लूका 22 - बिलासपुरी नौआं नियम

यीशुये रे खलाफ शाजिश रचणा

¹ बिणा मलेड़े औल़ा रोटियां रा त्योहार, तिसरी पैहल जे फसह रे त्योहारा ते हुआं इ, नेड़े आईगरा था।

² तिस बेले मुखियायाजक कने शास्त्री यीशुये जो मारने री शाजिश रचणे च व्यस्त थे, पर सै लोकां ते डराँ थे।

यहूदा रा धोखा देणा

³ फेरी शैतान यहूदा इस्करियोति च समाईया, सै जे यीशुये रे बारा चेलयां चते इक था।

⁴ सै मुखियायाजक कने मन्दरा री रखवाल़ी करने औल़े मुखियां ले गया ताकि यीशुये जो पकड़ाणे रे सब्बीं ते बेहतर तरिके री गल्ल बात करी सक्को।

⁵ यहूदा री इस सहायता रे करने ते सै बड़े खुश हुये, कने तिन्हें तिस्सो ईनामा च पैसे देणे रा बी बादा कित्या।

⁶ सै तिन्हारे इस बादे ते सहमत हुईग्या, कने तदुआं तेई सै यीशुये जो पकड़ाणे रे येढ़े मौकयां री तलास करने लगया भई जिस बगत जे यीशुये रे नेड़े मते लोक नीं हो, तिस बेले हऊँ यीशुये जो चुपचाप पकड़वाई सक्को।

चेलयां सौगी फसह री आखरी धाम

⁷ फेरी बिणा मलेड़े री रोटिया रे त्योहारा रा सै दिन आया, तिस दिन जे फसह रे भेडुये री बल़ि चढ़ाणा जरूरी था।

⁸ यीशुये पतरस कने यूहन्ने जो ये बोलीने अग्गे भेज्या, भई “जाईने अहांरे खातर फसह रे खाणे री त्यारी करा, ताकि अहें सौगी बैठीने खाई सक्को।”

⁹ तिन्हे यीशुये ते पुच्छया, “तुहें किति चाँये भई अहें खाणा बणाईये?”

¹⁰ यीशुये जबाब दित्या, “तुहांरे यरूशलेम च दाखल हुन्दे इ, ऊत्थी तुहांजो पाणिये रा घड़ा चक्कीरा इक माहणु मिलणा। तिस घरा च जे सै जाओ; तुहें तिसरे पिच्छे चली जायों।

¹¹ तिस घरा रे मालका ते पुछयों, गुरुये तेरते पुछीरा, भई सै मेहमान्नां रा कमरा किति आ तिसच जे हऊँ अपणे चेलयां ने फसह रा खाणा खाई सक्कूं?

¹² तिस तुहांजो ऊपरलिया तरफा जो लेई जाणा तित्थी जे इक बड्डा कमरा पहले तेई सजीरा सजाईरा हूणा। तुहांरे खातर सैई जगह हूणी, कने तित्थी तुहें फसह रा खाणा बणायों।”

¹³ फेरी सै चेले तिस नगरा जो गये कने तेढ़ा जे यीशुये तिन्हाने बोलीरा था, सब किछ तियां इ पाया कने तित्थी तिन्हे फसह रा खाणा बणाया।

प्रभु-भोज

¹⁴ ताहली जे ठीक वगत आया, यीशु अपणे बाराँ प्रेरितां सौगी मेज़ा पर खाणा खाणे बैट्ठे।

¹⁵ यीशुये तिन्हाने गलाया, “हऊँ बड़िया बेसवरिया ने इसा घड़िया रे इन्तजारा च था भई मेरा दुख भोगणे रा बगत औणे कने मरने ते पहले तुहांजो सौगी बैठीने फसह रा खाणा खाऊं।

¹⁶ काँह्भई हऊँ तुहांजो सच्च बोलां, भई तदुआं तक जे परमेशरा रे राज्जा च फसह रे त्योहारा रा मकसद पूरा नीं हुईजो, तदुआं तक मांज इसजो नीं खाणा।”

¹⁷ फेरी यीशुये अंगूरां रे रसा रा प्याल्ला लेआ कने पिता परमेशरा रा धन्यवाद करने ते बाद गलाया, “इस प्याल्ले जो लेईने इक दुज्जे च बन्डी लौआ।

¹⁸ तदुआं तक जे परमेशरा रा राज नीं आई लैन्दा, तदुआं तक मांज अज्जा ते अंगूरां रा रस कदीं नीं पीणा।”

