफ़त गाँवां री होर जातिया री इक विधवा जनाना लेई भेज्या।

²⁷ या फेरी एलीशा भविष्यवक्ते रे बगत इस्राएल देशा रे विच इ मते सारे कोढ़ी थे तिन्हाजो जे ठीक हुणे री जरूरत थी।” पर नामान नौआं रे कोढ़िये ते इलावा होर कोई ठीक नीं कित्या, सै जे सीरिया प्रदेशा रा बसिन्दा था,

²⁸ ताहली जे यहूदी सभा घर च हाजर लोकें ये गल्लां सुणी तां तिन्हाजो बड़ा गुस्सा आया।

²⁹ कने तिन्हे उट्ठीने तिसजो नगरा ते बाहर कढया कने तिस पहाड़ा री चोट्टिया पर लेईगे तिस पर जे तिन्हारा नगर बसीरा था, सै यीशुये जो मारने खातर पहाड़ा रिया चोट्टिया ते थल्ले सट्टणा चांह थे,

³⁰ पर यीशु तिन्हारे विच्चा ते निकल़ीने चलिग्या।

बुरीआत्मा रे सताईरे माहणुये जो चंगा करना

³¹ फेरी सै गलील प्रदेशा रे कफरनहूम नगरा च गया, कने विस्राम रे दिन लोका जो उपदेश देणे लगया।

³² सै तिसरे उपदेशा जो सुणीने हैरान हुईगे, काँह्भई तिसरा वचन अधिकारा सौगी था।

³³ यहूदी सभा घरा च इक माहणु था, तिसच जे बुरीआत्मा थी। सै ऊच्चिया अवाज़ा च चिल्लाणे लगया,

³⁴ “हे यीशु नासरी, अहांजो तेरते क्या काम्म आ? क्या तू अहांरा नाश करने आईरा? हऊँ तिज्जो जाणाँ भई तू कुण आ? तू परमेशरा रा पवित्र माहणु आ!”

³⁵ यीशुये तिस्सो डांटी ने गलाया, “चुप ओ! कने इस माहणुये चते बाहर निकल़ी जा!” फेरी तिने बुरीआत्में तिस माहणुये जो धरतिया पर फोड़ीत्या, लोक येढ़ा सब किछ देखीरां थे। फेरी सै बुरीआत्मा तिस माहणुये जो होर जादा नुक्शान कित्ते बगैर, तिस चते निकल़ीगी।

³⁶ इस पर सारयां लोकां जो हैरानी हुई कने सै अप्पूँ चियें गलाणे लगे, “ये केढ़ा वचन आ? भई सै अधिकारा कने सामर्थय ने बुरीआत्मा जो हुक्म देआं, कने सै निकल़ी जाईयां”

³⁷ यीशुये रे इस कम्मां री खबर तिस लाके रे चऊँ पासयां फैलीगी कने जगह-जगह लोकां बिच तिसरी चर्चा हुणे लगी।

यीशु कईयां लोकां जो चंगा कराँ

³⁸ फेरी यीशु उट्ठया कने यहूदी सभा घरा ते निकल़णे ते बाद सै शमौना रे घरा जो गया। तित्थी शमौना री सस्सा जो बौहत बुखार आईरा था। कने तिस घरा च रैहणे औल़यां सारयां तिसते बिनती किति भई “इसाजो चंगा करी दे।”

³⁹ तिने तिसारे मंजे रे सराहणे खौ खढ़ी ने बुखारा जो थिड़क्या, कने इकदम इ तिसारा बुखार उतरीग्या। सै इकदम बिस्तरे ते उट्ठीकने तिन्हांरी सेवा च लगी गी।

⁴⁰ संजके जुन्ना ताहली जे सूरज घरने लग्या, सारे लोक सै जे कई किस्मा री बमारियां ते जकड़ोईरे थे, सै सारे मरीजां जो यीशुये ले ली आये, कने तिने हर इक्की-इक्की मरीजा जो तिन्हां पर हत्थ रखीने ठीक कित्या।

यीशु प्रचार करना जारी रखां

⁴¹ कने बुरीआत्मायें रड़ान्दी हुई कने ये बोलदी हुई, भई “तू परमेशरा रा पुत्र आ,” बौहत लोकां चते निकल़ी गियां, पर सै तिन्हाजो थिड़कां था कने बोलणे नीं देन्दा था, काँह्भई बुरी आत्मा जाणाँ थिआं, भई सै मसीह आ।

⁴² ताहली जे दिन हुया तां सै निकल़ीने इक सुनसान जगह च गया, कने भीड़ा री भीड़ तिस्सो टोल़दी हुई तिसले आई, कने तिस्सो रोकणे लगी, भई अहां लाते चली जा।

⁴³ पर यीशु तिन्हाने बोलां, “मिन्जो होर नगराँ च बी परमेशरा रे राज्जा री खुशखबरी सुनाणा जरूरी आ, काँह्भई हऊँ इस खातर ही भेज्जिरा।”

⁴⁴ कने सै गलील रे यहूदी सभा घराँ च प्रचार करदा रैया।