¹⁹ फेरी तिन्हे रोटी लेई; कने परमेशरा रा धन्यवाद करीने तोड़ी, फेरी अपणे चेलयां जो येढ़ा गलांदे हुयां दित्ति, “ये रोटी मेरे शरीरा रा प्रतीक आ तिसजो जे हऊँ तुहांरे खातर बलिदान चढ़ाईराँ, इसाजो खावा कने मिन्जो याद करने खातर ये रोटी खाया करा।”

²⁰ खाणा खाणे ते बाद तिन्हे अंगूरां रे रस्सा रा इक होर कटोरा लेआ कने गलाया, “ये अंगूरां रा रस्स परमेशरा रिया तरफा ते, तिन्हारे नये वायदे रा प्रतीक आ, कने ये येढ़ा करार आ तिस पर हऊँ अपणा खून बगाई ने तुहांरे खातर मोहर लगाणे औल़ा।

²¹ पर इस मेचा पर अहां च इक येढ़ा माहणु बैठिरा, तिस जे हऊँ पकड़वाणा।

²² माहणुये रे पुत्रा जो त परमेशरा रिया योजना रे मुतावक मरना इ हाया, पर लाणत इ तिस माहणुये पर तिस जे सै पकड़वाणा!”

²³ फेरी सै चेले अप्पूँ चियें इक दुज्जे ते पुछणे लगे भई अहां चते कुण आ सै जे येढ़ा करी सक्कां?

महान कुण? इस पर बैहस

²⁴ सै अप्पूँ चियें ये बैहस करने लगे भई तिन्हां चते सब्बीं ते महान कुण आ?

²⁵ यीशुये तिन्हाने गलाया, “अन्यजातियां रे राजा कने बड्डे-बड्डे नेते अपणे लोकां पर हक जमाई ने रक्खां ये, कने अप्पूँजो लोकां रा मित्र कैहलवाणा चाँये।”

²⁶ पर तुहें तेढ़े नीं हुयों बल्कि तुहां बिच सै जे सब्बीं ते महान आ, सै छोट्टे साई कने सै जे प्रधान आ, सै सेवका साई बणो।

²⁷ आमतौर पर मालक मेचा पर बैठीने रोटी खायें कने तिसरे सेवक तिसरिया सेवा च रैं, पर मेरने येढ़ा निआं! काँह्भई हऊँ तुहांरे बिच तुहांरे सेवका साई आ।

²⁸ पर तुहें सैये, सै जे मेरी परीक्षां च लगातार मेरे सौगी रै।

²⁹ इस खातर तियां जे मेरे पिता मिन्जो इक राज दित्तिरा, तियां इ हऊँ बी तुहांजो राजा बणने रा हक देआं ताकि,

³⁰ तुहें तिस राज्जा च मेरे मेचा पर खाई पी सक्को, कने तुहां राजयां रे आसणा पर बैट्ठीने इस्राएल रे बारा गोत्राँ रा फैसला करगे।

पतरस रे इन्कारा रा भविष्यवाणी

³¹ “प्यारे शमौन! देख, शैताने परमेशरा ते तुहां सारयां लोकां री परीक्षा लेणे री अनुमति मंग्गी, खरे जो बुरे ते लग करने री, काँह्भई इक करसाण कणका जो भूआ ते लग करां।

³² पर शमौन, प्राथना च मैं तेरे खातर बिनती किति भई तेरा विश्वास टुटी नीं जाओ, इस खातर ताहली जे तू अपणे पापां ते मन फिराई ने मेरले वापस आई जाओ, ताहली अपणे भाईयां जो बी विश्वासा च मजबूत करयां।”

³³ पर पतरसे बोल्या, “प्रभु जी, हऊँ तेरे खातर जेल्ला जाणे जो त्यार आ, कने येत्थी तक भई तेरे सौगी मरने रे खातर बी त्यार आ।”

³⁴ फेरी यीशुये तिसने गलाया, “पतरस, हऊँ तेरने बोलां भई तदुआं तक जे तू तिन्न बार मेरा इन्कार नीं करी लेंगा भई हऊँ तिस्सो नीं जाणदा, तदुआं तक आज्ज कुकड़ा बांग नीं देणी।”

बटुआ, झोल़ी कने तलबार

³⁵ फेरी यीशुये अपणे चेलयां ते पुच्छया, “जिस वगत मैं तुहांजो खुशखबरिया रा प्रचार करने खातर बाहर भेज्या, कने तुहांले पैसा नीं था, झोल़ी नीं थी, कने नांत कपड़यां री कोई होर जोड़ी थी; तां क्या तुहांजो किसी चीज़ा री कमी महसूस हुई?” तिन्हे गलाया, “किसी बी चीज़ा री नीं।”

³⁶ फेरी यीशुये गलाया, “पर हुण लोक अहांरे बरोधा चे, इस खातर अप्पूँ सौगी झोल़ी कने पैसे रखी लौआ कने जे किसी ले तलवार नीं तां सै अपणा कोट बेच्चीने इक तलवार खरीदी लो!

³⁷ काँह्भई हऊँ तुहांजो दस्सां भई पवित्रशास्त्रा च सै जे लिखिरा : तिस्सो अपराधियां ने सौगी गिणया गया, ये मेरे बारे च कित्ती री भविष्यवाणी थी, हुण तिसारा मांह् च पूरा हूणा जरूरी आ; काँह्भई मेरे बारे च सै जे किछ लिखिरा, सै सब किछ पूरा हूणा।”

³⁸ चेलयां गलाया, “प्रभु, अहांले येत्थी दो तलवारां इयां।” यीशुये तिन्हाने गलाया, “बौहत इयां!”

जैतून रे पहाड़ा पर यीशुये री प्राथना

³⁹ फेरी सै ऊत्थीते उट्ठीने हर रोज्जा साई जैतून पहाड़ा पर गया। कने तिसरे चेले बी तिसरिया सौगी चलीपे।

⁴⁰ ताहली जे सै तिसा जगह पुज्जे तां यीशुये तिन्हाने गलाया, “प्राथना करा भई तुहांजो परीक्षा च नीं पौणे पौ।”

⁴¹ सै चेलयां ते थोड़े जे दूर गया कने गोडयां रे भार प्राथना करने लगया,

⁴² “पिता, जे तुहें चाओ तां, मिन्जो इन्हां कष्टां ते छुड़ाई सक्कां ये। पर हऊँ चाँह भई मेरी नीं तेरी ही इच्छा पूरी ओ।”

⁴³ फेरी स्वर्गा ते इक दूत आया, कने तिने यीशुये जो सामर्थ दित्ति।

⁴⁴ यीशु बड़ा बेचैन हुईने प्राथना करने लगया। तिसरिया आत्मा रा दर्द इतणा बधीग्या भई तिसरा परसीन्ना खून्ना रे टेपयां साई धरतिया पर टपकणे लगया।

⁴⁵ फेरी सै प्राथना ते उट्ठीने अपणे चेलयां ले गया, पर दुखा रिया वजह ने सै दवास हुईने सुत्तीरे दिखे।

⁴⁶ यीशुये तिन्हाते पुच्छया, “तुहें कजो सुत्तीरे? उट्ठा कने प्राथना करा, भई तुहें किसी परीक्षा च पैईने पाप नीं करो।”

प्रभु यीशुये जो धोखे च पकड़ना

⁴⁷ यीशु हल्तियें बोल्या इ कराँ था, ताहली लोकां री इक बड्डी भीड़ तिसा जगह आई पुज्जी। तिन्हां बारा चेलयां चते इक, तिसरा नौं जे यहूदा था, तिसा भीड़ा ते मूरे-मूरे चलीरा था। यहूदा यीशुये जो चुमणे खातर तिसरे नेड़े आया।

⁴⁸ फेरी यीशुये तिसने गलाया, “यहूदा, तू गल़े लाईने माहणुये रे पुत्रा जो कियां धोखा देई सक्कां?”

⁴⁹ सै जे किछ हुणे औल़ा था, तिस्सो देखीने यीशुये रे साथियें गलाया, “प्रभु जी, क्या अहें इन्हांजो तलवारी ने बार करिये?”

⁵⁰ कने तिन्हां चा ते इक्की अपणी तलवार महायाजका रे दास्सा पर चलाई कने तिसरा सज्जा कान्न बड्डीत्या।

⁵¹ पर यीशुये गलाया, “बस, हुण बड़ा हुईग्या!” कने यीशुये तिसरे कन्ना ने छोईने तिसजो ठीक कित्या।

⁵² फेरी यीशुये पर हमला करने आईरे मुखियायाजकां, मन्दरा रे रखवाल़यां रे मुखियां जो, कने बजुर्गां जो गलाया, “क्या हऊँ कोई चोर या डाकू आ, भई तुहें मिन्जो पकड़ने खातर तलवारां कने डन्डे लेईने आईरे?

⁵³ ताहली जे हऊँ हर रोज मन्दरा च तुहांजो सौगी हुआं था, तां तुहें तिस बगत मिन्जो काँह नीं पकड़या? पर ये तुहांरा बगत आ, सै बगत, ताहली जे अन्धेरे री ताकत काम्म कराँ इ।”

पतरसा रा इन्कार

⁵⁴ तिन्हे यीशु पकड़या कने महायाजका रे घरें लेईगे, कने पतरस दूर-दूर तिन्हारे पिच्छे चलीरा था।

⁵⁵ पैहरेदारें अंगणा च आग्ग बाल़ी कने तिसारे चऊँ पासयां बैठीगे, कने पतरस बी तिन्हारे बिच जाईने बैठिग्या।

⁵⁶ इक दासिये अग्गी रिया लोई च तिस्सो बैठिरा देख्या, कने सै तिसखा घूरदी रैई। तिसे गलाया, “ये माहणु त यीशुये रे चेलयां चा ते इक आ!”

⁵⁷ पतरसे इसा गल्ला ते नां किति कने गलाया, “नारी, हऊँ त तिस्सो जाणदा तक निआं!”

⁵⁸ थोड़िया देरा बाद, इक होर माहणुये तिसखा देख्या कने गलाया, “तू त तिन्हां चा ते इक आ!” पतरसे तिसने गलाया, “भाई जी, हऊँ तिन्हां चते निआं!”

⁵⁹ तकरीवन इक घण्टे बाद इक होर माहणुये जोर देईने गलाया, “पक्का, ये बी त तिस सौगी था; काँह्भई ये बी गलीली आ।”

⁶⁰ पर पतरसे गलाया, “भाई जी, हऊँ नीं जाणदा तू किस रे बारे च बोलीराँ।” तियां जे तिन्हें ये शव्द बोल्ले, तियां इ कुकड़े झांग देईती।

⁶¹ तिसा इ घड़िया प्रभुये पतरसा खा जो मुड़ीने देख्या, फेरी तिस्सो याद आया भई प्रभुये गलाया था, “आज्ज ताहली जे कुकड़ा झांग देणी, ताहलुआं तक तिन्न दफा तू मेरा इन्कार करी चुक्कया हूणा।”

⁶² फेरी पतरस तिस अंगणा ते निकल़ीने बाहरौ चलिग्या कने बिलकी-बिलकी ने रोणे लगया।

प्रभु यीशुये रा आगमन

⁶³ हुण सै पैहरेदार तिन्हे जे यीशु पकड़ीरा था, सै तिन्हारा मजाक डुआणे लगे कने तिन्हाजो मारने कुटणे लगे।

⁶⁴ तिन्हे यीशुये री आक्खीं पर पट्टी बन्हीती; कने तिसजो कुटया कने तिन्हाते पुच्छया, “भविष्यवाणी करने औल़े, हुण दस्स; तिज्जो किने कुटया?”

⁶⁵ तिन्हे तिसरी निंध्या करने खातर तिसजो होर बी मतियां गल्लां गलाईयां।

बड्डिया सभा रे सामणे यीशु

⁶⁶ ताहली जे दिन हुया तां मुखियायाजकां कने शास्त्रियां समेत लोकां रे बजुर्ग नेतयां री इक सभा हुई; फेरी सै लोक तिस्सो अपणी बड्डी सभा च ली आये।

⁶⁷ सै यीशुये ने बोलणे लगे, “जे तू मसीह आ तां अहांने बोल्ली दे!” पर यीशुये जबाब दित्या, “जे हऊँ तुहांजो दस्सूं, तां तुहां विश्वास नीं करना।”

⁶⁸ कने जे हऊँ तुहांते स्वाल पुछूं, तां तुहां बी जबाब नीं देणा।

⁶⁹ पर सै बगत जल्द आईराँ, ताहली जे माहणुये रे पुत्रा, सर्वशक्तिमान परमेशरा रे सज्जे पासे बैठणा।

⁷⁰ फेरी तिन्हे गलाया, “तां तुहांरे बोलणे रा मतलब येआ भई तुहें परमेशरा रे पुत्र ये?” यीशुये तिन्हाजो जबाब दित्या, “तुहें ठीक गलाया, हऊँ हाया।”

⁷¹ तिन्हे गलाया, “हुण अहांजो होर गवांह री क्या जरूरत इ? तिस्सो येढ़ा गलांदे हुये अहें खुद सुणया!”